ភ្នំពេញៈ រដ្ឋមន្ត្រីកម្ពុជាចំនួន ៤ រូបនឹងទៅធ្វើទស្សនកិច្ចនៅប្រទេស អាល្លឺម៉ង់ ចាប់ពីថ្ងៃទី ២៤ ដល់ថ្ងៃទី ៣០ ខែ កញ្ញា ដើម្បីស្វែងយល់បន្ថែមអំពីប្រព័ន្ធវិមជ្ឈការរបស់អាល្លឺម៉ង់។
លោក ខៀវ សុភ័គ អ្នកនាំពាក្យក្រសួងមហាផ្ទៃបានប្រាប់សារព័ត៌មាន Swift News កាលពីថ្ងៃព្រហស្បតិ៍ថា ដំណើរទស្សនកិច្ចទៅកាន់ប្រទេស អាល្លឺម៉ង់នេះ ដោយសារតែអាល្លឺម៉ង់បានសន្យាធ្វើកិច្ចសហការជាមួយរដ្ឋាភិបាលក្នុងអាណត្តិទី៦ នេះ។
លោកឲ្យដឹងថា ដំណើរទស្សនកិច្ចខាងមុខ នឹងធ្វើឡើងដោយលោក ស ខេង រដ្ឋមន្ត្រីក្រសួងមហាផ្ទៃ លោក ហង់ ជួនណារ៉ុន រដ្ឋមន្ត្រីក្រសួងអប់រំ លោក សាយ សំអាល់ រដ្ឋមន្ត្រីក្រសួងបរិស្ថាន និងលោក ម៉ម ប៊ុនហេង រដ្ឋមន្ត្រីក្រសួងសុខាភិបាល។
ភ្នំពេញប៉ុស្តិ៍មិនអាចទាក់ទងលោក ខៀវ សុភ័គ ដើម្បីបញ្ជាក់បន្ថែមបានទេកាលពីម្សិលមិញ។
ប៉ុន្តែ លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានបញ្ជាក់ថា លោក ហង់ ជួនណារ៉ុន នឹងធ្វើដំណើរទៅទស្សនកិច្ចនៅអាល្លឺម៉ង់ពិតមែន។
លោកថ្លែងថា ដំណើរទស្សនកិច្ចនេះ គឺដើម្បីពង្រឹងការងារវិមជ្ឈការ និងវិសហមជ្ឈការវិស័យអប់រំ យុវជន និងកីឡាឱ្យកាន់តែមានប្រសិទ្ធភាព និងប្រសិទ្ធផល ក្នុងការអនុវត្តនាពេលអនាគត។
លោកបានថ្លែងថា៖ «ដំណើរទស្សនកិច្ចនាចុងខែកញ្ញានេះ នឹងផ្តល់ឱកាសជូនប្រទេស កម្ពុជា និងប្រទេស អាល្លឺម៉ង់ ពង្រឹងកិច្ចសហប្រតិបត្តិការទ្វេភាគី និងផ្តល់មេរៀនបន្ថែម ស្តីពីវិមជ្ឈការនៅអាល្លឺម៉ង់លើវិស័យពាក់ព័ន្ធ»។
លោក Benjamin Knoedler អ្នកនាំពាក្យស្ថានទូតអាល្លឺម៉ង់ប្រចាំកម្ពុជាបានថ្លែងថា អាល្លឺម៉ង់គាំទ្រដល់រាជរដ្ឋាភិបាលកម្ពុជាក្នុងការធ្វើវិមជ្ឈការក្នុងផ្ដល់សេវាសាធារណៈជាង ១ ទសវត្សរ៍មកហើយ ដូច្នេះក្រសួងសហព័ន្ធអាល្លឺម៉ង់សម្រាប់សហប្រតិបត្តិការសេដ្ឋកិច្ច និងអភិវឌ្ឍន៍ បានអញ្ជើញប្រតិភូទៅចូលរួមដំណើរទស្សនកិច្ចអំពីវិមជ្ឈការនៅអាល្លឺម៉ង់ នៅចុងខែកញ្ញានេះ។
លោកបានថ្លែងថា៖ «តបតាមការស្នើសុំរបស់រាជរដ្ឋាភិបាល ដំណើរទស្សនកិច្ចនឹងពាក់ព័ន្ធនឹងការផ្ដល់សេវាថ្នាក់មូលដ្ឋានក្នុងវិស័យសុខាភិបាល អប់រំ ការគ្រប់គ្រងសំណល់រឹង និងព្រៃឈើ។ គោលនយោបាយលើប្រធានបទទាំងនេះមានទំនាក់ទំនងគ្នាយ៉ាងខ្លាំងទៅលើបរិបទនៃប្រទេស កម្ពុជា»។
លោកបានថ្លែងបន្ថែមថា អាល្លឺម៉ង់មានភាពល្បីល្បាញ ដោយសារតែអភិបាលកិច្ចប្រកបដោយវិមជ្ឈការ។ ខណៈពេលដែលបរិបទកម្ពុជា និងអាល្លឺម៉ង់មានភាពខុសគ្នា ដំណើរទស្សនកិច្ចនេះធ្វើឡើងក្នុងគោលបំណងលើកទឹកចិត្តលើការងារវិមជ្ឈការដែលកំពុងតែធ្វើឡើងនៅក្នុងប្រទេស កម្ពុជា។
លោក Benjamin បន្ថែមថា ក្រៅពីជួបមន្ត្រីថ្នាក់មូលដ្ឋាន ប្រតិភូក៏នឹងជួបជាមួយមន្ត្រីនៃការិយាល័យកិច្ចការបរទេសអាល្លឺម៉ង់ ក្រសួងមហាផ្ទៃនៃសហព័ន្ធអាល្លឺម៉ង់ ក្រសួងសហព័ន្ធអាល្លឺម៉ង់សម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ ក៏ដូចជាជួបជាមួយសមាជិកសភាអាល្លឺម៉ង់ផងដែរ។
លោកថ្លែងថា៖ «ប្រតិភូនឹងដឹកនាំដោយលោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស ខេង»។ ទោះយ៉ាងណា លោកថា កម្មវិធីលម្អិតភាគីអាល្លឺម៉ង់កំពុងរៀបចំ។
ទស្សនកិច្ចជាន់ខ្ពស់នេះ ត្រូវបានលោក ឡៅ ម៉ុងហៃ លើកឡើងថា ប្រហែលជាជាប់ពាក់ព័ន្ធនឹងរឿងប្រព័ន្ធអនុគ្រោះពន្ធ EBA។
លោកថ្លែងថា៖ «ទស្សនកិច្ចទៅកាន់ប្រទេសដែលមានឥទ្ធិពលបំផុតក្នុងសហភាពអឺរ៉ុប អាចជួយឲ្យមានការសម្របសម្រួលរវាងសហភាពអឺរ៉ុប និងកម្ពុជារឿង EBA»៕