.jpg)
លោក វេង សាខុន រដ្ឋមន្ត្រី ក្រសួងកសិកម្មឱ្យដឹងថា ក្នុងរយៈពេលជាង ៧ ខែ ដើមឆ្នាំ ២០២០ រដ្ឋបាលជលផលបាននាំយកកូនត្រីអណ្តែងសរុប ១៣៣ ០០០ ក្បាល និងកូនកង្កែប ៥៨ ៤០០ ក្បាល ចែកជូនពលរដ្ឋ។ រូបថត ក្រសួងកសិកម្ម
ភ្នំពេញៈ រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ បានផ្តល់ពូជកូនត្រីអណ្តែង និងកូនកង្កែបទៅដល់ប្រជាពលរដ្ឋជាង ៣០០ គ្រួសារ នៅក្នុងខេត្តគោលដៅចំនួន ៦ យកទៅចិញ្ចឹមដើម្បីបង្កើនសេដ្ឋកិច្ចគ្រួសារ។
លោក វេង សាខុន រដ្ឋមន្ត្រី ក្រសួងកសិកម្មឱ្យដឹងថា ក្នុងរយៈពេលជាង ៧ ខែ ដើមឆ្នាំ ២០២០ រដ្ឋបាលជលផលបាននាំយកកូនត្រីអណ្តែងសរុប ១៣៣ ០០០ ក្បាល និងកូនកង្កែប ៥៨ ៤០០ ក្បាល ចែកជូនពលរដ្ឋនៅតាមខេត្តគោលដៅចំនួន ៦ គឺខេត្តឧត្តរមានជ័យ ព្រះវិហារ មណ្ឌលគិរី រតនគិរី កំពង់ស្ពឺ និងខេត្តកំពតក្នុងចំណោមខេត្តគោលដៅចំនួន ១១។
លោកថ្លែងថា៖ «អនុវត្តតាមការណែនាំដ៏ខ្ពង់ខ្ពស់របស់លោកនាយករដ្ឋមន្ត្រីស្តីពីការជំរុញ និងលើកទឹកចិត្តឲ្យប្រជាពលរដ្ឋចិញ្ចឹមត្រី និងកង្កែប ដើម្បីធានាសន្តិសុខស្បៀងក្នុងគ្រួសារ ក្នុងខណ:ដែលប្រទេសជាតិកំពុងជួបវិបត្តិជំងឺឆ្លងកូវីដ ១៩»។
ជាមួយនឹងការចែកជូនកូនត្រី និងកង្កែបនេះ រដ្ឋបាលជលផលក៏បានផ្តល់នូវតង់ចិញ្ចឹម និងចំណីដល់ពលរដ្ឋផងដែរ ដែលក្នុងនោះពលរដ្ឋចំនួន ១៩០ គ្រួសារ ទទួលបានកូនត្រីអណ្តែងដោយ ១ គ្រួសារទទួលបានកូនត្រីអណ្តែង ៧០០ ក្បាល និងតង់ ១។ ចំណែកពលរដ្ឋ ១៤៦ គ្រួសារ ទទួលបានកូនកង្កែប ដោយគ្រួសារនីមួយៗទទួលបានកូនកង្កែបចំនួន ៤០០ ក្បាល និងតង់ ១។
បើតាមលោករដ្ឋមន្ត្រីជាបណ្តើរៗមន្ត្រីជំនាញរបស់រដ្ឋបាលជលផលនឹងបន្តចុះចែកកូនត្រីអណ្តែង និងកូនកង្កែបជូនពលរដ្ឋតាមបណ្តាខេត្តគោលដៅផ្សេងទៀតឲ្យបានគ្រប់ទាំង ១១ ខេត្តឲ្យបានឆាប់ឲ្យទាន់រដូវភ្លៀង ដើម្បីចូលរួមលើកកម្ពស់ និងធានាឲ្យបាននូវសន្តិសុខស្បៀងជូនពលរដ្ឋនៅតាមមូលដ្ឋាន និងប្រើប្រាស់ថវិកាដែលជាជំនួយរបស់លោក ហ៊ុន សែន ឲ្យមានតម្លាភាព សុក្រឹតភាព ប្រសិទ្ធភាព និងទទួលបានប្រសិទ្ធផលខ្ពស់។
លោក កែន ហេង ជាវារីវប្បករ និងជាគ្រូបង្គោលនៅក្នុងស្រុកបរសេដ្ឋ ខេត្តកំពង់ស្ពឺដែលបានចាប់ផ្តើមបង្កាត់ពូជត្រីចំនួន ៥ ប្រភេទរួមទាំងត្រីអណ្តែង ប្រាប់ភ្នំពេញប៉ុស្តិ៍ថា លោកទទួលបានជោគជ័យលើអាជីពចិញ្ចឹម និងបង្កាត់ពូជត្រីចាប់តាំងពីឆ្នាំ ២០០១ លើផ្ទៃដីសរុប ១,៧៥ ហិកតាដែលក្នុង ១ ខែលោកអាចលក់ចេញពី ៥ ទៅ ៦ ម៉ឺនក្បាល និងអាចរកចំណូលបានចន្លោះពី ៤ ទៅ ៥ លានរៀល ក្នុង ១ ខែ។
«ចំណូលពីការចិញ្ចឹម និងបង្កាត់ពូជកូនត្រីនេះបានជួយលើកស្ទួយជីវភាពរបស់ខ្ញុំបានច្រើនបើប្រៀបធៀបនឹងមុនពេលខ្ញុំប្រកបការងារនេះ ដោយខ្ញុំមានលុយទិញដី មានលុយឱ្យកូនបានបន្តការសិក្សា និងខ្ញុំមិនបាច់ខ្ចីលុយអ្នកផ្សេងមកចំណាយក្នុងគ្រួសារដូចមុនទៀត»។ លោក កែន ហេង បច្ចុប្បន្នកំពុងតែធ្វើការបង្កាត់ពូជកង្កែបដើម្បីពង្រីកនូវអាជីវកម្មរបស់លោកបន្ថែម ១ មុខទៀត។
បើតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ ខេត្តនេះមានកន្លែងបង្កាត់ភ្ញាស់កូនត្រីចំនួន ៣ កន្លែង និងកន្លែងបង្កាត់ និងភ្ញាស់កូនកង្កែបចំនួន ៤ កន្លែង៕
