.jpg)
គ្រោះថ្នាក់ចរាចរណ៍រថយន្តធ្លាក់ទឹកនៅក្បែរផ្លូវជាតិលេខ ៣ នៃខេត្តកំពត កាលពីថ្ងៃទី ៣ តុលា។ រូបថត ប៉ូលិស
ភ្នំពេញៈ រដ្ឋមន្ត្រីក្រសួងមហាផ្ទៃលោក ស ខេង កោតសរសើរ និងវាយតម្លៃខ្ពស់ចំពោះលទ្ធផលនៃការអនុវត្តច្បាប់ស្តីពីច្បាប់ចរាចរណ៍ផ្លូវគោកក្នុងពេល ៩ ខែ ដើមឆ្នាំ ២០២០ នេះដែលមានអត្រាថយចុះទាំងករណីគ្រោះថ្នាក់ស្លាប់ និងរងរបួស ប៉ុន្តែមន្ត្រីអង្គការខាងសុវត្ថិភាពចរាចរណ៍ ថាករណីស្លាប់ដោយគ្រោះថ្នាក់ចរាចរណ៍នៅតែមានច្រើនដដែល។
យោងតាមរបាយការណ៍របស់អគ្គស្នងការដ្ឋាននគរបាលជាតិពីចុងសប្តាហ៍មុនឱ្យដឹងថា ស្ថានភាពគ្រោះថ្នាក់ចរាចរណ៍រយៈពេល ៩ ខែ ចាប់ពីខែមករា ដល់ខែកញ្ញា គ្រោះថ្នាក់ចរាចរណ៍មានចំនួន ២ ៤៣០ ករណី ដែលបង្កឱ្យមានអ្នកស្លាប់ ១ ២៥៧ នាក់ និងរងរបួស ៣ ៦៦៣ នាក់។
របាយការណ៍បន្តថា ករណីនេះមានការថយចុះបើធៀបនឹងរយៈពេលដូចគ្នាក្នុងឆ្នាំ ២០១៩ ដែលគ្រោះថ្នាក់ចរាចរណ៍ថយ ៧២៩ លើក ស្មើ ២៣,០៧ ភាគរយ ដែលឆ្នាំមុនមាន ៣ ១៥៩ លើក។ ចំណែកអ្នកស្លាប់ថយចុះចំនួន ២៦៤ នាក់ ស្មើ ១៧,២៥ ភាគរយ ដែលឆ្នាំមុនមានអ្នកស្លាប់ចំនួន ១ ៥២១ នាក់។ រីឯអ្នករងរបួសមានការថយចុះចំនួន ១ ០៥៨ នាក់ ស្មើ ២២,៤១ ភាគរយ ដែលឆ្នាំមុនមានអ្នករងរបួសចំនួន ៤ ៧២១ នាក់។
នៅលើទំព័រហ្វេសប៊ុករបស់ឧបនាយករដ្ឋមន្ត្រី និងជារដ្ឋមន្ត្រី ក្រសួងមហាផ្ទៃ លោក ស ខេង កាលពីចុងសប្តាហ៍មុនដែរនោះ លោកបានកោតសរសើរ និងវាយតម្លៃខ្ពស់ចំពោះលទ្ធផលនៃការអនុវត្តច្បាប់ស្ដីពីចរាចរណ៍ផ្លូវគោកក្នុងរយៈពេល ៩ ខែ។ អត្រាគ្រោះថ្នាក់ស្លាប់ និងរងរបួសមានការថយចុះគួរឱ្យកត់សម្គាល់ បើប្រៀបធៀបនឹងរយៈពេលដូចគ្នាកាលពីឆ្នាំ ២០១៩។
លោកថ្លែងថា៖ «ផ្អែកលើលទ្ធផលនេះ ខ្ញុំសុំកោតសរសើរខ្ពស់ ចំពោះស្មារតីយកចិត្តទុកដាក់បំពេញភារកិច្ចដឹកនាំការអនុវត្តច្បាប់ស្ដីពីចរាចរណ៍ផ្លូវគោកទាំងយប់ ទាំងថ្ងៃ ដោយគ្មានការនឿយហត់របស់ថ្នាក់ដឹកនាំ និងមន្ត្រីកងកម្លាំងនគរបាលគ្រប់លំដាប់ថ្នាក់នៃអគ្គស្នងការដ្ឋាននគរបាលជាតិ គណៈបញ្ជាការឯកភាពរដ្ឋបាលរាជធានី-ខេត្ត និងអ្នកបញ្ជាមធ្យោបាយធ្វើដំណើរគ្រប់ប្រភេទទាំងអស់ដែលបានចូលរួម គោរពច្បាប់ចរាចរណ៍យ៉ាងខ្ជាប់ខ្ជួន និងគ្រប់ពេលធ្វើដំណើរធ្វើឱ្យអត្រាគ្រោះថ្នាក់ចំនួនអ្នកស្លាប់ និងរងរបួសដោយសារគ្រោះថ្នាក់ចរាចរណ៍មានការថយចុះគួរឱ្យកត់សម្គាល់ជាបន្តបន្ទាប់»។
លោក ស ខេង បានអំពាវនាវដល់ជនរួមជាតិទាំងអស់ អ្នកបញ្ជា យានយន្តទាំងអស់ប្រកាន់ខ្ជាប់នូវស្មារតីបើកបរដោយការគោរពច្បាប់ចរាចរណ៍ និងប្រុងប្រយ័ត្នគ្រប់ពេលវេលា។ លោកក៏បានស្នើដល់ថ្នាក់ដឹកនាំសមត្ថកិច្ចគ្រប់ លំដាប់ថ្នាក់បន្តបំពេញភារកិច្ចក្នុងការរក្សាសុវត្ថិភាពចរាចរណ៍ជូនប្រជាពលរដ្ឋ និងបន្តផ្តល់ការលើកទឹកចិត្តដល់មន្ត្រីដោយស្មារតីយកចិត្តទុកដាក់ខ្ពស់។
នាយកវិទ្យាស្ថានសុវត្ថិភាពចរាចរណ៍លោក គង់ រតនៈ សាទរចំពោះការថយចុះនៃករណីគ្រោះថ្នាក់ចរាចរណ៍នេះ ប៉ុន្តែលោកនៅតែមានការបារម្ភដោយសារចំនួននៃអ្នកស្លាប់ក្នុង ១ ថ្ងៃៗនៅតែមានចំនួនច្រើនដដែល។
លោកប្រាប់ ភ្នំពេញ ប៉ុស្តិ៍ ថា៖ «ប្រសិនបើយើងក្រឡេកមើលឱ្យស៊ីជម្រៅបន្តទៅទៀត យើងឃើញថា វាគ្រាន់តែថយទៅតាមភាគរយទេ។ ប៉ុន្តែបើយើងធ្វើការចែកជាមធ្យមភាគ គឺអ្នកដែលស្លាប់ដោយគ្រោះថ្នាក់ចរាចរណ៍នៅចន្លោះពី ៣ ទៅ ៤ នាក់ដដែលក្នុង ១ ថ្ងៃ។ ដូចនេះអ្នកស្លាប់ដោយសារគ្រោះថ្នាក់ចរាចរណ៍នៅតែមានចំនួនច្រើនដដែល»។
លោក គង់ រតនៈ មានការសាទរសម្រាប់ប្រសិទ្ធភាពនៃការអនុវត្តយុទ្ធនាការអប់រំផ្សព្វផ្សាយ ក៏ដូចជា ការរឹតបន្តឹងច្បាប់ចរាចរណ៍នៅក្នុងឆ្នាំនេះ។ ប៉ុន្តែលោកនៅតែលើកទឹកចិត្តមន្ត្រីមានសមត្ថកិច្ចបន្តការងារនេះបន្ថែមទៀត ដោយសារអ្វីដែលលោកចង់ឃើញគឺមិនត្រឹមតែការថយចុះទេគឺលោកមិនចង់ឱ្យមានអ្នកស្លាប់ ឬរបួសដោយគ្រោះថ្នាក់ចរាចរណ៍តែម្តង។
នាយកវិទ្យាស្ថានរូបនេះបញ្ជាក់ថា៖ «ខ្ញុំយល់ថា បញ្ហាចរាចរណ៍មិនមែនជារឿងរបស់សមត្ថកិច្ច ឬរបស់រាជរដ្ឋាភិបាលតែម្នាក់ឯងនោះទេ គឺជាកាតព្វកិច្ចរបស់យើងទាំងអស់គ្នា។ ជាពិសេសអ្នកបើកបរដែលមានអាយុចាប់ពី ១៥ ឆ្នាំដល់ ៤០ ឆ្នាំត្រូវតែចូលរួមគោរពច្បាប់ចរាចរណ៍ និងអនុវត្តច្បាប់នេះផងដែរ»៕
វីដេអូ៖
