ភ្នំពេញៈ រដ្ឋបាលជលផលបានប្រកាសបើករដូវនេសាទសម្រាប់ឆ្នាំ ២០១៩-២០២០ ចាប់ពីថ្ងៃអង្គារម្សិលមិញដែលអាចឲ្យប្រជាពលរដ្ឋធ្វើការនេសាទក្នុងដែននេសាទទឹកសាប ដោយឧបករណ៍នេសាទជាលក្ខណៈគ្រួសារ និងបានណែនាំឲ្យការធ្វើអាជីវកម្មក្រៅពីលក្ខណៈគ្រួសារត្រូវសុំច្បាប់អនុញ្ញាត។
សេចក្ដីជូនដំណឹងរបស់រដ្ឋបាលជលផលចុះថ្ងៃទី ២៦ ខែកញ្ញាហើយដែលទើបតែឃើញដាក់បង្ហោះកាលពីម្សិលមិញឲ្យដឹងថា រដូវបើកនេសាទត្រូវបានកំណត់ទៅតាមរយៈពេលចន្លោះពី ៥ ខែទៅ ៨ ខែដោយផ្អែកទៅលើទីតាំងដោយក្នុងនោះចាប់ពីថ្ងៃទី ១ ខែតុលាដល់ថ្ងៃទី ៣១ ខែឧសភា ចំពោះដែននេសាទទឹកសាបដែលស្ថិតនៅខាងជើងស្របទន្លេចតុមុខដែលមានខេត្តទាំងអស់ជុំវិញបឹងទន្លេសាប និងបណ្តាខេត្តមួយចំនួនដូចជាកំពង់ចាម ត្បូងឃ្មុំ ក្រចេះ រតនគិរី មណ្ឌលគិរី ព្រះវិហារ ប៉ៃលិន ឧត្តរមានជ័យ និង ១ ផ្នែកក្នុងភូមិសាស្ត្ររាជធានីភ្នំពេញ ខេត្តកណ្តាលដែលនៅប៉ែកខាងជើងទន្លេចតុមុខ។
ដោយឡែក ខេត្តស្ទឹងត្រែងគឺនឹងបើកឲ្យពលរដ្ឋអាចធ្វើការនេសាទចាប់ពីថ្ងៃទី ១ ខែតុលាដល់ថ្ងៃទី ១ ឧសភា។
សេចក្តីជូនដំណឹងបន្តថា៖ «ចាប់បើករដូវនេសាទពីថ្ងៃទី ១ ខែវិច្ឆិកាដល់ថ្ងៃទី ៣០ ខែមិថុនា ចំពោះដែននេសាទទឹកសាបដែលស្ថិតនៅខាងត្បូងខ្សែស្របទន្លេចតុមុខរួមមានខេត្តព្រៃវែង តាកែវ កំពង់ស្ពឺ ស្វាយរៀង និងមួយផ្នែកក្នុងភូមិសាស្ត្ររាជធានីភ្នំពេញ ខេត្តកណ្តាលដែលនៅប៉ែកខាងត្បូងទន្លេចតុមុខ»។
លោក អេង ជាសាន ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលជលផលឲ្យដឹងថា នៅក្នុងរយៈពេលបើកនេសាទនេះ ប្រជាពលរដ្ឋអាចធ្វើអាជីវកម្មនេសាទដោយឧបករណ៍នេសាទជាលក្ខណៈគ្រួសារដែលអនុញ្ញាតនៅក្នុងដែននេសាទទឹកសាប។ ក្រៅពីនេះ «ការធ្វើនេសាទត្រូវមានលិខិតអនុញ្ញាតឲ្យធ្វើអាជីវកម្មនេសាទ។ (អ្នកធ្វើអាជីវកម្ម) មានកាតព្វកិច្ចបង់ពន្ធ និងថ្លៃឈ្នួលនេសាទជូនរដ្ឋ និងគោរពតាមបទបញ្ជាដែលមានចែងក្នុងលិខិតអនុញ្ញាតឲ្យធ្វើនេសាទ»។
លោកបន្តថាចំពោះអ្នកនេសាទដែលមានបំណងធ្វើនេសាទដោយប្រើប្រាស់ឧបករណ៍ «ម៉ាញ់» នៅដងទន្លេមេគង្គ និងទន្លេសាបក្នុងទីតាំងដែលរាជរដ្ឋាភិបាលបានអនុញ្ញាតត្រូវមកទំនាក់ទំនងចុះឈ្មោះសុំលិខិតអនុញ្ញាតឲ្យធ្វើនេសាទនៅតាមខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និងនេសាទពាក់ព័ន្ធ ដើម្បីបានប្រកបមុខរបរនេសាទ និងទទួលការណែនាំពីសមត្ថកិច្ចជំនាញជលផលអំពីបច្ចេកទេស និងបទបញ្ជានានាដែលពាក់ព័ន្ធដល់ការធ្វើនេសាទ ដើម្បីធានានូវនិរន្តរភាពនៃធនធានជលផល។
លោក ឱម សាវ៉ាត នាយកប្រតិបត្តិសម្ព័ន្ធភាពដើម្បីការអភិរក្សធនធានជលផល (FACT) ថ្លែងពីម្សិលមិញថា តាមច្បាប់ជលផលចាប់ពីថ្ងៃទី ១ ខែតុលាជារៀងរាល់ឆ្នាំ រដូវបើកនេសាទលក្ខណៈគ្រួសារបានចាប់ផ្តើម បន្ទាប់ពីប្រកាសបិទរយៈពេល ៣ ខែ។
លោកបន្តថា ដោយសារតែស្ថានភាពទឹកជំនន់នៅក្នុងប្រទេស កម្ពុជា ក្នុងឆ្នាំនេះមានលក្ខណៈខុសពីធម្មតា ដោយសារតែកម្ពស់ទឹកមានលក្ខណៈឡើងយឺតព្រោះទើបតែមានទឹកនៅចុងខែ ៨ ដើមខែ ៩ ចូលទៅក្នុងបឹងដែលរហូតមកដល់ពេលនេះចំនួនទឹកនៅតែមានការកើនឡើងនៅឡើយ ដូច្នេះលោកបារម្ភចំពោះទិន្នផលដែលអាចនឹងទទួលបានតិចជាងឆ្នាំមុន។
លោកថា៖ «យើងមិនអាចវាយតម្លៃបានទេចំពោះទិន្នផលត្រីនៅឆ្នាំនេះ ព្រោះតែរដូវបើកនេសាទទើបតែចាប់ផ្តើម។ ប៉ុន្តែបើនិយាយពីលក្ខខណ្ឌធម្មជាតិ យើងឃើញថាកម្រិតកម្ពស់ទឹកឡើងមានលក្ខណៈយឺតទៅហើយ ដែលលក្ខណៈជីវសាស្ត្ររបស់ត្រី វាបំផ្លាស់ទីពីបឹងទន្លេសាបទៅតំបន់ទន្លេមេគង្គដើម្បីពងកូន (យឺត)។ ដូច្នេះនៅពេលចរន្តទឹកឡើងយឺត វាធ្វើឲ្យការបំផ្លាស់ទីរបស់ត្រី វាជួបផលលំបាកដែរ។ ទី២ យើងឃើញគម្រោងអភិវឌ្ឍន៍វារីអគ្គិសនីក៏ជាឧបសគ្គមួយដែលធ្វើឲ្យរាំងស្ទះដល់ការបំផ្លាស់ទីរបស់ត្រី»។
លោក ឱម សាវ៉ាត បានអំពាវនាវឲ្យមានការទប់ស្កាត់ឲ្យបានក្នុងរដូវបើកនេសាទនេះ ចំពោះការនេសាទដោយខុសច្បាប់ដែលធ្វើឲ្យទិន្នផលត្រីកាន់តែជួបនូវវិបត្តិ។
«ចាប់តាំងពីរដ្ឋាភិបាលលុបឡូត៍នេសាទទូទាំងប្រទេសចំនួន ២ ដងកាលពីឆ្នាំ ២០០០ និងឆ្នាំ ២០១២ មក (រដ្ឋាភិបាល) បានកំណត់អនុញ្ញាតឲ្យធ្វើនេសាទតែលក្ខណៈគ្រួសារទេ និងឲ្យសហគមន៍នេសាទហ្នឹង ដើរតួនាទីសំខាន់ក្នុងការចូលរួមចំណែកគ្រប់គ្រងវិស័យជលផលដោយរក្សាទុកតែដាយខ្លះ ដែលគ្រប់គ្រងដោយរដ្ឋបាលជលផល។ ប៉ុន្តែធាតុពិតនៃការអនុវត្តជាក់ស្តែងគឺមានជនឆ្លៀតឱកាសនៅតែបន្តប្រើឧបករណ៍ខុសច្បាប់ផ្សេងៗដោយកំបាំងពីភ្នែកសមត្ថកិច្ចស្របពេលដែលការការពាររបស់សហគមន៍នេសាទនៅមានកម្រិត»៕