.jpg)
លោក កើត រិទ្ធ្ ក្នុងពិធីតែងតាំងប្រធានតុលាការនៅភ្នំពេញពីថ្ងៃទី ១៩ ឧសភា។ រូប ក្រសួងយុត្តិធម៌
ភ្នំពេញៈ រដ្ឋមន្ត្រីក្រសួងយុត្ដិធម៌ លោក កើត រិទ្ធ ក្រើនរំឭកដល់មន្ត្រីតុលាការទាំងអស់នៃសាលាជម្រះក្តីគ្រប់ជាន់ថ្នាក់ ត្រូវប្រកាន់ខ្ជាប់នូវភាពម៉ឺងម៉ាត់ក្នុងការអនុវត្តច្បាប់ និងគោរពឱ្យបានត្រឹមត្រូវតាមក្រមសីលធម៌វិជ្ជាជីវៈ ដើម្បីធានាឱ្យការផ្តល់សេវាយុត្តិធម៌ជូនប្រជាពលរដ្ឋបាន «លឿន ត្រឹមត្រូវ យុត្តិធម៌ និងមិនពុករលួយ»។
លោក កើត រិទ្ធ ក្រើនរំឭកបែបនេះ ពេលលោកចូលរួមជាអធិបតីក្នុងពិធីប្រកាសតែងតាំង និងចូលកាន់មុខតំណែងជាផ្លូវការរបស់ប្រធានសាលាឧទ្ធរណ៍ភ្នំពេញ ប្រធានសាលាដំបូងខេត្តកំពង់ស្ពឺ ប្រធានសាលាដំបូងខេត្តកំពង់ឆ្នាំង ប្រធានសាលាដំបូងខេត្តព្រៃវែង និងព្រះរាជអាជ្ញាអមសាលាដំបូងខេត្តព្រៃវែងនៅក្រសួងយុត្ដិធម៌កាលពីថ្ងៃទី ១៩ ខែឧសភា។
លោករដ្ឋមន្ដ្រីបានណែនាំដល់ប្រធានសាលាឧទ្ធរណ៍ភ្នំពេញ ប្រធានសាលាដំបូង និងព្រះរាជអាជ្ញានៃអយ្យការ អមសាលាដំបូង ដែលទើបត្រូវបានតែងតាំងថ្មី ឱ្យខិតខំយកចិត្តទុកដាក់ក្នុងការដឹកនាំស្ថាប័នតុលាការ និងស្ថាប័នអយ្យការប្រកបដោយស្មារតីទទួលខុសត្រូវខ្ពស់ ធានាឱ្យបាននូវសាមគ្គីភាពផ្ទៃក្នុងព្រមទាំងកិច្ចសហការកាន់តែល្អប្រសើរជាមួយអាជ្ញាធរមានសមត្ថកិច្ច និងស្ថាប័នពាក់ព័ន្ធ សំដៅពង្រឹងការអនុវត្តច្បាប់ និងប្រសិទ្ធភាពនៃការផ្តល់សេវាយុត្តិធម៌ជូនប្រជាពលរដ្ឋ។
លោករដ្ឋមន្ដ្រីថ្លែងថា៖ «ចៅក្រម ព្រះរាជអាជ្ញា មន្ត្រីតុលាការ និងមន្ត្រីរាជការទាំងអស់នៃសាលាជម្រះក្តីគ្រប់ជាន់ថ្នាក់ត្រូវប្រកាន់ខ្ជាប់នូវភាពម៉ឺងម៉ាត់ក្នុងការអនុវត្តច្បាប់ និងគោរពឱ្យបានត្រឹមត្រូវតាមក្រមសីលធម៌វិជ្ជាជីវៈ ដើម្បីធានាឱ្យការផ្តល់សេវាយុត្តិធម៌ជូនប្រជាពលរដ្ឋធ្វើឡើងបានលឿន ត្រឹមត្រូវ យុត្តិធម៌ និងមិនពុករលួយ និងដើម្បីលើកកម្ពស់កិត្តិយស និងសេចក្តីថ្លៃថ្នូររបស់អង្គចៅក្រមបន្ថែមទៀត»។
ជាងនេះទៀត លោកជំរុញឲ្យប្រធានសាលាជម្រះក្តី និងអយ្យការអមសាលាជម្រះក្តីត្រូវពង្រឹងនូវវិន័យការងារប្រចាំថ្ងៃរបស់ចៅក្រម ព្រះរាជអាជ្ញាដែលបម្រើការក្នុងស្ថាប័នក្រោមសមត្ថកិច្ចរបស់ខ្លួន។ ជាពិសេសការគ្រប់គ្រងវត្តមានប្រចាំថ្ងៃឱ្យបានត្រឹមត្រូវ ហើយត្រូវចាត់វិធានការនានាស្របតាមច្បាប់ចំពោះអ្នកដែលមិនគោរពវិន័យការងារ។ ជាពិសេសត្រូវអនុវត្តវិធានការដែលមានចែងក្នុងមាត្រា ៥២ នៃច្បាប់ស្តីពីលក្ខន្តិកនៃចៅក្រម និងព្រះរាជអាជ្ញា។
សមាសភាពដែលត្រូវបានប្រកាសតែងតាំង និងចូលកាន់មុខតំណែងមន្ដ្រីសាលាឧទ្ធរណ៍ និងសាលាដំបូងនេះ រួមមានលោក សេង ស៊ីវុត្ថា អតីតអនុប្រធានសាលាឧទ្ធរណ៍ភ្នំពេញត្រូវបានតែងតាំងជាប្រធានសាលាឧទ្ធរណ៍ភ្នំពេញ ជំនួសលោក យូ ប៊ុនឡេង ដែលត្រូវបានតែងតាំងជាអនុប្រធានតុលាការកំពូល។
លោក គុជ គីមឡុង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ត្រូវបានតែងតាំងជាព្រះរាជអាជ្ញានៃអយ្យការអមសាលាដំបូងខេត្តព្រៃវែងជំនួសលោក ប៊ូ ប៊ុនហាង ដែលត្រូវបានតែងតាំងជាព្រះរាជអាជ្ញានៃមហាអយ្យការអមតុលាការកំពូលជាដើម។
លោក ជិន ម៉ាលីន អ្នកនាំពាក្យក្រសួងយុត្ដិធម៌បានថ្លែងថា ការតែងតាំង និងការផ្ទេរមន្ដ្រីនៅស្ថាប័នតុលាការ គឺវាជាវិធាន និងបែបបទរដ្ឋបាលធម្មតា ក្នុងការពង្រឹងប្រសិទ្ធភាពរបស់ស្ថាប័ន។
លោកថ្លែងថា៖ «ការផ្ទេរនេះក៏ដោយសារមានមន្ដ្រីនៅក្នុងស្ថាប័នតុលាការខ្លះ ពួកគាត់ដល់ពេលត្រូវចូលនិវត្តន៍។ ដូច្នេះត្រូវមានការតែងតាំងមន្ដ្រីថ្មីមកជំនួស និងមន្ដ្រីខ្លះទៀតដល់ពេលត្រូវផ្ទេរពីខេត្ដមួយទៅខេត្ដមួយ ដែលយើងធ្វើក្នុងរយៈពេល ៤ ឆ្នាំម្ដង។ ការចល័តចៅក្រមនេះដើម្បីធានានូវប្រសិទ្ធភាពរបស់ស្ថាប័ន តម្លាភាព និងគណនេយ្យភាព»។
នាយករងអង្គការការពារសិទ្ធិមនុស្ស (លីកាដូ) លោក អំ សំអាត លើកឡើងថា កន្លងមក ប្រព័ន្ធយុត្ដិធម៌នៅប្រទេសកម្ពុជា រងការរិះគន់ពីមជ្ឈដ្ឋានជាច្រើន។ ក្នុងនោះក៏មានការផ្ដល់អនុសាសន៍ពីក្រុមប្រឹក្សាសិទ្ធិមនុស្សលើការធ្វើកំណែទម្រង់ ទាំងប្រព័ន្ធច្បាប់ ប្រព័ន្ធយុតិ្ដធម៌ និងប្រព័ន្ធតុលាការ ដើម្បីឱ្យតុលាការរបស់កម្ពុជាក្លាយទៅជាតុលាការឯករាជ្យជាទំនុកចិត្ដសម្រាប់ប្រជាពលរដ្ឋ និងធានាសិទ្ធិស្មើគ្នាចំពោះមុខច្បាប់រវាងជនរងគ្រោះ និងភាគីពាក់ព័ន្ធ។
លោកថ្លែងថា៖ «កន្លងមក មានការរិះគន់ច្រើនលើប្រព័ន្ធយុត្ដិធម៌កម្ពុជា ទាំងនៅលើបណ្ដាញសង្គមហ្វេសប៊ុក អង្គការជាតិ និងអន្តរជាតិ ជាដើម ពិសេសពាក់ព័ន្ធលើប្រព័ន្ធតុលាការនៅកម្ពុជានេះ»។
លោក អំ សំអាត ចាត់ទុកការធ្វើកំណែទម្រង់ប្រព័ន្ធយុត្ដិធម៌ និងប្រព័ន្ធតុលាការ គឺជារឿងសំខាន់ ដើម្បីបង្កើននូវជំនឿទុកចិត្ដសម្រាប់ពលរដ្ឋ។ បង្កើននូវការធានាភាពស្មើគ្នាចំពោះមុខច្បាប់ និងយុត្ដិធម៌នៅក្នុងសង្គម ដើម្បីធានាលុបបំបាត់នូវនិទ្ទណ្ឌភាព។
បើតាមលោក អំ សំអាត លោកសង្កេតឃើញរដ្ឋមន្ដ្រីក្រសួងយុត្ដិធម៌ លោក កើត រិទ្ធ តាំងពីឡើងកាន់តំណែងរហូតមក គឺបានដាក់ចេញនូវគោលនយោបាយកំណែទម្រង់ជាបន្តបន្ទាប់ទៅលើប្រព័ន្ធតុលាការ។ ប៉ុន្ដែចំណុចនេះលោកបញ្ជាក់ថា គឺនៅមិនទាន់ឆ្លើយតបចំពោះកំណែទម្រង់ប្រព័ន្ធច្បាប់ និងប្រព័ន្ធតុលាការឱ្យមានឯករាជភាពនៅឡើយទេ។
លោក សំអាត បានថ្លែងថា៖ «ការផ្ដល់អនុសាសន៍ ឬការព្រមានទៅលើមន្ដ្រីតុលាការឱ្យពង្រឹងនូវតួនាទីរបស់ខ្លួន ដូចជាការអនុវត្ដនូវក្រមសីលធម៌ វិជ្ជាជីវៈ ប្រកាន់ខ្ជាប់ទៅលើច្បាប់ វាជារឿងសំខាន់ហើយ ដើម្បីធ្វើកំណែទម្រង់ប្រព័ន្ធតុលាការ។ ប៉ុន្តែត្រូវធ្វើយ៉ាងម៉េចឱ្យមន្ដ្រីទាំងអស់សកម្មចំពោះការងាររបស់ខ្លួន ដើម្បីកុំឱ្យមានការកកស្ទះសំណុំរឿងនៅតុលាការបន្តទៀត»៕
