.jpg)
មន្ត្រីក្នុងវគ្គបណ្ដុះបណ្ដាលរបៀបគ្រប់គ្រងភ្លុកដំរីដែលរឹបអូសបាន។ រូបថត រដ្ឋបាលព្រៃឈើ
ភ្នំពេញ: រដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទបានបើកវគ្គបណ្ដុះបណ្ដាលមន្ត្រីជំនាញចំនួន ២៥ នាក់ ពីរបៀបគ្រប់គ្រង និងថែរក្សាសំណាកភ្លុកដំរីដែលបានរឹបអូសពីជនល្មើស។ លើសពីនេះត្រូវដឹងពីរបៀបគ្រប់គ្រងភ្លុកដំរីទម្ងន់ជាង ៩ តោន ដែលមន្ត្រីគយ និងរដ្ឋាករកម្ពុជាចាប់បានកាលពីឆ្នាំ ២០១៤ រួមទាំងមន្ត្រីរដ្ឋបាលព្រៃឈើចាប់បានជាង ៣៥០ គីឡូក្រាម។
លោក ហង់ ស៊ុនត្រា អនុប្រធានរដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទបានថ្លែងកាលពីម្សិលមិញថា ការសិក្សានេះមានផលប្រយោជន៍ច្រើនចំពោះមន្ត្រីជាសិក្ខាកាមដែលកំពុងឈរលើតួនាទីនេះ ដើម្បីឲ្យមានចំណេះដឹងបន្ថែមអំពីរបៀបរបបការងារគ្រប់គ្រង និងថែរក្សាសំណាកភ្លុកដំរីដែលសមត្ថកិច្ចបានរឹបអូស និងចាប់បានពីជនល្មើសជាបន្តបន្ទាប់។
លោកបញ្ជាក់ថា៖ «លើសពីនេះ យើងចង់ឲ្យមន្ត្រីយល់ដឹងពីកិច្ចសហប្រតិបត្តិការជាមួយមន្ត្រីជំនាញអន្តរជាតិពោលគឺ នៅពេលមានបទល្មើសឆ្លងដែនពីបរទេសចូលមកកម្ពុជា។ ក្នុងវគ្គនេះ យើងបណ្ដុះបណ្ដាលតែមន្ត្រីជួរមុខដែលជាអ្នកអនុវត្តច្បាប់ អ្នកចាប់បទល្មើស អ្នកធ្វើកំណត់ហេតុ ឬអ្នកដែលធ្វើសំណុំបែបបទលើបទល្មើសជាមួយបរទេសពោលគឺយើងបណ្ដុះបណ្ដាលមន្ត្រីផ្ទៃក្នុងយើង»។
លោក សួន ផល្លា មន្ត្រីរដ្ឋបាលព្រៃឈើ និងជាគ្រូបង្គោលនៃក្រសួងកសិកម្ម រុក្ខាប្រមាញ់ និងនេសាទបានថ្លែងពីម្សិលមិញថា លោកបានរៀបចំឲ្យមានវគ្គបណ្ដុះបណ្ដាលនេះក្នុងន័យផ្ទេរចំណេះដឹងដល់មន្ត្រីពីរបៀបថែរក្សា និងវាស់វែងសំណាកភ្លុកដំរីដែលមន្ត្រីនាយកដ្ឋានគយ និងរដ្ឋាករកម្ពុជាចាប់បានជាបន្តបន្ទាប់ចាប់ពីឆ្នាំ ២០១៤ ដល់ឆ្នាំ ២០១៨។
លោកបន្តថា ភ្លុកដំរីចំនួនជាង ៩ តោន ត្រូវបានមន្ត្រីគយ និងរដ្ឋាករកម្ពុជា ចាប់បានកាលពីឆ្នាំ ២០១៤ ដល់ឆ្នាំ ២០១៨ ដោយកំពុងរក្សាទុកនៅទីស្នាក់ការរដ្ឋបាលព្រៃឈើ និងមន្ត្រីរដ្ឋបាលព្រៃឈើចាប់បានចំនួនជាង ៣៥០ គីឡូក្រាមដោយត្រៀមវាស់វែងចុះក្នុងបញ្ជីសារពើភណ្ឌ។
លោកបញ្ជាក់ថា៖ «ក្រោយពីចាប់បានភ្លុកដំរីទាំងនេះ សមត្ថកិច្ចបានបញ្ជូនជនល្មើសទៅតុលាការ ប៉ុន្ដែមានករណីខ្លះតុលាការមិនទាន់សម្រេចក្ដីនៅឡើយ ហើយករណីខ្លះបានសម្រេចរួចហើយ តែសំណាកភ្លុកដំរីនេះ យើងយកមកទុកនៅក្នុងឃ្លាំង ហើយយើងអត់ទាន់បានវាស់វែង ឬកត់ត្រាគិតជាស្ថិតិច្បាស់លាស់ទេ»។
លោកបញ្ជាក់បន្ថែមថា៖ «ដូច្នេះទើបយើងបង្កើតឲ្យមានវគ្គបណ្ដុះបណ្ដាលនេះ គឺបង្រៀនមន្ត្រីឲ្យចេះវាស់ភ្លុកដំរី ឲ្យចេះថ្លឹងគិតជាគីឡូក្រាម ហើយចេះមើលបទប្បញត្តិទាក់ទងអនុសញ្ញាដែលតម្រូវឲ្យយើងធ្វើ។ ចំពោះតម្លៃភ្លុកដំរីទាំងនេះ ខ្ញុំអត់ដឹងទេ យើងអត់អាចបង្ហាញបានទេ ព្រោះពួកខ្ញុំគ្រាន់តែចាប់បានរឹបអូស យកមករក្សាទុក»។
តាមរបាយការណ៍ដែលភ្នំពេញប៉ុស្ដិ៍ទទួលបានពីម្សិលមិញឲ្យដឹងថា តាមទិន្នន័យបង្ក្រាបបទល្មើសរបស់នាយកដ្ឋានគយ និងរដ្ឋាករកម្ពុជាមានភ្លុកដំរីទម្ងន់ ៩ ៣៥៣,០១ គីឡូក្រាម និងទិន្នន័យបង្ក្រាបបទល្មើសច្បាប់ព្រៃឈើភ្លុកដំរីទម្ងន់ ៣៥៣,០៥ គីឡូក្រាមត្រូវបានសមត្ថកិច្ចចាប់បានជាបន្តបន្ទាប់។
រដ្ឋបាលព្រៃឈើមិនទាន់បានបំពេញ ឬការចេញប្រកាសជាអន្តរក្រសួងស្ដីពី ការគ្រប់គ្រងភ្លុកដំរីដែលបានចាប់យក និងការរៀបចំប្រព័ន្ធគ្រប់គ្រងភ្លុកដំរីឲ្យបានច្បាស់លាស់នៅឡើយ។ ដូច្នេះមន្ត្រីជំនាញពាក់ព័ន្ធនឹងការងារនេះត្រូវប្រមូលទិន្នន័យពីការអនុវត្តកម្មវិធីតាមដានការសម្លាប់ដំរីល្មើសច្បាប់ (MIKE) និងការរកប្រព័ន្ធព័ត៌មានអំពីពាណិជ្ជកម្មលើសត្វដំរី (ETIS) ការសិក្សាវិភាគព័ត៌មានដោយត្រូវបង្ហាញចំនួនកំណាត់ភ្លុក និងទម្ងន់របស់ដុំភ្លុកនីមួយៗ ហើយសម្រាប់កំណាត់ណាដែលទាក់ទងគ្នាត្រូវដាក់ស្លាកសម្គាល់ដែលត្រូវអនុវត្តតាមបទប្បញ្ញត្តិនានានៃសេចក្ដីសម្រេចដែលត្រូវស្រង់ព័ត៌មានអំពីប្រភព និងបញ្ជាក់ហេតុផល៕
