.jpg)
លោក ឃួង ស្រេង អភិបាលរាជធានីភ្នំពេញ ក្នុងកិច្ចប្រជុំនាពេលកន្លងមក។ រូបថត រដ្ឋបាលរាជធានីភ្នំពេញ
ភ្នំពេញៈ រដ្ឋបាលរាជធានីភ្នំពេញនឹងចាត់វិធានការពង្រឹងការបង្ក្រាបបនល្បែងស៊ីសង និងគ្រឿងញៀនក្នុងទិសដៅកាត់បន្ថយបទល្មើសលួច និងប្លន់ ដើម្បីពង្រឹងសន្តិសុខសណ្តាប់ធ្នាប់ជូនប្រជាពលរដ្ឋក្នុងឱកាសបុណ្យចូលឆ្នាំសកលដែលនឹងឈានចូលមកដល់ក្នុងពេលដ៏ខ្លីខាងមុខនេះ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញថ្លែងកាលពីថ្ងៃទី ២៤ ខែធ្នូ ថា លោក ឃួង ស្រេង អភិបាលរាជធានីភ្នំពេញបានធ្វើការណែនាំដល់សមត្ថកិច្ចពាក់ព័ន្ធទាំងអស់ក្នុងរាជធានីភ្នំពេញត្រូវពង្រឹងផ្នែកសន្តិសុខសណ្តាប់ធ្នាប់បន្ថែមទៀតជូនប្រជាពលរដ្ឋ ដើម្បីឱ្យបានសប្បាយនៅក្នុងឱកាសពិធីបុណ្យសកលនេះ។ ការណែនាំសមត្ថកិច្ចឲ្យពង្រឹងសន្តិសុខនេះ បានធ្វើឡើងនៅក្នុងកិច្ចប្រជុំជាមួយគណៈបញ្ជាការឯកភាពរាជធានីភ្នំពេញ កាលពីថ្ងៃទី ២៣ ខែធ្នូ នៅសាលារាជធានីភ្នំពេញ។
លោកបញ្ជាក់ថា៖ «ធម្មតាទេពេលមានពិធីបុណ្យផ្សេងៗមិនថាតែរាជធានីភ្នំពេញ ឬបណ្តាខេត្តផ្សេងៗដែលរៀបចំកម្មវិធីគឺតែងតែយកចិត្តទុកដាក់ជាងថ្ងៃធម្មតា ដោយសារតែរាល់ពិធីបុណ្យ ឬកម្មវិធីផ្សេងៗបងប្អូនរបស់យើង គាត់ត្រូវចូលរួមហើយមានទីតាំង ខ្លះ ត្រូវមានការជួបជុំ និងការប្រ-មូលផ្តុំច្រើន។ ដូច្នេះហើយយើងត្រូវគិតគូរពីបញ្ហាសន្តិសុខ និងការពារជូនពួកគាត់»។
លោក ស ថេត ស្នងការនគរបាលរាជធានីភ្នំពេញថ្លែងដែរថា លោកបានណែនាំកម្លាំងសមត្ថកិច្ចទាំង ១៤ ខណ្ឌក្នុងរាជធានីភ្នំពេញត្រូវពង្រឹងបន្ថែមក្នុងការថែរក្សានូវសន្តិសុខ សណ្ដាប់ធ្នាប់ ដើម្បីប្រជាពលរដ្ឋបានសប្បាយក្នុងពិធីបុណ្យសកលនេះ។
លោកបញ្ជាក់ថា៖ «ក្នុងឱកាសបុណ្យចូលឆ្នាំសកល យើងក៏រៀបចំកម្លាំងការពារដែរទៅគ្រប់កន្លែងណាដែលប្រជាពលរដ្ឋមានការប្រមូលផ្តុំ និងកម្សាន្ត។ យើងត្រៀមកម្លាំងការពារនៅតាមកន្លែងកម្សាន្តសំខាន់ផ្សេងៗនៅរាជធានីភ្នំពេញពិសេសជួយសម្រួលនៅពេលយប់។ យើងការពារកុំឲ្យមានអំពើហិង្សា ឬការពារកុំឲ្យមានករណីចោរកម្មផ្សេងៗ»។
លោកបន្ថែមថា កម្លាំងសមត្ថកិច្ចរាជធានីភ្នំពេញនឹងសហការជាមួយគណៈបញ្ជាការឯកភាពខណ្ឌទាំង ១៤ ក្នុងការបង្ក្រាបល្បែងស៊ីសង និងគ្រឿងញៀនក្នុងរាជធានីដែលភាគច្រើនកើតឡើងនៅតាមតំបន់ជាយក្រុង និងសំណង់មិនរៀបរយដែលបានបង្កបទល្មើសផ្សេងៗដូចជាបទល្មើស លួច ឆក់ ប្លន់ជាដើម។
លោកថា៖ «វាគឺជាការប្រជុំប្រចាំខែគណៈបញ្ជាការឯកភាពរាជធានីភ្នំពេញ។ ដូច្នេះលោក [ឃួង ស្រេង] ត្រូវលើកចំណុចជាអាទិភាពប៉ុន្មានហ្នឹង ដែលយើងត្រូវថែរក្សាឲ្យបាន។ ទោះបីជាយ៉ាងណាក៏ដោយការបង្ក្រាបមួយប្រាវមិនមែនអស់ហើយស្ងាត់ឈឹងដូចចោរលួចសេះនោះទេ។ បទល្មើសវានៅតែមានលេចចេញនៅកន្លែងនេះ ឬកន្លែងនោះហើយយើងនឹងចូលរួមសហការជាមួយគណៈបញ្ជាការឯកភាពខណ្ឌទាំង ១៤ ដើម្បីធ្វើឲ្យបទល្មើសហ្នឹងមានការថយចុះ»៕
