.jpg)
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក្នុងជួបសំណេះសំណាល និងទទួលទានអាហារសាមគ្គីជាមួយអ្នកសារព័ត៌មាន កាលពីសប្ដាហ៍មុន។ រូបថត MPWT
ភ្នំពេញៈ ក្រសួងសាធារណការ និងដឹកជញ្ជូនជំរុញឱ្យប្រជាពលរដ្ឋទៅរកសេវាប្តូរបណ្ណបើកបរ និងសេវាផ្សេងៗទៀតដោយផ្ទាល់ ដើម្បីកាត់បន្ថយការចំណាយជាជាងពឹងអ្នកគួកជេ ខណៈដែលក្រសួងខិតខំប្រឹងប្រែងផ្តល់សេវាឱ្យជិតដល់ដៃពលរដ្ឋ។
ការជំរុញនេះធ្វើឡើង ខណៈលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានដឹកនាំអ្នកសារព័ត៌មានជាច្រើនរូប ដើម្បីទស្សនកិច្ច និងបង្ហាញអគារទីស្តីការក្រសួង និងអគារវិទ្យាស្ថាន «តេជោសែន សាធារណការ និងដឹកជញ្ជូន» កាលពីថ្ងៃទី ៣០ ខែមករា។
លោកថ្លែងថា៖ «សូមអញ្ជើញទៅប្តូរបណ្ណបើកបរ ពន្យារបណ្ណបើកបរនៅផ្សារទំនើប អ៊ីអនទី១ អ៊ីអនទី២ ណូរ៉ូម៉លនៅក្រសួងសាធារណការ កុំពឹងគេអ្នករត់ការឱ្យសោះ។ យើងខ្ញុំបម្រើ ប្រជារាស្ត្រដោយឥតគិតថ្លៃ»។
លោកបញ្ជាក់ថា ប្រជាពលរដ្ឋមានបញ្ហាពាក់ព័ន្ធការកាត់ឈ្មោះ បាត់កាតគ្រី បាត់ពែកមី ចង់ពន្យារបណ្ណបើកបរ ធ្វើបណ្ណបើកបរឆ្លងប្រទេស ក្រសួងចេញឱ្យដោយក្រសួងមិនចង់ឱ្យប្រជាពលរដ្ឋទៅពឹងពាក់អ្នករត់ការអ្នកគួកជេមកធ្វើបណ្ណបើកបរទេ។
ជាមួយគ្នានេះដែរ លោករដ្ឋមន្ត្រីក៏បានក្រើនរំឭកដល់មន្ត្រីក្រសួងសាធារណការត្រូវផ្តល់សេវាដល់ប្រជាពលរដ្ឋដោយយកចិត្តទុកដាក់ និងរហ័ស ហើយក្នុងករណីដែលមន្ត្រីផ្តល់សេវាណាមួយ ប្រើកាយវិការឆ្គាំឆ្គង ឬទារកម្រៃសេវាលើសពលរដ្ឋអាចទូរស័ព្ទរាយការណ៍ពីករណីមិនប្រក្រតីនេះភ្លាមៗតែម្តង។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជាលោក សន ជ័យ បានថ្លែងថា ការជំរុញនេះជារឿងល្អមួយ ប៉ុន្តែដើម្បីឱ្យការអនុវត្តមានប្រសិទ្ធភាព ក៏ដូចជាយន្តការដោះស្រាយបញ្ហានេះ ក្រសួងត្រូវលុបបំបាត់អ្នករត់ការ (អ្នកគួកជេ) នៅតាមការិយាល័យផ្តល់សេវា ដោយដាក់ជំនួសមកវិញនូវមន្ត្រីជំនាញនៅទីនោះដើម្បីផ្តល់ព័ត៌មានដល់ពលរដ្ឋដែលទៅរកសេវាផ្សេងៗ។
លោកថា៖ «ត្រូវមានមន្ត្រីផ្តល់ព័ត៌មាន ឬជួយពលរដ្ឋក្នុងការបំពេញឯកសារមួយចំនួន ពីព្រោះប្រសិនបើពលរដ្ឋទៅរកសេវាហើយអត់មានអ្នកផ្តល់ព័ត៌មានលម្អិតជូនគាត់ ហើយគាត់ខ្វះព័ត៌មានមួយចំនួនអ៊ីចឹងគាត់នៅតែពឹងគេពឹងឯងនៅក្បែរនោះហើយបើសិនមានអ្នករត់ការនៅក្បែរនោះ វាជាការទាក់ទាញក្នុងការពឹងអ្នកគួកជេ ដូច្នេះត្រូវតែបិទច្រកអ្នករត់ការ តែជំនួសមកវិញនូវអ្នកជំនាញពិតប្រាកដ»។
អគារទីស្តីការក្រសួង និងអគារវិទ្យាស្ថាន «តេជោសែន សាធារណការ និងដឹកជញ្ជូន» ក៏បានបង្កើតឱ្យមានមជ្ឈមណ្ឌលផ្តល់សេវាសាធារណៈទំនើបផងដែរ រួមមាន សេវាចុះបញ្ជីយានយន្តត្រួតពិនិត្យលក្ខណៈបច្ចេកទេសយានយន្ត ធ្វើបណ្ណបើកបរ ការស្នើសុំអាជ្ញាប័ណ្ណដឹកជញ្ជូនផ្លូវទឹក ផ្លូវសមុទ្រ និងកំពង់ផែ និងការសុំអាជ្ញាប័ណ្ណធ្វើអាជីវកម្មដឹកជញ្ជូនក្នុងប្រទេសតាមផ្លូវគោកជាដើម។
លោក ស៊ុន ចាន់ថុល ចាត់ទុកការផ្តល់សេវាលឿនរហ័ស និងមានតម្លាភាពជូនប្រជាពលរដ្ឋ គឺជាគោលបំណងដ៏ធំទៅតាមអនុសាសន៍ណែនាំរបស់លោកនាយករដ្ឋមន្ត្រី ហ៊ុន សែន ដើម្បីផ្តល់ទំនុកចិត្ត ក៏ដូចជាភាពជឿជាក់របស់ប្រជាពលរដ្ឋលើមន្ត្រីរាជរដ្ឋាភិបាល៕
វីដេអូ៖
