.jpg)
បិទខ្ទប់ក្នុងភូមិសាស្រ្តខណ្ឌមានជ័យ ខណ្ឌពោធិ៍សែនជ័យ និងខណ្ឌឫស្សីកែវ រាជធានីភ្នំពេញ ដែលជាតំបន់ក្រហម។ រូបភាព រដ្ឋបាលរាជធានីភ្នំពេញ
ភ្នំពេញៈ រដ្ឋបាលរាជធានីភ្នំពេញបានសម្រេចផ្អាកដំណើរការជាបណ្តោះអាសន្ននូវសកម្មភាពផ្សាររដ្ឋ និងផ្សារមិនរៀបរយទាំងអស់នៅរាជធានីភ្នំពេញក្នុងរយៈពេល ៧ ថ្ងៃទៀត គិតចាប់ពីម៉ោងសូន្យនាថ្ងៃទី ៨ ខែឧសភាស្អែកនេះ រហូតដល់ ថ្ងៃទី ១៤ ខែឧសភា ឆ្នាំ ២០២១ ។
យោងតាមសេចក្តីសម្រេចលេខ ១០១/២១ សសរ ដែលចុះហត្ថលេខាដោយ លោក ឃួង ស្រេង អភិបាលរាជធានីភ្នំពេញកាលពីថ្ងៃទី ៦ ខែឧសភា ឆ្នាំ ២០២១ បញ្ជាក់ថា ការផ្អាកដំណើរការផ្សារជាបណ្តោះអាសន្ននេះគឺដើម្បីប្រយុទ្ធ និងទប់ស្កាត់ ការឆ្លងរាលដាលនៃជំងឺកូវីដ១៩ នៅក្នុងរាជធានីភ្នំពេញ។
លោក កើត ឆែ អភិបាលរងរាជធានីភ្នំពេញបានបញ្ជាក់នៅក្នុងសន្និសីទសារព័ត៌មានកាលពីម្សិលមិញថា រដ្ឋបាលរាជធានីភ្នំពេញដែលដឹកនាំផ្ទាល់ដោយ លោក ឃួង ស្រេង អភិបាលរាជធានីភ្នំពេញកាលពីកន្លងមកនេះបានសម្រេច ចិត្តប្រកាសផ្អាកសកម្មភាពផ្សារមួយចំនួនភ្លាមៗ ដើម្បីកាត់ផ្តាច់ការឆ្លងនូវជំងឺកូវីដ១៩។
បើតាមលោក កើត ឆែ បើមិនមានការប្រកាសបន្តផ្អាកដំណើរការផ្សារទាំងផ្សាររដ្ឋ និងផ្សារមិនរៀបរយទាន់ពេលវេលាទេនោះ កំណើននៃការឆ្លងជំងឺកូវីដ១៩នឹងមានកាន់តែច្រើនដែលធ្វើឱ្យរដ្ឋបាលរាជធានីភ្នំពេញមិនអាចគ្រប់គ្រងបាន៕
