ភ្នំពេញ៖ រដ្ឋមន្ត្រីក្រសួងការពារជាតិលោក ទៀ បាញ់ លើកឡើង ថាសំណង់វិមានឈ្នះ ឈ្នះ គឺជាសញ្ញាមួយបង្ហាញនូវអត្តសញ្ញាណជាតិ ការសាមគ្គីជាតិ និងរួបរួមគ្នា ដើម្បីសុខសន្តិភាពរហូតដល់សព្វថ្ងៃនេះ និងបានក្លាយទៅជាមជ្ឈមណ្ឌលមួយដ៏ធំនៅក្នុងរាជធានីភ្នំពេញ សម្រាប់ភ្ញៀវជាតិ និងអន្តរជាតិយល់ដឹង កាន់តែច្បាស់អំពីប្រវត្តិសាស្ត្រខ្មែរពិតប្រាកដ និងក៏ជាទីកន្លែងសម្រាប់ភ្ញៀវដើរលម្ហែកាយ។
ការថ្លែងបែបនេះ របស់លោក ទៀ បាញ់ បានធ្វើឡើងកាលពីថ្ងៃ ទី ២៩ ខែ ធ្នូ ឆ្នាំ ២០១៩ ក្នុងឱកាសដែលលោកបានអញ្ជើញជាតំណាងរបស់លោកនាយករដ្ឋមន្ត្រី ហ៊ុន សែន ក្នុងពិធីខួប ២១ ឆ្នាំ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យនយោបាយឈ្នះ ឈ្នះ របស់លោក ហ៊ុន សែន ដោយមានការចូលរួមពីមន្ត្រីជាន់ខ្ពស់ និងកងកម្លាំងប្រដាប់អាវុធ មានទាហាន នគរបាល កងរាជអាវុធហត្ថ និងពលរដ្ឋរាប់រយនាក់។
សំណង់វិមានឈ្នះ ឈ្នះ បានចាប់ផ្តើមសាងសង់ឡើងកាលពីខែកុម្ភៈ ឆ្នាំ ២០១៦ លើទំហំដី ៨ ហិកតា ស្ថិតនៅសង្កាត់ព្រែកតាសេក ខណ្ឌជ្រោយចង្វារ ប៉ែកខាងជើងរាជធានីភ្នំពេញ។ ការសាងសង់នេះចំណាយថវិកា អស់ជាង ១២ លានដុល្លារអាមេរិកដែលភាគច្រើនជាថវិកាសាលារាជធានីភ្នំពេញ និងមួយផ្នែកពីលោកឧកញ៉ា លី យ៉ុងផាត់ និងរាជរដ្ឋាភិបាល។ វិមានឈ្នះ ឈ្នះ ជានិមិត្តរូបនៃសុខសន្តិភាព ដែលកម្ពុជាទទួលបាន ក្រោយពីបញ្ចប់សង្គ្រាមស៊ីវិលដ៏រ៉ាំរ៉ៃ ជាច្រើនទសវត្សរ៍កន្លងមក ហើយវិមាននេះក្លាយជាកេរមរតក។
លោក ទៀ បាញ់ ថ្លែងថា ការសាងសង់វិមានឈ្នះ ឈ្នះ មិនមែនដើម្បីរកចំណូលដូចសណ្ឋាគារនោះទេ ពោលគឺសាងសង់ដើម្បីផ្ទុកជាឯកសារ និងតឹកតាងនានាសម្រាប់ក្មេងៗខ្មែរជំនាន់ក្រោយឲ្យពួកគេយល់កាន់តែច្បាស់អំពីប្រវត្តិសាស្ត្រខ្មែរពិតប្រាកដដែលទទួលបានសុខសន្តិភាព និងការអភិវឌ្ឍរហូតដល់សព្វថ្ងៃនេះ។
លោកបន្ថែមថា វិមានឈ្នះ ឈ្នះ ជាកន្លែងមួយសម្រាប់ផ្ទុកឯកសារប្រវត្តិសាស្ត្ររបស់កម្ពុជា ហើយក៏ជាសារមន្ទីរដ៏ធំសម្រាប់កូនខ្មែរក្នុងការសិក្សាស្រាវជ្រាវបន្ថែមទៀត ចំពោះប្រវត្តិសាស្ត្រប្រទេសមួយនេះ។
លោកបញ្ជាក់ថា៖ «វាបានក្លាយទៅជាមជ្ឈមណ្ឌលមួយដ៏ធំនៅក្នុងរាជធានីភ្នំពេញសម្រាប់ភ្ញៀវជាតិ និងអន្តរជាតិដើរលំហែកាយផងដែរ ហើយជាងនេះទៅទៀត សំណង់វិមាននេះគឺជាសញ្ញាមួយបង្ហាញនូវអត្តសញ្ញាណជាតិ ការសាមគ្គីជាតិ និងរួបរួមគ្នាដើម្បីសុខសន្តិភាពរហូតដល់សព្វថ្ងៃនេះផងដែរ»។
លោក ទៀ បាញ់ រំឭកថា នៅថ្ងៃនេះ កាលពី ២១ ឆ្នាំមុន ពោលគឺនៅថ្ងៃទី ២៩ ខែ ធ្នូ ឆ្នាំ ១៩៩៨ ត្រូវបានកំណត់ជាថ្ងៃដែលបានបញ្ចប់ សង្គ្រាមស៊ីវិលទាំងស្រុងនៅកម្ពុជា និងទទួលបានសន្តិភាពពេញលេញ ដែលជាឱកាសនៃការចាប់ផ្តើមកសាង និងអភិវឌ្ឍប្រទេសជាតិឡើងវិញ។ រយៈពេលជាង ២០ ឆ្នាំមកនេះ កម្ពុជាបានអភិវឌ្ឍខ្លួនជាបន្តបន្ទាប់រហូតក្លាយជាប្រទេសមួយដែលមានសក្តានុពល ទាំងសេដ្ឋកិច្ច ពាណិជ្ជកម្ម សំណង់ហេដ្ឋារចនាសម្ព័ន្ធ ធនធានមនុស្សដែលទទួលស្គាល់ដោយសហគមន៍អន្តរជាតិ ក្លាយជាប្រទេសគោលដៅទីផ្សារមួយដ៏សំខាន់សម្រាប់ពិភពលោក។
លោកបញ្ជាក់ថា៖ «នយោបាយឈ្នះ ឈ្នះ ជាគោលនយោបាយដ៏ធំមួយក្នុងការដឹកនាំប្រទេស កម្ពុជា ដើម្បីនាំមកនូវការបញ្ចប់សង្គ្រាមស៊ីវិលទាំងស្រុង និងនាំមកនូវសន្តិភាព ព្រមទាំងការឯកភាពពេញលេញនៅកម្ពុជា។ គោលនយោបាយនេះ បានបង្កើតឡើងដោយមគ្គុទ្ទេសក៍ឆ្នើមរបស់កម្ពុជា គឺសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា មិនមែនជាការចៃដន្យនោះទេ តែជាពលិកម្មដ៏មហាធំធេងមួយ ដែលប្រជាជនខ្មែរគ្រប់រូប ត្រូវចងចាំជាប្រវត្តិសាស្ត្រ និងគោរពមហាវីរភាព ដែលសម្តេចតេជោបានយកជីវិតមកប្តូរ ដើម្បីសន្តិភាព»។
បើតាមការឲ្យដឹងពីលោក ណឹម សុវត្ថិ ប្រធានក្រុមការងារសាងសង់វិមានឈ្នះ ឈ្នះ បានឲ្យដឹងថា ក្រោយសម្ពោធជាផ្លូវការអស់រយៈពេល ១ ឆ្នាំមកនេះ មានប្រតិភូទាំងក្នុង និងក្រៅប្រទេសសាធារណជនជាតិ និងអន្តរជាតិនានាចូលទស្សនា និងសិក្សាស្រាវជ្រាវ មានចំនួនជាង ៣ លាននាក់។ ក្នុងនោះអត្រាប្រជាជនចូលទស្សនា គិតជាមធ្យមក្នុង ១ ថ្ងៃ ៥០០ នាក់ ទៅ ១ ៥០០ នាក់។ ដោយឡែក នៅថ្ងៃបុណ្យជាតិ និងថ្ងៃឈប់សម្រាកនានា ចំនួនចូលទស្សនាកើនឡើងគួរឱ្យកត់សម្គាល់ ពី ១ ០០០ នាក់ ទៅ ៣ ០០០ នាក់ក្នុង ១ ថ្ងៃ។
លោកថ្លែងថា៖ «ទី ២ គោរព និងចារឹកទុកអំពីការលះបង់ការដឹកនាំ និងភាពច្នៃប្រឌិតរបស់មគ្គុទេ្ទសក៍ដឹកនាំ និងប្រតិបត្តិករស្នូលកម្ពុជា ដែលបាននាំមកនូវការផ្សះផ្សាជាតិ និងបញ្ចប់សង្គ្រាមស៊ីវិលដោយគ្មានការបង្ហូរឈាម ដែលនាំមកនូវវិបុលភាព និងសន្តិភាពដល់ប្រទេសកម្ពុជា។ ទី៣ បង្កើតមជ្ឈមណ្ឌល ១ ដែលផ្ដល់នូវការរៀនសូត្រដល់ប្រជាជនគ្រប់ជំនាន់ទាំងអស់ ឱ្យបន្តការសិក្សា និងទទួលការយល់ដឹងពីប្រវត្តិសាស្ត្រពិតរបស់ប្រទេស កម្ពុជា និងបន្តអនុវត្តគោលនយោបាយឈ្នះ ឈ្នះ របស់តេជោសែន និងគុណតម្លៃក្នុងការធ្វើសមាហរណកម្ម ក្នុងដំណើរការកសាងដឹកនាំ និងអភិវឌ្ឍប្រទេសនាពេលអនាគត»។
លោក សំបូរ ម៉ាណារ៉ា សាស្ត្រាចារ្យផ្នែកប្រវត្តិសាស្ត្រថ្លែងថា វិមានឈ្នះ ឈ្នះ គឺជាផ្នែកមួយក្នុងការបង្ហាញឲ្យប្រជាជនបានយល់ដឹង និងរៀនសូត្រពីការខិតខំប្រឹងប្រែង និងស្នាដៃរបស់ថ្នាក់ដឹកនាំដើម្បីទទួលបានសន្តិភាព និងកសាងប្រទេស។ លោកបន្ថែមថា ប្រសាសន៍របស់លោក ទៀ បាញ់ ចង់ឲ្យយុវជនជំនាន់ក្រោយយកចិត្តទុកដាក់សិក្សារៀនសូត្រស្វែងយល់ពីប្រវត្តិសាស្ត្រកម្ពុជា និងដើម្បីជួយថែរក្សា ស្នាដៃប្រវត្តិសាស្ត្រកម្ពុជា។
លោកបញ្ជាក់ថា៖ «កាលណាយើងនិយាយពីអ្វីដែលកើតឡើងជារបស់ជាតិ សមិទ្ធផលរបស់ជាតិ។ កាលណា វាទាក់ទង និងកើតឡើងនៅក្នុងប្រទេសរបស់ខ្ញុំដូច្នេះហើយវាជារបស់ជាតិយើង។ ខ្ញុំចាត់ទុកថា ការវិវត្ត និងអភិឌ្ឍសម្រាប់ជាចំណែកនៃប្រវត្តិសាស្ត្រនៃសម័យកាលនីមួយៗ»។
តាមរបាយការណ៍របស់គណៈកម្មការសាងសង់ឲ្យដឹងថា កំពូលវិមានឈ្នះ ឈ្នះដែលមានជ្រុង ៣ តំណាងឲ្យនយោបាយសំខាន់ៗចំនួន ៣ ទី១ ការធានារូបកាយ និងអាយុជីវិត ទី២ ធានាអាជីព និងមុខរបរ និងទី៣ ការធានាកម្មសិទ្ធិ និងទ្រព្យសម្បត្តិទាំងចលនទ្រព្យ និងអចលនទ្រព្យ។ ឯតួវិមានដែលមានជ្រុង ៥ តំណាង ឲ្យយុទ្ធសាស្ដ្រ DIFID បំបែកឯកោ បញ្ចប់ធ្វើសមាហរណកម្ម និងអភិវឌ្ឍដែលជាយុទ្ធសាស្ដ្ររំលាយ អង្គការចាត់តាំងនយោបាយ និងយោធាខ្មែរក្រហម៕