ភ្នំពេញ៖ រដ្ឋមន្ដ្រីក្រសួងបរិស្ថាន លោក សាយ សំអាល់ បានបន្តរំឭកដល់អភិបាលរាជធានី-ខេត្ដ ពិសេសខេត្ដចំនួន ២១ ដែលមានផ្ទៃដីក្នុងតំបន់ការពារធម្មជាតិទំហំ ៧,៣ លានហិកតា ឱ្យបដិសេធ និងមោឃភាពរាល់ឯកសារកាន់កាប់ និងការផ្ទេរសិទ្ធិលើដីធ្លីដែលចុះហត្ថលេខាដោយរដ្ឋបាលឃុំ-សង្កាត់ និងត្រូវអនុវត្ដវិធានការច្បាប់ចំពោះអ្នកបំពាន។ នេះបើតាមលោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាននៅថ្ងៃនេះ។
កាលពីថ្ងៃទី ១០ ខែឧសភា លោក សាយ សំអាល់ បានចេញលិខិតមួយជម្រាបជូនលោកស្រី មិថុនា ភូថង អភិបាលខេត្ដកោះកុង ដោយស្នើអន្តរាគមន៍ចាត់វិធានការឱ្យបញ្ឈប់ជាបន្ទាន់ និងមោឃភាពនូវរាល់ការចុះហត្ថលេខា ឬការបញ្ជាក់ទទួលស្គាល់លើលិខិតផ្ទេរសិទ្ធិ ពាក្យស្នើសុំកាន់កាប់ ប្រើប្រាស់ដីធ្លី លិខិតទិញលក់ដីរដ្ឋ និងការបញ្ជាក់លើប្លង់បង្ហាញទីតាំងដីក្នុងតំបន់ការពារធម្មជាតិ និងក្នុងរបៀងអភិរក្សជីវចម្រុះ ដែលរដ្ឋបាលឃុំ-សង្កាត់បានចុះហត្ថលេខានាពេលកន្លងទៅ បន្ទាប់ពីក្រសួងសង្កេតឃើញមានករណីបែបនេះកើតឡើងនាពេលថ្មីៗនេះ។
លោក នេត្រ ភក្ត្រា អ្នកនាំពាក្យក្រសួងបរិស្ថានបានថ្លែងថា៖ «នេះ គឺជាកិច្ចការងារមួយដែលក្រសួងបរិស្ថានបញ្ជូនទៅអភិបាលរាជធានី-ខេត្ដទាំងអស់នៅក្នុងប្រទេសកម្ពុជា ជាពិសេសគឺខេត្ដចំនួន ២១ ដែលមានតំបន់ការពារធម្មជាតិដែលក្នុងនោះមានផ្ទៃដី ៧,៣ លានហិកតា ដើម្បីឱ្យគាត់ចូលរួមក្នុងការអនុវត្ដវិធានការចាំបាច់មួយចំនួន។ ក្នុងនោះបដិសេធ និងមោឃភាពរាល់លិខិត និងឯកសារទាំងឡាយណាដែលមានការពាក់ព័ន្ធទៅនឹងការកាន់កាប់ និងការផ្ទេរសិទ្ធិទាំងឡាយទៅលើដីធ្លីដែលស្ថិតនៅតំបន់ការពារធម្មជាតិ និងរបៀងអភិរក្សជីវចម្រុះដែលរដ្ឋបាលឃុំ-សង្កាត់បានចុះហត្ថលេខាកន្លងទៅ»។
លោកបានបន្តថា ជាមួយនេះក្រសួងក៏បានណែនាំដល់រដ្ឋបាលឃុំ-សង្កាត់ឱ្យបញ្ឈប់រាល់ការចុះហត្ថលេខាបញ្ជាក់លើលិខិតផ្ទេរសិទ្ធិពាក្យស្នើសុំកាន់កាប់ ប្រើប្រាស់ដី លិខិតទិញលក់ដីរដ្ឋ ឬក៏ការបញ្ជាក់លើប្លង់បង្ហាញដីជាដើមនៅលើដីដែលស្ថិតនៅតំបន់ការពារធម្មជាតិ និងរបៀងអភិរក្សជីវចម្រុះនៃដែនសមត្ថកិច្ចខេត្ដនីមួយៗ។
លោកបានថ្លែងថា ក្រសួងបរិស្ថានស្នើដល់អភិបាលរាជធានី-ខេត្ដផ្ដល់កិច្ចសហការ និងចាត់វិធានការយ៉ាងម៉ឺងម៉ាត់តាមផ្លូវច្បាប់ចំពោះរដ្ឋបាលឃុំ-សង្កាត់ណា ដែលនៅតែបន្តចុះហត្ថលេខាបញ្ជាក់លើលិខិតផ្ទេរសិទ្ធិ ឬក៏ពាក្យស្នើសុំកាន់កាប់ប្រើប្រាស់ជាអាទិ៍ទៅលើដីដែលបានកាប់ឆ្ការរុករានដីព្រៃរបស់រដ្ឋដោយខុសច្បាប់ ដើម្បីធ្វើជាកម្មសិទ្ធិនៅក្នុងតំបន់នេះ។
លោក នេត្រ ភក្ត្រា បានបញ្ជាក់ថា៖ «ក្រសួងបរិស្ថានមានគោលជំហរមួយ គឺយើងមិនទទួលស្គាល់ចំពោះការទិញ ឬលក់ដីនៅក្នុងតំបន់ការពារធម្មជាតិនោះទេ។ យើងនឹងបន្តធ្វើការស៊ើបអង្កេតតាមដានទៅលើកិច្ចការងារនេះបន្តទៀត ហើយនឹងអនុវត្ដវិធានការច្បាប់ចំពោះជនទាំងឡាយណាដែលប្រព្រឹត្តបទល្មើស»។
លោកថា៖ «គ្មានជនណាម្នាក់អាចទិញ ឬលក់ដីនៅក្នុងតំបន់ការពារធម្មជាតិបានឡើយ។ កន្លងទៅនេះយើងបានអនុវត្ដវិធានការច្បាប់ទៅលើជនល្មើសមួយចំនួនដែលបំពាន។ ដូច្នេះសេចក្ដីជូនដំណឹងនេះ គឺដើម្បីស្នើការអន្តរាគមន៍ចាត់វិធានការឱ្យបញ្ឈប់បន្ទាន់ នេះគឺជាការក្រើនរំឭកបន្ថែមទៀត ទៅដល់រដ្ឋបាលថ្នាក់ក្រោមជាតិឱ្យចូលរួមនៅក្នុងការទប់ស្កាត់បទល្មើសទន្ទ្រានកាន់កាប់ដីព្រៃដោយខុសច្បាប់»។
យោងតាមលិខិតរបស់ លោក សាយ សំអាល់ ផ្ញើជូនលោកស្រីអភិបាលខេត្ដកោះកុងបានបញ្ជាក់ថា ថ្មីៗនេះ ក្រសួងបរិស្ថានបានពិនិត្យឃើញថា រដ្ឋបាលឃុំ-សង្កាត់ មួយចំនួននៅតែបន្តចុះហត្ថលេខាបញ្ជាក់ទទួលស្គាល់នៅលើលិខិតផ្ទេរសិទ្ធិ ពាក្យស្នើសុំកាន់កាប់ ប្រើប្រាស់ដីធ្លី លិខិតទិញលក់ដីរដ្ឋ ឬការបញ្ជាក់លើប្លង់បង្ហាញទីតាំងដីស្ថិតក្នុងតំបន់ការពារធម្មជាតិ និងរបៀងអភិរក្ស ជីវចម្រុះ ដើម្បីធ្វើជាកម្មសិទ្ធិដែលជាការផ្ទុយនឹងច្បាប់។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋបានគាំទ្រចំពោះវិធានការរបស់ក្រសួងបរិស្ថាននេះ ដោយលោកបានអះអាងថា សកម្មភាពរុករានទន្ទ្រានកាន់កាប់ដីព្រៃខុសច្បាប់ តាមរយៈការឃុបឃិតគ្នាពីមន្ដ្រីភូមិ-ឃុំ នៅមូលដ្ឋានជាអ្នកចុះហត្ថលេខា គឺមានការកើតឡើងជាច្រើន។
លោកបានថ្លែងថា៖ «សកម្មភាពបទល្មើសនៃការកាប់រាន់ទន្ទ្រានយកដីរដ្ឋធ្វើជាកម្មសិទ្ធិនេះ ភាគច្រើនមន្ដ្រីមូលដ្ឋានជាអ្នកឃុបឃិត ចុះហត្ថលេខាឱ្យប្រជាពលរដ្ឋរួចយកឯកសារបញ្ជាក់សម្គាល់ទីតាំងដីទាំងនោះទៅលក់ឱ្យឈ្មួញក្នុងតម្លៃថោក។ សកម្មភាពនេះកំពុងកើតមានឡើងច្រើនពិសេសនៅខេត្តកំពង់ស្ពឺ និងខេត្ដកោះកុង។ ជនល្មើសបានធ្វើសកម្មភាពស្របពេលដែលរាជរដ្ឋាភិបាល និងអាជ្ញាធរខេត្ដកំពុងជាប់រវល់ចាត់វិធានការរឿងជំងឺកូវីដ ១៩»។
តំណាងសហគមន៍ម្នាក់នៅឃុំជ្រោយស្វាយ ស្រុកស្រែអំបិល ខេត្ដកោះកុង ប្រាប់ក្នុងលក្ខខណ្ឌមិនបញ្ចេញឈ្មោះថា អាជ្ញាធរភូមិជ្រោយស្រាយ ឃុំជ្រោយស្វាយ បានធ្វើលិខិតបញ្ជាក់សិទ្ធិកាន់កាប់ដីមួយចំនួនឱ្យពលរដ្ឋជាង ២០ គ្រួសារនៅក្នុងទីតាំងដីរបស់សហគមន៍ជាង ៦៣ ហិកតា ដែលស្ថិតនៅភូមិជ្រោយស្រាយ។
តំណាងសហគមន៍រូបនេះថា៖ «គេឱ្យពលរដ្ឋទៅឈរឈ្មោះធ្វើជាម្ចាស់កម្មសិទ្ធិក្នុងដីសហគមន៍ដោយបញ្ជាក់ថា បានកាន់កាប់ដីនោះយូរឆ្នាំដោយឱ្យលុយពលរដ្ឋក្នុង ១ គ្រួសារ ៥០០ ដុល្លារ និងឱ្យសារព័ត៌មានគ្មានវិជ្ជាជីវៈច្បាស់លាស់ផ្សព្វផ្សាយពីការផ្ដល់ដីនោះដល់ពលរដ្ឋ។ ជាការឃុបឃិតគ្នាយកដីសហគមន៍ធ្វើជាកម្មសិទ្ធិ។ ពលរដ្ឋនៅសហគមន៍ក្នុងភូមិជ្រោយស្វាយជាង ១០០ គ្រួសារ កំពុងបន្តតវ៉ារឿងនេះនៅរដ្ឋបាលស្រុកស្រែអំបិល»៕