.jpg)
កិច្ចប្រជុំនៅសាលារាជធានីស្តីពីការបង់ថ្លៃសេវាប្រមូលសំរាមកាលពីថ្ងៃទី ១ ខែកុម្ភៈ។ រូបថត សាលារាជធានី
ភ្នំពេញ: រដ្ឋបាលរាជធានីភ្នំពេញបានប្រកាសឲ្យប្រជាពលរដ្ឋដែលរស់នៅ និងអ្នកប្រកបអាជីវកម្មក្នុងរាជធានីភ្នំពេញទាំងអស់ត្រូវបង់ថ្លៃសេវាប្រមូលសំរាមតាមប្រព័ន្ធអេឡិចត្រូនិកវិញដោយកាត់ផ្ដាច់ចេញពីវិក្កយបត្រអគ្គិសនីកម្ពុជា ជាមួយនឹងការព្រមានធ្វើការផាកពិន័យទៅតាមផ្លូវច្បាប់ បើមិនព្រមទៅបង់តាមការណែនាំ។
លោក កែវ ចាន់ណារិទ្ធ អភិបាលរងរដ្ឋាករស្វយ័តគ្រប់គ្រងសំរាម និងសំណល់រឹងរាជធានីភ្នំពេញបានថ្លែងពីថ្ងៃអាទិត្យថា រដ្ឋបាលរាជធានីភ្នំពេញបានកែសម្រួលនីតិវិធីថ្មីនៃការបង់ថ្លៃសេវាប្រមូលសំរាម ព្រោះរដ្ឋបាលរាជធានីភ្នំពេញបានកាត់ផ្ដាច់ចេញពីវិក្កយបត្រអគ្គិសនីកម្ពុជា។ តម្លៃសេវាប្រមូលសំរាមដែលត្រូវបង់តាមនីតិវិធីថ្មីនេះ មិនខុសពីតម្លៃដែលប្រជាពលរដ្ឋ ធ្លាប់បង់ភ្ជាប់ជាមួយអគ្គិសនីពីមុននោះទេពោលតម្លៃ ១ ដុល្លារ សម្រាប់ផ្ទះល្វែងនៅរក្សាដដែល ហើយតម្លៃសម្រាប់ផ្ទះអាជីវកម្មក៏នៅរក្សាដូចគ្នាដែរ។
លោកបន្តថា នីតិវិធីនៃការបង់ថ្លៃសេវាប្រមូលសំរាមថ្មីនេះ ប្រជាពលរដ្ឋអាចបង់តាមរយៈមធ្យោបាយប្រព័ន្ធអេឡិចត្រូនិកជាច្រើនដូចជាការទូទាត់អេឡិចត្រូនិក (តាមទូរស័ព្ទដៃ) ការទូទាត់នៅធនាគារ ACLEDA ឬតាមភ្នាក់ងារទូទាត់ផ្សេងៗទៀតរួមមាន ធនាគារឯកទេសវីង អ៊ីម៉ាន់នី លីហួរវេរលុយ ផៃផេ ទ្រូម៉ាន់នី។ ក្នុងមួយប្រត្តិបត្តិការចំណាយថ្លៃសេវាចាប់ពី ៥០០ រៀលទៅ ៨០០ រៀល ទៅតាមទំហំទឹកប្រាក់នៃការបង់ទូទាត់ ប៉ុន្តែប្រជាពលរដ្ឋក៏អាចបង់ជាប្រចាំឆ្នាំក៏បាន ដោយមានភាពចំណេញច្រើនគឺអស់ថ្លៃសេវាតែមួយប្រតិបត្តិការទូទាត់ប៉ុណ្ណោះ។
លោកបញ្ជាក់ថា៖ «នៅពេលយើងទៅបង់ប្រាក់នៅតាមភ្នាក់ងារទូទាត់ប្រាក់នានាប្រជាពលរដ្ឋគ្រាន់តែប្រាប់លេខសម្គាល់អតិថិជន (ID) របស់គាត់នៅក្នុងវិក្កយបត្រអគ្គិសនីជាការស្រេច។ ខ្ញុំសង្ឃឹមថា ប្រជាពលរដ្ឋ និងអ្នកបង្កើតសំរាមទាំងអស់នឹងចូលរួមចំណែកក្នុងការពង្រីកវប្បធម៌ចូលរួមក៏ដូចជាការរក្សាអនាម័យ បរិស្ថាន សោភណភាពរាជធានីភ្នំពេញឲ្យកាន់តែស្រស់ស្អាតថែមទៀត»។
លោក ចាន់ណារិទ្ធ បានសង្កត់ធ្ងន់ថាការបង់ថ្លៃសេវាប្រមូលសំរាម ប្រជាពលរដ្ឋត្រូវបង់ថ្លៃចាប់ពីថ្ងៃទី ១ ដល់ថ្ងៃទី ១៥ នៃខែបន្ទាប់ ហើយក្នុងករណីខកខានមិនបានបង់ទូទាត់ ក្រោយរយៈពេល ១៥ ថ្ងៃ នៃដំណាច់ខែនីមួយៗនឹងត្រូវចាត់ទុកជាបំណុលដែលជាកម្មវត្ថុនៃការផាកពិន័យប្រាក់ទៅតាមច្បាប់។ ដោយឡែកសម្រាប់ផ្ទះអាជីវកម្ម ភោជនីយដ្ឋាន ឬសិប្បកម្មផ្សេងៗ ប្រសិនបើមិនព្រមបំពេញកាតព្វកិច្ចនេះអាចនឹងត្រូវដកហូតលិខិតអនុញ្ញាតអាជីវកម្មជាដើម។
លោក ហេង យ៉ុនគូរ៉ា នាយកប្រតិបត្តិអង្គការកែច្នៃ និងអនាម័យសហគមន៍ (CSARO) បានថ្លែងថា លោកគាំទ្រឲ្យមានការធ្វើកំណែទម្រង់បែបនេះ ប៉ុន្ដែនៅមានប្រជាពលរដ្ឋមួយចំនួនមិនទាន់បានយល់ពីនីតិវិធីបង់តាមប្រព័ន្ធអេឡិចត្រូនិកនៅឡើយ។
លោកបញ្ជាក់ថា៖ «ខ្ញុំយល់ថា វាជាការល្អ ប៉ុន្ដែនៅមានពលរដ្ឋយើងមួយចំនួនពិបាកខ្លះដែរក្នុងការបង់តាមប្រព័ន្ធនេះព្រោះចំណេះដឹងពួកគាត់នៅមានកម្រិត។ ម្យ៉ាងទៀតខ្ញុំក៏មិនទាន់យល់ដែរថាប្រសិនដូចជាអ្នកប្រកបអាជីវកម្មគឺត្រូវការវិក្កយបត្រមកវិញដើម្បីដឹងថា យើងបង់ប៉ុន្មាន? ហើយរាយការណ៍ទៅស្ថាប័នគាត់វិញ ប៉ុន្ដែចំពោះពលរដ្ឋគ្មានអាជីវកម្មមិនមានអ្វីចោទជាបញ្ហាទេ សំខាន់ឲ្យតែចេះវិធីបង់ប្រាក់ជាការស្រេច»។
លោក យ៉ុនគូរ៉ា ជំរុញឲ្យពលរដ្ឋជួយដាក់សំរាមឲ្យដាច់ដោយឡែកពីគ្នាតាមលំដាប់ដូចជា សម្បកដបដាក់ផ្សេងកាកសំណល់ផ្ទះបាយដាក់ផ្សេង សំណល់ប្លាស្ទិកដាក់ដោយឡែក និងសំណល់រឹងដាក់ផ្សេង។ ការទុកដាក់របៀបនេះ ដើម្បីងាយស្រួលដល់អ្នកប្រមូល និងងាយស្រួលដល់អ្នកយកទៅកែច្នៃផងដែរ។
លោក ហុង សេងហាន ពលរដ្ឋម្នាក់រស់នៅសង្កាត់ស្ទឹងមានជ័យ ខណ្ឌមានជ័យថ្លែងថាលោកបានឃើញការណែនាំនេះ ប៉ុន្ដែមិនទាន់បានសាកល្បងបង់ប្រាក់តាមប្រព័ន្ធនេះនៅឡើយដោយកន្លងមកលោកធ្លាប់បង់ថ្លៃសេវាតាមរយៈអគ្គិសនីកម្ពុជា។
លោកបានបញ្ជាក់ថា៖ «ខ្ញុំបានឃើញខាងអាជ្ញាធរគេជូនដំណឹងមកខ្ញុំដែរ ប៉ុន្ដែមិនទាន់បានសាកល្បងបង់ផង ហើយខ្ញុំមិនទាន់ចេះរបៀបបង់តាមប្រព័ន្ធអេឡិចត្រូនិកហ្នឹងទេ ប្រហែលជាចាំសួរគេពីវិធីហ្នឹង»។
ទោះយ៉ាងណាលោក កែវ ចាន់ណារិទ្ធ បានឲ្យដឹងថា ចំពោះក្រុមហ៊ុនស៊ីនទ្រី (Centri) ត្រូវបានសាលារាជធានីអនុញ្ញាតឲ្យបន្តការងាររបស់គាត់ជាលក្ខណៈអន្តរកាលពោល គឺក្រុមហ៊ុនស៊ីនទ្រីអាចប្រមូលសំរាមត្រឹមចន្លោះពី ៦ ខែទៅ ៨ ខែខាងមុខនៅឆ្នាំ ២០២០ នេះ។ រដ្ឋបាលរាជធានីបាននិងកំពុងធ្វើការដាក់ដេញថ្លៃរកក្រុមហ៊ុនមកជំនួសក្រុមហ៊ុនស៊ីនទ្រីឲ្យបានឆាប់បំផុតដោយយ៉ាងយូរនៅអំឡុងខែកក្កដា ឬខែសីហា ហើយអាចនឹងមានក្រុមហ៊ុនថ្មីមកជំនួសក្រុមហ៊ុនស៊ីនទ្រីជាផ្លូវការ៕
វីដេអូ៖
