.jpg)
ទិដ្ឋភាពវាលស្រែនៅស្រុកមោងឫស្សីដែលនៅខ្វះទឹក។ ហ្វេសប៊ុក
ភ្នំពេញៈ តាមរបាយការណ៍បង្កបង្កើនផលស្រូវគិតត្រឹមថ្ងៃទី ៥ ខែ សីហា របស់ក្រសួងកសិកម្មរុក្ខាប្រមាញ់ និងនេសាទបានឲ្យដឹងថា នៅរដូវវស្សាឆ្នាំនេះ ការបង្កបង្កើនផលស្រូវបានជាង ២ លានហិកតា ស្មើនឹងជិត ៨៣% ខណៈការនាំចេញកសិផលមានជិត ២,៥ លានតោន ប៉ុន្តែលោក វេង សាខុន រដ្ឋមន្ត្រីក្រសួងកសិកម្មបានបង្ហាញក្តីបារម្ភពីអាកាសធាតុដែលមានភាពមិនប្រក្រតី។
របាយការណ៍របស់ក្រសួងដែលបានផ្សព្វផ្សាយលើបណ្តាញសង្គមរបស់លោក វេង សាខុន កាលពីម្សិលមិញ បានបង្ហាញថា ការងារបង្កបង្កើនផលស្រូវក្នុងរដូវវស្សាទូទាំងប្រទេសនៅក្នុងឆ្នាំនេះ គឺមានផ្ទៃដីសរុប ២ ៣២៦ ៩១០ ហិកតា ក្នុងនោះផ្ទៃដីបង្កបង្កើនផលបានមានប្រមាណ ២ ១៣៧ ៧៥៨ ហិកតា ស្មើនឹង ៨២,៦៦% នៃផែនការសរុប។ ក្នុងចំណោមផ្ទៃដីដែលបានដាំដុះស្រូវវស្សានេះ គឺមានជាង ៦ សែនហិកតា បានដាំស្រូវស្រាល ចំណែកការដាំស្រូវកណ្តាលមានជាង ១ លានហិកតា និងស្រូវធ្ងន់មានជិត ៤ សែនហិកតា។
របាយការណ៍នេះ ត្រូវបានលោក វេង សាខុន អះអាងថាគឺជាលទ្ធផលដែលបានបូកសរុបចាប់ពីដើមឆ្នាំ ២០១៩ មកចំពោះការនាំចេញកសិផល រីឯការងារបង្កបង្កើនផលគឺបានបូកចាប់ពីដើមរដូវវស្សាមក។ ចំពោះផ្ទៃដីដែលបានដាំដំណាំរួមផ្សំ មាន ពោត ដំឡូងជ្វា បន្លែគ្រប់មុខ រួមទាំងអំពៅ និងសណ្តែកជាដើមនោះក៏មានប្រមាណ ៤៤ ០០៣ ហិកតា ខណៈផ្ទៃដីដាំដំណាំឧស្សាហកម្មរយៈពេលខ្លីមានប្រមាណជាង ៧ សែនហិកតា។
របាយការណ៍ដដែលក៏បានឲ្យដឹងបន្តថា ចំណែកស្ថិតិនៃការនាំចេញកសិផលនាដើមឆ្នាំនេះ គឺមុខទំនិញកសិផលដែលកម្ពុជាបាននាំចេញទៅក្រៅប្រទេស ដូចជា អង្ករ ដំឡូងមី គ្រាប់ស្វាយចន្ទី ពោត សណ្តែកសៀង ចេក ស្វាយ ម្រេច បន្លែ និងដំណាំផ្សេងៗទៀតគឺមានប្រមាណ ២ ៤៤៩ ៩៤៥,១៩ តោន។ ក្នុងនោះមានការនាំចេញទៅប្រទេសប្រមាណ ២០ មានដូចជា ចិន ថៃ វៀតណាម បារាំង កូរ៉េ អង់គ្លេស និងឥណ្ឌា ជាដើម។
ជាមួយនឹងការបង្ហាញរបាយការណ៍នេះ លោក វេង សាខុន បានលើកឡើងថា ឆ្នាំនេះពិតជាចម្លែកណាស់ដែលតាមសេចក្តីរាយការណ៍កាលពីថ្ងៃទី ៥ ខែ សីហា ឆ្នាំ ២០១៩ បានឲ្យដឹងថា នៅខេត្តបាត់ដំបង បើទោះបីជាភ្លៀងបានធ្លាក់រាយប៉ាយ តាមបណ្តាក្រុង ស្រុកមួយចំនួនក្ដី ក៏នៅមានភូមិ ឃុំមួយចំនួន នៃស្រុកមោងឫស្សីនៅតែមិនទាន់ទទួលបានទឹកភ្លៀងគ្រប់គ្រាន់ ពោលគឺបានត្រឹមសើមដីតិចតួចធ្វើឱ្យមានបញ្ហាប្រឈម និងការបារម្ភ។
ភ្នំពេញប៉ុស្តិ៍មិនអាចទាក់ទងសុំការអត្ថាធិប្បាយពីលោក ស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ដើម្បីសុំព័ត៌មានបន្ថែមជុំវិញបញ្ហានេះបានទេ ដោយសារមិនមានអ្នកលើកទូរស័ព្ទ កាលពីម្សិលមិញ។
លោកស្រី តុង ចាន់ធាង នាយិកាអង្គការសេដាក បានថ្លែងថា ការដាំដុះរបស់កសិករនៅតែធ្វើបែបធម្មតា ស្របពេលបញ្ហាប្រឈមមានដដែលៗ តែលោកស្រីយល់ថា កម្ពុជា គួរតែចៀសវាងការធ្វើកសិកម្មអាស្រ័យលើមេឃបន្តទៀត។
លោកស្រីបញ្ជាក់ថា៖ «តាមពិតខ្ញុំមិនដឹងរបាយការណ៍ស្តីពីស្ថិតិច្បាស់នោះទេ ប៉ុន្តែជាទូទៅតាមការសង្កេតឃើញរបស់ខ្ញុំ នៅតាមតំបន់ជនបទ គឺឃើញថាការធ្លាក់ភ្លៀងមានច្រើនគួរសមហើយកសិករចាប់ផ្តើមបង្កបង្កើនផល ដំណាំចម្ការធំៗ ដូចជាដំឡូងមីអីហ្នឹង។ មានការដាំដុះបានច្រើន ហើយតំបន់ដែលមានទឹកគ្រប់គ្រាន់ ពួកគាត់ ចាប់ផ្តើមដាំ ដោយខ្លះក៏បានប្រមូលផលនៅដើមរដូវ ខ្លះក៏ប្រឈមនឹងការរាំងស្ងួតហែង ដោយសារគ្មានភ្លៀង ដោយតំបន់ខ្លះក៏មានការជន់ជោរលិចខូចអស់ ព្រោះភ្លៀង»។
លោកស្រី តុង ចាន់ធាង ស្នើឲ្យរដ្ឋាភិបាល ជាពិសេសក្រសួងកសិកម្ម គួរដោះស្រាយបញ្ហាប្រឈមដដែលៗរបស់កសិករឲ្យបាន ចៀសវាងបង្ហាញតែតួលេខ ខណៈលោកស្រីបារម្ភថា នៅពេលកសិករប្រមូលផល តម្លៃកសិផល នឹងមានការធ្លាក់ចុះ ព្រោះថា កសិករក៏នៅប្រឈមជាដដែលទៅនឹងបញ្ហាទីផ្សារ ដែលមានការធ្លាក់ចុះ នៅពេលដល់រដូវប្រមូលផល ហើយបញ្ហានេះ ពេលខ្លះនាំឲ្យកសិករ បោះបង់មុខរបរនេះទៀតផង។
តាមរបាយការណ៍បូកសរុបការងាររបស់ក្រសួងកាលពីឆ្នាំ ២០១៨ បានឲ្យដឹងថា រយៈពេលពេញ ១ ឆ្នាំ ការងារបង្កបង្កើនផលស្រូវទូទាំងប្រទេស គឺមានផ្ទៃដីចំនួន ៣,៣៤ លានហិកតា ដោយការដាំដុះស្រូវវស្សា មានប្រមាណ ២,៧៥ លានហិកតា ស្របពេលដែលការនាំចេញកសិផលសរុបកាលពីឆ្នាំមុនគឺមានប្រមាណ ៤,២៣ លានតោន ៕
