.jpg)
សមត្ថកិច្ចពាក់ព័ន្ធពេលចុះទៅពិនិត្យទីតាំងដីសុំបង្កើតជាសហគមន៍។ រូបថត រដ្ឋបាលព្រៃឈើ
កំពតៈ ខណ្ឌរដ្ឋបាលព្រៃឈើខេត្ដកំពតបានស្នើសុំឲ្យមានការទទួលស្គាល់ពីក្រសួងកសិកម្ម រុក្ខាប្រមាញ់ និងនេសាទចំពោះការបង្កើត និងការគ្រប់គ្រងតំបន់ព្រៃសហគមន៍ចំនួន ៣ កន្លែងនៅស្រុកឈូក និងស្រុកដងទង់ ខេត្តកំពត ដើម្បីលើកស្ទួយជីវភាពពលរដ្ឋក្នុងតំបន់ និងដើម្បីឲ្យមានការចូលរួមថែរក្សាដីរដ្ឋបន្ថែមទៀត។
តាមរបាយការណ៍រដ្ឋបាលព្រៃឈើ សហគមន៍ព្រៃឈើដែលត្រូវបានបង្កើតនោះរួមមាន សហគមន៍ព្រៃឈើភ្នំខ្ពបក្នុងឃុំព្រៃថ្នង,សហគមន៍ព្រៃឈើនារាយណ៍ក្នុងឃុំនារាយណ៍ដែលស្ថិតនៅក្នុងស្រុកឈូក និងសហគមន៍ព្រៃឈើជ្រោះគគីរដែកក្នុងឃុំស្រែជាខាងជើងនៅស្រុកដងទង់។
លោក ចាន់ រិទ្ធិ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ដកំពតបានប្រាប់ភ្នំពេញប៉ុស្ដិ៍ពីម្សិលមិញថា ការបង្កើត និងការគ្រប់គ្រងតំបន់ព្រៃសហគមន៍ទាំងនេះជាផ្នែកមួយក្នុងការលើកកម្ពស់ជីវភាពពលរដ្ឋក្នុងសហគមន៍ ដើម្បីអាចឱ្យគាត់អាចប្រមូលផលពីធនធានធម្មជាតិ និងចូលរួមថែរក្សាដីនៅតំបន់នោះ។ ជាមួយគ្នានេះនៅក្នុងគម្រោងក៏បានជំរុញផ្នែកថវិកាក្នុងការទ្រទ្រង់សហគមន៍ ការបង្កើតមុខរបរបន្ថែម ដើម្បីធ្វើឱ្យពលរដ្ឋក្នុងសហគមន៍មានជីវភាពប្រសើរជាងមុនផងដែរ។
លោកថ្លែងថា៖ «សព្វថ្ងៃនេះហាក់បីដូចជា យើងសង្ឃឹមតែទៅលើសហគមន៍។ អ្វីៗ (ដីរដ្ឋ) ដែលមាននៅសេសសល់បច្ចុប្បន្នពី ១ ថ្ងៃទៅ ១ ថ្ងៃ មានការរំលោភបំពានកាន់កាប់ ទោះបីតំបន់សហគមន៍ដែលបានបង្កើតហើយមានប្រកាសរបស់ក្រសួងហើយក៏មានការចេញលិខិតផ្សេងៗមកជាន់គ្នាដែរ។ អ៊ីចឹងខណ្ឌរដ្ឋបាលព្រៃឈើទាមទារឱ្យមានការសម្របសម្រួល និងបញ្ឈប់ការអភិវឌ្ឍនៅកន្លែងដែលមានការចេញលិខិតសម្គាល់ដីជាន់គ្នា»។
លោកប្រធានមន្ទីរកសិកម្មបានបន្តថា សព្វថ្ងៃប្រជាសហគមន៍បានថែរក្សា និងទទួលបានផលតែបន្ដិចបន្តួចប៉ុណ្ណោះពីព្រៃសហគមន៍របស់ពួកគាត់។ ដោយឡែកការគ្រប់គ្រងដីរដ្ឋ ឬដីសហគមន៍លុះត្រាមានការជួយថែរក្សាពីប្រជាសហគមន៍ទើបបានគង់វង្ស។
លោកបញ្ជាក់ថា៖ «ការបង្កើត និងការគ្រប់គ្រងតំបន់ព្រៃសហគមន៍គឺដើម្បីថែរក្សាដីព្រៃតំបន់សហគមន៍ឱ្យបានគង់វង្ស។ នៅតំបន់ណាក៏ដោយ នៅពេលមានសហគមន៍ដំណើរការល្អយើងតែងតែជំរុញលើកទឹកចិត្ដគាត់។ បើតាមតែកម្លាំងរដ្ឋបាលព្រៃឈើ និងមន្ទីរយើងមិនមានកម្លាំងគ្រប់គ្រាន់ដើម្បីថែរក្សាព្រៃឈើទេ។ ប៉ុន្ដែបើសហគមន៍ជាអ្នកមូលដ្ឋានផ្ទាល់ពួកគាត់អាចជំនួសមុខឱ្យអាជ្ញាធរដែនដីក៏ដូចជារាជរដ្ឋាភិបាលក្នុងការការពារសម្បត្ដិធម្មជាតិក្នុងដែនដីរបស់ពួកគាត់បាន»។
បើតាមរបាយការណ៍រដ្ឋបាលព្រៃឈើដដែល សំណើសុំទទួលស្គាល់ការបង្កើត និងការគ្រប់គ្រងតំបន់ព្រៃសហគមន៍នេះបានទទួលការឯកភាពពីប្រធានរដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទរួចហើយ។
របាយការណ៍នេះឱ្យដឹងថា ក្រោយមានការឯកភាពពីប្រធានរដ្ឋបាលព្រៃឈើរួចមកកាលពីថ្ងៃទី ១២ ដល់ថ្ងៃទី ២៥ ខែមីនាឆ្នាំនេះ ក្រុមការងារនៃការិយាល័យសហគមន៍ព្រៃឈើសហការជាមួយរដ្ឋបាលព្រៃឈើមូលដ្ឋាន អាជ្ញាធរដែនដី គណៈកម្មការគ្រប់គ្រងសហគមន៍ និងសមាជិកសហគមន៍ព្រៃឈើ ព្រមទាំងអ្នកពាក់ព័ន្ធបានចុះទៅសម្របសម្រួលសកម្មភាពប្រជុំ ពិនិត្យ និងផ្ទៀងផ្ទាត់តំបន់សក្តានុពលព្រៃសហគមន៍ទាំង ៣ កន្លែងនោះ។
លោក ចាន់ ហេង អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទបានបញ្ជាក់កាលពីម្សិលមិញថា បច្ចុប្បន្ននៅមិនទាន់មានរបាយការណ៍បន្ថែមមកក្រសួងនៅឡើយទេ ប៉ុន្តែក្រុមការងារចុះទៅពិនិត្យតំបន់ទាំង ៣ នោះរួចហើយ។ បច្ចុប្បន្នប្រធានរដ្ឋបាលព្រៃឈើកំពុងតែធ្វើការលើការងារនេះ។
លោកបានបញ្ជាក់ថា៖ «ជារួមការបង្កើត និងការគ្រប់គ្រងតំបន់ព្រៃសហគមន៍គឺដើម្បីថែរក្សាការពារតំបន់ព្រៃសហគមន៍។ នៅពេលយើងប្រកាសជាតំបន់សហគមន៍ ប្រសិនបើមានការរំលោភបំពាននៅតំបន់នោះ ក្រសួងនឹងមានវិធានការតាមច្បាប់លើអ្នករំលោភបំពាន»។
លោក ជួន សារ៉ា នាយខណ្ឌរដ្ឋបាលព្រៃឈើខេត្តកំពតមិនអាចសុំការបញ្ជាក់បន្ថែមជុំវិញការសុំបង្កើត និងការគ្រប់គ្រងតំបន់ព្រៃសហគមន៍នេះបានទេកាលពីម្សិលមិញដោយលោកថ្លែងថា កំពុងជាប់រវល់។
លោក យន់ ផល្លី មន្ដ្រីសម្របសម្រួលអង្គការអាដហុកប្រចាំខេត្ដកំពតបានថ្លែងថា កន្លងមកតំបន់ព្រៃឈើសហគមន៍នៅតាមតំបន់ជើងភ្នំ និងមាត់សមុទ្រក្នុងខេត្ដកំពតគឺតែងតែត្រូវបានអ្នកមានអំណាចទៅរំលោភយកជាកម្មសិទ្ធិផ្ទាល់ខ្លួន។
លោកថា៖ «កន្លងមកដីស្ថិតនៅតំបន់ជើងភ្នំត្រូវបានអ្នកមានអំណាចវាតទីយកតែម្ដង នេះបើតាមការលើកឡើងរបស់សហគមន៍។ យើងបានឃើញហើយភ្នំនៅខេត្ដកំពតត្រូវបានគេឈូសឆាយព្រៃឈើអស់គ្មានសល់ទេ»៕
