.jpg)
ទីតាំងដីជម្លោះជិត ១ ហិកតាដែលស្ថិតនៅក្នុងខណ្ឌសែនសុខ។ រូបថត FN
ភ្នំពេញៈ លោក កើត រិទ្ធ រដ្ឋមន្ដ្រីក្រសួងយុត្តិធម៌បានស្នើឲ្យសាលាដំបូងរាជធានីភ្នំពេញពិនិត្យលទ្ធភាពតាមផ្លូវច្បាប់ក្នុងការផ្អាកនីតិវិធីតុលាការលើវិវាទដីធ្លីជិត ១ ហិកតា របស់ប្រជាពលរដ្ឋចំនួន ១៦៣ គ្រួសារដែលមានទីតាំងនៅភូមិរោងចក្រ សង្កាត់ភ្នំពេញថ្មី (បច្ចុប្បន្នស្ថិតក្នុងសង្កាត់គោកឃ្លាង) ខណ្ឌសែនសុខ ដើម្បីរង់ចាំក្រុមអធិការកិច្ចចុះធ្វើការស្រាវជ្រាវលើវិវាទនេះ។
តាមរយៈលិខិតចុះហត្ថលេខាដោយលោក កើត រិទ្ធ ចុះថ្ងៃទី ១៧ ខែកក្កដា បានឲ្យដឹងថាការសម្រេចនេះគឺក្រោយពីទទួលបានពាក្យបណ្ដឹងពីអ្នកស្រី ជា សារ៉ុម តំណាងប្រជាពលរដ្ឋ ១៦៣ គ្រួសារ ដែលប្ដឹងសុំឲ្យមន្ដ្រីជំនាញចុះធ្វើអធិការកិច្ចលើទីតាំងដីវិវាទមានទំហំ ៩ ៩៩២ ម៉ែត្រការ៉េ មានទីតាំងស្ថិតនៅភូមិរោងចក្រ សង្កាត់ភ្នំពេញថ្មី។
លិខិតបន្តថា៖ «ក្រោយពីបានពិនិត្យពាក្យបណ្ដឹង និងឯកសារពាក់ព័ន្ធក្នុងសំណុំរឿងនេះឃើញថា មានភាពស្មុគស្មាញលើចំណុចវិវាទដែលមិនអាចដោះស្រាយភ្លាមៗលើការបញ្ជាក់អំពីទឡ្ហីករណ៍ជាក់លាក់ប្រាកដប្រជាជូនភាគីមានវិវាទបានឆាប់ៗឡើយ»។
លិខិតបញ្ជាក់យ៉ាងដូច្នេះថា អាស្រ័យដូចនេះក្រសួងយុត្តិធម៌សូមលោកប្រធានសាលាដំបូងរាជធានីភ្នំពេញ និងលោកព្រះរាជអាជ្ញាពិនិត្យលទ្ធភាពតាមផ្លូវច្បាប់ផ្អាកនីតិវិធីតុលាការលើវិវាទនេះ ដើម្បីរង់ចាំក្រុមអធិការកិច្ចធ្វើការស្រាវជ្រាវឲ្យបានចប់សព្វគ្រប់ជាមុនសិន។
តាមពាក្យបណ្តឹងរបស់អ្នកស្រី ជា សារ៉ុម តំណាងប្រជាជនចំនួន ១៦៣ គ្រួសារដែលបានដាក់ពាក្យប្តឹងជូនរដ្ឋមន្ត្រីក្រសួងយុត្តិធម៌អះអាងថា សំណុំរឿងនេះត្រូវបានតុលាការកំពូលកាត់ក្តីឲ្យពលរដ្ឋ ១៦៣ គ្រួសារឈ្នះក្តីកាលពីឆ្នាំ ២០១១ ក្នុងវិវាទជាមួយភាគីម្ខាងទៀតដែលមានឈ្មោះ ព្រឹង សុជាតិ ឈ្មោះ ហួយ តារាវី និងឈ្មោះ អ៊ឹង សៀងប៉ាង។
ប៉ុន្តែក្រោយមកឈ្មោះ គីម កៅ ដែលបានទិញដីបន្តពីបុគ្គល ៣ នាក់ខាងលើបានប្តឹងតវ៉ាទៅសាលាដំបូងរាជធានីហើយតុលាការនេះក៏សម្រេចច្រានចាលសេចក្តីសម្រេចរបស់តុលាការកំពូលនៅឆ្នាំ ២០១៥។
បន្ទាប់ពីការសម្រេចរបស់តុលាការដំបូងនេះ ភាគីចាញ់ក្តីក៏បានប្តឹងទាស់ទៅឧទ្ធរណ៍ ហើយនៅឆ្នាំ ២០១៨ ប្រធានសាលាឧទ្ធរណ៍ក៏បានសម្រេចធ្វើការលុបចោលរូបមន្ត ដែលបានកាត់ក្តីឲ្យភាគីឈ្មោះ គីម កៅ ឈ្នះក្តី និងការធ្វើលិខិតបញ្ជាក់កម្មសិទ្ធិលើអចលនទ្រព្យនោះទុកជាអសារបង់វិញក៏ព្រោះតែផ្ទៃដីនេះកំពុងស្ថិតក្នុងវិវាទមិនទាន់ដាច់ស្រេច។ នេះបើតាមអ្នកស្រី ជា សារ៉ុម។
ចំណែកលោក ញ៉ាត សាម៉េត ចៅសង្កាត់គោកឃ្លាងបានបដិសេធធ្វើអត្ថាធិប្បាយជុំវិញករណីនេះ ដោយអះអាងថាលោកមិនដឹងរឿងខណៈភ្នំពេញ-ប៉ុស្តិ៍មិនអាចស្វែងរកប្រភពនៃភាគីជម្លោះម្ខាងទៀតដើម្បីសុំការបញ្ជាក់បាន។
បើតាមដីកាសន្និដ្ឋានបញ្ចូនរឿងឲ្យស៊ើបសួររបស់សាលាដំបូងរាជធានីភ្នំពេញចុះថ្ងៃទី ២៥ ខែ មិថុនា ឆ្នាំ ២០២០ ដែលចេញដោយព្រះរាជអាជ្ញាឈ្មោះ ម៉ុត ដារ៉ា បានសម្រេចធ្វើការចោទប្រកាន់បុគ្គលចំនួន ៦ រូប និងបក្ខពួកផ្សេងទៀត ដែលជាប់ពាក់ព័ន្ធនឹងរឿងក្តីក្តាំ វិវាទដីធ្លីទំហំជិត ១ ហិកតានេះ ពីបទប្រើប្រាស់ឯកសារសាធារណៈក្លែងពីបទលួចលក់អចលនវត្ថុរបស់អ្នកដទៃ និងសមគំនិតកាលពីអំឡុងឆ្នាំ ២០១៨។
ដីកាសន្និដ្ឋានដដែលនោះក៏បានសម្រេចដាក់ឲ្យពួកគេទាំង ៦ នាក់ ស្ថិតនៅក្រោមការឃុំខ្លួនបណ្តោះអាសន្ន ដើម្បីបង្ការបទល្មើស ឬបញ្ចប់បទល្មើសកុំឲ្យកើតឡើងជាថ្មី និងធានារក្សាជនត្រូវចោទទុកជូនតុលាការ ចាត់វិធានការទៅតាមនីតិវិធី។
ជនត្រូវចោទខាងលើមានឈ្មោះ ព្រីង សុជាតិ ឈ្មោះ អ៊ឹង សៀងប៉ាង ឈ្មោះ ហួយ តារាវី ឈ្មោះ បាញ់ អ៊ុយតា ឈ្មោះ គីម ស៊ូប៊ុត និងឈ្មោះ RYU DONGYUN ។ ពួកគេត្រូវបានចោទប្រកាន់ថា មានពាក់ព័ន្ធក្នុងការឃុបឃិតគ្នាលួចធ្វើវិញ្ញាបនបត្រសម្គាល់អចលនទ្រព្យចុះថ្ងៃទី ៥ ខែតុលា ឆ្នាំ ២០១៨ របស់មន្ទីររៀបចំដែនដី នគរូបនីយកម្ម សំណង់ និងសូរិយោដីមិនប្រក្រតីឲ្យទៅឈ្មោះ ព្រីង សុជាតិ ពីព្រោះដីវិវាទខាងលើកំពុងតែមានទំនាស់នៅឡើយ ហើយស្រាប់តែមានក្រុមហ៊ុន អាយអេស ប៊ី យូ (ខេមបូឌា) មកធ្វើសកម្មភាពចាក់ដីឈូសឆាយដីធ្វើជាកម្មសិទ្ធិផ្ទាល់ខ្លួន។
លោក ជិន ម៉ាលីន អ្នកនាំពាក្យក្រសួងយុត្តិធម៌បានប្រាប់ភ្នំពេញប៉ុស្តិ៍កាលពីម្សិលមិញថា ក្រុមអធិការកិច្ចកំពុងតែធ្វើការលើករណីនេះ ដូច្នេះព័ត៌មានលម្អិតមិនទាន់អាចផ្តល់ជូនបានទេដោយលោកបញ្ជាក់ថា ព្រោះករណីនេះមានជាប់ពាក់ព័ន្ធការសម្ងាត់នៃការងារអធិការកិច្ច។
លោក អ៊ី រិន្ទ អ្នកនាំពាក្យសាលាដំបូងរាជធានីឲ្យដឹងថា ចៅក្រមកំពុងពិនិត្យលើសំណើរបស់ក្រសួងយុត្តិធម៌ដោយមិនអាចបកស្រាយអ្វីបានទេ ខណៈលោកបញ្ជាក់ថា ក្នុងដំណាក់កាលនេះតុលាការនៅតែបន្តដំណើរការលើសំណុំរឿងនេះដដែលដោយមិនទាន់មានអ្វីផ្លាស់ប្តូរនោះទេ៕
