ភ្នំពេញ៖ រដ្ឋមន្ត្រីក្រសួងយុត្តិធម៌លោក កើត រិទ្ធ បានប្រាប់ឯកអគ្គរាជទូតអូស្ត្រាលីលោក Pablo Kang នៅក្នុងជំនួបកាលពីថ្ងៃអង្គារ នៅក្រសួងយុត្តិធម៌ថា ការចាប់ខ្លួនបុគ្គលណាមួយដោយសមត្ថកិច្ច គឺធ្វើទ្បើងដោយអនុលោមតាមច្បាប់កម្ពុជា។ ការលើកឡើងនេះ ជាការឆ្លើយតបទៅនឹងក្ដីកង្វល់របស់លោក Kang និងសារដែលសរសេរនៅលើបណ្ដាញសង្គម។
លោករដ្ឋមន្ត្រី កើត រិទ្ធ បានប្រាប់លោក Kang ថា សិទ្ធិសេរីភាពបុគ្គលត្រូវយកមកអនុវត្តក្នុងក្របខ័ណ្ឌច្បាប់ ហើយការអនុវត្តសិទ្ធិហួសព្រំដែន ប៉ះពាល់ដល់សិទ្ធិអ្នកដទៃ ឬបំពានលើច្បាប់ត្រូវប្រឈមនឹងការទទួលខុសត្រូវចំពោះមុខច្បាប់ ហើយនេះពុំមែនជាការអនុវត្តសិទ្ធិសេរីភាពបុគ្គលទេ។
លោកបន្តថា ច្បាប់នៃប្រទេសនីមួយៗមិនដូចគ្នាទេ ដោយសារបរិបទសង្គម និងប្រវតិ្តសាស្រ្តរបស់ប្រទេសនីមួយៗខុសៗគ្នា។ ជាទិដ្ឋភាពប្រវតិ្តសាស្រ្ត បញ្ហាព្រំដែន គឺជារឿងដ៏រសើបបំផុតរបស់កម្ពុជា ហើយការញុះញង់ មួលបង្កាច់ការពិតលើបញ្ហាព្រំដែន ធ្លាប់បានធ្វើឱ្យកម្ពុជាធ្លាក់ចូលក្នុងភ្នក់ភ្លើងសង្គ្រាម ការបែកបាក់ជាតិ និងអស្ថិរភាពសង្គមអស់ជិត ៣ ទសវត្សរ៍។
បើតាមលោក កើត រិទ្ធ សម្រាប់កម្ពុជា ការមួលបង្កាច់ និងការបំភាន់ការពិតលើបញ្ហាព្រំដែនក្នុងចេតនាញុះញង់ឱ្យមានចលាចលសង្គម គឺជាអំពើខុសច្បាប់ បំផ្លាញសន្តិភាព និងស្ថិរភាពប្រទេស ហើយពុំមែនជាការបញ្ចេញមតិទ្បើយ។
លោករដ្ឋមន្ត្រីបញ្ជាក់ថា៖ «កម្ពុជាប្រកាន់យកនូវរបបនីតិរដ្ឋ។ ហេតុនេះកម្ពុជាត្រូវអនុវត្តច្បាប់របស់ខ្លួន ចំពោះការប្រព្រឹត្តខុសច្បាប់ ដើម្បីធានាការពារសនិ្តសុខសង្គម និងសណ្តាប់ធ្នាប់សាធារណៈ ក៏ដូចជាសម្រាប់ជាឧត្តមប្រយោជន៍ដល់ប្រជាពលរដ្ឋទូទៅ។ នៅក្នុងសង្គមនីតិរដ្ឋ ចំពោះបុគ្គលដែលត្រូវបានចាប់ខ្លួន ដោយអាជ្ញាធរមានសមត្ថកិច្ច មានសិទ្ធិពេញលេញតាមផ្លូវច្បាប់ ដើម្បីការពារខ្លួន ឬពឹងពាក់មេធាវីល្អៗ ដើម្បីការពារខ្លួននៅចំពោះមុខតុលាការ»។
ទន្ទឹមនឹងនេះ លោក កើត រិទ្ធ បានពន្យល់ថា ការប្រមូលផ្តុំគ្នាតាមដងផ្លូវ ដើម្បីតវ៉ាទាមទារឱ្យមានការដោះលែងបុគ្គលណាមួយ គឺជាការដាក់សម្ពាធលើតុលាការ និងស្ថាប័នអនុវត្តច្បាប់ ដែលនេះជាការប្រាសចាកពីគោលការណ៍នៃនីតិរដ្ឋ។
គិតចាប់ពីចុងខែកក្កដា មក មនុស្សចំនួន ១៤ នាក់ ត្រូវបានចាប់ខ្លួនពាក់ព័ន្ធនឹងការលើកឡើងថា កម្ពុជាបាត់ដីទៅវៀតណាមតាមការបោះបង្គោលព្រំដែនប្រទេសទាំង ២ ក្នុងនោះមានលោក រ៉ុង ឈុន និងលោក សួង សុភ័ណ្ឌ និងអ្នកគាំទ្រឱ្យមានការដោះលែងរូបលោក។ នេះបើតាមការបញ្ជាក់ពីលោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ។
ក្រៅពីនេះ លោក កើត រិទ្ធ និងលោក Kang ក៏បានពិភាក្សាគ្នាលើការផ្ដល់ជំនួយរបស់អូស្ត្រាលីដល់កម្ពុជាផងដែរ ដោយលោក កើត រិទ្ធ បានអរគុណរដ្ឋាភិបាលអូស្ត្រាលីដែលបានចូលរួមចំណែកស្ទើរគ្រប់វិស័យនៅកម្ពុជា រួមមានជំនួយក្នុងវិស័យសុខាភិបាល និងវិស័យកសិកម្ម។ជំនួយបច្ចេកទេសរៀបចំកសាងលិខិតបទដ្ឋានគតិយុត្តនាពេលកន្លងមក ដូចជាច្បាប់ស្តីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌជាដើម។ នេះបើតាមគេហទំព័រក្រសួងយុត្តិធម៌។
បើតាមក្រសួងយុត្តិធម៌ លោក Kang បានសរសើរចំពោះកិច្ចសហប្រតិបត្តិការល្អរបស់រាជរដ្ឋាភិបាលកម្ពុជា ជាពិសេសលើការប្រយុទ្ធប្រឆាំងនឹងការសម្អាតប្រាក់អាជីវកម្មលើកុមារ និងឧក្រិដ្ឋកម្មឆ្លងដែន ហើយលោកក៏បានសាទរ ចំពោះកិច្ចខិតខំប្រឹងប្រែងរបស់ក្រសួងយុត្តិធម៌ ក្នុងយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត។
ស្ថានទូតអូស្ត្រាលីបានប្រាប់ភ្នំពេញ ប៉ុស្តិ៍ តាមអ៊ីមែលថា លោក Kang ពិតជាបានពិភាក្សាយ៉ាងស៊ីជម្រៅលើបញ្ហាជាច្រើនជាមួយលោក កើត រិទ្ធ។ ប៉ុន្តែស្ថានទូតមិនអាចផ្ដល់សេចក្ដីលម្អិតពីការពិភាក្សានោះបានទេដោយគ្រាន់តែថា លោក Kang បានកោតសរសើរដល់ការអនុម័តច្បាប់ប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ និងការសម្របសម្រួលការជួយគ្នាក្នុងវិស័យព្រហ្មទណ្ឌ។ ស្ថានទូតបញ្ជាក់ថា៖ «អូស្ត្រាលីត្រៀមខ្លួនរួចរាល់ ដើម្បីគាំទ្រកម្ពុជាក្នុងការអនុវត្តច្បាប់ទាំងនេះរួមមាន ទាំងការជួយក្រសួងយុត្តិធម៌បើកសិក្ខាសាលានៅខែក្រោយ ដើម្បីបណ្ដុះមន្ត្រីអំពីច្បាប់ថ្មីស្ដីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ»។
ស្ថានទូតនេះបានឱ្យដឹងថា ប្រសិនបើមានការស្នើសុំ អូស្ត្រាលីនឹងផ្ដល់ជំនួយបច្ចេកទេសគាំទ្រដល់ក្រសួងយុត្តិធម៌ក្នុងការរៀបចំអនុក្រឹត្យពាក់ព័ន្ធស្ថិតនៅក្រោមច្បាប់ស្តីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ។
កាលពីថ្ងៃពុធ ទី ២៣ កញ្ញា លោក Kang បានសរសេរលើទំព័រធ្វីធើររបស់លោកថា៖ «ខ្ញុំបានជួបជាមួយរដ្ឋមន្ត្រីយុត្តិធម៌លោក កើត រិទ្ធ ពីម្សិលមិញ។ ខ្ញុំបានលើកឡើងយ៉ាងច្រើនអំពីក្ដីបារម្ភរបស់យើងចំពោះការចាប់ខ្លួនសកម្មជនជាបន្តបន្ទាប់ និងបានបង្ហាញការប្ដេជ្ញារបស់អូស្ត្រាលីក្នុងការបន្តជួយដល់ការអនុវត្តច្បាប់ថ្មី គឺច្បាប់ស្តីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ និងច្បាប់ស្តីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ ដើម្បីជាប្រយោជន៍សម្រាប់ប្រទេសទាំង ២»៕