ភ្នំពេញ៖ បន្ទាប់ពីរកឃើញមានអាជីវករនៅផ្សារដើមគ ប្រមាណជា ១០០ នាក់ មានវិជ្ជមានវីរុសកូវីដ១៩ អាជ្ញាធរក្រុងភ្នំពេញបានសម្រេចធ្វើការផ្អាកដំណើរការជាបណ្តោះអាសន្ននូវមូលដ្ឋានផ្សារដើមគ និងផ្សារបន្លែដែលស្ថិតនៅជុំវិញតំបន់ប្រជុំជនផ្សារដើមគក្នុងខណ្ឌទួលគោក និងខណ្ឌបឹងកេងកង រាជធានីភ្នំពេញ។
លោក ឃួង ស្រេង អភិបាលរាជធានីភ្នំពេញបានឱ្យដឹងថា ដោយសារស្ថានភាពនៃការរីករាលដាលជំងឺកូវីដ១៩ក្នុងរយៈពេលប៉ុន្មានថ្ងៃចុងក្រោយនេះ មានការរីករាលដាលខ្លាំងក្នុងនោះបានធ្វើឱ្យមានអាជីវករ និងកម្លាំងសន្តិសុខផ្សារដើមគប្រមាណ ១០០ នាក់បានឆ្លងវីរុសកូវីដ១៩ក្នុងព្រឹត្តិការណ៍សហគមន៍ ២០ កុម្ភៈ ២០២១។
លោកបានមានប្រសាសន៍ថា៖ «ស្ថានភាពនេះបានឆ្លងរាលដាលយ៉ាងឆាប់រហ័សគួរឱ្យព្រួយបារម្ភ និងចាំបាច់ ត្រូវមានវិធានការសុខាភិបាល ដើម្បីទប់ស្កាត់ជាបន្ទាន់។ ចំពោះមុខរដ្ឋបាលរាជធានីភ្នំពេញបានសម្រេចផ្អាកដំណើរការជាបណ្តោះអាសន្ននូវមូលដ្ឋានផ្សារដើមគ និងផ្សារបន្លែសម្រាប់រយៈពេលពេល ១៤ ថ្ងៃ គិតចាប់ពីថ្ងៃទី ១៨ ខែមេសាដល់ថ្ងៃទី ១ ខែឧសភាឆ្នាំ ២០២១»។
លោក ឃួង ស្រេង បានបន្ថែមថា ការផ្អាកនេះគឺដើម្បីបង្ការ និងទប់ស្កាត់ការឆ្លងរីករាលដាលវីរុសកូវីដ១៩ទៅដល់បងប្អូនអាជីវករអតិថិជនក៏ដូចជាប្រជាពលរដ្ឋដែលចេញ-ចូលផ្សារនេះ។
ជាមួយគ្នានេះដែរ រដ្ឋបាលរាជធានីភ្នំពេញបានជូនដំណឹងដល់អាជីវករសន្តិសុខបុគ្គលិក-កម្មករបម្រើការងារក្នុងផ្សារ និងក្រុមគ្រួសារអាជីវករ ពាក់ព័ន្ធព្រមទាំងប្រជាពលរដ្ឋដែលបានចេញ-ចូលផ្សារដើមគ គិតចាប់ពីថ្ងៃទី ៥ ខែមេសាឆ្នាំ ២០២១ មក ត្រូវរួសរាន់ទៅយកសំណាកតេស្ករកមេរោគកូវីដ១៩ជាបន្ទាន់។ ការធ្វើតេស្តនេះគឺនៅក្នុងបរិវេណមជ្ឈមណ្ឌលវប្បធម៌ចេនឡាព្រមទាំងត្រូវអនុវត្តន៍វិធានចត្តាឡីស័កស្របតាមការណែនាំរបស់ក្រសួងសុខាភិបាលឱ្យបានត្រឹមត្រូវបំផុត។
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានប្រាប់ភ្នំពេញប៉ុស្តិ៍នៅថ្ងៃអាទិត្យទី ១៨ ខែមេសា ឆ្នាំ ២០២១ នេះថា លោកគាំទ្រចំពោះចំណាត់ការរបស់សាលារាជធានីភ្នំពេញ ក៏ដូចជារាជរដ្ឋាភិបាលផងដែរ ក្នុងការផ្អាកបណ្តោះអាសន្ននូវមូលដ្ឋានផ្សារដើមគ និងផ្សារបន្លែដែលស្ថិតនៅជុំវិញតំបន់នោះ ប៉ុន្តែអាជ្ញាធរគួរតែមានវិធានការណាមួយផ្សេងទៀត សម្រាប់ជួយដល់អាជីវករក៏ដូចជាអ្នកដែលបាត់បង់ចំណូល។
លោកបានប្រាប់ថា៖ «ការបិទនេះនឹងធ្វើឱ្យប៉ះពាល់ដល់របររកស៊ីប្រចាំថ្ងៃ ដែលធ្វើឱ្យពួកគាត់បាត់បង់ចំណូល ហើយយើងដឹងថាផ្សារដើមគ ជាកន្លែងធំក្នុងការចែកចាយបន្លែទូទាំងប្រទេស ពិសេសតំបន់ខេត្តដែលជាប់នឹងទីក្រុងភ្នំពេញ។ នេះមិនមែនធ្វើឱ្យប៉ះពាល់តែ អាជីវករទេ តែក៏ធ្វើឱ្យមានការប៉ះពាល់ដល់អ្នកទទួលផលពីផ្សារដើមគដែរ»។
លោក វន់ ពៅ បានបន្តទៀតថា ការបិទនេះដើម្បីចូលរួមជាមួយរដ្ឋាភិបាលដើម្បីទប់ស្កាត់ការរីករាលដាលនៃជំងឺកូវីដ១៩ ដូចនេះរដ្ឋគួរតែមានវិធានការយ៉ាងណារៀបចំទីផ្សារបន្លែសុវត្ថិភាពណាមួយសម្រាប់ចែកចាយជូនដល់ពលរដ្ឋផ្សេងៗទៀតសម្រាប់ទទួលផលនៅកន្លែងដែលពួកគាត់អាចយកបន្លែសម្រាប់លក់បន្តទៀតផងដែរ៕