.jpg)
ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ និងជាប្រធានគណៈកម្មការខេត្ត ប្រយុទ្ធប្រឆាំងជំងឺកូវីដ១៩ នាថ្ងៃទី ១២ ខែឧសភា ឆ្នាំ ២០២១ នេះទទួលឧបករណ៍តេស្តរកមេរោគកូវីដ១៩ ឆាប់រហ័ស (Covid-19 Ag RAPID TEST DEVICE) ចំនួនមួយឈុត (១,០០០តេស្ត) ពីតំណាង ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ដើម្បីប្រើប្រាស់ក្នុងការប្រយុទ្ធប្រឆាំងនឹងជំងឺកូវីដ១៩។ រូបភាព រដ្ឋបាលខេត្តពោធិ៍សាត់
ពោធិ៍សាត់ៈ អភិបាលខេត្តពោធិ៍សាត់លោក ម៉ៅ ធនិន នៅថ្ងៃទី ១២ ខែឧសភា បានទទួលឧបករណ៍តេស្តរកមេរោគកូវីដ ១៩ ឆាប់រហ័សចំនួន ១ ឈុតដែលមាន ១ ០០០ តេស្តពីតំណាងលោក ស៊ុយ សែម រដ្ឋមន្ត្រីក្រសួងរ៉ែ និងថាមពលសម្រាប់ប្រើប្រាស់ក្នុងការប្រយុទ្ធប្រឆាំងជំងឺកូវីដ១៩។
លោក ង៉ែត សីលា អ្នកនាំពាក្យសាលាខេត្តពោធិ៍សាត់ប្រាប់ ភ្នំពេញ ប៉ុស្តិ៍ នៅថ្ងៃទី ១២ ខែឧសភា ថា រដ្ឋបាលខេត្តពោធិ៍សាត់បានប្រគល់ឧបករណ៍តេស្តរហ័សនេះដល់មន្ទីរសុខាភិបាលខេត្តរួចហើយ ដើម្បីប្រើប្រាស់យកសំណាកមេរោគកូវីដ១៩។
លោកថ្លែងថា៖ «ករណីសង្ស័យ យើងធ្វើតេស្តយកសំណាកអីហ្នឹង គឺយើងប្រើឧបករណ៍ហ្នឹងហ្មង»។
កាលពីថ្ងៃទី ១១ ខែឧសភា មន្ទីរសុខាភិបាលខេត្តពោធិ៍សាត់បានប្រកាសរកឃើញអ្នកមានវិជ្ជមានមេរោគកូវីដ១៩ ចំនួន ៧ នាក់ដែលមកពីភ្នំពេញចំនួន ៦ នាក់ និងមកពីប្រទេសថៃ ១ នាក់។ គិតត្រឹមថ្ងៃទី ១១ ខែឧសភា ខេត្តពោធិ៍សាត់មានករណីអ្នកវិជ្ជមានកូវីដ១៩សរុប ៣៨ នាក់ដែលក្នុងនោះអ្នកជាសះស្បើយមាន ៤ នាក់ និងកំពុងសម្រាកព្យាបាល ៣៤ នាក់។
កាលពីថ្ងៃទី ១១ ខែឧសភា អាជ្ញាធរខេត្តពោធិ៍សាត់សម្រេចបិទបណ្តោះអាសន្នទីតាំងចំនួន ៥ កន្លែងភ្លាមៗ ដើម្បីទប់ស្កាត់ការឆ្លងរាលដាលជំងឺកូវីដ១៩ក្នុងសហគមន៍ ក្រោយពីពលរដ្ឋនៅក្នុងទីតាំងទាំងនេះមានការពាក់ព័ន្ធជាមួយអ្នកវិជ្ជមានកូវីដ១៩ ដែលរស់នៅខេត្តបន្ទាយមានជ័យបានមកកាន់ខេត្តពោធិ៍សាត់កាលពីថ្ងៃទី ២ ខែឧសភា។ ពេលត្រឡប់ទៅខេត្តបន្ទាយមានជ័យវិញ ទើបធ្វើតេស្តរកឃើញមានវិជ្ជមានកូវីដ១៩។
ទីតាំងទាំង ៥ កន្លែងនោះ រួមមាន មន្ទីរព្យាបាលឈ្មោះ គន្ធា មន្ទីរសម្រាកព្យាបាល វឌ្ឍនៈពោធិ៍សាត់ មន្ទីរសម្រាកព្យាបាល និងសម្ភព មុត សារុន ទីតាំង ហួត ចន្ថា មានទទួលខ្វៃជ្រូក និងហាងឈ្មោះ ប្រាក់ បូរី ណាហ្សា។
អាជ្ញាធរខេត្តបានអំពាវនាវដល់ប្រជាពលរដ្ឋដែលបានប៉ះពាល់ដោយផ្ទាល់នឹងអ្នកវិជ្ជមានខាងលើរួសរាន់មកជួបក្រុមគ្រូពេទ្យ និងធ្វើចត្តាឡីស័ក ដើម្បីយកសំណាកទៅពិនិត្យ។ ឯអ្នកប៉ះពាល់ប្រយោលជាមួយអ្នកវិជ្ជមានត្រូវធ្វើចត្តាឡីស័កតាមផ្ទះរៀងៗខ្លួនដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃឡើយ។
លោក ង៉ែត សីលា ថ្លែងថា៖ «ថ្ងៃម្សិលមិញហ្នឹង យើងបានបិទកន្លែងហ្នឹងជាបណ្តោះអាសន្ន ហើយម្សិលមិញហ្នឹងយើងធ្វើតេស្ត Rapid Test ហ្នឹង គឺអវិជ្ជមានទាំងអស់ហើយ។ អ៊ីចឹងយើងរង់ចាំលទ្ធផលនៅវិទ្យាស្ថានប៉ាស្ទ័រទៀត»។
លោកថ្លែងថា ប្រជាពលរដ្ឋមុននឹងធ្វើដំណើរមកកាន់ខេត្តពោធិ៍សាត់ គឺត្រូវពិនិត្យសុខភាពជាមុនសិន។ ក្នុងករណីសង្ស័យថាមានវិជ្ជមានកូវីដ១៩ គឺតម្រូវឱ្យធ្វើចត្តាឡីស័ក។
កាលពីថ្ងៃទី ១១ ខែឧសភា លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានប្រគល់ឧបករណ៍តេស្តរកមេរោគកូវីដ១៩ឆាប់រហ័ស ចំនួន ២ ឈុតដែលមាន ២ ០០០ តេស្ត ដល់លោក ឈាង រ៉ា អគ្គនាយកមន្ទីរពេទ្យកាល់ម៉ែតសម្រាប់ប្រើប្រាស់ប្រយុទ្ធប្រឆាំងជំងឺកូវីដ១៩។
កាលពីថ្ងៃទី ៥ ខែឧសភា មន្ទីរសុខាភិបាល ខេត្តពោធិ៍សាត់ បានដាក់ចេញវិធានការដោយធ្វើការរឹតបន្ដឹងការធ្វើចរាចរណ៍ចន្លោះម៉ោង ៨ យប់ រហូតដល់ម៉ោង ៥ ព្រឹកក្នុងភូមិសាស្ត្រភូមិ ឃុំ សង្កាត់ និងក្រុង ស្រុក ទូទាំងខេត្តសំដៅរកឱ្យឃើញករណីលបលួចធ្វើដំណើរ ករណីលួចឆ្លងដែន និងការលបលួចដឹកជញ្ជូនជនបរទេស គេចចេញពីភូមិសាស្ត្រ ដែលត្រូវបិទខ្ទប់មកកាន់ខេត្តពោធិ៍សាត់៕
