The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋ​មន្ត្រី​ប្រតិកម្ម​ការរិះ​គន់​ថា ​ប្រព័ន្ធ​អប់រំ​ខ្សោយ​ខ្លាំង

រដ្ឋ​មន្ត្រី​ប្រតិកម្ម​ការរិះ​គន់​ថា ​ប្រព័ន្ធ​អប់រំ​ខ្សោយ​ខ្លាំង

Content image - Phnom Penh Post
លោក​ហង់ ជួន​ណារ៉ុន ផ្ដល​់​បទ​សម្ភាស​​​ដល់​ក្រុម​អ្នក​កា​​សែត​ កាល​ពី​​ពេល​កន្លងមក​​​។ ហុង មិនា

រដ្ឋ​មន្ត្រី​ប្រតិកម្ម​ការរិះ​គន់​ថា ​ប្រព័ន្ធ​អប់រំ​ខ្សោយ​ខ្លាំង

ភ្នំពេញៈ ក្រោយ​រង​ការ​រិះគន់​ពី​សំណាក់​ប្រធាន​គណបក្ស​ប្រឆាំង ​ដែលថា​ប្រព័ន្ធ​អប់រំ​ នៅ​កម្ពុជា​ទន់​ខ្សោយ​ខ្លាំង រដ្ឋ​មន្ត្រី​ក្រសួង​អប់រំ កាលពី​ម្សិលមិញ បាន​ប្រតិកម្ម​តប​វិញ​ដោយ​​ចាត់​ទុក ការ​លើក​ឡើង​នោះ​ថា ជា​ការ​រិះគន់​វាយ​ប្រហារ ដែល​មិន​យល់​ពី​បរិបទ​សង្គម​កម្ពុជា និង​មិនបាន​​រួម​ចំណែក​ជួយ​ធ្វើ​ការ​​កែ​លម្អ​ប្រព័ន្ធ​អប់រំ​នោះ​ទេ។

ក្នុង​វីដេអូ​ឃ្លីប រយៈពេល​ជាង ៥ នាទី​ដែល​ត្រូវបាន​បង្ហោះ​កាល​ពី​ថ្ងៃ​អង្គារ លើ​គេហទំព័រ​ផ្លូវ​ការ​របស់​ខ្លួន លោក សម រង្ស៊ី ប្រធាន​គណបក្ស​សង្គ្រោះ​ជាតិ បាន​ថ្លែង​ទៅ​កាន់​សិក្ខាកាម ដែល​ទើប​បញ្ចប់​វគ្គ​សិក្សា​ រយៈពេល ៣ ខែ រៀបចំ​ដោយ​គណបក្ស​នេះ ដោយ​រិះ​គន់​ថា ប្រព័ន្ធ​អប់រំ​នៅ​កម្ពុជា មាន​ភាព​ទន់ខ្សោយ​ខ្លាំង បើ​ធៀប​នឹង​ប្រទេស​ដទៃ ហើយ​​លោក​ក៏​បាន​សន្យា​ថា បើ​​គណបក្ស​សង្គ្រោះជាតិ​ឡើង​កាន់​អំណាច​កំណែ​ទម្រង់​ប្រព័ន្ធ​អប់រំ នឹងត្រូវ​កំណត់​ឡើង​វិញ ដើម្បី​ធានា​ប្រសិទ្ធភាព នៃ​សញ្ញា​បត្រដែល​សិស្សានុសិស្ស​ទទួល​បាន។

លោក សម រង្ស៊ី បាន​ថ្លែង​នៅ​គ្រា​នោះ​ថា៖ «នៅ​កម្ពុជា សញ្ញាបត្រ​ព្រោងព្រាត យើង​យក​ទៅ​ធ្វើ​អី បិទ​ជញ្ជាំង​ផ្ទះ​យ៉ាង​ម៉េច បើ​ប្រើ​មិន​បាន រក​ការងារ​មិន​បាន​ផង វា​ខូច​តម្លៃ​ទាំង​អស់ ទាំង​សញ្ញាបត្រ ​សាកលវិទ្យា​ល័យ ទាំង​គ្រូ និង​អ្នក​ចែក​ទៀត...សញ្ញាបត្រ​សព្វថ្ងៃ​គឺ​អត់​តម្លៃ ប្រព័ន្ធ​សិក្សា​ទន់​ខ្សោយ»។

ថ្លែងប្រាប់​អ្នកសារ​ព័ត៌មាន​ក្នុង​ទិវា​គ្រូ​បង្រៀន​ពិភព​លោក កាល​​ពី​​​ម្សិល​មិញ នៅ​វិទ្យាស្ថាន​បច្ចេកវិទ្យា​កម្ពុជា លោក ហង់ ជួនណារ៉ុន រដ្ឋ​មន្ត្រី​ក្រសួង​អប់រំ បាន​រំឭក​ពី​ពាក្យ​សម្តី​របស់​លោក សម រង្ស៊ី ដោយ​គូស​បញ្ជាក់​ថា កម្ពុជា បាន​ឆ្លងកាត់​សង្គ្រាម និង​បដិវត្តន៍ ដែល​​ពិត​ជា​នាំ​ឲ្យ​វិស័យ​អប់រំ​ធ្លាក់ចុះ​ ប៉ុន្តែ ស្ថិរភាព​សង្គម​ ក្នុង​រយៈពេល ១៥ ឆ្នាំ​ចុង​ក្រោយ​នេះ គឺ​បាន​នាំ​ឲ្យ​វិស័យ​នេះ​មាន​ការ​វិវត្ត​ទៅមុខ​គួរ​ឲ្យ​កត់​សម្គាល់។

លោកថា៖ «អ្វី​ដែល​ឯកឧត្តម សម រង្ស៊ី ថ្លែង​វាយ​ប្រហារ គឺជា​ការ​ទិតៀន វាយ​ប្រហារ មិន​មែន​ជា​ការជួយ​កែលម្អ​ទេ ការ​វាយ​ប្រហារ​នេះ គ្មាន​ន័យ គាត់​ជា​អ្នក​នយោបាយ បាន​តែ​ថា តែ​មិន​ដែល​បាន​ធ្វើ​ទេ យើង​មិន​ដែល​ឃើញ​គាត់ ហ្នឹង​បាន​កៀរ​គរ​ធនធាន​ទៅ​សាង​សង់​សាលា​ណាមួយ​នៅ​កម្ពុជា​ទេ គាត់​មិន​ឲ្យ​តម្លៃ​នៅ​កម្ពុជា​ដោយសារ​គាត់ និង​គ្រួសារ​គាត់​​មិន​ដែល​រៀន​នៅ​កម្ពុជា យើង​មិន​ច្បាស់​ថា តើគាត់​ចេះ​សរសេរ​ខ្មែរ​​ឲ្យ​បានល្អ​ដែរ​ឬយ៉ាង​ណា​ទេ»។

លោករដ្ឋមន្ត្រី​បន្ត​ថា ក្រសួង​មិន​អាច​ទទួល​បាន​ឡើយ ចំពោះ​ការ​វាយ​ប្រហារ​លើ​គុណ​ភាព​គ្រូ​បង្រៀន​បែប​នោះ។

លោក​ថា ក្រសួង នឹង​យក​ចិត្ត​ទុក​ដាក់​បណ្តុះ​បណ្តាល​គ្រូ​បង្រៀន​​បន្ថែម​ទៀត ជាពិសេស​នឹង​ដំឡើង​ប្រាក់​បៀវត្សរ៍​របស់​គ្រូ​បង្រៀន​ ឲ្យ​បាន​កាន់​តែ​ប្រសើរ​នៅ​ឆ្នាំ ២០១៦ ខាង​មុខ​នេះ។

ក្នុង​ឱកាស​ទិវា​គ្រូ​បង្រៀន​ពិភព​លោក ដែល​តំណាង​ក្រុម​គ្រូបង្រៀន​មួយ​ចំនួន​ មក​ពី​តាម​បណ្តា​រាជធានី-ខេត្ត បាន​រៀបចំ​កាល​ពី​ថ្ងៃទី ៥ ខែ​តុលា ក្រុម​គ្រូ​បង្រៀន​​ក៏​បាន​លើក​ឡើង​ពី​បញ្ហា​ប្រឈម ពាក់ព័ន្ធ​នឹង​បញ្ហា​ប្រាក់បៀវត្សរ៍ ដើម្បី​លើក​កម្ពស់​ជីវភាព​គ្រូ និង​គុណភាព​អប់រំ​ផងដែរ។

តំណាង​បណ្តាញ​គណនេយ្យភាព​សង្គម​អាស៊ី​បូព៌ា និង​អាស៊ីប៉ាស៊ីហ្វិក​ ប្រចាំ​កម្ពុជា លោក ​សន ជ័យ បាន​ឲ្យ​ដឹង​តាម​ការ​សង្កេត​របស់​លោក​​ថា ការ​ចោទ​ប្រកាន់​របស់​លោក សម រង្ស៊ី គឺ​ត្រូវ​ខ្លះ និង​មិនត្រូវ​ខ្លះ។

លោក​ថ្លែង​ថា ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ កំណែ​ទម្រង់​អំឡុង​ពេល​ប្រឡង និង​កម្មវិធី​សិក្សា​ត្រូវបាន​ផ្លាស់​ប្តូរ ដែល​នាំមក​នូវ​លទ្ធ​ផល​វិជ្ជ​មាន​ច្រើន បើ​ទោះ​បីជា​គុណ​ភាព​អប់រំ​កម្រិត​ឧត្តម​សិក្សា (បរិញ្ញាបត្រ) នៅ​មិន​ទាន់​មាន​សញ្ញាណ​កែប្រែ​ក្តី។

លោក សន ជ័យ ​និយាយ​ថា៖​«គុណភាព​អប់រំ​របស់​យើង ​មិន​អន់​នោះទេ យើង​ឃើញ​ថ្នាក់​ដឹក​នាំ​ស្ថាប័ន​និង​ក្រុមហ៊ុន​មួយ​ចំនួន​ សុទ្ធ​តែជា​ខ្មែរ ហើយ​បញ្ញវ័ន្ត​ខ្មែរ​យើង ​ក៏​លេច​ធ្លោ​ទៀត។ ខ្ញុំ​គិតថា បើ​ឯកឧត្តម ​សម រង្ស៊ី ​គិត​ថា បក្ស​គាត់​ អាច​មាន​គោល​នយោបាយ យុទ្ធសាស្ត្រ​កែ​ទម្រង់​ល្អ ម៉េច​ក៏​មិន​ចូល​រួម​សហការ​គ្នា ជា​មួយ​ក្រសួង​អប់រំ ហើយ​ធ្វើ​វា​ទៅ»៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។