.jpg)
លោក កើត រិទ្ធ រដ្ឋមន្ត្រីក្រសួងយុត្តិធម៌។ រូបថត ក្រសួងយុត្តិធម៌
ភ្នំពេញៈ រដ្ឋមន្ត្រីក្រសួងយុត្តិធម៌លោក កើត រិទ្ធ កាលពីថ្ងៃចន្ទបានគូសបញ្ជាក់ឡើងវិញពីជំហរដ៏ម៉ឺងម៉ាត់របស់ក្រសួងយុត្តិធម៌ក្នុងការបន្តពង្រឹងអភិបាលកិច្ចល្អក្នុងវិស័យយុត្តិធម៌ និងការពង្រឹងវិធានការវិន័យ ក្រមសីលធម៌ និងភាពស្អាតស្អំរបស់អង្គចៅក្រម ដើម្បីលើកកម្ពស់កិត្តិយស និងសេចក្តីថ្លៃថ្នូររបស់អង្គចៅក្រមលើកកម្ពស់គុណភាពនៃការកាត់ក្តីប្រកបដោយភាពត្រឹមត្រូវ និងយុតិ្តធម៌។
លោក កើត រិទ្ធ បានថ្លែងឲ្យដឹងទៀតថា ការពង្រឹងវិធានការវិន័យនឹងក្រមសីលធម៌នេះក៏នឹងលើកកម្ពស់ការផ្តល់សេវាយុត្តិធម៌ឲ្យមានភាពងាយស្រួល ឆាប់រហ័ស និងស្អាតស្អំ ដើម្បីពង្រឹងជំនឿទុកចិត្តពីសាធារណជនចំពោះវិស័យយុត្តិធម៌។
ការថ្លែងរបស់លោកបានធ្វើឡើងនៅខេត្តបាត់ដំបងក្នុងពេលលោកធ្វើជាអធិបតីក្នុងពិធីប្រកាសចូលកាន់មុខតំណែងជាផ្លូវការរបស់លោក សម ប៊ុនថុន ដែលត្រូវបានតែងតាំងជាប្រធានសាលាឧទ្ធរណ៍បាត់ដំបងលោក នួន សាន ដែលត្រូវបានតែងតាំងជាអគ្គព្រះរាជអាជ្ញានៃមហាអយ្យការអមសាលាឧទ្ធរណ៍បាត់ដំបង និង លោក គឺ ប៊ុណ្ណារ៉ា ដែលត្រូវបានតែងតាំងជាព្រះរាជអាជ្ញានៃអយ្យការអមសាលាដំបូងខេត្តបាត់ដំបង។
លោកថ្លែងថា៖ «ចៅក្រម ព្រះរាជអាជ្ញា ក៏ដូចជាមន្ត្រីតុលាការទាំងអស់ត្រូវប្រកាន់ខ្ជាប់នូវអភិក្រមដ៏ថ្លៃថ្លាទាំង ៥ របស់សម្តេចតេជោនាយករដ្ឋមន្ត្រីគឺ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ដើម្បីធ្វើជាគោលការណ៍ក្នុងការអនុវត្តមុខងារ និងភារកិច្ចរបស់ខ្លួនក៏ដូចជាក្នុងការដឹកនាំអង្គភាពសាលាជម្រះក្តី»។
លោកបន្តថា ចៅក្រម ព្រះរាជអាជ្ញាក៏ដូចជាមន្ត្រីតុលាការទាំងអស់ត្រូវប្រកាន់ខ្ជាប់នូវភាពម៉ឺងម៉ាត់របស់ខ្លួនក្នុងការអនុវត្តច្បាប់ឲ្យបានត្រឹមត្រូវ ដើម្បីផ្តល់ការកាត់ក្តីមួយប្រកបដោយអនាគតិក្នុងការធានាឲ្យបាននូវភាពយុតិ្តធម៌ ត្រឹមត្រូវជូនប្រជាពលរដ្ឋ ជាពិសេសគឺការវៀរចាកនូវអគតិធម៌ទាំង ៤ គឺ ឆន្ទាគតិ ទោសាគតិ ភយាគតិ និងមោហោគតិដូចដែលចៅក្រម ព្រះរាជអាជ្ញាទាំងអស់បានធ្វើសច្ចាប្រណិធាននៅមុនពេលខ្លួនចូលកាន់តំណែង។
លោកថ្លែងថា៖ «ចៅក្រម ព្រះរាជអាជ្ញា ក៏ដូចជាមន្ត្រីតុលាការទាំងអស់ត្រូវប្រកាន់ខ្ជាប់ឲ្យបានម៉ឺងម៉ាត់នូវវិន័យ និងក្រមសីលធម៌វិជ្ជាជីវៈរបស់ចៅក្រម និងព្រះរាជអាជ្ញាទាំងក្នុងពេលបំពេញការងារ ទាំងក្នុងជីវភាពរស់នៅប្រចាំថ្ងៃ។ ការប្រកាន់ខ្ជាប់នូវក្រមសីលធម៌វិជ្ជាជីវៈរបស់ខ្លួន គឺជាការរួមចំណែកដ៏សំខាន់ក្នុងការលើកកម្ពស់កិត្តិយស សេចក្តីថ្លៃថ្នូរ និងកិត្យានុភាពនៃអង្គចៅក្រមខ្លួនឯង ហើយវាជាកត្តារួមចំណែកដ៏សំខាន់មិនអាចខ្វះបាន ក្នុងការពង្រឹងជំនឿទុកចិត្តពីសាធារណជនចំពោះវិស័យយុត្តិធម៌»។
លោកប្រាប់ឲ្យចៅក្រម ព្រះរាជអាជ្ញា និងមន្ត្រីតុលាការឲ្យចូលរួមប្រកបដោយឆន្ទៈ និងស្មារតីទទួលខុសត្រូវខ្ពស់ក្នុងការអនុវត្តនូវយុទ្ធនាការដោះស្រាយការកកស្ទះសំណុំរឿងនៅតាមសាលាដំបូង ដែលយុទ្ធនាការនេះត្រូវបានដាក់ចេញដោយក្រសួងយុត្តិធម៌កាលពីថ្ងៃទី ១៨ ខែឧសភា។ ការដោះស្រាយការកកស្ទះនេះត្រូវធ្វើឡើងឲ្យបានត្រឹមត្រូវ និងម៉ឺងម៉ាត់តាមអភិក្រម «លឿន ត្រឹមត្រូវ យុត្តិធម៌ និងមិនពុករលួយ»។
លោក ជិន ម៉ាលីន អ្នកនាំពាក្យក្រសួងយុត្តិធម៌បានថ្លែងពីម្សិលមិញថា ការងារអាទិភាពធំជាងគេរបស់ក្រសួងយុត្តិធម៌នាពេលបច្ចុប្បន្ននេះគឺការដោះស្រាយការកកស្ទះសំណុំរឿងនៅតាមតុលាការ។ ប្រសិនបើសំណុំរឿងកកស្ទះច្រើន វាធ្វើឲ្យប៉ះពាល់ដល់សមត្ថភាពរបស់ស្ថាប័ន និងធ្វើឲ្យសេវាយុត្តិធម៌សម្រាប់ប្រជាពលរដ្ឋមានភាពយឺតយ៉ាវ។
ការងារអាទិភាពផ្សេងទៀតរបស់ក្រសួងយុត្តិធម៌រួមមានការកសាងក្របខ័ណ្ឌច្បាប់ និងគោលនយោបាយសំខាន់ៗនៅក្នុងវិស័យយុត្តិធម៌ដែលនៅខ្វះខាត រួមមានការកសាងធនធានមនុស្ស ការពង្រឹងសមត្ថភាព ក្រមសីលធម៌ វិជ្ជាជីវៈរបស់មន្ត្រី។ ការកសាងហេដ្ឋារចនាសម្ព័ន្ធរូបវន្តបន្ថែមនៅតាមតុលាការ និងយន្តការអធិការកិច្ចលើមន្ត្រីក្នុងវិស័យយុត្តិធម៌ ក៏ជាការងារអាទិភាពរបស់ក្រសួងយុត្តិធម៌ដែរ។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជាថ្លែងដោយគាំទ្រការលើកឡើងរបស់លោករដ្ឋមន្ត្រីក្រសួងយុត្តិធម៌ ព្រោះការធានាឯករាជ្យភាពនៃប្រព័ន្ធយុត្តិធម៌នៅកម្ពុជាគឺជាបញ្ហាបន្ទាន់ និងចាំបាច់បំផុត ព្រោះប្រព័ន្ធយុត្តិធម៌ឯករាជ្យ និងអាចទុកចិត្តបាននឹងបង្កើតបានជាបរិយាកាសមួយដល់វិស័យផ្សេង ជាពិសេសសុខុមាលភាពរបស់ពលរដ្ឋ ការវិនិយោគ និងសេដ្ឋកិច្ចរីកលូតលាស់៕
