.jpg)
លោក វេង សាខុន (ឆ្វេង) នៅពេលចុះទៅខេត្តកោះកុងកាលពីថ្ងៃទី ២៤ ខែឧសភា។ រូបថត ក្រសួងកសិកម្ម
កោះកុង: រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលោក វេង សាខុន បានស្នើឲ្យក្រុមហ៊ុនដែលទទួលបានដីសម្បទានសេដ្ឋកិច្ចពីរាជរដ្ឋាភិបាល នៅក្នុងខេត្តកោះកុងត្រូវសហការជាមួយរដ្ឋបាលព្រៃឈើ មន្ទីរកសិកម្ម និងអាជ្ញាធរមូលដ្ឋានឲ្យបានពេញលេញ ដើម្បីទប់ស្កាត់ការរំលោភយកដីព្រៃធ្វើជាកម្មសិទ្ធិ។ នេះបើតាមគេហទំព័រហ្វេសប៊ុកក្រសួងកសិកម្ម។
លោក វេង សាខុន បានថ្លែងបែបនេះក្នុងអំឡុងពេលលោកដឹកនាំក្រុមមន្ត្រីចុះពិនិត្យ និងវាយតម្លៃអំពីវឌ្ឍនភាពនៃការអភិវឌ្ឍដំណាំកសិឧស្សាហកម្ម និងកែច្នៃកសិផលសម្រាប់នាំចេញរបស់ក្រុមហ៊ុន Greenrich group Co., Ltd ដែលទទួលបានដីសម្បទានសេដ្ឋកិច្ចជាង ៦ ម៉ឺនហិកតានៅតំបន់ឧទ្យានជាតិ បទុមសាគរក្នុងស្រុកកោះកុងកាលពីថ្ងៃទី ២៤ ខែឧសភា។
លោក កែវ អូម៉ាលីស្ស ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលព្រៃឈើមិនអាចទាក់ទងសុំការបញ្ជាក់ជុំវិញការលើកឡើងរបស់លោក វេង សាខុនបានទេកាលពីម្សិលមិញដោយទូរស័ព្ទមិនអាចទាក់ទងបាន។ ចំណែកលោក អេង ជាសាន ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផលបានចុចផ្ដាច់ទូរស័ព្ទ។
លោក វេង សាខុន ថ្លែងទៀតថា លោកបានស្នើឲ្យក្រុមហ៊ុនទាំងអស់ យកចិត្តទុកដាក់អំពីសុខភាព ជីវភាពប្រចាំថ្ងៃ និងចំណូលគ្រួសាររបស់កម្មករដោយបង្កើតរបរកសិកម្មបន្ថែមដូចជា ចិញ្ចឹមសត្វ និងដាំបន្លែដើម្បីផ្គត់ផ្គង់ជីវភាពគ្រួសារ។
លោកបញ្ជាក់ថា៖ «ក្រុមហ៊ុនត្រូវតែសហការឲ្យបានពេញលេញជាមួយរដ្ឋបាលព្រៃឈើ មន្ទីរកសិកម្ម រុក្ខាប្រមាញ់ និងនេសាទខេត្ត និងអាជ្ញាធរមូលដ្ឋាន ដើម្បីការពារដីព្រៃ និងទប់ស្កាត់ការរំលោភយកដីធ្វើជាកម្មសិទិ្ធ។ ក្រុមហ៊ុនគួរតែពន្លឿនសកម្មភាពប្រមូលផល កែច្នៃ និងធ្វើការដាំដុះលើដីដែលនៅសេសសល់ឲ្យគ្រប់តាមផែនការដែលបានគ្រោងទុក»។
លោកបន្ថែមថា ក្រសួងនឹងរង់ចាំផ្តល់កិច្ចសហការជាមួយក្រុមហ៊ុនក្នុងបំណងជួយលើកទឹកចិត្ត និងគាំទ្រលើការវិនិយោគរបស់ក្រុមហ៊ុន ដើម្បីលើកកម្ពស់សមត្ថភាពផ្គត់ផ្គង់ផលិតផលឈើដាំឧស្សាហកម្មលើទីផ្សារក្នុង និងក្រៅប្រទេសធ្វើការប្រកួតប្រជែង ជំរុញការប្រើប្រាស់ផលិតផលឈើដាំកាត់បន្ថយការប្រើប្រាស់ឈើធម្មជាតិ និងជាពិសេសបង្កើត និងរក្សាបាននូវគម្របព្រៃឈើ បង្កើតការងារ បង្កើនចំណូលរក្សាបរិស្ថានក្នុងតំបន់នេះ និងនិរន្តរភាពសេដ្ឋកិច្ចជាតិ។
លោកស្រី មិថុនា ភូថង អភិបាលខេត្តកោះកុងមិនអាចទាក់ទងសុំការបញ្ជាក់ជុំវិញបញ្ហានេះបានទេ ដោយទូរស័ព្ទលោកស្រីគ្មានអ្នកទទួល។ ចំណែកលោក សុខ សុធី អ្នកនាំពាក្យខេត្តកោះកុងបានថ្លែងថា លោកមិនមានព័ត៌មានទាក់ទងនឹងក្រុមហ៊ុនដីសម្បទាននេះទេ ដោយជំរុញឲ្យសួរទៅប្រធានមន្ទីរកសិកម្មលោក អ៊ី ម៉េងលាង ដែលមិនអាចទាក់ទងបាន។
គេហទំព័រហ្វេសប៊ុកក្រសួងកសិកម្មបានដកស្រង់សម្ដីលោក រតនា តំណាងក្រុមហ៊ុន Greenrich group Co., Ltd ដែលរាយការណ៍ជូនលោករដ្ឋមន្ត្រីថា ក្រុមហ៊ុន Greenrich group ជាក្រុមហ៊ុនបុត្រសម្ព័ន្ធរបស់ក្រុមហ៊ុន ASIA PULP & PAPER (APP) ដែលជាក្រុមហ៊ុនផលិតក្រដាសលំដាប់លេខ ១ នៅអាស៊ី និងជាក្រុមហ៊ុន ១ ក្នុងចំណោម ១០ ក្រុមហ៊ុនដែលផលិតក្រដាសធំជាងគេលើពិភពលោក។
លោកបន្តថា ក្រុមហ៊ុនបានចាប់ផ្តើមអនុវត្តគម្រោងអភិវឌ្ឍឧស្សាហកម្មដាំដើមកាស្យាលើដីសម្បទានសេដ្ឋកិច្ចជាង ១ ម៉ឺនហិកតា ក្នុងស្រុកកោះកុងគឺដាំដើមឈើផលិតក្រដាសផ្តល់ប្រយោជន៍ដល់មនុស្សលោក។ គិតចាប់ពីឆ្នាំ ២០០៧ ដល់ឆ្នាំ ២០១៥ ក្រុមហ៊ុនធ្វើការដាំដុះបាន ៥៨៧៧ ហិកតាទទួលបានទិន្នផល ១៣៨ តោនក្នុង ១ ហិកតាសរុបរួមបរិមាណឈើ ៨០ ម៉ឺនតោន។
លោកបន្តថា កន្លងមកក្រុមហ៊ុនបាននាំចេញចំណិតឈើសរុបជាង ១១ ម៉ឺនតោន (ឈើរបស់ក្រុមហ៊ុន និងឈើប្រមូលទិញពីចម្ការឯកជន)។ ក្នុងអំឡុងប្រតិបត្តិការ ក្រុមហ៊ុនត្រូវការកម្លាំងពលកម្មចំនួន ២៥០០ នាក់។ ក្រុមហ៊ុនបានកសាងហេដ្ឋារចនាសម្ព័ន្ធផ្លូវថ្នល់សាលារៀន និងប្រព័ន្ធផ្គត់ផ្គត់ទឹកសម្រាប់បុគ្គលិក កម្មករក្នុងក្រុមហ៊ុនទាំងមូល។ ក្រៅពីសមិទ្ធផលដែលសម្រេចបានក្រុមហ៊ុនកំពុងប្រឈមបញ្ហាមួយចំនួនដូចជាការកាប់ទន្ទ្រានដីយកជាកម្មសិទ្ធិ និងការធ្វើផ្លូវកាត់ដីក្រុមហ៊ុនពីសំណាក់ប្រជាពលរដ្ឋ។
លោកថា ក្រុមហ៊ុននឹងសហការជាមួយក្រសួងបរិស្ថាន និងអាជ្ញាធរពាក់ព័ន្ធដើម្បីវាយតម្លៃពីផលប៉ះពាល់បរិស្ថាន និងសង្គមពេញលេញក្នុងការចុះបញ្ជីដីរដ្ឋ ចាប់ផ្តើមប្រមូលផលឈើ និងដាំដុះឡើងវិញដើម្បីផ្តល់ប្រយោជន៍សម្រាប់សង្គមបរិស្ថាន និងសេដ្ឋកិច្ច និងជាពិសេសសហការជាមួយក្រសួងកសិកម្ម ក្នុងការរៀបចំផែនការដាំឈើក្នុងឆ្នាំ ២០២០។
លោក ហោ អ៊ិន មន្ត្រីសម្របសម្រួលផ្នែកសិទ្ធិមនុស្សនៃអង្គការលីកាដូបានថ្លែងពីម្សិលមិញថា លោកគាំទ្រចំពោះការលើកឡើងរបស់លោករដ្ឋមន្ត្រី វេង សាខុន ដែលស្នើឲ្យក្រុមហ៊ុនទទួលបានដីសម្បទានសេដ្ឋកិច្ចពីរដ្ឋាភិបាល សហការជាមួយអាជ្ញាធរ និងមន្ត្រីជំនាញ ដើម្បីទប់ស្កាត់ការកាប់បំផ្លាញព្រៃឈើ និងការទន្ទ្រានដីព្រៃរបស់រដ្ឋ។
លោកបន្តថា កិច្ចសហការនេះមិនមែនត្រឹមតែខេត្តកោះកុងមួយទេ ចំពោះខេត្តដទៃទៀតដែលកំពុងមានទំនាស់ដីធ្លីក៏ត្រូវតែសហការជាមួយអាជ្ញាធរ និងមន្ត្រីជំនាញ ដើម្បីដោះស្រាយទំនាស់ដីធ្លីជាមួយប្រជាពលរដ្ឋ ក៏ដូចជាចៀសវាងការកាប់បំផ្លាញព្រៃឈើខុសច្បាប់។ «ក្រុមហ៊ុនដែលកំពុងមានទំនាស់ដីធ្លីជាមួយពលរដ្ឋគួរបង្ហាញពីឆន្ទៈស្មោះត្រង់ចង់ដោះស្រាយបញ្ហាដែលនៅសេសសល់ មិនគួរទុកឲ្យបញ្ហាអូសបន្លាយរាប់ឆ្នាំទេ គឺវាធ្វើឲ្យខាតបង់ពេលវេលា និងលុយកាក់ពលរដ្ឋ។ បញ្ហាទំនាស់ដីធ្លីនៅខេត្តកោះកុងនេះនៅមិនទាន់ដោះស្រាយចប់ទាំងស្រុងទេនៅស្រុកគិរីសាគរ ដោះស្រាយបានខ្លះនៅស្រុកបទុមសាគរក៏នៅសេសសល់មួយចំនួនដែរ»៕
វីដេអូ៖
