.jpg)
លោក ស ខេង ដឹកនាំកិច្ចប្រជុំផែនការប្រចាំឆ្នាំ ២០២០ នៅក្រសួងមហាផ្ទៃ ថ្ងៃទី ៩ មិថុនា។ រូប Sar Kheng's FB
ភ្នំពេញៈ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃលោក ស ខេង ណែនាំឲ្យមន្ដ្រីរបស់ក្រសួងមហាផ្ទៃត្រូវប្រមូលរឿង និងចងក្រងជាបញ្ជីបញ្ហា ដើម្បីដោះស្រាយរឿង ឬបញ្ហាឲ្យអស់នូវរាល់រឿងទាំងឡាយណាដែលពាក់ព័ន្ធនឹងក្រសួងមហាផ្ទៃ ទោះបីរឿងនោះមានប្រភពមកពីណាក៏ដោយគឺមិនត្រូវទុកឲ្យសេសសល់ឡើយ។
លោកថ្លែងបែបនេះក្នុងពេលដឹកនាំកិច្ចប្រជុំឆ្លងផែនការសកម្មភាពប្រចាំឆ្នាំ ២០២០ របស់អគ្គាធិការដ្ឋាននៃក្រសួងមហាផ្ទៃនៅទីស្ដីការក្រសួងមហាផ្ទៃកាលពីថ្ងៃ ទី ៩ មិថុនា។ កិច្ចប្រជុំនេះមានការចូលរួមពីលោកលោកស្រីរដ្ឋលេខាធិការ អនុរដ្ឋលេខាធិការ អគ្គាធិការ អគ្គនាយក អគ្គស្នងការរង និងមន្ត្រីពាក់ព័ន្ធជាច្រើនរូបទៀត។
លោក ស ខេង ថ្លែងថា៖ «ការប្រមូលរឿងគឺប្រកាន់គោលការណ៍ប្រមូលរឿងឱ្យអស់ ហើយត្រូវដោះស្រាយឱ្យអស់ ពោលគឺព័ត៌មានទាំងឡាយណាដែលពាក់ព័ន្ធនឹងក្រសួងមហាផ្ទៃគឺយើងត្រូវខិតខំប្រមូលឱ្យអស់ហើយដោះស្រាយឱ្យអស់ ទោះបីតាមប្រភពណាក៏ដោយ គឺមិនត្រូវទុកឱ្យរឿងទាំងនោះនៅសេសសល់ឡើយ»។
ជាមួយគ្នានោះលោកក៏បានផ្តល់ជាអនុសាសន៍អំពីដំណើរការប្រមូល និងដោះស្រាយបណ្ដឹងនានាទាំងនៅថ្នាក់ក្រសួងនៅអង្គភាពរដ្ឋបាលថ្នាក់ក្រោមជាតិ ឬអង្គភាពកងកម្លាំងនគរបាលជាតិពាក់ព័ន្ធនឹងភាពមិនប្រក្រតីក្នុងការងារគ្រប់គ្រង ឬចាត់ចែងនានាដោយលោកលើកឡើងថា ក្រសួងមានយន្តការ ២ ក្នុងការដោះស្រាយបញ្ហា។ ក្នុងនោះគឺដោះស្រាយដោយអគ្គាធិការ និងដោះស្រាយដោយមានកិច្ចសហការជាមួយអគ្គនាយកដ្ឋានដែលមានការពាក់ព័ន្ធ។
លោកបញ្ជាក់ថា៖ «ពេលនេះ យើងអាចប្រមូលព័ត៌មានបានមួយផ្នែកតាមប្រព័ន្ធផ្សព្វផ្សាយ និងបណ្ដាញសង្គម។ ព័ត៌មានពីប្រភពទាំងនេះក៏មានខ្លះជាព័ត៌មានពិត ដែលយើងមិនត្រូវមើលរំលងឡើយ»។ លោកឲ្យដឹងថា ជាក់ស្ដែងទំព័រហ្វេសប៊ុកផ្ទាល់ខ្លួនរបស់លោកធ្វើឱ្យលោកទទួលព័ត៌មានជាច្រើនពីមហាជនតាមរយៈប្រអប់សារ និងប្រអប់បញ្ចេញមតិដែលត្រូវបានប្រមូលចងក្រងដោយក្រុមការងារហ្វេសប៊ុក។
លោកឧបនាយករដ្ឋមន្ត្រីថ្លែងថា កន្លងមកបន្ទាប់ពីក្រុមការងារហ្វេសប៊ុកបានបញ្ជូនព័ត៌មានស្ដីអំពីបញ្ហាប្រឈម ឬភាពអសកម្មនានាមកមានបញ្ហាខ្លះក៏ត្រូវបានដោះស្រាយ។ ប៉ុន្តែបញ្ហាខ្លះទៀតបានបញ្ជូនឱ្យអង្គភាពពាក់ព័ន្ធ តែនោះនៅមិនទាន់បានដោះស្រាយនៅឡើយទេ ដោយសារអាចមិនទាន់មានយន្តការជាក់លាក់។ ដូច្នេះត្រូវមានក្រុមការងារច្បាស់លាស់មួយដើម្បីតាមដាន និងដោះស្រាយបញ្ហាដែលប្រមូលបាន និងអង្គភាពពាក់ព័ន្ធត្រូវសហការគ្នាស្រង់ជាបញ្ជីបញ្ហា។
លោកបន្ថែមថា ជាបឋមអង្គភាពនីមួយៗត្រូវគ្រប់គ្រងសភាពការណ៍ផ្ទាល់របស់ខ្លួនដូចជា ការរិះគន់ ឬការប្រតិកម្មនានា ដើម្បីមានវិធានការដោះស្រាយឱ្យបានជាក់លាក់ និងទាន់ពេលវេលា។ ចំពោះក្រុមការងារអធិការកិច្ច និងសវនកម្ម មន្ត្រីទាំង ២ ក្រុមនេះត្រូវប្រកាន់នូវយុត្តិធម៌ និងភាពមិនលម្អៀងពីព្រោះការស្រាវជ្រាវទាំងឡាយណាដែលមានភាពលម្អៀងនឹងមិនអាចរកយុត្តិធម៌ឃើញឡើយ ហើយបញ្ហាអយុត្តិធម៌នេះគឺមិនអាចមើលស្រាលបានឡើយ ទោះក្នុងសង្គមណាក៏ដោយ។
លោកបញ្ជាក់ថា៖ «ដូច្នេះមន្ត្រីទទួលបានប្រាក់ខែរដ្ឋ ឬអាចហៅថា បានប្រាក់ខែពីប្រជាជនត្រូវប្រកាន់គោលការណ៍បម្រើប្រជាជនប្រកបដោយស្មារតីទទួលខុសត្រូវ និងតម្កល់ផលប្រយោជន៍ជាតិជាធំ ទើបអាចបញ្ចៀសភាពអសកម្ម ភាពមិនប្រក្រតី និងអយុត្តិធម៌បាន»។
កាលពីថ្ងៃទី ១០ មិថុនាលោក ស ខេង ក៏បានដឹកនាំកិច្ចប្រជុំឆ្លងផែនការសកម្មភាពឆ្នាំ ២០២០ របស់អគ្គនាយកដ្ឋានរដ្ឋបាលនៃក្រសួងមហាផ្ទៃនៅទីស្ដីការក្រសួងមហាផ្ទៃដោយមានការអញ្ជើញចូលរួមពីលោក លោកស្រី រដ្ឋលេខាធិការ អនុរដ្ឋលេខាធិការ និងអគ្គនាយក អគ្គនាយករងអង្គភាពពាក់ព័ន្ធជាច្រើនរូបទៀត។
លោកថ្លែងក្នុងកិច្ចប្រជុំនេះថា៖ «កិច្ចប្រជុំនេះគឺជាផ្នែកមួយនៃការខិតខំប្រឹងប្រែងក្នុងការងារកំណែទម្រង់រដ្ឋបាលសាធារណៈដែលជាអង្គភាពរដ្ឋបាលថ្នាក់កណ្ដាលដ៏មានសារៈសំខាន់។ ថ្វីដ្បិតជាលើកទី ១ ដែលក្រសួងបានរៀបចំឱ្យមានការរៀបចំផែនការសកម្មភាពប្រចាំឆ្នាំរបស់អង្គភាពនីមួយៗ ដែលផែនការដំបូងនេះអាចនឹងរៀបចំមិនបានល្អ ១០០ ភាគរយក៏ដោយ ប៉ុន្តែផែនការនេះនឹងក្លាយជាមូលដ្ឋានសម្រាប់ការរៀបចំផែនការសកម្មភាពនាឆ្នាំបន្តបន្ទាប់ទៀត»។
លោក អំ សំអាត នាយករងអង្គការការពារសិទ្ធិមនុស្ស (លីកាដូ) ស្វាគមន៍ចំពោះការយកចិត្ដទុកដាក់ដល់ប្រជាពលរដ្ឋ និងការដាក់ចេញវិធានការបែបនេះរបស់លោក ស ខេង។
លោកថ្លែងថា៖ «កន្លងមកយើងឃើញមានការដោះស្រាយខ្លះលើសំណុំរឿង និងបញ្ហាដែលពលរដ្ឋបានដាក់មកក្រសួង ប៉ុន្ដែរឿងមួយចំនួនអាជ្ញាធរមូលដ្ឋានដោះស្រាយមិនចេញ។ ជួនកាលពួកគាត់អត់បានស្វែងរកវិធី ឬធ្វើរបាយការណ៍ដាក់មកថ្នាក់លើ ដើម្បីដោះស្រាយបញ្ហានោះទេ ហើយបញ្ហាសំណុំរឿងនោះចេះតែនៅកប់ចោល ឬកកស្ទះដែលនាំឲ្យពលរដ្ឋមានការអាក់អន់ចិត្ដ និងខឹងសម្បា»។
មន្ត្រីជាន់ខ្ពស់សិទ្ធិមនុស្សរូបនេះបន្ថែមថា៖ «កន្លងមកយើងឃើញពលរដ្ឋមានការតវ៉ាទាមទារ ព្រោះតែដំណោះស្រាយនៅមូលដ្ឋានមិនបានដោះស្រាយធ្វើឲ្យពលរដ្ឋបាត់បង់ជំនឿ»៕
