ភ្នំពេញៈ រដ្ឋបាលជលផល និងអង្គការសត្វព្រៃ និងរុក្ខជាតិអន្តរជាតិ (FFI) បានចេញគោលការណ៍ណែនាំ ១០ ចំណុច ស្ដីពី «ការការពារ និងអភិរក្សធនធានធម្មជាតិក្នុងតំបន់ឆ្នេរសមុទ្រកម្ពុជា» ដើម្បីឲ្យទេសចរជាតិ អន្តរជាតិ និងស្ថាប័នពាក់ព័ន្ធនានារួមទាំងប្រជានេសាទសមុទ្រចូលរួមអនុវត្តលើកស្ទួយបរិស្ថានក្នុងតំបន់ឆ្នេរ និង ប្រព័ន្ធអេកូឡូហ្ស៊ីក្នុងបាតសមុទ្រ។
លោក អ៊ុក វិបុល ប្រធាននាយកដ្ឋានអភិរក្សធនធានជលផលនៃរដ្ឋបាលជលផល បានប្រាប់ភ្នំពេញប៉ុស្តិ៍កាលពីថ្ងៃចន្ទថា នាប៉ុន្មានឆ្នាំចុងក្រោយនេះចំនួនទេសចរជាតិ និងអន្តរជាតិដែលបានចូលមកកម្សាន្តក្នុងតំបន់ឆ្នេរសមុទ្រកម្ពុជា មានការកើនឡើងគួរឲ្យកត់សម្គាល់។ ជាមួយគ្នានេះ ការបោះចោលនូវកាកសំណល់ប្លាស្ទិកពាសវាលពាសកាលនៅតាមមាត់ឆ្នេរ និងការជាន់ឈ្លីលើស្មៅសមុទ្រ ក៏ដូចជាការកាច់ផ្កាថ្មក្នុងបាតសមុទ្រលេង ក៏ត្រូវបានគេពិនិត្យឃើញមានជាញឹកញាប់ និងគួរឲ្យកត់សម្គាល់ផងដែរ។
លោកបានបន្តថា ដើម្បីចូលរួមលើកកម្ពស់បរិស្ថាន និងធនធានធម្មជាតិក្នុងតំបន់ឆ្នេរសមុទ្រកម្ពុជា រដ្ឋបាលជលផល បានរួមសហការជាមួយអង្គការ FFI ចេញគោលការណ៍ណែនាំ ១០ ចំណុច ដល់ទេសចរជាតិ និងអន្តរជាតិ ព្រមទាំងស្ថាប័នពាក់ព័ន្ធរដ្ឋ និងឯកជន ពិសេសប្រជានេសាទក្នុងសហគមន៍មូលដ្ឋានឲ្យចូលរួមអនុវត្តឲ្យបានខ្ជាប់ខ្ជួនតាមបទប្បញ្ញតិ្តនៃតំបន់ការពារធនធានសមុទ្រ។
លោកបានបញ្ជាក់ថា៖ «គោលការណ៍ណែនាំ ១០ ចំណុចនោះ គឺហាមប្រាមការដើរជាន់ ឬបោះយុថ្កាលើផ្កាថ្ម កាច់ និងជួញដូរផ្កាថ្មគ្រប់ប្រភេទ ពិសេសក្នុងតំបន់ការពារ និងគ្រប់គ្រងធនធានសមុទ្រ ព្រោះពួកវាមានការធំលូតលាស់យ៉ឺតបំផុត។ ហាមប៉ះពាល់សត្វសមុទ្រដូចជា កាំប្រមាសមុទ្រ ល្មិច...និងពពួកពពុះទឹក ដែលអាចបង្កផលប៉ះពាល់ធ្ងន់ធ្ងរដល់សុខភាព ព្រោះពួកវាមានជាតិពុល និងរមាស់»។
លោកបានបន្ថែមថា៖ «ហាមដាច់ខាតការមុជហែលលេងនៅក្បែរ ឬចាប់ និងជួញដូរនូវប្រភេទសត្វសមុទ្រដែលកម្រ និងកំពុងរងគ្រោះថ្នាក់ជិតផុតពូជ ដូចជា ប្រភេទត្រីបាណន់គីង្គក់។ ជាមួយគ្នានេះក៏មានការហាមប្រើប្រាស់ឧបករណ៍បាញ់ត្រី ការចោលសំរាម និងកាកសំណល់ផ្សេងៗ ពិសេសថង់ប្លាស្ទិកតាមតំបន់ឆ្នេរ និងក្នុងតំបន់ការពារធនធានសមុទ្រ»។
យោងតាមទិន្នន័យដែលទទួលបានរដ្ឋបាលជលផល តំបន់ការពារ និងគ្រប់គ្រងធនធានសមុទ្រនៅកម្ពុជា មានចំនួន ៧ ទីតាំងក្នុងនោះនៅខេត្តកែប មាន ១ ទីតាំង ដែលមានផ្ទៃដីជាង ១ ម៉ឺនហិកតា លាតសន្ធឹងចាប់ពីប្រជុំកោះពោធិ៍ ដល់ប្រជុំកោះទន្សាយ និងនៅខេត្តព្រះសីហនុ មាន ១ ទីតាំង ដែលមានផ្ទៃដីជាង ៤ ម៉ឺនហិកតា លាតសន្ធឹងចាប់ពីប្រជុំកោះរ៉ុងដល់កោះរ៉ុងសន្លឹម។ ប៉ុន្តែតំបន់នេះត្រូវបានរាជរដ្ឋាភិបាលតាមរយៈក្រសួងបរិស្ថានសម្រេចបង្កើតជាឧទ្យានជាតិសមុទ្រ និងដាក់ឲ្យស្ថិតក្រោមការគ្រប់គ្រងរួមគ្នារវាងមន្ត្រីបរិស្ថាន និងរដ្ឋបាលជលផល។
ដោយឡែក ៥ ទីតាំងផ្សេងទៀត កំពុងស្ថិតក្នុងការស្រាវជ្រាវនៅឡើយ។ ក្នុងនោះនៅខេត្តកំពត គ្រោងនឹងបង្កើត ១ កន្លែង ក្នុងតំបន់ប្រជុំកោះត្រពាំងល្ពៅ ដែលមានផ្ទៃដីប្រមាណ ៨ ០០០ ហិកតា។ នៅខេត្តព្រះសីហនុគ្រោងនឹងបង្កើត ១ កន្លែងទៀត ក្នុងតំបន់រាម ខណៈនៅខេត្តកោះកុង គ្រោងបង្កើត ៣ ទីតាំង ដែលរួមមាន នៅក្នុងតំបន់ប្រជុំកោះស្ដេច ១ ទីតាំង ប្រជុំកោះកាពិ និងពាមក្រសោប ១ ទីតាំង និង នៅកោះកុងក្រៅ ១ ទីតាំង។
ច្បាប់នៃអនុសញ្ញាសមុទ្រតម្រូវឲ្យមានវិធីសាស្រ្តបង្ការទុកជាមុនដែលគិតគូរពីផលវិបាកនៃសកម្មភាពណាមួយដែលអាចធ្វើឱ្យប៉ះពាល់ដល់សុខភាព និងដំណើរការនៃប្រព័ន្ធអេកូឡូស៊ីក្នុងសមុទ្រ។
យោងតាមការសិក្សាស្រាវជ្រាវថ្មីមួយរបស់អង្គការ FFI បានបង្ហាញថា សត្វមានជីវិតដែលត្រូវបានរកឃើញនៅក្នុងសមុទ្រ គឺមានភាពចាំបាច់ខ្លាំងណាស់ សម្រាប់ថែរក្សាប្រព័ន្ធអេកូឡូស៊ីសមុទ្រឲ្យមានសុខភាពល្អ និងគាំទ្រដល់ជីវិតទាំងអស់នៅលើផែនដី។ សមុទ្រអាចផលិតបានច្រើនជាង ៥០ ភាគរយ នៃអុកស៊ីហ៊្សែនរបស់ពិភពលោក និងជួយស្រូបយកការបំភាយកាបូនប្រមាណជា ៨៥ ភាគរយ និងច្រើនជាង ៦០ ភាគរយ បានផ្តល់ជាប្រភពប្រូតេអ៊ីនដ៏សំខាន់សម្រាប់មនុស្សជាង ១ ពាន់លាននាក់។
បើយោងតាមរបាយការណ៍នោះ បានបញ្ជាក់ថា៖ «ការធ្វើឲ្យអន្តរាយដល់ប្រព័ន្ធអេកូឡូស៊ីសមុទ្រ ដែលមានសុខភាពល្អ នឹងមានផលវិបាកយ៉ាងធ្ងន់ធ្ងរដល់ភពផែនដី និងជីវិតទាំងអស់នៅលើវា ក្នុងនោះរួមទាំងជីវិតមនុស្សផងដែរ»៕