លោក ព្រុំ សុខា រដ្ឋមន្ត្រីក្រសួងមុខងារសាធារណៈ ដាស់តឿនមន្ត្រីក្រោមឱវាទគ្រប់ជាន់ថ្នាក់កុំឲ្យគេចវេសពីការងារក្នុងដំណាក់កាលនេះ ដោយយកលេស Lock down [ថាគេចាក់សោខ្លួន] ដើម្បីបង្ការការពារជំងឺកូវីដ ១៩ នោះទេ ហើយត្រូវបង្កើតប្រសិទ្ធភាពការងារ ក្នុងការទទួលបម្រើសេវាសាធារណៈជូនប្រជាពលរដ្ឋឲ្យបានល្អថែមទៀត។
ការថ្លែងយ៉ាងដូច្នេះរបស់លោករដ្ឋមន្ត្រី ត្រូវបានធ្វើឡើងក្នុងពិធីប្រកាសចូលកាន់មុខតំណែងថ្នាក់ដឹកនាំ និងមន្ត្រីរាជការក្រសួងមុខងារសាធារណៈ កាលពីថ្ងៃទី ៣ ខែមិថុនា នៅសាលាភូមិន្ទរដ្ឋបាល។ នេះបើតាមការចុះផ្សាយរបស់ស្ថាប័នសារព័ត៌មានអង្គភាព Fresh News។
Fresh News បានដកស្រងសម្តីរបស់លោក ព្រុំ សុខា យ៉ាងដូច្នេះថា ក្នុងពេលជួបវិបត្តិជំងឺកូវីដ ១៩ ដែលមានកាលៈទេសៈខ្លះមិនអាចចេញធ្វើដំណើរ ឬ Lock down នោះ ក៏មិនមែនមន្ត្រីទាំងឡាយត្រូវនៅធ្វើការក្នុងផ្ទះទាំងអស់គ្នានោះដែរ ពីព្រោះមន្ត្រីខ្លះត្រូវផ្ដល់សេវាសាធារណៈដោយផ្ទាល់ជូនប្រជាពលរដ្ឋ។
លោកថ្លែងដូច្នេះថា៖ «មិនអាចមានលេសថាកើតកូវីដ គេ Lock down ខ្ញុំមិនអាចចេញទៅធ្វើការបាននោះឡើយ។ អ្វីដែលចាំបាច់ត្រូវការពារខ្លួនឯងផង ការពារកុំឱ្យអ្នកដទៃមកចម្លងយើងផង ហើយផ្ដល់សេវាបានប្រកបដោយការប្រុងប្រយ័ត្ន។ នេះជាការងារគំរូរបស់មន្ត្រីរាជការសាធារណៈត្រូវអនុវត្តឱ្យបានខ្ជាប់ខ្ជួន»។
ក្រៅពីនេះ លោកព្រំ សុខា បានដាស់តឿនមន្ត្រីមុខងារសាធារណៈគ្រប់រូប ត្រូវបន្តពង្រឹងគុណភាព ប្រសិទ្ធភាព និងប្រសិទ្ធផលការងារទាំងឡាយទាំងពួងជូនក្រសួង ស្ថាប័នរបស់ខ្លួន។ ពិសេសប្រជាជាតិទាំងមូល ហើយត្រូវអភិវឌ្ឍន៍សមត្ថភាពទៅតាមការរីកចម្រើនប្រព័ន្ធឌីជីថល ឬបដិវត្តឧស្សាហកម្ម ៤.០ ដែលពោរពេញទៅដោយការប្រើប្រាស់បច្ចេកវិទ្យាទំនើបៗ។
លោកឈឿន ប៊ុណ្ណារត្ន័ អនុរដ្ឋលេខាធិការ និងជាអ្នកនាំពាក្យក្រសួងមុខងារសាធារណៈ ប្រាប់ភ្នំពេញប៉ុស្តិ៍ពីម្សិលមិញថាក្នុងពិធីប្រកាសចូលកាន់តំណែងនោះ រដ្ឋមន្ត្រីក្រសួងមុខងារសាធារណៈ មិនត្រឹមតែដាស់ឲ្យមន្ត្រីទាំងអស់បំពេញការងាររបស់ខ្លួនឲ្យបានល្អប៉ុណ្ណោះទេ។ ប៉ុន្តែលោករដ្ឋមន្ត្រីថែមទាំងបានណែនាំឲ្យមន្ត្រីមុខងារសាធារណៈគ្រប់ជាន់ថ្នាក់ គោរពឲ្យបាននូវគោលការណ៍រក្សាគម្លាត និងអនាម័យ ដើម្បីការពារការឆ្លងរីករាលដាលនៃជំងឺនេះផងដែរ។
លោកបញ្ជាក់ថា៖ «តាមពិតទៅ ឯកឧត្តមរដ្ឋមន្ត្រី ក៏បាន[ដាស់តឿន]មន្ត្រីទាំងអស់រក្សានូវចរន្តការងារបច្ចុប្បន្ន ក្នុងការបម្រើការងារ ជាពិសេសក្នុងការបើកផ្តល់ប្រាក់បៀវត្សរ៍មន្ត្រីរាជការជាប្រចាំ។ ប៉ុន្តែក្នុងន័យឲ្យយើងគោរពតាមបទដ្ឋាននៃការណែនាំរបស់ក្រសួងសុខាភិបាល ដោយពាក់ម៉ាស់ និងរក្សាចម្ងាយពីគ្នា ចំពោះមន្ត្រីដែលកំពុងបំពេញការងារ»។
បើតាមលោក ឈឿន ប៊ុណ្ណារត្ន័ បានឲ្យដឹងថា បើទោះបីបច្ចុប្បន្ន ពិភពលោក ក៏ដូចជាកម្ពុជា កំពុងប្រឈមជំងឺកូវីដ ១៩ ក៏មន្ត្រីរាជការសាធារណៈក្រោមក្របខ័ណ្ឌក្រសួងមុខងារសាធារណៈ នៅតែបន្តបំពេញការងារជាធម្មតា ខណៈមន្ត្រីរាជការសារធាណៈនៅតាមក្រសួងនានាមានមួយចំនួនតូចប៉ុណ្ណោះដែលបន្តបំពេញការងារនៅតាមផ្ទះតាមរយៈអនឡាញ៕