.jpg)
ជ្រូកកណ្ដុរនាំចូលពីវៀតណាមដែលសមត្ថកិច្ចចាប់បាននៅខេត្តត្បូងឃ្មុំកាលពីថ្ងៃ ១៦ ឧសភា ថ្មីៗនេះ ។ រូបថត ហ្វេសប៊ុក
ភ្នំពេញ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ស្នើឲ្យបណ្តាខេត្តជាប់ព្រំដែនវៀតណាម ទប់ស្កាត់ការនាំចូលសត្វជ្រូកនិងផលិតផលសាច់ជ្រូកខុសច្បាប់ បន្ទាប់ពីទទួលបានព័ត៌មានពីការផ្ទុះជំងឺប៉េស្តជ្រូកអាហ្វ្រិកនៅក្នុងប្រទេសនេះ ខណៈសមកត្ថកិច្ចឃាត់បានរថយន្ត១គ្រឿងដែលដឹកជ្រូកកណ្តុរខុសច្បាប់ជិត ១០០ ក្បាល នៅខេត្តត្បូងឃ្មុំ។
លិខិតមួយច្បាប់ផ្ញើជូនអភិបាលខេត្តព្រៃវែង របស់រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ចុះថ្ងៃទី ១៩ ឧសភា បានឲ្យដឹងថា បច្ចុប្បន្នជំងឺប៉េស្តជ្រូកអាហ្វ្រិក កំពុងបន្តឆ្លងរាលដាលនៅក្នុងពិភពលោក និងបានឆ្លងរាលដាលចូលក្នុងប្រទេសអាស៊ី ក្នុងនោះមានប្រទេសចិននិងអាស៊ីអាគ្នេយ៍ រួមមាន ប្រទេសវៀតណាម មីយ៉ាន់ម៉ា និងប្រទេសកម្ពុជាផងដែរ។
ក្រសួង បានបន្តថា ជំងឺនេះបានផ្ទុះនៅក្នុងប្រទេសវៀតណាមលើកដំបូងស្ទើរតែពាសពេញផ្ទៃប្រទេសនៅថ្ងៃទី ១៩ ខែ កុម្ភៈ ឆ្នាំ ២០១៩ និងបន្តផ្ទុះជារៀងរាល់ឆ្នាំ ហើយនៅថ្ងៃទី ៤ ខែ ឧសភា ឆ្នាំ ២០២១ បានផ្ទុះនៅក្នុងប្រទេសនេះម្ដងទៀត ដែលអាចនឹងបន្តឆ្លងរាលដាលយ៉ាងឆាប់រហ័សដល់បណ្តាខេត្តដែលមានព្រំប្រទល់ជាប់ជាមួយប្រទេសកម្ពុជា។
ក្រសួងកសិកម្មបានបញ្ជាក់ថា «ដើម្បីចូលរួមចំណែកក្នុងការទប់ស្កាត់ការឆ្លងរាលដាលនៃជំងឺនេះពីប្រទេសជិតខាងចូលមកកម្ពុជា និងបង្ការការខាតបង់យ៉ាងធ្ងន់ធ្ងរដល់អ្នកចិញ្ចឹមជ្រូក ព្រមទាំងធានាបាននូវគុណភាព សុវត្ថិភាពសត្វជ្រូក សាច់ជ្រូក ផលិតផលសាច់ និងការពារដល់សុខភាពសាធារណៈ ក្រសួងកសិកម្ម រុក្ខាប្រមាញ់ និងនេសាទស្នើរដ្ឋបាលខេត្តជាប់ព្រំដែនប្រទេសវៀតណាម ជួយទប់ស្កាត់ ការនាំចូលសត្វជ្រូក សាច់ជ្រូក និងផលិតផលសាច់ជ្រូកខុសច្បាប់ពីប្រទេសវៀតណាម ដែលអាចបណ្តាលឱ្យឆ្លងរាលដាលជំងឺប៉េស្តជ្រូកអាហ្វ្រិក»។
បើតាមលិខិតក្រសួងកសិកម្ម ខេត្តដែលប្រឈមនឹងការឆ្លងរាលដាលជំងឺនេះរួមមាន ខេត្តដាក់ណុង ជាប់ខេត្តមណ្ឌលគិរី ខេត្តយ៉ាឡាយ ជាប់ខេត្តរតនគិរី ខេត្តដុងថាប់ ជាប់ខេត្តព្រៃវែង ខេត្តកៀនយ៉ាង ជាប់ខេត្តកំពត ខេត្តតៃនិញ ជាប់ខេត្តត្បូងឃ្មុំ និងខេត្តស្វាយរៀង ខេត្តឡុងអាន ជាប់ខេត្តស្វាយរៀង ខេត្តប៊ិញភូ ជាប់ខេត្តក្រចេះ និងខេត្តអានយ៉ាង ជាប់ខេត្តតាកែវ និងខេត្តកណ្តាល។
លោក វេង សាខុន ក៏ស្នើឲ្យបណ្តាខេត្តទាំងនោះ ត្រូវជួយទប់ស្កាត់ការនាំចូលជ្រូក សាច់ជ្រូក និងផលិតផលសាច់ជ្រូកខុសច្បាប់ពីប្រទេសវៀតណាមតាមការគួរ ដើម្បីចៀសវាងមានហានិភ័យខ្ពស់នៃការឆ្លងរាលដាលក្នុងលក្ខណៈទ្រង់ទ្រាយធំ និងធ្ងន់ធ្ងរដល់ប្រទេសកម្ពុជា។
លោក តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា និងជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មនៃក្រសួងកសិកម្ម រុក្ខាប្រមាញ់ និងនេសាទេ បានប្រាប់ ភ្នំពេញ ប៉ុស្តិ៍ នៅថ្ងៃទី ២០ ឧសភានេះថា ស្របពេលដែលប្រទេសវៀតណាម កំពុងផ្ទុះជំងឺប៉េស្តជ្រូកអាហ្វ្រិក គឺនឹងនាំឲ្យជ្រូកក្នុងប្រទេសនោះ ធ្លាក់ចុះថោក ដែលនាំឲ្យជនខិលខូចឆ្លៀតឱកាសនាំចូលមកចែកចាយខុសច្បាប់នៅក្នុងប្រទេសកម្ពុជា។
លោកបញ្ជាក់ថា៖ «និយាយឲ្យចំទៅមិនមានការនាំចូលជ្រូកមកពីវៀតណាមនោះទេ កន្លងមកនេះ។ ក៏ប៉ុន្តែនេះជាការបារម្ភរបស់ឯកឧត្តមរដ្ឋមន្ត្រី វេង សាខុន ក៏ដូចជាអគ្គនាយកដ្ឋាន គឺមានតែធ្វើការទប់ស្កាត់មុន។ ព្រោះដឹងថា នៅប្រទេសវៀតណាម មានផ្ទុះជំងឺប៉េស្ដជ្រូកអាហ្វ្រិកនេះខ្លាំង»។
លោកបន្តថា៖ «កាលណាវាផ្ទុះខ្លាំង កសិដ្ឋានធំៗនៅប្រទេសវៀតណាម នឹងនាំគ្នាលក់ហើយ។ កាលណាលក់ នឹងធ្វើឲ្យមានធ្លាក់ចុះតម្លៃក្នុងប្រទេសវៀតណាម។ អ៊ីចឹងគាត់នឹងអាចនាំចូលក្នុងប្រទេសយើងដោយខុសច្បាប់។ នេះគឺ ជាអ្វីដែលយើងត្រូវត្រៀមទុកជាមុន»។
បើតាមលោកលោក តាន់ ផាន់ណារ៉ា កាលពីថ្ងៃទី ១៦ ខែឧសភា សមត្ថកិច្ចខេត្តត្បូងឃ្មុំក៏បានចុះស្ទាក់ចាប់ រថយន្ត ១ គ្រឿង ដោយបានដឹកសត្វជ្រូកប្រភេទជ្រូកកណ្តុរពីប្រទេសវៀតណាម មកកាន់ប្រទេសកម្ពុជាតាមច្រករបៀង ដោយខុសច្បាប់ផងដែរ។
លោកបន្តថា ជ្រូកកណ្តុរនោះ គឺមានចំនួន ៨៩ ក្បាល ហើយជំនាញកំពុងបន្តធ្វើតេស្ដសំណាកដើម្បីឲ្យប្រាកដថា ជ្រូកទាំងនេះមានផ្ទុកជំងឺប៉េស្តជ្រូកអាហ្វ្រិក ឬយ៉ាងណា ខណៈសមត្ថកិច្ចនឹងដុតកម្ទេចចោល ក្នុងករណីរកឃើញថា មានផ្ទុកជំងឺ។
លោក ឈាង សុវណ្ណារ៉ា នាយករដ្ឋបាលខេត្តព្រៃវែង បានលើកឡើងថា ខេត្តលោកនឹងបន្តពង្រឹងការទប់ស្កាត់ការនាំជ្រូកគ្រប់ប្រភេទនេះឲ្យបានកាន់តែតឹងរ៉ឹងបន្ថែមទៀត ខណៈរហូតមកទល់ពេលនេះ ច្រកព្រំដែនទាំង ៦ របស់ខេត្ត ដែលជាប់នឹងប្រទេសវៀតណាម គឺបានបិទមិនអនុញ្ញាតឲ្យមានការនាំចូលដោយខុសច្បាប់នោះទេ។
លោកបញ្ជាក់ថា៖ «ច្រកព្រំដែនយើងទាំង ៦ បិទយូរហើយ មិនឲ្យមានការចេញចូលទេ គឺបានបិទជិត ២ ឆ្នាំហើយ សូម្បីតែមនុស្ស ឆ្លងមិនចង់បានផង។ មានករណីនាំជ្រូកខុសច្បាប់ឯណា កើតមានឡើងនៅតាមព្រំដែនយើងនោះ។ ក្នុងករណីថ្មីនេះ យើងនឹងបន្តពង្រឹង និងទប់ស្កាត់ តាមសំណើរបស់ក្រសួងបន្តទៀត»៕
វីដេអូ៖
