កណ្តាលៈ លោក ជា សុផារ៉ា បានប្រកាសនៅថ្ងៃទី ២២ ខែមិថុនាថា ប្រជាពលរដ្ឋចំនួន ១៧៣ គ្រួសារ ដែលរងផលប៉ះពាល់ដោយសារគម្រោងសាងសង់អាកាសយានដ្ឋានអន្តរជាតិភ្នំពេញថ្មីដែលមានទីតាំងស្ថិតនៅក្នុងឃុំព្រែកស្លែង នៅស្រុកកណ្ដាលស្ទឹង ខេត្តកណ្ដាល ត្រូវបានដោះស្រាយចប់ជាស្ថាពរហើយ។
ក្នុងដំណើរចុះពិនិត្យការដ្ឋានសាងសង់អាកាសយានដ្ឋានអន្តរជាតិភ្នំពេញថ្មី កាលពីព្រឹកថ្ងៃទី ២២ ខែមិថុនា ឆ្នាំ ២០២០ លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានថ្លែងថា អាកាសយានដ្ឋានអន្តរជាតិភ្នំពេញថ្មី ដែលកំពុងសាងសង់នាពេលនេះមានទំហំ ២ ៦០០ ហិកតា ក្នុងនោះទំហំដី ៩២៦ ហិកតា ស្មើនឹង ៣៥% ជារបស់ក្រុមហ៊ុនអ្នកឧកញ៉ាពុង ឃាវសែ។ ចំណែកទំហំដី ១ ៦៧៣ ហិកតាទៀត គឺជាកម្មសិទ្ធិរបស់ប្រជាពលរដ្ឋ និងក្រុមហ៊ុនឯកជនមួយចំនួនក្នុងតំបន់នោះ។
លោកថ្លែងថា៖ «រហូតមកទល់ពេលនេះក្រុមការងារយើងបានជួយសម្របសម្រួលដោះស្រាយបញ្ចប់វិវាទជាមួយប្រជាពលរដ្ឋ ដែលមានដីនៅតាមបណ្ដោយទំនប់ ៥៤,៩២ និងទំនប់ ៩៤ ក្នុងទីតាំងអនុវត្តគម្រោងបានចំនួន ១៧៣ គ្រួសារ តាមរយៈការផ្ដល់សំណងគោលនយោបាយជាថវិកា និងផ្ដល់ទៅតាមទំហំក្បាលដីជាក់ស្ដែង»។
លោក ជា សុផារ៉ា បន្តថា៖ «ទន្ទឹមនឹងនេះក្រុមការងារបានដោះស្រាយបញ្ចប់វិវាទជូនប្រជាពលរដ្ឋចំនួន ៣៦ គ្រួសារ ដែលរងការប៉ះពាល់ដោយការសាងសង់ផ្លូវទៅកាន់ទីតាំងដីឡូត៍លំនៅឋានសម្រាប់ផ្ដល់ជូនពលរដ្ឋ ក្នុងនោះមានចំនួន ៨ គ្រួសារយល់ព្រមទទួលយកដីឡូត៍លំនៅឋាន ៥ គុណនឹង ២០ ម៉ែត្រការ៉េក្នុង ១ គ្រួសារ និង ២៨ គ្រួសារទៀតយល់ព្រមទទួលយកការដោះស្រាយគោលនយោបាយជាថវិកាផងដែរ»។
ជុំវិញករណីនេះលោក អ៊ួច សៅវឿន អភិបាលស្រុកកណ្ដាលស្ទឹងបានប្រាប់ភ្នំពេញប៉ុស្តិ៍នៅល្ងាចថ្ងៃទី ២២ ខែមិថុនា ថា ចំនួនក្បាលដីដែលរងផលប៉ះពាល់ដោយគម្រោងសាងសង់ព្រលានយន្តហោះអន្តរជាតិថ្មីនេះ នៅក្នុងក្របខ័ណ្ឌស្រុកកណ្ដាលស្ទឹងមានចំនួនជាង ២ ០០០ ក្បាលដី គិតជាទំហំជាង ២ ០០២ ហិកតា។
លោកថ្លែងថា៖ «បច្ចុប្បន្នក្រុមការងារដោះស្រាយផលប៉ះពាល់នៃគម្រោងនេះបានសម្របសម្រួលរកដំណោះស្រាយជូនប្រជាពលរដ្ឋបានមួយចំនួនហើយ និងកំពុងបន្តចុះសម្របសម្រួលរកដំណោះស្រាយជូនប្រជាពលរដ្ឋដែលជាម្ចាស់ក្បាលដីមួយចំនួនទៀតទៅតាមគោលនយោបាយរបស់រដ្ឋ និងតាមទំហំក្បាលដីជាក់ស្ដែង»។
យ៉ាងណាក៏ដោយកាលពីថ្ងៃទី ២២ ខែមិថុនា លោក ជា សុផារ៉ា បានប្រកាសថា គិតត្រឹមថ្ងៃទី ៣០ ខែ មេសា ឆ្នាំ ២០២០ ក្រុមការងារបានប្រមូលទិញដីតាមគោលការណ៍ក្នុងតម្លៃមិនលើសពី ៨ ដុល្លារ ក្នុង ១ ម៉ែត្រការ៉េបានចំនួន ២៣ ក្បាលដី ស្មើនឹង ៥៤ ហិកតា។
លោកបានបន្តថា បច្ចុប្បន្នក្រុមហ៊ុន CAIC បានដំណើរការសាងសង់ អាកាសយានដ្ឋានអន្តរជាតិភ្នំពេញថ្មី ខ្នាត 4F សម្រាប់ដំណាក់កាលទី ១ សម្រេចបាន ៥% ដែលគ្រោងបញ្ចប់ និងដាក់ឲ្យដំណើរការសាកល្បងនៅឆ្នាំ ២០២៣ ដែលអាចទទួលអ្នកដំណើរបានរហូតទៅដល់ ១៣ លាននាក់ ក្នុង ១ ឆ្នាំ។
ក្នុងឱកាសចុះពិនិត្យការដ្ឋានសាងសង់ព្រលានយន្តហោះនេះផងដែរ លោកឧកញ៉ា ពុង ឃាវសែ តំណាងក្រុមហ៊ុន CAIC បានថ្លែងថា ក្នុងគម្រោងអាកាសយានដ្ឋានថ្មីនេះ សព្វថ្ងៃមានកម្លាំងពលកម្មសរុបចំនួន ១ ១០២ នាក់ ក្នុងនោះមានវិស្វករបរទេសចំនួន ៩៥ នាក់ និងវិស្វករខ្មែរមានចំនួន ១១០ នាក់។ លោកបានបញ្ជាក់ថា៖ «តាមការប៉ាន់ស្មាន នៅពេលដំណើរការការងារដល់កំពូលនោះ តម្រូវការកម្លាំងពលកម្មនឹងកើនដល់ ២ ម៉ឺននាក់ក្នុង ១ ថ្ងៃ។
ជាមួយគ្នានេះខ្ញុំសង្ឃឹមថា តាមរយ:ការឆ្លងកាត់ ការសាងសង់ព្រលានយន្តហោះថ្មីនេះនឹងអាចបណ្ដុះបណ្ដាល អ្នកបច្ចេកទេស វិស្វករខ្មែរបានច្រើន និងផ្ដល់កម្លាំងបន្ថែមសម្រាប់អភិវឌ្ឍប្រទេសកម្ពុជានាពេលអនាគត»។ បើតាមលោក ឃាវសែ រហូតមកទល់ពេលនេះក្រុមហ៊ុនបានចំណាយទឹកប្រាក់ចំនួន ១២០ លានដុល្លារ សម្រាប់ផ្នែកប្រឹក្សាយោបល់ ផ្នែករចនា (គូរប្លង់) និងការបុកគ្រឹះ ការចាក់ដីបង្ហាប់ និងការកែសម្រួលគុណភាពដីជាដើម។ ក្រុមហ៊ុននឹងត្រូវចំណាយទឹកប្រាក់ចំនួន ២០៨ លានដុល្លារបន្ថែមទៀត រហូតដល់បំណាច់ឆ្នាំ ២០២០ ខាងមុខ៕