.jpg)
រដ្ឋមន្ត្រីមហាផ្ទៃលោក ស ខេង ក្នុងកិច្ចប្រជុំស្តីពីច្បាប់អន្តោប្រវេសន៍នាថ្ងៃទី ២៨ កក្កដា។ រូប ក្រសួងមហាផ្ទៃ
ភ្នំពេញៈ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃលោក ស ខេង បានណែនាំអភិបាលគ្រប់ រាជធានី-ខេត្តត្រូវយកចិត្តទុកដាក់អនុវត្តកិច្ចការចាំបាច់មួយចំនួន ដើម្បីលើកកម្ពស់ការផ្ដល់សេវាស្នាក់កម្សាន្ត ការពារសន្ដិសុខ និងការទប់ស្កាត់ការចម្លងរាលដាលជំងឺកូវីដ ១៩ នៅថ្ងៃទី ១៧ ដល់ថ្ងៃទី ២១ សីហា ខាងមុខនេះ ដែលជាថ្ងៃឈប់សម្រាកសងចូលឆ្នាំ។
ក្នុងលិខិតចុះថ្ងៃទី ២៧ កក្កដា របស់លោក ស ខេង បញ្ជាក់ថាកិច្ចការចាំបាច់ទាំងនោះ ដូចជា ពង្រឹងសន្ដិសុខសណ្ដាប់ធ្នាប់ និងការផ្ដល់សេវាចាំបាច់នានាឱ្យបានល្អប្រសើរ ដើម្បីឆ្លើយតបតម្រូវការរបស់ពលរដ្ឋឱ្យបានទាន់ពេលវេលា ព្រមទាំងណែនាំម្ចាស់ផ្ទះសំណាក់ សណ្ឋាគារ ភោជនីយដ្ឋានជាដើមឱ្យរៀបចំទឹកអាល់កុល ឬជែលសម្រាប់លាងដៃ និងវាស់កម្ដៅភ្ញៀវទាំងអស់នៅតាមច្រកចេញចូល និងត្រូវឱ្យមានគម្លាតសុវត្ថិភាពបុគ្គល និងសង្គម។
លិខិតសរសេរថា៖ «ចំពោះផ្សារទំនើប ផ្សាររដ្ឋ ឬផ្សារឯកជនត្រូវណែនាំឱ្យម្ចាស់ និងអ្នកគ្រប់គ្រងរៀបចំទឹកអាល់កុល និងជែលសម្រាប់លាងដៃនៅតាមច្រក-ចេញចូល និងចាត់តាំងបុគ្គលិកឱ្យវាស់កម្ដៅប្រជាពលរដ្ឋទាំងអស់ដែលចូលទៅក្នុងផ្សារ»។
ក្រៅពីនេះ គ្រប់រាជធានី-ខេត្តត្រូវបន្តជំរុញឱ្យពលរដ្ឋនៅតាមមូលដ្ឋានគោរពឱ្យបានជាប់ជាប្រចាំក្នុងការរស់នៅបែបថ្មី ដូចជា សម្អាតដៃឱ្យបានញឹកញាប់ ពាក់ម៉ាស់ និងក្រមានៅពេលកណ្ដាស់ ឬក្អក និងរក្សាគម្លាតសុវត្ថិភាពពីបុគ្គលម្នាក់ទៅបុគ្គលម្នាក់យ៉ាងតិច ១,៥ ម៉ែត្រ។
កាលពីថ្ងៃទី ២៧ កក្កដា លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ក៏បានចេញលិខិតទៅកាន់រដ្ឋមន្ត្រីក្រសួងសាធារណការ និងដឹកជញ្ជូន ក្រសួងទេសចរណ៍ និងអភិបាលគ្រប់រាជធានី-ខេត្តដើម្បីជួយផ្សព្វផ្សាយបន្តដល់អង្គភាព និងអាជ្ញាធរមូលដ្ឋានរបស់ខ្លួននូវសេចក្ដីណែនាំរបស់ក្រសួងសុខាភិបាលស្ដីពីការការពារការចម្លងជំងឺកូវីដ ១៩ ក្នុងថ្ងៃឈប់សម្រាកចំនួន ៥ ថ្ងៃក្នុងខែសីហាខាងមុខនេះ។
ក្នុងលិខិតចុះថ្ងៃទី ១៧ កក្កដា បញ្ជាក់ថា ប្រជាពលរដ្ឋត្រូវតែជ្រើសរើសការជួបជុំគ្រួសារ និងធ្វើដំណើរកម្សាន្តដែលមានសុវត្ថិភាព និងមិនមានការចម្លងដូចជាដំណើរលក្ខណៈគ្រួសារដាច់ដោយឡែក គ្មានការជួបជុំច្រើន ចៀសវាងកន្លែងបិទជិតគ្មានខ្យល់ចេញចូល ការបរិភោគអាហារជាមួយគ្នាច្រើននៅក្រៅផ្ទះ ការជប់លៀងទ្រង់ទ្រាយធំ។
មិនត្រូវជុំគ្នាលេងល្បែង និងច្រៀងរាំ ផឹកស៊ីគគ្រឹកគគ្រេងគ្មានគម្លាតសុវត្ថិភាព ចៀសវាងទៅកម្សាន្តនៅខារ៉ាអូខេ ក្លិបកម្សាន្ត និងការធ្វើដំណើរតាមរថយន្តសាធារណៈដែលផ្ទុកមនុស្សច្រើន។
លោក ឃាង ភារម្យ មន្ត្រីនាំពាក្យខេត្តព្រះសីហនុលើកឡើងថារដ្ឋបាលខេត្តតែងអនុវត្តជាប្រចាំតាមគោលការណ៍ណែនាំជាបន្តបន្ទាប់របស់ក្រសួងសុខាភិបាល និងក្រសួងមហាផ្ទៃដូចជាការធ្វើចត្តាឡីស័កអ្នកដំណើរមកពីក្រៅប្រទេសនៅតាមច្រកអន្តរជាតិសំខាន់ៗរួមមានព្រលានយន្តហោះ និងកំពង់ផែរួមទាំងការចុះអប់រំពលរដ្ឋឱ្យធ្វើអនាម័យ និងពាក់ម៉ាស់ជាដើម។
លោកបន្តថា នៅក្នុងរយៈពេលចុងក្រោយនេះ ខេត្តព្រះសីហនុមានលក្ខណៈកាន់តែល្អប្រសើរ ដូចជាហេដ្ឋារចនាសម្ព័ន្ធ និងមានទីកន្លែងកម្សាន្តច្រើន និងធំទូលាយជាងមុន ដែលជួយឱ្យពលរដ្ឋមកកម្សាន្តក្នុងខេត្តនេះនៅថ្ងៃឈប់សម្រាកថ្ងៃទី ១៧ ដល់ថ្ងៃទី ២១ សីហា ខាងមុខនេះ អាចរក្សាគម្លាតសុវត្ថិភាពពីគ្នាបាន ខណៈកន្លែងកម្សាន្តដូចជាតំបន់ឆ្នេរជាដើម ក៏ត្រៀមដាក់ពង្រាយមន្ត្រីទេសចរណ៍ និងមន្ត្រីសុខាភិបាលអំពីការរក្សាគម្លាតសុវត្ថិភាព។
លោកថា៖ «ពាក់ព័ន្ធនឹងការងាររៀបចំផែនការហ្នឹង យើងលម្អិតបន្ថែមទៀត បន្ទាប់ពីមានកិច្ចប្រជុំពេលខាងមុខ»។
កាលពីថ្ងៃទី ២៨ កក្កដា ក្រសួងសុខាភិបាលបានប្រកាសករណីនាំចូលជំងឺមួយករណីលើបុរសជនជាតិឥណ្ឌាដែលបានធ្វើដំណើរតាមជើងហោះហើរដឹកអ្នកដំណើរចម្រុះជាតិសាសន៍សរុប ៩០ នាក់ ចេញពីប្រទេសឥណ្ឌា តជើងហោះហើរនៅប្រទេសកូរ៉េខាងត្បូង និងប្រទេសម៉ាឡេស៊ី ហើយបានដល់កម្ពុជាកាលពីថ្ងៃទី ២៦ កក្កដា។
គិតត្រឹមថ្ងៃម្សិលមិញ កម្ពុជាមានករណីឆ្លងសរុប ២៣៣ នាក់ ក្នុងនោះព្យាបាលជាសះស្បើយមានចំនួន ១៥៤ នាក់។ ក្នុងខែកក្កដានេះ មន្ត្រីក្រសួងសុខាភិបាលបញ្ជាក់ថា ក្នុងខែកក្កដា ការនាំចូលករណីពីក្រៅប្រទេសចូលមកកម្ពុជា គឺបានកើនឡើងយ៉ាងគំហុកដែលភាគច្រើនចេញតាមរយៈជើងហោះហើរមកពីប្រទេសម៉ាឡេស៊ី និងឥណ្ឌូនេស៊ី។
រដ្ឋាភិបាលបានសម្រេចផ្អាកជើងហោះហើរមកពីប្រទេសទាំង ២ នេះចាប់ពីថ្ងៃទី ១ ខែសីហា ដើម្បីទប់ស្កាត់កុំឱ្យមានការឆ្លងរាលដាលជំងឺកូវីដពីបុគ្គលម្នាក់ទៅបុគ្គលម្នាក់ ដោយកម្ពុជាត្រូវមានថ្ងៃឈប់សម្រាកច្រើនចាប់ពីខែសីហានេះទៅ៕
