.jpg)
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន។ ហេង ជីវ័ន
ភ្នំពេញៈ រដ្ឋមន្ត្រីក្រសួងព័ត៌មានលោក ខៀវ កាញារីទ្ធ បានជំរុញដល់ប្រព័ន្ធផ្សព្វផ្សាយព័ត៌មានតាមវិទ្យុនិងកាសែតមួយចំនួនត្រូវកែតម្រូវអត្ថបទរបស់ខ្លួនឡើងវិញ ប្រសិនបើមានការជំទាស់ចំពោះការចុះផ្សាយទាំងនោះថា ខុសពីការពិត ជាអ្វីដែលលោកថាដើម្បីបញ្ចៀសពីការប្ដឹងផ្ដល់គ្នាទៅតាមផ្លូវច្បាប់។
ថ្លែងនៅក្នុងពិធីបូកសរុបការងាររបស់ក្រសួងព័ត៌មានប្រចាំឆ្នាំ ២០១៨ នៅថ្ងៃ ២២ កុម្ភៈ លោក ខៀវ កាញារីទ្ធ បានលើកឡើងថា កន្លងមកធ្លាប់មានការស្នើសុំឲ្យស្ថានីយវិទ្យុ និងកាសែតខ្លះកែតម្រូវនូវអ្វីដែលចុះផ្សាយខុសពីការពិតនិងនាំឲ្យប៉ះពាល់កិត្តិយសបុគ្គល ប៉ុន្តែស្ថាប័នព័ត៌មានទាំងនោះបានបដិសេធមិនកែប្រែឡើយ។
ថ្វីដ្បិតមិនបញ្ជាក់ឈ្មោះស្ថាប័នព័ត៌មានដែលធ្លាប់ចុះផ្សាយខុសមិនកែតម្រូវក្ដី ប៉ុន្តែលោក ខៀវ កាញារីទ្ធ បន្តថា ក្រសួងមិនចង់ឲ្យមានការប្ដឹងផ្ដល់អ្នកកាសែតជុំវិញករណីនេះទេ ខណៈក្រសួងក៏ធ្លាប់ទទួលបានមតិខ្លះស្នើឲ្យធ្វើវិសោធនកម្មច្បាប់ស្ដីពីរបបសារព័ត៌មាន ដើម្បីដាក់បន្ថែមអំពីកាតព្វកិច្ចកែតម្រូវសម្រាប់ការចុះផ្សាយព័ត៌មានខុសពីការពិត។
លោកថា៖ «អ៊ីចឹងបានកន្លងមក មានការលើកយោបល់ថា ក្រសួងគួរតែវិសោធនកម្មច្បាប់ស្ដីរបបសារព័ត៌មាន ដែលយើងបានអនុម័តតាំងពីឆ្នាំ ១៩៩៥ ដោយដាក់បន្ថែមអំពីកាតព្វកិច្ចកែតម្រូវរបស់អ្នកសារព័ត៌មាន នៅពេលណាដែលមានការសុំឲ្យកែតម្រូវដោយមានភ័ស្ដុតាងត្រឹមត្រូវគ្រប់គ្រាន់»។
ជាមួយគ្នានេះ លោក ខៀវ កាញារីទ្ធ ក៏បានជំរុញឲ្យមន្ត្រីក្រសួងព័ត៌មានទាំងអស់ត្រូវមានភាពរហ័សរហួនក្នុងឆ្លើយតបឲ្យបានឆាប់ជុំវិញការផ្សព្វផ្សាយព័ត៌មានបំពុលដែលជាដំណឹងខុសពីការពិត។
លោកថា៖ «ប្រសិនបើមន្ត្រីក្រសួងព័ត៌មានមួយៗ នៅពេលមានដំណឹងបំពុលកើតឡើង គាត់បំភ្លឺភ្លាមគឺចប់ហើយ។ ក្រសួងព័ត៌មានអត់មានគោលជំហរក្នុងបញ្ហាប្ដឹងអីទេ ប៉ុន្តែជាបុគ្គលឬអង្គភាពណាគេគិតថា ធ្វើឲ្យប៉ះពាល់ដល់កេរ្តិ៍ឈ្មោះគេ ប៉ះពាល់ដល់ការរកស៊ីរបស់ពួកគេ អាហ្នឹងគាត់អាចប្ដឹងបាន ប៉ុន្តែគោលការណ៍ក្រសួងសំខាន់ យើងតបដំណឹងក្លែងបន្លំ និងបំពុលនេះ អាស្រ័យដោយការឆ្លើយតបឲ្យទាន់ពេលវេលា»។
របាយការណ៍ប្រចាំឆ្នាំ ២០១៨ របស់ក្រសួងព័ត៌មានបានចុះផ្សាយថា បច្ចុប្បន្ននៅកម្ពុជាមានអង្គភាពព័ត៌មានជាង ១ ៦០០ អង្គភាព ក្នុងនោះមានកាសែត ៤៣៩ ស្ថាប័ន ទស្សនាវដ្ដី ១៩៤ ស្ថាប័ននិងស្ថានីយវិទ្យុ ២២០ ស្ថាប័ន។
លោក ប៉ែន បូណា ប្រធានក្លិបអ្នកកាសែតកម្ពុជាលើកឡើងដែរថា ក្រៅពីមានតួនាទីជាអ្នកផ្ដល់ព័ត៌មាន អ្នកព័ត៌មានក៏មានកាតព្វកិច្ចដ៏សំខាន់ ១ ទៀត គឺប្រសិនបើមានការចុះផ្សាយដោយភាន់ច្រឡំ ហើយមានការស្នើឲ្យកែប្រែពីភាគីណាមួយ នោះអ្នកកាសែតត្រូវកែតម្រូវឡើងវិញដែលនេះក៏ជាការតម្រូវតាមច្បាប់ដែរ។
ផ្ទុយទៅវិញ លោកបានថ្លែងថា បើទោះបីជាមានភាគីណាមួយប្រឆាំងជំទាស់អំពីការចុះផ្សាយ ហើយស្នើឲ្យកែតម្រូវក្ដី ប៉ុន្តែអ្នកសារព័ត៌មានក៏មានសិទ្ធិក្នុងការរក្សាអ្វីដែលពួកគេបានចុះផ្សាយដែរ ប្រសិនបើការចុះផ្សាយមានភ័ស្ដុតាងច្បាស់លាស់នោះ។
លោកថា៖ «ស្ថាប័នកាសែតមានវិជ្ជាជីវៈ គាត់មានការត្រួតពិនិត្យខុសត្រូវផ្ទៀងផ្ទាត់ប្រយ័ត្នប្រយែងខ្លាចព័ត៌មានហ្នឹងខុសជាទូទៅខ្ញុំឃើញថាល្អ។ ប៉ុន្តែនៅមានសារព័ត៌មានខ្លះ ពិសេសអនឡាញហ្នឹងមួយចំនួនអត់បានចុះបញ្ជីអីទេ គាត់អត់សូវមានការទទួលខុសត្រូវ ដោយគ្រាន់តែឮអ្វី ១ អ៊ីចឹងចុះផ្សាយរហ័ស អត់បានផ្ទៀងផ្ទាត់ឲ្យបានច្បាស់លាស់ ដូច្នេះជួនកាលគាត់ផ្សាយទៅវាខុស»។
ចំណែកលោក លាង ដឺលុច អគ្គនាយកសារព័ត៌មានថ្មីៗបានលើកឡើងថា តាមពិតអ្នកកាសែតវិជ្ជាជីវៈតែងពិនិត្យយ៉ាងហ្មត់ចត់មុននឹងចេញផ្សាយព័ត៌មាន ប៉ុន្តែបើតាមបទពិសោធចំពោះការចុះផ្សាយព័ត៌មានខុសមួយចំនួនអាចដោយសារការផ្ទៀងផ្ទាត់មិនបានគ្រប់ជ្រុងជ្រោយឬភាពខ្វះចន្លោះ និងម្យ៉ាងទៀតប្រភពខ្លះបានបដិសេធវិញនូវអ្វីដែលពួកគេបានផ្ដល់ព័ត៌មានមកឲ្យចុះផ្សាយ។
លោកថា៖ «អង្គភាពខ្លះគេមិនកែ គេច្បាស់ខ្លួនគេហើយបានន័យថា អ្វីដែលផ្សាយគឺមិនខុស»។
ច្បាប់ស្ដីពីរបបសារព័ត៌មានមាត្រា ១០ ចែងថា ជនណាម្នាក់ដែលយល់ថា អត្ថបទណាមួយ ទោះជាសរសេរបញ្ឆិតបញ្ឆៀងក៏ដោយ រូបគំនូរឬរូបថតណាមួយនៃសារព័ត៌មានណាមួយដែលមានលក្ខណៈខុសពីការពិតធ្វើឲ្យខូចខាតដល់កិត្តិយស និងសេចក្ដីថ្លៃថ្នូររបស់ខ្លួនមានសិទ្ធិទាមទារឲ្យសារព័ត៌មាននោះធ្វើការកែតម្រូវឬមានសិទ្ធិឆ្លើយតបនិងធ្វើការប្ដឹងពីបទបរិហារកេរ្តិ៍ពីបទមួលបង្កាច់ឬពីបទជេរប្រមាថ ចំពោះការប៉ះពាល់កិត្តិយស និងសេចក្ដីថ្លៃថ្នូររបស់ខ្លួន។
ក្រសួងព័ត៌មានបញ្ជាក់អំពីការមានវិធានការមួយចំនួនដូចជា ចុះបន្តពិនិត្យតាមដានអំពីសារព័ត៌មានមួយចំនួនដែលធ្វើឲ្យប៉ះពាល់ដល់ក្រមសីលធម៌នៃច្បាប់ស្ដីពីរបបសារព័ត៌មាន និងរដ្ឋធម្មនុញ្ញ ចុះត្រួតពិនិត្យនៅតាមរោងពុម្ពដែលគ្មានច្បាប់អនុញ្ញាតនិងការចុះពិនិត្យចំពោះស្ថាប័នកាសែតគ្មានអាជ្ញាប័ណ និងគ្មានការបោះពុម្ពផ្សាយ ជាដើម៕
