ខេត្តកណ្តាល៖ រដ្ឋបាលស្រុកខ្សាច់កណ្តាលបង្កើតផ្សារបណ្តោះអាសន្នថ្មីមួយសម្រាប់អ្នកលក់ចំនួន ១២០ តូប ដោយលក់មិនគិតថ្លៃឈ្នួលតូប ក្នុងគោលបំណងដើម្បីរក្សាគម្លាតសុវត្ថិភាពសង្គម ក្នុងកាលៈទេសៈដែលមេរោគកូវីដ ១៩ កំពុងរីករាលដាលខ្លាំង។ ផ្សារថ្មីនេះ ស្ថិតនៅក្នុងឃុំព្រែកតាមាក់ ស្រុកខ្សាច់កណ្តាល ខេត្តកណ្តាល ដែលអាចដំណើរការក្នុងពេលឆាប់ៗនេះ។
លោក ប៊ុន ផេង អភិបាលស្រុកខ្សាច់កណ្តាលប្រាប់ ភ្នំពេញ ប៉ុស្តិ៍ នៅថ្ងៃទី ២៩ ខែមេសាថា ផ្សារថ្មីនេះ ជាផ្សារបណ្តោះអាសន្ន ដោយបំបែកអ្នកលក់ពីផ្សារព្រែកតាមាក់មួយចំនួន។
លោកថ្លែងថា៖ «ផ្សារហ្នឹងមិនមែនជាផ្សារចល័តទេ គឺផ្សារបន្លែបណ្តោះអាសន្ន មាន ១២០ តូប ហើយអាជីវករយើងយកពីផ្សារព្រែកតាមាក់ ដោយយកតែអ្នកលក់បន្លែ ត្រី សាច់មកទេ ដើម្បីរក្សាគម្លាត ហើយផ្សារចាស់ដំណើរការលក់ធម្មតា តែលក់អីៗផ្សេងក្រៅពីបន្លែត្រីសាច់ហ្នឹង»។
លោក ប៊ុន ផេង ថ្លែងថា ផ្សារថ្មីនេះ បានរៀបចំរួចរាល់ហើយ ប៉ុន្តែមិនទាន់ដំណើរការបាន ដោយសារតែរង់ចាំលទ្ធផលការធ្វើតេស្តរបស់អាជីវកររកមេរោគកូវីដ ១៩ ជាមុនសិន។
លោកថ្លែងថា៖ «ផ្សារថ្មីនេះ មានគណៈកម្មការបាញ់អាល់កុល និងវាស់កម្តៅ បើសិនជាអ្នកបម្រុងចូលទៅទិញមានបញ្ហាឡើងកម្តៅខ្លួនខុសប្រក្រតីក៏មិនអនុញ្ញាតឲ្យចូលដែរ ហើយអ្នកលក់ត្រូវតែធ្វើតេស្តរកមេរោគជាមុនសិន បើមានមេរោគក៏មិនអនុញ្ញាតឲ្យចូលទៅលក់ដែរ អ៊ីចឹងយើងនឹងបើកដំណើរឲ្យពួកគាត់លក់ ក្រោយពេលបានលទ្ធផលតេស្តសំណាករបស់អាជីវករ»។
បើតាមលោកអភិបាលស្រុកខ្សាច់កណ្តាល គោលបំណងនៃការបង្កើតផ្សារនេះឡើង គឺដើម្បីកាត់បន្ថយប្រជាពលរដ្ឋជួបគ្នាច្រើននៅផ្សារ ការពារសុខសុវត្ថិភាព និងរក្សាគម្លាតរបស់ប្រជាពលរដ្ឋក្នុងមូលដ្ឋានស្រុក។ លោកថា ផ្សារថ្មីនេះផ្ដួចផ្ដើមគំនិតដោយអភិបាលខេត្តកណ្តាល និងរួមសហការរៀបចំផ្សារ ដោយលោកឧកញ៉ា ស្រី ចាន់ថន អគ្គនាយកក្រុមហ៊ុន JET’S GROUP៕