.jpg)
សិស្សចូលប្រឡងសញ្ញាបត្រមធ្យមសិក្សាបឋមភូមិចាប់ពីថ្ងៃ ៣០ ខែវិច្ឆិការហូតដល់ថ្ងៃទី ១ ខែធ្នូនេះ។ ហ៊ាន រង្សី
ភ្នំពេញៈ លោក ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡាសម្រេចផ្អាកដំណើរការគ្រឹះស្ថានសិក្សាឯកជនជាបណ្ដោះអាសន្នរយៈពេល ២ សប្ដាហ៍ និងបញ្ចប់ឆ្នាំសិក្សា ២០១៩-២០២០ សម្រាប់គ្រឹះស្ថានសិក្សាសាធារណៈទាំងអស់ដើម្បីចៀសវាងការឆ្លងជំងឺកូវីដ១៩។ ប៉ុន្ដែការប្រឡងបាក់ឌុបនៅថ្ងៃទី ២១ ខែធ្នូ ឆ្នាំ ២០២០ នៅរក្សាទុកដដែល។
ការណែនាំរបស់លោករដ្ឋមន្រ្តីក្រសួងអប់រំបានធ្វើឡើង បន្ទាប់ពីលោកនាយករដ្ឋមន្រ្តី ហ៊ុន សែន បានចេញសារសំឡេងកាលពីថ្ងៃទី ២៩-៣០ ខែវិច្ឆិកា ដោយបានផ្តល់សិទ្ធិឱ្យរដ្ឋមន្ត្រី និងអភិបាលរាជធានី-ខេត្ត បិទផ្នែកខ្លះនៃក្រសួង សាលារៀន អាហារដ្ឋាន ឬទីតាំងដែលពាក់ព័ន្ធនឹងព្រឹត្តិការណ៍សហគមន៍ ២៨ វិច្ឆិកា ដើម្បីចៀសវាងការឆ្លងជំងឺកូវីដ-១៩ ដោយមិនចាំបាច់ជូនដំណឹងដល់លោកជាមុនឡើយ។
លោករដ្ឋមន្រ្តីបានបញ្ជាក់ថា ក្រសួងអប់រំបានណែនាំដល់ប្រធានមន្ទីរអប់រំ រាជធានី-ខេត្ដ និងគណៈគ្រប់គ្រងគ្រឹះស្ថានសិក្សាសាធារណៈទាំងអស់បញ្ចប់ឆ្នាំសិក្សា ២០១៩-២០២០ នៅថ្ងៃទី ៣០ ខែវិច្ឆិកា ឆ្នាំ ២០២០។ សម្រាប់គ្រឹះស្ថានសិក្សាសាធារណៈ បន្ទាប់ពីបានវាយតម្លៃបឋមរួចមក និងបើកបវេសនកាលឆ្នាំសិក្សា ២០២០-២០២១ នៅថ្ងៃទី ១១ ខែមករា ឆ្នាំ ២០២១»។
បើតាមសេចក្ដីជូនដំណឹងរបស់លោករដ្ឋមន្រ្ដីចំពោះការផ្អាកដំណើរការគ្រឹះស្ថានសិក្សាឯកជនជាបណ្ដោះអាសន្នរយៈពេល ២ សប្ដាហ៍គឺគិតចាប់ពីថ្ងៃទី ២៩ ខែវិច្ឆិកា ឆ្នាំ ២០២០។ ប៉ុន្ដែត្រូវបន្តការសិក្សាតាមប្រព័ន្ធអេឡិចត្រូនិក។
លោកនាយករដ្ឋមន្រ្ដី ហ៊ុន សែន កាលពីម្សិលមិញបានចេញបទបញ្ជាតាមរយៈសារសំឡេងបន្ថែមទៀតឱ្យអភិបាលរាជធានីភ្នំពេញ អភិបាលខេត្តសៀមរាប និងក្រសួងអប់រំដាក់ចេញវិធានការបន្ថែមទាក់ទងនឹងព្រឹត្តិការណ៍សហគមន៍ ២៨ វិច្ឆិកាគឺផ្អាករាល់ការជួបជុំដែលមានមនុស្សច្រើនមានពិធីអាពាហ៍ពិពាហ៍ ការជួបប្រជុំជាដើមរយៈពេល ១៥ ថ្ងៃគិតចាប់ពីថ្ងៃទី ៣០ ខែវិច្ឆិកាក្នុងខេត្ដទាំង ២ នេះ។
លោកនាយករដ្ឋមន្រ្ដីថ្លែងថា៖ «ក្រសួងអប់រំ ត្រូវធ្វើសកម្មភាពបន្ទាន់ថ្ងៃនេះ (ថ្ងៃទី ៣០ ខែវិច្ឆិកា) ទាក់ទិនជាមួយនឹងការបិទសាលារៀន បិទបវេសនកាល។ ហើយការរៀនបន្តក៏គួរផ្អាកសិនសម្រាប់សិស្សថ្នាក់ទី ១២ ដែលត្រៀមប្រឡង»។
លោកនាយករដ្ឋមន្រ្ដីបញ្ជាក់ថា ក្រសួងអប់រំត្រូវណែនាំទៅមន្ទីរអប់រំ និងផ្នែកពាក់ព័ន្ធក្នុងវិស័យអប់រំនៅខេត្ដសៀមរាប និងភ្នំពេញទាំងសាលាបណ្ដុះបណ្ដាលវិជ្ជាជីវៈក៏ដូចគ្នាដែរក៏ត្រូវបិទផ្អាកក្នុងរយៈពេល ១៥ ថ្ងៃ ដូច្នេះត្រូវអនុវត្ដជាបន្ទាន់។
លោក ហង់ជួន ណារ៉ុន កាលពីម្សិលមិញបានចេញសេចក្តីជូនដំណឹង ១ ទៀតស្ដីពីការផ្អាកសកម្មភាពជួបជុំរយៈពេល ១៥ ថ្ងៃនៅរាជធានីភ្នំពេញ និងខេត្ដសៀមរាប ដើម្បីចៀសវាងការឆ្លងជំងឺកូវីដ១៩ និងការរីករាលដាលក្នុងសហគមន៍។
សេចក្ដីជូនដំណឹងនេះបានដាក់ចេញនូវវិធានការផ្អាករាល់សកម្មភាពជួបជុំ សិក្ខាសាលា និងកិច្ចប្រជុំដែលមានអ្នកចូលរួមលើសពី ២០ នាក់។ ផ្អាកការរៀនសូត្ររបស់សិស្សថ្នាក់ទី ១២ និងការបំប៉នត្រៀមប្រឡងដែលធ្វើឡើងនៅក្នុងគ្រឹះស្ថានសិក្សា ឬលក្ខណៈប្រមូលផ្ដុំការផ្អាកនេះគឺគិតចាប់ពីពេលជូនដំណឹងកាលពីថ្ងៃម្សិលមិញ។
ចំណែកសិស្សថ្នាក់ទី ១២ ត្រូវបន្តធ្វើស្វ័យសិក្សា និងរៀនតាមអនឡាញ ហើយការប្រឡងសញ្ញាបត្រមធ្យមសិក្សាទុតិយភូមិសម័យប្រឡងថ្ងៃទី ២១ ខែធ្នូ ឆ្នាំ ២០២០ គឺនៅរក្សាទុកដដែល។
លោករដ្ឋមន្ដ្រីអប់រំក៏បានដាក់វិធានការឱ្យផ្អាកដំណើរការគ្រឹះស្ថានឧត្តមសិក្សាសាធារណៈ និងឯកជនជាបណ្តោះអាសន្ន និងផ្អាករាល់ការហាត់ប្រាណ និងលេងកីឡាដែលមានលក្ខណៈប្រមូលផ្ដុំរយៈពេល ១៥ ថ្ងៃគិតចាប់ពីថ្ងៃម្សិលមិញផងដែរ។
ក្រសួងការងារ និងបណ្ដុះបណ្ដាលវិជ្ជាជីវៈកាលពីម្សិលមិញក៏បានជូនដំណឹងស្ដីពីការផ្អាកដំណើរការបណ្តុះបណ្តាលនៅតាមគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈទាំងអស់រយៈពេល ១៥ ថ្ងៃគិតចាប់ពីថ្ងៃទី ១ ដល់ថ្ងៃទី ១៥ ខែធ្នូ ឆ្នាំនេះជាបណ្តោះអាសន្នផងដែរ ដើម្បីចូលរួមចំណែកក្នុងការទប់ស្កាត់ការរីករាលដាលនៃជំងឺកូវីដ១៩ក្នុងសហគមន៍។ ប៉ុន្ដែគ្រប់គ្រឹះស្ថានអាចបន្តដំណើរការបណ្តុះបណ្តាលតាមប្រព័ន្ធបណ្តុះបណ្តាលពីចម្ងាយ (ONLINE)។
សាលារៀនអន្តរទ្វីប អាមេរិកាំងនៅថ្ងៃទី ៣០ ខែវិច្ឆិកា ឆ្នាំ ២០២០ បានជូនដំណឹងស្ដីពីការផ្អាកការសិក្សាក្នុងថ្នាក់បណ្ដោះអាសន្ននេះដល់គ្រប់សាខានៃសាលារបស់ខ្លួន ដើម្បីចៀសវាងការឆ្លងជំងឺកូវីដ-១៩។ សាលារៀនឱ្យប្អូនៗសិស្សានុសិស្សគ្រប់កម្រិតថ្នាក់ទាំងអស់ផ្លាស់ប្ដូរការសិក្សាក្នុងថ្នាក់រៀនផ្ទាល់មកសិក្សាពីចម្ងាយ និងតាមប្រព័ន្ធអេឡិចត្រូនិកតាមរយៈកម្មវិធី Google Classroom, Zoom, Telegram, Messenger, Google Meet និងកម្មវិធីអនឡាញផ្សេងទៀតតាមកាលវិភាគ និងវេនសិក្សារបស់សិស្សចាប់ពីថ្ងៃទី ៣០ ខែវិច្ឆិកា ឆ្នាំនេះរហូតដល់មានការប្រកាសជាថ្មីរបស់ក្រសួងអប់រំ។
ដោយឡែកទាក់ទងនឹងការប្រឡងសញ្ញាបត្រមធ្យមសិក្សាបឋមភូមិចាប់ពីថ្ងៃ ៣០ ខែវិច្ឆិការហូតដល់ថ្ងៃទី ១ ខែធ្នូនេះ លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានបញ្ជាក់ពីម្សិលមិញថា ដំណើរការកំពុងប្រព្រឹត្តទៅដោយរលូនតាមការគ្រោងទុកតាមគ្រឹះស្ថានសិក្សានៅទូទាំង ២៥ ខេត្ត-រាជធានី។
អ្នកនាំពាក្យរូបនេះបានថ្លែងឱ្យដឹងទៀតថា៖ «ជារួម ក្រសួងអប់រំយល់ឃើញថា គណៈគ្រប់គ្រងគ្រឹះស្ថានសិក្សា បេក្ខជនប្រឡង និងគ្រប់ភាគីពាក់ព័ន្ធបានអនុវត្តវិធានការសុវត្ថិភាពសុខភាពខ្ជាប់ខ្ជួន។ មេប្រយោគកំពុងបំពេញការងារប្រកបដោយការទទួលខុសត្រូវខ្ពស់។ គ្មានហេតុការណ៍ ឬប្រធានស័កិ្តអ្វីកើតឡើងគួរឱ្យកត់សម្គាល់ទេ»៕
