ភ្នំពេញៈ រដ្ឋមន្ត្រីក្រសួងបរិស្ថានលោក សាយ សំអាល់ បានប្រកាសគាំទ្រកញ្ចប់ថវិកាមូលនិធិបរិស្ថាន និងសង្គមដល់តំណាងសហគមន៍ទាំង ១៦៨ ដើម្បីយកទៅអភិវឌ្ឍដែលជាផ្នែកនៃការចូលរួមការពារ និងអភិរក្សធនធានធម្មជាតិ ខណៈតំណាងសហគមន៍ថា ជាឱកាសល្អដើម្បីជួយដល់ពលរដ្ឋឱ្យមានការអភិវឌ្ឍនៅមូលដ្ឋាន និងលើកស្ទួយសង្គមផងដែរ។
ការប្រកាសរបស់លោករដ្ឋមន្ត្រីដូចនេះបានធ្វើឡើងក្នុងសន្និបាតបណ្តាញសហគមន៍អភិរក្សធនធានធម្មជាតិប្រចាំឆ្នាំលើកទី ១ ក្នុងឆ្នាំនេះនៅទីស្តីការក្រសួងបរិស្ថានកាលពីថ្ងៃអង្គារ។
បើតាមហ្វេសប៊ុកក្រសួងបរិស្ថានកាលពីថ្ងៃអង្គារលោក សាយ សំអាល់ បានថ្លែងថា ប្រសិនបើបងប្អូនប្រជាសហគមន៍មានគោលដៅច្បាស់លាស់ រាជរដ្ឋាភិបាលនឹងគាំទ្រកញ្ចប់ថវិកាសម្រាប់ការអភិវឌ្ឍសហគមន៍ដើម្បីធ្វើយ៉ាងណាឱ្យសហគមន៍របស់យើងមានជីវភាពរីកចម្រើន។
លោក សាយ សំអាល់ បានបញ្ជាក់ថា៖ «ខ្ញុំជឿជាក់ថាបងប្អូននឹងសម្រេចចិត្តដ៏ត្រឹមត្រូវដើម្បីអនាគតសហគមន៍ និងសូមលើកទឹកចិត្តអាជ្ញាធរខេត្តសហការឱ្យបានស្អិតល្មួត និងសម្របសម្រួលជាមួយក្រសួងបរិស្ថាន និងសហគមន៍ដើម្បីអនុវត្តគម្រោងនានាអភិវឌ្ឍសហគមន៍»។
លោករដ្ឋមន្ត្រីបានបន្តថា រាជរដ្ឋាភិបាលកម្ពុជាមានទិសដៅលើកកម្ពស់ឱ្យសហគមន៍មានចំណូលបន្ថែម និងបង្កើតជម្រើសថ្មីសម្រាប់ការប្រកបមុខរបរចិញ្ចឹមជីវិតដើម្បីកាត់ផ្តាច់ពីការពឹងអាស្រ័យលើអនុផលព្រៃឈើដែលជាទម្លាប់តាំងពីយូរលង់ណាស់មកហើយតាមរយៈការបង្កើតមុខរបរថ្មីបម្រើឱ្យវិស័យអេកូទេសចរណ៍ និងការបណ្តុះបណ្តាលសហគមន៍ឱ្យចេះគ្រប់គ្រង និងការចិញ្ចឹមសត្វផ្គត់ផ្គង់ដល់ទីផ្សារ...។
លោក រ៉ាត់ រឿយ ប្រធានបណ្តាញសហគមន៍មូលដ្ឋានព្រះជ័យវរ្ម័ននរោត្តមភ្នំគូលែនក្នុងខេត្តសៀមរាបដែលបានចូលរួមសន្និបាតនេះបានប្រាប់ភ្នំពេញប៉ុស្តិ៍ពីថ្ងៃពុធថា នេះជាឱកាសល្អសម្រាប់អភិវឌ្ឍសហគមន៍ផ្ទាល់ផង និងសម្រាប់ជួយដល់ពលរដ្ឋនៅមូលដ្ឋានឱ្យមានការអភិវឌ្ឍផង។ មួយវិញទៀតវាក៏រួមចំណែកលើកស្ទួយជួយសង្គមផងដែរ។
លោកថ្លែងថា៖ «ខ្ញុំប្រហែលជាដាក់ (ពាក្យស្នើសុំថវិកា) យកទៅប្រើប្រាស់ក្នុងផ្នែកអេកូទេសចរណ៍ដើម្បីបង្កើនជីវភាពរបស់ពួកគាត់តាមរយៈរកចំណូលតាមអេកូទេសចរណ៍ ដូចជាការលក់វត្ថុអនុស្សាវរីយ៍ លក់ដំណាំផ្លែឈើ ផលអនុផលព្រៃឈើផ្សេងៗហើយក៏មានតាមរយៈការជូនភ្ញៀវជាលក្ខណៈសមាគមរបស់សហគមន៍ ហើយមានសេវាកម្មម៉ូតូឌុបអីផ្សេងៗអ៊ីចឹង។ កាលណាយើងមានអេកូទេសចរណ៍ ភ្ញៀវមកលេងច្រើន គាត់មានចំណូលចូលនៅក្នុងមូលដ្ឋានរបស់ពួកគាត់»។
លោកបន្តថា៖ «ខ្ញុំចាំមិនភ្លេច ប្រសាសន៍របស់ឯកឧត្តមរដ្ឋមន្ត្រី (បរិស្ថាន) គាត់ថា ក្នុងគោលការណ៍ដែលសហគមន៍បានស្នើថវិកាយកទៅប្រើប្រាស់ក្នុងសហគមន៍មូលដ្ឋានហ្នឹង គាត់ថាឱ្យតែសហគមន៍ហ្នឹងប្រើនៅក្នុងកញ្ចប់ថវិកាឱ្យបានត្រឹមត្រូវតាមដែលពាក្យស្នើសុំ កុំឱ្យតែប្រើខុសផែនការ»។
យោងតាមឯកសារទស្សនទានរបស់សន្និបាតនេះបានឱ្យដឹងថា គិតត្រឹមឆមាសទី ១ ឆ្នាំនេះក្រសួងបរិស្ថានបានបង្កើតសហគមន៍អភិរក្សធនធានធម្មជាតិចំនួន ១៦៨ សហគមន៍។ សហគមន៍ទាំងនេះត្រូវបានចងក្រង និងបង្កើតទៅជា ៣៥ បណ្តាញនៅក្នុងតំបន់ការពារធនធានធម្មជាតិចំនួន ២៤ ក្នុងខេត្តចំនួន ១៧។
បើតាមឯកសារដដែល គោលបំណងនៃការចងក្រង និងបង្កើតជាបណ្តាញនេះគឺដើម្បីធ្វើជាយន្តការសន្ទនារវាងសហគមន៍មូលដ្ឋាន និងរដ្ឋាភិបាលក្នុងការពង្រឹងកិច្ចសហការបង្កើនប្រសិទ្ធភាពការគ្រប់គ្រង និងអភិរក្សធនធានធម្មជាតិ និងលើកកម្ពស់ជីវភាពសហគមន៍មូលដ្ឋាន។
កាលពីឆ្នាំ ២០១៦ ក្រសួងបរិស្ថានធ្លាប់បានរៀបចំវេទិកាថ្នាក់ជាតិលើកទី ១ ស្តីពីការការពារ និងអភិរក្សធនធានធម្មជាតិនៅវិមានសន្តិភាពក្រោមអធិបតីភាពលោកនាយករដ្ឋមន្ត្រី ហ៊ុន សែន៕