The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋមន្ត្រី​ការពារជាតិ​កម្ពុជា-វៀតណាម​ សហប្រតិបត្តិការ​ប្រឆាំង​កូវីដ ​១៩




រដ្ឋមន្ត្រី​ការពារជាតិ​កម្ពុជា-វៀតណាម​ សហប្រតិបត្តិការ​ប្រឆាំង​កូវីដ ​១៩

Content image - Phnom Penh Post
លោក ទៀ បាញ់ រដ្ឋមន្ត្រី​ក្រសួង​ការពារជាតិ​។ រូបថត ហ្វេសប៊ុក

រដ្ឋមន្ត្រី​ការពារជាតិ​កម្ពុជា-វៀតណាម​ សហប្រតិបត្តិការ​ប្រឆាំង​កូវីដ ​១៩

ភ្នំពេញៈ លោក​ ទៀ បាញ់ ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួង​ការពារ​ជាតិ​កម្ពុជា​ និង​មន្ត្រី​យោធា​ជាន់ខ្ពស់​មួយចំនួន​បាន​បើក​កិច្ចសន្ទនា​តាមរយៈ​បច្ចេកវិទ្យា​បន្ទាន់ (Hot Line) កាលពី​ម្សិលមិញ​ជាមួយ​សមភាគី​វៀតណាម ដែល​ដឹកនាំ​ដោយ​លោក ង៉ូ ស៊ុនលិច្ស រដ្ឋមន្ត្រី​ការពារជាតិ​វៀតណាម​ដោយ​ភាគី​ទាំង​ ២ ​បាន​ពិភាក្សា​លើ​កិច្ចសហប្រតិបត្តិការ​ប្រយុទ្ធប្រឆាំង​ជំងឺឆ្លង​កូវីដ​ ១៩​។

លោក ទៀ បាញ់ បាន​ប្រាប់​ភ្នំពេញ​ប៉ុស្ដិ៍​កាលពី​ម្សិលមិញ​ថា លោក​បាន​ថ្លែងអំណរគុណ​ដល់​ភាគី​វៀតណាម​ដែល​បាន​ផ្ដល់​សម្ភារ​មួយចំនួន​ដល់​កម្ពុជា ដើម្បី​ប្រយុទ្ធប្រឆាំង​ជំងឺ​កូវីដ​ ១៩ រួមទាំង​កិច្ចសន្ទនា​ទៅលើ​បញ្ហា​មួយចំនួន​ទៀត ដែល​ប្រទេស​ទាំង​ ២ ​ត្រូវ​ពង្រឹង​កិច្ចសហប្រតិបត្តិការ​គ្នា​បន្ថែមទៀត​។

លោក​បញ្ជាក់ថា មូលហេតុ​នាំឱ្យ​កើតមាន​កិច្ចសន្ទនា​នេះ គឺ​ដោយសារ​លោក និង​លោក ង៉ូស៊ុនលិច្ស ខាន​ជួប​ពិភាក្សា​គ្នា​យូរ​បន្ទាប់ពី​ផ្ទុះឡើង​ជំងឺឆ្លង​កូវីដ​ ១៩​។

លោក ទៀ បាញ់ បាន​ថ្លែងថា​៖ «​ធម្មតា! ការសន្ទនា​គ្នា​គឺ​បាន​ថ្លែង​ពី​ការយោគយល់ និង​ការយល់ដឹង​ពី​គ្នា​នូវ​អ្វី​ដែល​ត្រូវ​សហការ​គ្នា​ដើម្បី​ពង្រឹង​បន្តទៀត ក៏ដូចជា​ការថ្លែងអំណរគុណ​អំពី​ការគ្រប់គ្រង​កូវីដ​ជាមួយ​គ្នា​ដែល​ធ្វើ​បានល្អ ទាំង​សិក្ខាកាម​កម្ពុជា​រៀន​នៅ​វៀតណាម​។ ការសន្ទនា​គ្នា វា​សុទ្ធតែ​ផ្ដល់​ផលប្រយោជន៍​សម្រាប់​ប្រទេស​ទាំង​សងខាង ដើម្បី​ពង្រឹង​កិច្ចការងារ​មួយចំនួន​ឱ្យ​វា​បាន​កាន់តែ​ល្អ​ថែមទៀត​។ (​យើង​) ​ពិភាក្សា​តែ​លើ​កិច្ចសហប្រតិបត្តិការ​តែ​ប៉ុណ្ណោះ​ហ្នឹងឯង​»​។

ថ្វីដ្បិត​លោក ទៀ បាញ់ ថា​កម្ពុជា-វៀតណាម​មាន​កិច្ចសហប្រតិបត្តិការ​គ្នា​ល្អ​ក្នុងការ​ប្រយុទ្ធប្រឆាំង​ជំងឺ​កូវីដ​១៩ ប៉ុន្តែ​កន្លងមក​ក្រសួង​សុខាភិបាល​កម្ពុជា ធ្លាប់បាន​បដិសេធ​ចំពោះ​សេចក្ដី​រាយការណ៍​របស់​ក្រសួង​សុខាភិបាល​វៀតណាម​ដែល​អះអាង​ថា មាន​អ្នកដំណើរ​ចេញពី​កម្ពុជា​មួយចំនួន​បាន​ឆ្លង​ជំងឺ​នេះ និង​ធ្វើ​ដំណើរ​ទៅកាន់​ប្រទេស​វៀតណាម​។

កាលណោះ ក្រសួង​សុខាភិបាល​កម្ពុជា​បានចាត់ទុក​ការផ្សព្វផ្សាយ​ព័ត៌មាន​ពី​ភាគី​ក្រសួងសុខាភិបាល​វៀតណាម ថា​ជា​ព័ត៌មាន​មិន​ពិត និង​មិនបាន​ផ្ដល់​កិច្ចសហការ​ដើម្បី​ផ្ដល់​ដំណឹង​ឱ្យ​គ្នា​ទៅវិញទៅមក មុន​ប្រកាស​ព័ត៌មាន​ជា​សាធារណៈ​ដែល​ធ្វើឱ្យ​ប៉ះពាល់​ធ្ងន់ធ្ងរ​ដល់​កិច្ចខិតខំ​ប្រឹងប្រែង​របស់​រដ្ឋាភិបាល​កម្ពុជា​ក្នុង​ការទប់ស្កាត់​ជំងឺ​កូវីដ​ ១៩​។

កាលពី​ថ្ងៃ​ម្សិលមិញ ក្រសួង​សុខាភិបាល​កម្ពុជា​បាន​រាយការណ៍​ថា អ្នកជំងឺ​ម្នាក់ទៀត​បាន​ជា​សះស្បើយ និង​ចេញពី​មន្ទីរពេទ្យ​ដែល​បាន​ធ្វើឱ្យ​អ្នក​ជាសះស្បើយ​ពី​ជំងឺ​នេះ​សរុប​កើន​ដល់​ ២៧៣ ​នាក់​ក្នុង​ចំណោម​អ្នកឆ្លង​ទាំងអស់​ចំនួន​ ២៧៤ ​នាក់​ដែល​បាន​រកឃើញ​នៅ​កម្ពុជា​តាំងពី​ថ្ងៃទី​ ២៧ ខែមករា​។ ក្នុង​រយៈពេល​ជិត​ ៣០ ​ថ្ងៃ​ចុងក្រោយ​នេះ​គឺ​កម្ពុជា​បាន​រកឃើញ​ករណី​នាំចូល​ជំងឺ​កូវីដ​ ១៩​ តែ​ ១ ​ករណី​ប៉ុណ្ណោះ ក្រោយពី​មាន​ការបិទ​ជើងហោះហើរ​មកពី​ហ្វីលីពីន ឥណ្ឌូនេស៊ី និង​ម៉ាឡេស៊ី ជា​ប្រទេស​កំពុង​ឆ្លង​រាលដាល​ខ្ពស់​។

ទោះជា​យ៉ាងណា​កាលពី​ថ្ងៃ​ម្សិលមិញ​លោក ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​បាន​សរសេរ​សារ​បង្ហោះ​នៅក្នុង​ហ្វេសប៊ុក​ដោយ​បាន​​អំពាវនាវ​គ្រូបង្រៀន និង​សិស្ស​ទាំងអស់​ត្រូវ​ប្រកាន់ខ្ជាប់​ការអនុវត្ត​វិធានការ​ការពារ​សុវត្ថិភាព​សុខភាព​ជានិច្ច ដើម្បី​ការពារ​ការចម្លង​ជំងឺ​កូវីដ​១៩ ជាពិសេស​បន្ត​បង្ហាត់​សិស្ស​ឱ្យ​ឧស្សាហ៍​លាង​សម្អាត​ដៃ​ជាមួយ​សាប៊ូ ​ជែល ទឹក​អាល់កុល និង​ពាក់​ម៉ាស់​តាម​ការណែនាំ​របស់​ក្រសួង​សុខាភិបាល​។

ការអំពាវនាវ​នេះ​ធ្វើឡើង​ ១ ​ថ្ងៃ បន្ទាប់ពី​ការបើក​ដំណើរការ​សាលារៀន​ដំណាក់កាល​ទី​ ២ បានចាប់ផ្ដើម​នៅ​ថ្ងៃទី​ ៧ ​កញ្ញា ​គឺ​ការបើក​សាលារៀន​ចាប់ពី​ថ្នាក់​មតេ្តយ្យ​សិក្សា​រហូតដល់​មធ្យមសិក្សា​មួយចំនួន និង​ថ្នាក់​ទី​ ៩ ​ដល់​ ១២ ​នៅ​ទូទាំង​ប្រទេស​។

ពាក់ព័ន្ធ​នឹង​ការប្រយុទ្ធ​ប្រឆាំង​ជំងឺ​កូវីដ​ ១៩​ នេះ​ លោក Antonio Guterres អគ្គលេខាធិការ​អង្គការ​សហប្រជាជាតិ​ក៏​បាន​ថ្លែងអំណរគុណ​លោក​នាយករដ្ឋមន្ត្រី ហ៊ុន សែន ដែល​បាន​បង្ហាញ​អំពី​ការប្ដេជ្ញាចិត្ត​ក្នុង​ការប្រយុទ្ធប្រឆាំង​ការរាតត្បាត​ជំងឺ​កូវីដ​ ១៩​ ជា​សកល ដោយ​បាន​ជួយ​សម្រួលការ​ធ្វើដំណើរ​របស់​ក្រុមគ្រូពេទ្យ និង​ក្រុម​ការងារ​មនុស្សធម៌​បាន​ទៅកាន់​ប្រទេស​មួយចំនួន ដើម្បី​ផ្ដល់​សេវា​ដល់​អ្នក​ងាយ​រងគ្រោះ​បំផុត​។ នេះ​យោងតាម​លិខិត​ ១ ​ផ្សព្វផ្សាយ​កាលពី​ថ្ងៃទី​ ៧ ខែ​កញ្ញា​៕

អត្ថបទគួរចាប់អារម្មណ៍

  • ភ្នំពេញៈ ប្រទេស​ កាតា បាន​ចុះ​អនុស្សរណៈ​ជាមួយ​ក្រសួង​អប់រំ យុវជន និង​កីឡា​លើ​គម្រោង​អភិវឌ្ឍន៍​ដើម្បី​កុមារ​ដំណាក់កាល​ទី​២ ដោយ​ផ្ដល់​មូលនិធិ​ជា​ថវិកា​ជាង​ ១៣ ​លាន​ដុល្លារ​អាមេរិក ដើម្បី​រួមចំណែក​ពង្រឹង​វិស័យ​អប់រំ​កម្ពុជា​ដោយ​ផ្ដោតលើ​កុមារ​ងាយ​រងគ្រោះ​ក្នុង​ការសិក្សា​នៅ​កម្រិត​បឋមសិក្សា ស្របតាម​គោលដៅ​អភិវឌ្ឍន៍​ប្រកប​ដោយ​ចីរភាព​ឆ្នាំ​ ២០៣០​។

  • ភ្នំពេញៈ ក្រុមហ៊ុន Asiatic Group (Holdings) Ltd ដែលមាន​មូលដ្ឋាន​នៅ​ប្រទេស​សិង្ហបុរី​កំពុង​ស្វែងរក​ការទាមទារ​ទឹកប្រាក់​ចំនួន​ ១៤,៤ ​លាន​ដុល្លារ​ ពី​ក្រុមហ៊ុនតំបន់​សេដ្ឋកិច្ច​ពិសេស​ភ្នំពេញ (PPSP) ​ដែល​ចុះបញ្ជី​នៅ​ក្រុមហ៊ុន​ផ្សារមូលបត្រ​កម្ពុជា (CSX) ចំពោះ​ការចោទប្រកាន់​ដែល​ថា​បាន​រំលោភ​លើ​កិច្ចព្រមព្រៀង​វិនិយោគ​រួម (JV) នៃ​រោងចក្រ​ថាមពល​មួយ​។

  • ភ្នំពេញៈ មន្ត្រី​នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ​បាន​អះអាង​ថា កម្ពុជា និង​សិង្ហបុរី​បាន​ប្តេជ្ញា​បន្ត​កិច្ចសហការ​គ្នា​ឱ្យ​កាន់តែ​រឹងមាំ​ថែមទៀត ក្នុង​ការពង្រីក​លើ​វិស័យ​ការងារ និង​បណ្តុះបណ្តាល​ធនធាន​មនុស្ស​របស់​កម្ពុជា​ជាពិសេស​នៅក្នុង​បរិបទ​នៃ​ជំងឺ​​កូវីដ ​១៩​។

  • ភ្នំពេញ៖ ត្រឹមតែ​រយៈពេល ​១០ ​ខែ​ ភោជនីយដ្ឋាន ​Uncle Fu បាន​ធ្វើ​ឱ្យ​ភ្ញៀវ​​ចម្រុះ​ជាតិ​សាសន៍​ជាប់​ចិត្ត​នឹង​រសជាតិ​​ម្ហូប​ម៉ាឡេស៊ី​ និង​សិង្ហបុរី​។

  • កំពតៈ រោងចក្រ​ផលិត​ឥដ្ឋ​ដ៏ធំ​មួយ​ក្នុង​ខេត្តកំពត ដែល​មាន​ទុនវិនិយោគ ៩ ​លាន​ដុល្លារ​ជា​ការវិនិយោគ​រួមគ្នា​រវាង​វិនិយោគិន​ក្នុងស្រុក និង​វិនិយោគិន​មកពី​ប្រទេស​ចិន​បាន​សម្ពោធ​បើក​ដំណើរការ​ជា​ផ្លូវការ​ហើយ​កាលពី​ថ្ងៃអាទិត្យ ដោយ​អាចមាន​សមត្ថភាព​ផលិត​ឥដ្ឋ​បាន​ប្រមាណ ៨០ ​ម៉ឺន​ដុំ​ក្នុង​ ១ ​ថ្ងៃ​។

  • ភ្នំពេញៈ អគ្គស្នងការរង​នគរបាល​ជាតិ លោក ស ថេត ជំរុញ​ឱ្យ កងកម្លាំង​ប្រដាប់អាវុធ និង​មន្ត្រីរាជការ​ត្រូវ​ធ្វើជា​គំរូ​ដ៏ល្អ​សម្រាប់​ប្រជាពលរដ្ឋ​ទូទៅ​ក្នុង​ការគោរព​ច្បាប់​ចរាចរណ៍​នៅលើ​ដងផ្លូវ ដោយ​លោក​ប្រាប់​ឱ្យ​មន្ត្រី​នគរបាល​ចរាចរណ៍​កុំ​ភ័យខ្លាច​ក្នុង​ការអនុវត្ត​ច្បាប់​លើ​មន្ត្រី​ជាន់ខ្ពស់​ណា​ដែល​ប្រព្រឹត្ត​ខុស ខណៈ​ការបើកបរ​ល្មើសច្បាប់​នៅតែ​ជា​បញ្ហា​សម្រាប់​កម្ពុជា​។