.jpg)
លោក ហង់ជួន ណារ៉ុន និងលោកគ្រូ អ្នកគ្រូ ក្នុងពិធីផ្សព្វផ្សាយសុវត្ថិភាពចំណីអាហារ។ រូបថត សហការី
ភ្នំពេញៈ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាកាលពីថ្ងៃចន្ទម្សិលមិញបានប្រកាសបើកយុទ្ធនាការផ្សព្វផ្សាយអំពីសុវត្ថិភាពចំណីអាហារនៅតាមសាលារៀន ដោយស្នើឲ្យសាលារៀននានាក្លាយជាសាលាកុមារមេត្រីដែលមានសុវត្ថិភាពទាំងផ្លូវកាយ និងផ្លូវចិត្តសម្រាប់កុមារ។
ពិធីប្រកាសស្ដីពីយុទ្ធនាការផ្សព្វផ្សាយសុវត្ថិភាពចំណីអាហារនៅក្នុងសាលារៀននេះធ្វើឡើងនៅសាលាបឋមសិក្សាព្រះនរោត្ដមក្នុងរាជធានីភ្នំពេញមុនពេលយុទ្ធនាការនេះបន្តទៅតាមបណ្ដាខេត្តផ្សេងៗទៀត។
លោកបានពន្យល់ក្នុងពិធីប្រកាសយុទ្ធនាការនេះថា៖ «[សុវត្ថិភាព] ផ្លូវកាយរបៀបម៉េចបានន័យថា ត្រូវមានអគារដែលមានសុវត្ថិភាពចៀសវាងនូវការកើតឡើងនូវឧបទ្ទវហេតុផ្សេងៗ។ ហេតុដូច្នេះហើយបានជាក្រសួងអប់រំ យុវជន និងកីឡាយកចិត្តទុកដាក់ខ្ពស់ចំពោះសុវត្ថិភាពនៃបរិស្ថានសិក្សានេះ ហើយក៏បានស្នើសុំឲ្យខេត្តទាំងអស់ មន្ទីរទាំងអស់ ការិយាល័យអប់រំស្រុកខណ្ឌ ជាពិសេសនាយកសាលារៀនត្រូវវាយតម្លៃជាប្រចាំនូវស្ថានភាពអគារសិក្សាចៀសវាងអគារសិក្សាដែលទ្រុឌទ្រោមដែលអាចធ្វើឲ្យប៉ះពាល់ទៅដល់សុវត្ថិភាពផ្លូវកាយរបស់សិស្ស»។
ចំពោះសុខភាពផ្លូវចិត្តវិញ លោករដ្ឋមន្ត្រីបានស្នើឲ្យចៀសវាងកុំឲ្យមានបងតូចបងធំ ការគំរាមកំហែងផ្លូវចិត្តដែលអាចប៉ះពាល់ទៅដល់កុមារ និងសុវត្ថិភាពចំណីអាហារ។
លោកបន្តថា ការពិនិត្យមើលលើបញ្ហាផ្លូវចិត្ត និងផ្លូវកាយគឺជាតួនាទីរបស់នាយកសាលា។
លោក រស់ សុវិចា អ្នកនាំពាក្យក្រសួងអប់រំបានបញ្ជាក់កាលពីម្សិលមិញថា គោលបំណងចម្បងនៃយុទ្ធនាការនេះ គឺផ្សព្វផ្សាយឲ្យបានរឹតតែទូលំទូលាយជូនគ្រប់ភាគីពាក់ព័ន្ធសំខាន់ៗដូចជា គណៈកម្មការគ្រប់គ្រងសាលារៀន ឬនាយកសាលារៀន និងអ្នកលក់ចំណីអាហារនៅក្នុងសាលារៀនទាំងអស់ដើម្បីឲ្យពួកគាត់កាន់តែមានការយកចិត្តទុកដាក់ខ្ពស់ និងត្រួតពិនិត្យឲ្យបានរឹតតែហ្មត់ចត់នូវរាល់ចំណីអាហារក្នុងសាលារៀន។
លោកបញ្ជាក់ថា ដើម្បីសុវត្ថិភាព និងសុខុមាលភាពរបស់សិស្សានុសិស្ស អាហារ ៦ ប្រភេទត្រូវបានហាមឃាត់រួមមានអាហារដែលហួសកំណត់កាលបរិច្ឆេទ គ្រឿងស្រវឹង និងផលិតផលថ្នាំជក់ ចំណីអាហារដែលមិនមានប្រភពច្បាស់លាស់ ភេសជ្ជៈប៉ូវកម្លាំង ភេសជ្ជៈមានរសជាតិផ្អែមខ្លាំង កាហ្វេ ការ៉េម ទឹកស៊ីរ៉ូហ៍ ស្ករសូកូឡា ស្ករគ្រាប់ និងស្ករកៅស៊ូ ចាហួយគ្រប់ប្រភេទ នំដូណាត់ និងនំផ្អែមខ្លាំង។
លោកថ្លែងថា៖ «លទ្ធផលរំពឹងទុកនៃយុទ្ធនាការនេះគឺការបញ្ជ្រាបលើកកម្ពស់ចំណេះដឹងជូនអ្នកលក់ដូរដែលជាគោលដៅសំខាន់ឲ្យបានយល់ដឹងរឹតតែខ្ពស់អំពីការរក្សាក្បួនអនាម័យក្នុងការលក់ដូរ និងការហាមលក់ដូរចំណីអាហារដែលអាចបង្កឲ្យមានបញ្ហាសុខភាពដល់សិស្ស ជាពិសេសកុមារតូចៗ»។
លោកបញ្ជាក់ថា យុទ្ធនាការនេះមានការចូលរួមពីក្រុមហ៊ុនមួយចំនួន ហើយក្រសួងនឹងចុះអប់រំផ្សព្វផ្សាយនៅតាមសាលារៀននានាក្នុងប្រទេសកម្ពុជា ដោយជំហានដំបូងនេះនឹងឆ្ពោះទៅកាន់សាលាបឋមសិក្សា នរោត្ដមក្នុងរាជធានីភ្នំពេញ។
លោកបន្តថា យុទ្ធនាការដ៏ធំមួយនេះនឹងបន្តទៅកាន់សាលាបឋមសិក្សានៅតាមបណ្ដាខេត្តផ្សេងទៀតដូចជានៅសាលាបឋមសិក្សាអង្គរបាន ខេត្តកំពង់ចាម សាលាបឋមសិក្សាផ្សារ ខេត្តកំពង់ឆ្នាំង សាលាបឋមសិក្សាឃ្លាំងលើ ក្រុងព្រះសីហនុ និងសាលាបឋមសិក្សាបាគូរតាមកាលបរិច្ឆេទខុសៗគ្នាក្នុងខែមករានេះ។
ពាក់ព័ន្ធនឹងសុវត្ថិភាពផ្នែកសំណង់សាលារៀនលោក សុវិចា បានថ្លែងថា ក្រសួងអប់រំ យុវជន និងកីឡាកំពុងបន្តជួសជុលហេដ្ឋារចនាសម្ព័ន្ធអគារសិក្សានៅសាលារៀនចំនួន ៣៩ ដោយប្រើថវិកាសរុប ៧២០០ លានរៀលនៅតាមរាជធានី និងខេត្តចំនួន ១៩ នៅទូទាំងប្រទេស។ លោកថានៅទូទាំងប្រទេសកម្ពុជាមានសាលារៀនសាធារណៈសរុប ១៣ ០០០ សាលា។
លោកបានថ្លែងថា៖ «ក្រសួងអប់រំទទួលបានថវិកាប្រមាណ ១៨០០០ លានរៀលពីក្រសួងសេដ្ឋកិច្ច និងហិរញ្ញវត្ថុ ដើម្បីធ្វើការជួសជុល និងសាងសង់ក្នុង ១ ឆ្នាំៗ។ [ចំនួននេះ] មិនគិតពីថវិកាសាងសង់ដែលជាអំណោយដ៏ថ្លៃថ្លារបស់សម្តេចតេជោ និង មិនគិតពីថវិកាដៃគូអភិវឌ្ឍន៍ទេ»។
លោកស្រី Natascha Paddison អនុប្រធានអង្គការ UNICEF ប្រចាំកម្ពុជាបានថ្លែងឲ្យដឹងតាមរយៈអ៊ីមែលកាលពីម្សិលមិញថា អង្គការយូនីសេហ្វកោតសរសើរដល់យុទ្ធនាការរបស់ក្រសួងអប់រំក្នុងការលើកកម្ពស់សុវត្ថិភាពចំណីអាហារនៅតាមសាលា និងការហាមមិនឲ្យលក់អាហារប៉ះពាល់សុខភាពដល់សិស្សសាលា។
លោកស្រីបន្តថា អាហារមានសារធាតុចិញ្ចឹមមានសារៈសំខាន់សម្រាប់ការរស់រានមានជីវិតរបស់កុមារ សុខភាព និងបរិស្ថាន។ កុមារដែលមានអាហារូបត្ថម្ភល្អមានសុខភាពល្អ ហើយមានសមត្ថភាពលូតលាល់ រៀនសូត្រ និងចូលរួមក្នុងសហគមន៍របស់ពួកគេ។
លោកស្រីថ្លែងថា៖ «ដើម្បីធ្វើឲ្យមានបរិស្ថានចំណីអាហារមានសុខភាពសម្រាប់កុមារ យើងត្រូវធ្វើការរួមគ្នាដើម្បីប្រមែប្រមូលប្រព័ន្ធគាំទ្រនានា ដូចជា សុខភាព ទឹក អនាម័យ ការអប់រំ និងការការពារសង្គម ដើម្បីពង្រីកដល់លទ្ធផលនៃអាហារូបត្ថម្ភសម្រាប់ក្មេងៗ»។
លោកស្រី Natascha Paddison បានថ្លែងថា នៅឆ្នាំ ២០២០ នេះ អង្គការយូនីសេហ្វ និងក្រសួងអប់រំនឹងធ្វើការជាមួយគ្នាដើម្បីធ្វើឲ្យប្រសើរឡើងដល់កម្មវិធីអាហារូបត្ថម្ភសម្រាប់សិស្សសាលា ដោយពង្រឹងទំនាក់ទំនងរវាងមណ្ឌលសុខភាព និងសាលានៅតាមសហគមន៍ និងលើកកម្ពស់ការបរិភោគប្រកបដោយសុខភាព និងមានអាហារូបត្ថម្ភសម្រាប់សិស្សសាលា និងក្មេងតូចៗ៕
