សីហនុៈ រាជរដ្ឋាភិបាលតាមរយៈក្រសួងពាក់ព័ន្ធ និងរដ្ឋបាលខេត្ដព្រះសីហនុកំពុងដំណើរការសាងសង់ហេដ្ឋារចនាសម្ព័ន្ធផ្លូវចំនួន ៣៤ ខ្សែឡើងវិញ នៅក្នុងខេត្តព្រះសីហនុដែលមានប្រវែងសរុប ៨៤ គីឡូម៉ែត្រ ខណៈថវិកាត្រូវចំណាយមានជាង ២០០ លានដុល្លារ ដោយត្រូវប្រើពេលប្រមាណ ៨ ខែ ដើម្បីបញ្ចប់ការងារនេះទាំងស្រុង។
លោក ប៉ាល់ ចន្ទតារា រដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូនបានប្រាប់ភ្នំពេញប៉ុស្ដិ៍កាលពីម្សិលមិញថា រាជរដ្ឋាភិបាលមានថវិកាគ្រប់គ្រាន់សម្រាប់សាងសង់ហេដ្ឋារចនាសម្ព័ន្ធផ្លូវ និងលូនៅក្នុងខេត្ដព្រះសីហនុឡើងវិញ ខណៈបច្ចុប្បន្នក្រុមការងារកំពុងដំណើរការការសាងសង់បណ្ដើរៗ ប៉ុន្តែគម្រោងធំបន្តក៏នឹងត្រូវដំណើរការផងដែរ។
លោកថ្លែងថា៖ «ថវិកាសម្រាប់សាងសង់ហេដ្ឋារចនាសម្ព័ន្ធផ្លូវថ្នល់ក្នុងខេត្ដព្រះសីហនុ យើងអត់ខ្វះទេ រង់ចាំតែពេលឲ្យល្អសម្រាប់ការសាងសង់ប៉ុណ្ណោះដើម្បីឲ្យការសាងសង់របស់យើងមានប្រសិទ្ធភាព និងគុណភាព»។
លោក ចន្ទតារា បញ្ជាក់ថាដំណើរការសាងសង់នេះមិនទុករយៈពេលយូរនោះគឺត្រូវធ្វើឲ្យលឿនជាទីបំផុតដោយមានក្រុមការងារជំនាញពីក្រសួងពាក់ព័ន្ធទាំងអស់បានសហការគ្នាជាមួយខេត្ដព្រះសីហនុ។
លោកបន្ដថា៖ «ឥឡូវយើងរៀបចំស្ដារហេដ្ឋារចនាសម្ព័ន្ធក្នុងខេត្ដព្រះសីហនុឲ្យស្អាតទាំងអស់ដូចជា ការរៀបចំទីក្រុងថ្មីអ៊ីចឹង។ ថវិកាសម្រាប់យកទៅស្ដារហេដ្ឋារចនាសម្ព័ន្ធផ្លូវថ្នល់នេះយើងមានអស់ហើយប្រមាណជាង ២០០ លានដុល្លារ។ ចំណែកក្រុមការងារបច្ចេកទេសក៏យើងមានអស់ហើយដែរសម្រាប់ធ្វើការងារនេះ»។
លោក ចន្ទតារា បានឲ្យដឹងថា ការស្ថាបនាផ្លូវឡើងវិញនៅក្នុងខេត្ដព្រះសីហនុនេះធ្វើឡើងជាប្រភេទផ្លូវបេតុងកម្ពស់ ២ តឹកកន្លះ និងមានអ៊ុតកៅស៊ូកម្រាស់ ៧ ហ៊ុនបន្ថែមពីលើទៀត។
លោក ឃាង ភារម្យ អ្នកនាំពាក្យរដ្ឋបាលសាលាខេត្ដព្រះសីហនុបានថ្លែងថា ផ្លូវដែលត្រូវសាងសង់ឡើងវិញនៅក្នុងខេត្ដព្រះសីហនុមានចំនួន ៣៤ ខ្សែ សរុបមានប្រវែង ៨ ៤៥០៥ ម៉ែត្រ ស្មើនឹងប្រមាណជាង ៨៤ គីឡូម៉ែត្រ ដោយត្រូវប្រើពេលប្រមាណជា ៨ ខែ។
លោកថ្លែងថា៖ «ការសាងសង់ផ្លូវនេះយើងនឹងធ្វើតាមប្លង់ប្រព័ន្ធរបស់ខេត្ដដោយមានសួនច្បារ និងផ្លូវថ្មើរជើងសម្រាប់មនុស្សដើរផងដែរ។ ចំពោះផលប៉ះពាល់តែងតែមានហើយ ប៉ុន្ដែយើងត្រូវតែធ្វើមិនអាចទុកឲ្យប៉ះពាល់តិចតួចបង្កផលលំបាកដល់សាធារណជនធ្វើដំណើរនោះទេ។ ការស្ថាបនាផ្លូវនេះនឹងចាប់ផ្ដើមធ្វើចាប់ពីខែវិច្ឆិកាខាងមុខនេះ»។
លោកបានបន្តថា ពាក់ព័ន្ធនឹងថវិកាវិញគឺពីដំបូងឡើយយើងពិភាក្សាគ្នាថា មានចំនួនកើនឡើង។ ប៉ុន្ដែក្រោយកិច្ចប្រជុំពិភាក្សាឡើងវិញកាលពីថ្ងៃអង្គារកន្លងទៅចំនួនថវិកានេះអាចមានការប្រែប្រួលខ្លះ។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនកាលពីថ្ងៃទី ៤ ខែ តុលា បានថ្លែងនៅក្នុងពេលបើកយុទ្ធនាការ «បណ្តុះបណ្តាល និងផ្សព្វផ្សាយបច្ចេកទេសជួសជុលថែទាំផ្លូវ និងការប្រើប្រាស់កម្មវិធី ថែទាំផ្លូវ (ROAD CARE Mobile App) ថាការស្តារ និងពង្រីកហេដ្ឋារចនាសម្ព័ន្ធនៅខេត្តព្រះសីហនុគឺត្រូវធ្វើឡើងជាកញ្ចប់ដ៏ធំតែម្តង។
លោកថ្លែងថា៖ «យើងនឹងរៀបចំដាក់ឱ្យមានការដាក់លូឱ្យរួចរាល់ទាំងលូទឹកភ្លៀង លូទឹកស្អុយ កន្លែងដាក់ខ្សែភ្លើង កន្លែងដាក់ខ្សែកាបទូរស័ព្ទប្រព័ន្ធទឹកស្អាត ការដាក់ភ្លើងបំភ្លឺតាមដងផ្លូវ និងរៀបចំឱ្យហើយទាំងអស់តែម្តងក្នុងកញ្ចប់តែមួយ ដើម្បីកុំឱ្យបងប្អូនប្រជាពលរដ្ឋចេះតែរអ៊ូថា ពេលធ្វើផ្លូវកាយផ្លូវដាក់លូដល់ពេលដាក់លូកាយផ្លូវវិញ។
ដូច្នេះក្រុងព្រះសីហនុនេះនឹងក្លាយជាក្រុងដំបូងគេដែលអនុវត្តផែនការនេះ»។
លោកនាយករដ្ឋមន្ត្រី ហ៊ុន សែន កាលពីថ្ងៃទី ៤ ខែ កញ្ញា បានអនុម័តថវិកាចំនួន ១០០ លានដុល្លារអាមេរិក សម្រាប់សាងសង់ និងស្តារ ហេដ្ឋារចនាសម្ព័ន្ធក្នុងខេត្តព្រះសីហនុ ខណៈរដ្ឋមន្ត្រីក្រសួងសាធារណការបញ្ជាក់ថា ការដោះស្រាយបញ្ហាផ្លូវ និងទឹកកខ្វក់ក្នុងក្រុងព្រះសីហនុគឺត្រូវការលុយរាប់រយលានទៀត។
អ្នកស្រី ជៀប សុធារី មន្ដ្រីសម្របសម្រួលសមាគមសិទ្ធិមនុស្សអាដហុកប្រចាំខេត្ដព្រះសីហនុ បានគាំទ្រចំពោះគម្រោងនៃការសាងសង់ផ្លូវឡើងវិញនៅក្នុងខេត្តព្រះសីហនុនេះ។
អ្នកស្រីថ្លែងថា៖ «ខ្ញុំគាំទ្ររដ្ឋបាលខេត្ដឱ្យពង្រីកផ្លូវនេះទៅតាមប្លង់ប្រព័ន្ធរបស់ខេត្ត។ ពិតប្រាកដណាស់ ការធ្វើផ្លូវនេះនឹងមានការប៉ះពាល់ដល់ផ្ទះប្រជាពលរដ្ឋមួយចំនួនដែលរស់នៅលើចំណីផ្លូវ ប៉ុន្ដែពលរដ្ឋខ្លះពួកគាត់បានពង្រីកផ្ទះរបស់ពួកគាត់មកលើចំណីផ្លូវដើម្បីប្រកបអាជីវកម្មដែលជាហេតុនាំឲ្យមានការកកស្ទះចរាចរណ៍ដូចសព្វថ្ងៃនេះផងដែរ»៕