ភ្នំពេញ/កំពង់ស្ពឺ: រដ្ឋបាលរាជធានីភ្នំពេញបានប្រគល់ម៉ូតូដឹកសំរាមបែបទំនើបចំនួន ៤០ គ្រឿង ដល់ខណ្ឌចំនួន ៦ បន្ថែមទៀតដើម្បីបន្ថែមមធ្យោបាយដឹកសំរាម ខណៈរដ្ឋបាលខេត្តកំពង់ស្ពឺ និងតំណាងធនាគារពិភពលោកបានពិភាក្សាពីការដោះស្រាយ ការគ្រប់គ្រងសំរាម សំណល់រឹងទីប្រជុំជន និងគ្រប់គ្រងទីលានចាក់សំរាម។
លោក ម៉េត មាសភក្តី អ្នកនាំពាក្យសាលារាជធានីបានឲ្យដឹងពីម្សិលមិញថា តាមគម្រោងរដ្ឋបាលរាជធានីភ្នំពេញនឹងចែកម៉ូតូកង់បីដឹកសំរាមបែបទំនើបនេះទៅឲ្យគ្រប់ខណ្ឌទាំងអស់ដើម្បីជួយសម្រួលបន្ថែមលើមធ្យោបាយដឹកជញ្ជូនសំរាមតាមមូលដ្ឋានខណ្ឌនីមួយៗ ប៉ុន្ដែក្រុមហ៊ុនទទួលបន្ទុកប្រមូលសំរាមនៅតែធ្វើប្រតិបត្តិការរបស់ខ្លួនដដែល។ លោកបន្តថា ការចែកម៉ូតូនេះដោយពិនិត្យទៅលើស្ថានភាពជាក់ស្ដែង ប្រសិនខណ្ឌណាមួយដែលមានតម្រូវការច្រើននឹងត្រូវទទួលបានម៉ូតូច្រើនជាងគេ។
ជាក់ស្ដែងកាលពីថ្ងៃទី ៧ ខែកុម្ភៈ ម៉ូតូដឹកសំរាមទំនើបត្រូវបានប្រគល់ជូនខណ្ឌទាំង ៦ រួមមាន ខណ្ឌច្បារអំពៅ ៦ គ្រឿង, ខណ្ឌពោធិ៍សែនជ័យ ៧ គ្រឿង, ខណ្ឌមានជ័យ ៧ គ្រឿង, ខណ្ឌទួលគោក ១០ គ្រឿង, ខណ្ឌ៧មករា ៣ គ្រឿង, ខណ្ឌសែនសុខ ៦ គ្រឿង និងរដ្ឋាករស្វយ័តផ្សារធំថ្មី ១ គ្រឿង។
លោកបញ្ជាក់ថា៖ «ការចែកជូនម៉ូតូនេះកន្លងមកយើងបានចែកជូនជាច្រើនលើករួចមកហើយ ប៉ុន្ដែមិនមែនជាទ្រង់ទ្រាយធំដូចលើកនេះដើម្បីឲ្យពួកគាត់តាមសង្កាត់ ឬខណ្ឌហ្នឹង គាត់យកទៅប្រើប្រាស់សម្រាប់ដឹកសំរាមតាមច្រកល្ហកដែលក្រុមហ៊ុនប្រមូលសំរាមចូលទៅអត់ដល់អ៊ីចឹងយើងប្រើម៉ូតូនេះដឹកសំរាមហ្នឹងចេញមកក្រៅមក»។
លោក ចេង មុនីរ៉ា អភិបាលខណ្ឌច្បារអំពៅថ្លែងថា បើតាមទិសដៅរដ្ឋបាលរាជធានីនឹងប្រគល់ជូនម៉ូតូទំនើបដឹកសំរាមនេះទៅឲ្យគ្រប់ខណ្ឌទាំង ១៤ និងសង្កាត់ទាំង ១០៥ ដើម្បីងាយស្រួលក្នុងការនាំយកកាកសំណល់ទៅចាក់ ឬប្រមូលផ្តុំនៅទីលានចាក់សំរាមធ្វើយ៉ាងណាពន្លឿនការប្រមូលសំរាម និងថែរក្សាបរិស្ថាន អនាម័យជូនប្រជាពលរដ្ឋ។
លោកបញ្ជាក់ថា៖ «ម៉ូតូនេះយើងយកមកប្រគល់ជូនទៅឲ្យសង្កាត់ ហើយសង្កាត់គាត់មានមន្ត្រីប្រចាំការទទួលបន្ទុកផ្នែកអនាម័យជាអ្នកប្រើប្រាស់ម៉ូតូនេះ ប្រសិនកន្លែងណាមានសំរាម គឺគាត់ទៅប្រមូលយកមក ទន្ទឹមនឹងប្រមូលនោះ គាត់ត្រូវអប់រំ ផ្សព្វផ្សាយទៅពលរដ្ឋពីការទុកដាក់សំរាមឲ្យបានត្រឹមត្រូវផងដែរ»។
កាលពីថ្ងៃទី ០៤ ខែវិច្ឆិកា ឆ្នាំ ២០១៩ លោក ឃួង ស្រេង អភិបាលរាជធានីធ្លាប់បានប្រគល់ម៉ូតូដឹកសំរាមជូនដល់ខណ្ឌ ៤ គឺខណ្ឌជ្រោយចង្វារ,ដូនពេញ, ចំការមន និងខណ្ឌបឹងកេងកង។
ករណីស្រដៀងគ្នានេះលោក វ៉ី សំណាង អភិបាលខេត្តកំពង់ស្ពឺនៅថ្ងៃទី ០៧ ខែកុម្ភៈបានជួបពិភាក្សាជាមួយក្រុមការងារធនាគារពិភពលោក ដើម្បីប្រមូលព័ត៌មានអំពីស្ថានភាពនៃការគ្រប់គ្រងសំរាម សំណល់រឹងទីប្រជុំជន និងគ្រប់គ្រងទីលានចាក់សំរាមនៅក្នុងខេត្តកំពង់ស្ពឺ។
លោក វ៉ី សំណាង ថ្លែងពីម្សិលមិញថាតំណាងធនាគារពិភពលោកបានបង្កើតគម្រោងមួយទាក់ទងការគ្រប់គ្រងសំរាម និងសំណល់រឹង ដោយបានជ្រើសយកខេត្តកំពង់ស្ពឺ និងបាត់ដំបង ដើម្បីធ្វើជាគោលដៅ អនុវត្តគម្រោងរបស់ខ្លួន។ មន្ត្រីធនាគារពិភពលោកបានចុះមកសិក្សាពីភូមិសាស្ត្រ និងស្ថានភាពជាក់ស្ដែង ដើម្បីធ្វើការសម្រេចចិត្ត។
លោកបន្តថា គម្រោងនេះនឹងផ្ដល់ហិរញ្ញប្បទានដល់ការវិនិយោគការគ្រប់គ្រងសំណល់រឹងនៅទីលានចាក់សំរាមក្នុងតំបន់ និងហេដ្ឋារចនាសម្ព័ន្ធសំណល់រឹងផ្សេងៗ លិខិតបទដ្ឋានគតិយុត្ត និងការកសាងសមត្ថភាពមន្ត្រីនៅថ្នាក់ជាតិ និងក្រោមជាតិ និងការបង្កលក្ខខណ្ឌអំណោយផលដល់វិស័យឯកជនកាន់តែល្អប្រសើរ។
លោកបញ្ជាក់ថា៖ «មូលហេតុដែលធនាគារពិភពលោកជ្រើសរើសយកខេត្តកំពង់ស្ពឺ និងខេត្តបាត់ដំបងធ្វើជាគោលដៅអនុវត្តន៍គម្រោងនេះគឺខេត្តទាំង ២ នេះមានការអភិវឌ្ឍច្រើនជាងគេ គឺមានរោងចក្រ សហគ្រាសតូចធំជាច្រើន ប្រជាពលរដ្ឋក៏មានជីវភាពធូរធារដែរ។ លើសពីនេះខេត្តទាំង ២ ក៏ជាខេត្តគោលដៅដែលចោលសំរាមអនាធិបតេយ្យច្រើនដែរ អ៊ីចឹងបើបានធនាគារពិភពលោកមកជួយបែបនេះគឺល្អខ្លាំងណាស់»៕