ភ្នំពេញៈ លោក អង្គ វង្សវឌ្ឍនា រដ្ឋមន្ដ្រីក្រសួងយុត្ដិធម៌កាលពីថ្ងៃទី ២៤ ខែមីនា បានស្នើទៅប្រធានសាលាដំបូង និងព្រះរាជអាជ្ញាអមសាលាដំបូងខេត្ដកំពង់ចាមឲ្យប្ដូរសមត្ថកិច្ចជំនុំជម្រះលើសំណុំរឿងព្រហ្មទណ្ឌករណីគ្រោះថ្នាក់ចរាចរណ៍ដែលបានចោទប្រកាន់លោកគ្រូបង្រៀននៅវិទ្យាល័យឥន្ទ្រទេវី ឈ្មោះ អ៊ូ ជាលី ពីបទ បើកបរដោយធ្វេសប្រហែសបណ្ដាលឱ្យស្លាប់អ្នកដទៃមកសាលាដំបូងរាជធានីភ្នំពេញវិញ ដើម្បីធានាដំណើរការល្អនៃយុត្ដិធម៌តុលាការ។
សំណើប្ដូរនេះធ្វើឡើងក្រោយពីរដ្ឋមន្ដ្រីក្រសួងយុត្ដិធម៌ទទួលបានពាក្យស្នើសុំប្ដូរសមត្ថកិច្ចចុះថ្ងៃទី ១០ ខែកុម្ភៈ ឆ្នាំ ២០២០ របស់មេធាវី តំណាងឈ្មោះ អ៊ូ ជាលី និងយោងមាត្រា ១៩ នៃច្បាប់ស្ដីពីការរៀបចំអង្គការតុលាការឆ្នាំ ២០១៤។ សំណើដដែលនេះបញ្ជាក់ថា ក្រសួងយុត្ដិធម៌បានទទួលលិខិតពីមេធាវីតំណាងដោយអាណត្ដិរបស់ឈ្មោះ អ៊ូ ជាលី ដែលស្នើសុំប្ដូរសមត្ថកិច្ចជំនុំជម្រះសំណុំរឿងព្រហ្មទណ្ឌលេខ ៤៩៩ ចុះថ្ងៃទី ១៧ ខែសីហា ឆ្នាំ ២០១៩ របស់សាលាដំបូងខេត្ដកំពង់ចាមមកសាលាដំបូងភ្នំពេញវិញពាក់ព័ន្ធករណីគ្រោះថ្នាក់ចរាចរណ៍ដែលកើតឡើងក្នុងភូមិអង្គរបានទី ៩ ឃុំអង្គរបានស្រុកកងមាស។
លិខិតថា៖ «សាលាដំបូងខេត្ដកំពង់ចាមបានចោទប្រកាន់ពីបទបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្នបណ្ដាលឱ្យស្លាប់អ្នកដទៃ»។
បើតាមសំណើរបស់រដ្ឋមន្ត្រីក្រសួងយុត្ដិធម៌ឈ្មោះ អ៊ូ ជាលី លើកឡើងថា នាយកដ្ឋាននគរបាលបច្ចេកទេស និងវិទ្យាសាស្ត្រនៃក្រសួងមហាផ្ទៃបានធ្វើកោសល្យវិច័យហើយបញ្ជាក់ថាឈ្មោះ អ៊ូ ជាលី មិនមានការពាក់ព័ន្ធនឹងករណីគ្រោះថ្នាក់ចរាចរណ៍ខាងលើទេ ប៉ុន្ដែអយ្យការអមសាលាដំបូងខេត្ដកំពង់ចាមនៅតែចោទប្រកាន់ឈ្មោះ អ៊ូ ជាលី ដដែល។ «ដោយមិនជឿជាក់លើសមត្ថកិច្ចសាលាដំបូងខេត្ដកំពង់ចាម និង (អ៊ូ ជាលី) មានទីលំនៅបច្ចុប្បន្ននៅភ្នំពេញ ពិបាកធ្វើដំណើរទៅមកដើម្បីអនុវត្ដនីតិវិធីរបស់តុលាការកំពង់ចាម អ៊ូ ជាលី បានសុំមកក្រសួងយុត្ដិធម៌ ដើម្បីប្ដូរសមត្ថកិច្ចជំនុំជម្រះពីសាលាដំបូងខេត្ដកំពង់ចាមមកសាលាដំបូងរាជធានីភ្នំពេញវិញ»។
លោក វង្សវឌ្ឍានា បញ្ជាក់ថា ដើម្បីធានាដំណើរការល្អនៃយុត្ដិធម៌តុលាការតាមមាត្រា ១៩ នៃច្បាប់ស្ដីពីការរៀបចំអង្គការតុលាការ ក្រសួងយុត្ដិធម៌សូមចាត់បញ្ជូនពាក្យស្នើសុំប្ដូរសមត្ថកិច្ចតុលាការខាងលើ និងឯកសារពាក់ព័ន្ធជូនលោកប្រធានសាលាដំបូង និងលោកព្រះរាជអាជ្ញាពិនិត្យចាត់ចែងផ្ទេរសមត្ថកិច្ចសំណុំរឿងខាងលើពីសាលាដំបូងខេត្តកំពង់ចាមមកសាលាដំបូងរាជធានីភ្នំពេញវិញ។
កាលពីថ្ងៃទី ៩ ខែមីនា បុគ្គលិកលោកគ្រូ អ្នកគ្រូ និងសិស្សចំនួន ១០០ នាក់នៅវិទ្យាល័យឥន្ទ្រទេវីបានដាក់ពាក្យបណ្ដឹងទៅលោក ហ៊ុន សែន ឱ្យជួយអន្តរាគមន៍ផ្ដល់យុត្ដិធម៌ដល់ឈ្មោះ អ៊ូ ជាលី។ បន្ទាប់មកនៅថ្ងៃទី ២៣ ខែមីនាលោក ហូ សិទ្ធី នាយកខុទ្ទកាល័យលោកនាយករដ្ឋមន្ដ្រីបានចេញដីកាបញ្ជូនសំណើកិច្ចសុំអន្តរាគមន៍នេះជូនរដ្ឋមន្ដ្រីក្រសួងយុត្ដិធម៌ពិនិត្យ។
សំណើសុំអន្តរាគមន៍របស់គ្រូ និងសិស្សនេះសរសេរថា៖ «សូមមេត្ដាអនុញ្ញាតគោរពជម្រាបជូនសម្ដេចតេជោ ដើម្បីស្នើសុំ សម្ដេច មេត្តាជួយអន្តរាគមន៍ផ្ដល់យុត្ដិធម៌ជូនលោកគ្រូ អ៊ូ ជាលី ដែលត្រូវបានព្រះរាជអាជ្ញារង តុប ឈុនឡុង រួមជាមួយចៅក្រមស៊ើបសួរឈ្មោះ សម័យ លីនដា នៅសាលាដំបូងខេត្ដកំពង់ចាមធ្វើការចោទប្រកាន់ថា រថយន្តគាត់បានបុកមនុស្សស្លាប់យ៉ាងអយុត្ដិធម៌ទាំងគ្មានភ័ស្ដុតាង ហើយរក្សាទុកប្រាក់ធានាខ្លួនចំនួន ១ ម៉ឺនដុល្លារអាមេរិក និងរថយន្តមិនព្រមដោះលែង។ ការចោទប្រកាន់នេះគឺធ្វើឡើងដោយខ្វះវិជ្ជាជីវៈគ្មានមូលដ្ឋានផ្លូវច្បាប់ឡើយ»។
យោងតាមរបាយការណ៍ស្ដីពីការចុះស្រាវជ្រាវករណីគ្រោះថ្នាក់ចរាចរណ៍ខាងលើនេះរបស់នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈនៃអគ្គស្នងការដ្ឋាននគរបាលជាតិកាលពីថ្ងៃទី ២ ខែមីនា បង្ហាញថា សំណុំរឿង និងចំណាត់ការនៃករណីនេះមិនបានគូសប្លង់ដើមនៃទីតាំងគ្រោះថ្នាក់តាមទម្រង់នីតិវិធីហើយមន្ដ្រីថ្នាក់ស្រុកខ្វះសមត្ថភាពក្នុងការកសាងសំណុំរឿងបញ្ជូនទៅកាន់តុលាការ។ នគរបាលខេត្ដកំពង់ចាម ទទួលបន្ទុកផ្នែកសណ្ដាប់ធ្នាប់សាធារណៈកាលពីថ្ងៃទី ២៤ ខែមករាបានចេញលិខិតស្នើសុំការយោគយល់ និងអធ្យាស្រ័យពីការធ្វេសប្រហែសរបស់ខ្លួនក្នុងការកសាងសំណុំរឿង។
លោក អ៊ូ ជាលី បានថ្លែងពីម្សិលមិញថា តុលាការខេត្ដកំពង់ចាមបានកាត់សេចក្ដីដោយមិនបានយោងទៅតាមរបាយការណ៍ស្រាវជ្រាវរបស់នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈនៃអគ្គស្នងការដ្ឋាននគរបាលជាតិនោះទេ ហើយនៅតែបន្តចោទប្រកាន់មកលើរូបលោកដដែល។
លោកថា៖ «ដូច្នេះមានន័យថាកាលណាតុលាការនៅតែបញ្ជូនខ្ញុំមកជំនុំជម្រះនោះខ្ញុំនឹងទៅជាជនជាប់ចោទ ហើយកាលពីដំបូងឡើយគ្រាន់តែជាជនសង្ស័យប៉ុណ្ណោះ។ កាលដែលខ្ញុំនៅជាជនសង្ស័យតុលាការខេត្ដកំពង់ចាមគាត់មិនយករបាយការណ៍របស់សមត្ថកិច្ចក្រសួងមហាផ្ទៃក្នុងការពិចារណាដើម្បីដោះបន្ទុកឱ្យខ្ញុំទេ គឺគាត់នៅតែដាក់បន្ទុកចេះតែពាក្យ ២ ម៉ាត់ចោទហើយនិងលុយ»។ «ខ្ញុំជឿជាក់ថាតុលាការរាជធានីភ្នំពេញនឹងស្វែងរកយុត្ដិធម៌ឱ្យខ្ញុំ ព្រោះខ្ញុំមានសាក្សីចំនួន ១៤ នាក់ និងសំអាងលើរបាយការណ៍ស្រាវជ្រាវរបស់សមត្ថកិច្ចក្រសួងមហាផ្ទៃ»។
យ៉ាងណាក្តីលោក សួស ឡា ប្រធានសាលាដំបូងខេត្តកំពង់ចាមថ្លែងពីម្សិលមិញថា សំណុំរឿងខាងលើនេះឈ្មោះ ជាលី បានដាក់ប្តឹងឧទ្ធរណ៍ ហើយបច្ចុប្បន្នលោកកំពុងអនុវត្ដតាមលិខិតរបស់រដ្ឋមន្ដ្រីក្រសួងយុត្ដិធម៌ ដើម្បីចាត់ចែងផ្ទេរសំណុំរឿងនេះទៅសាលាដំបូងភ្នំពេញវិញ។
លោកបន្តថា៖ «កាលមុនយើងដាក់សវនាការម្ដងរួចហើយ ប៉ុន្ដែគាត់បានដាក់ប្តឹងឧទ្ធរណ៍ និងដីកាដំណោះស្រាយ។ សវនាការហ្នឹងត្រូវលើករង់ចាំសេចក្ដីសម្រេចរបស់សាលាឧទ្ធរណ៍សិន។ ការចោទប្រកាន់ហ្នឹង គាត់មានមេធាវីដែរ គាត់គួរយល់ហើយការចោទប្រកាន់ហ្នឹងមិនទាន់មានទោសឯណា។ អ្នកដែលសន្មតថា មានទោសលុះត្រាតែតុលាការសម្រេចចុងក្រោយចេញជាសាលក្រមស្ថាពរទៀតទើបចាត់ទុកថាមានទោស។ រហូតដល់ដំណាក់កាលជំនុំជម្រះក៏នៅតែមិនទាន់មានទោសដែរ»៕