.jpg)
រដ្ឋមន្ត្រីសុខាភិបាលលោក ម៉ម ប៊ុនហេង។ រូបថត សហការី
ភ្នំពេញៈ រដ្ឋមន្ត្រីក្រសួងសុខាភិបាលលោក ម៉ម ប៊ុនហេង ចូលរួមមហាសន្និបាតសុខភាពពិភពលោកលើកទី ៧៣ រយៈពេល ៦ ថ្ងៃជាថ្មីទៀត ដោយរំពឹងថា កិច្ចប្រជុំនេះនឹងអនុម័តវិធានជាច្រើនពាក់ព័ន្ធនឹងបញ្ហាសុខភាពជាសកល ដូចជាការថែទាំសុខភាពបឋម ការប្រយុទ្ធនឹងជំងឺមិនឆ្លង ការប្រយុទ្ធនឹងជំងឺឆ្លង ជាពិសេសវ៉ាក់សាំងកូវីដ ១៩ ។
តាមសេចក្តីប្រកាសព័ត៌មានរបស់ក្រសួងសុខាភិបាលឱ្យដឹងកាលពីថ្ងៃទី ៩ វិច្ឆិកាថា កិច្ចប្រជុំនេះធ្វើឡើងតាមរយៈប្រព័ន្ធវីដេអូ ដោយចាប់ពីថ្ងៃទី ៩ ដល់ថ្ងៃទី ១៤ វិច្ឆិកា ឆ្នាំ ២០២០។ នេះជាកិច្ចប្រជុំបន្តពីកិច្ចប្រជុំមុនដែលបានធ្វើឡើងកាលពីខែឧសភា។
ក្រសួងសុខាភិបាលបញ្ជាក់ថា កិច្ចប្រជុំបន្តដែលមានរយៈពេល ៦ ថ្ងៃនេះនឹងពិនិត្យពិភាក្សាទៅលើបញ្ហាសុខភាពជាអាទិភាពជាច្រើន ដែលគ្របដណ្តាប់ទៅលើបញ្ហាសុខភាពជាសកល។ ការថែទាំសុខភាពបឋម ការប្រយុទ្ធនឹងជំងឺមិនឆ្លង ការចាក់ថ្នាំបង្ការ ជាពិសេសវ៉ាក់សាំងកូវីដ ១៩ និងការប្រយុទ្ធនឹងជំងឺឆ្លង។
បន្ថែមពីនេះបញ្ហាសុខភាពភ្នែកដូចជាការការពារភាពងងឹតភ្នែក ការអភិវឌ្ឍធនធានមនុស្សផ្នែកវេជ្ជសាស្ត្រ កម្មវិធីគាំពារមាតា កុមារ និងទារកនិងកម្មវិធីអាហារូបត្ថម្ភក៏ត្រូវបានលើកយកមកពិភាក្សា។
បើតាមលោក ម៉ម ប៊ុនហេង ក្រោយកិច្ចប្រជុំ មហាសន្និបាតនេះអាចនឹងអនុម័តនូវសេចក្តីសម្រេចមួយចំនួនពាក់ព័ន្ធនឹងការឆ្លើយតបនឹងវិបត្តិកូវីដ ១៩ ផែនការយុទ្ធសាស្ត្រលុបបំបាត់ជំងឺមហារីកមាត់ស្បូននៅឆ្នាំ ២០៣០ និងផែនការយុទ្ធសាស្ត្រជាសកលស្តីពីការស្រាវជ្រាវរក និងនវានុវត្តន៍ជំងឺរបេង។ មហាសន្និបាតក៏អាចនឹងអនុម័តសេចក្តីសម្រេចពីសុខភាពភ្នែកតាមរយៈការការពារភាពពិការ និងងងឹតភ្នែក ការពង្រឹងកិច្ចប្រឹងប្រែងសុវត្ថិភាពចំណីអាហារ របៀបវារៈចាក់ឆ្នាំបង្ការឆ្នាំ ២០៣០ និងទសវត្សរ៍សុខភាពមនុស្សចាស់ ២០៣០។
លោករដ្ឋមន្ត្រីសុខាភិបាលបញ្ជាក់ថា៖ «កិច្ចប្រជុំនេះនឹងអាចអនុម័តសេចក្តីសម្រេចពាក់ព័ន្ធនឹងការត្រៀមខ្លួនរៀបចំទប់ស្កាត់ជំងឺផ្កាសាយ កំណែទម្រង់អង្គការសុខភាពពិភពលោក យុទ្ធសាស្ត្រសកលស្តីពីសុខភាពសាធារណៈ នវានុវត្តន៍ និងកម្មសិទ្ធិបញ្ញា។ កិច្ចប្រជុំបានសម្រេចជ្រើសរើសទីក្រុងហ្ស៊ឺណែវ ប្រទេសស្វ៊ីសសម្រាប់មហាសន្និបាតសុខភាពពិភពលោកលើកទី ៧៤»។
លោក ម៉ម ប៊ុនហេង សង្កត់ធ្ងន់ថា ក្នុងនាមប្រទេសជាសមាជិកមួយនៃអង្គការសុខភាពពិភពលោកគឺកម្ពុជា សម្តែងនូវការគាំទ្រចំពោះសេចក្តីសម្រេចនានា ដែលបានដាក់ចេញ និងលទ្ធផលដែលកិច្ចប្រជុំសម្រេចបាន។
លោក Tedros Adhanom អគ្គលេខាធិការអង្គការសុខភាពពិភពលោកថ្លែងក្នុងមហាសន្និបាតពីថ្ងៃទី ៩ វិច្ឆិកា ថា ពិភពលោកគួរតែជ្រើសរើសសុខភាព និងចាត់ទុកវាជារឿងសំខាន់។ លោកថាការមាននិរន្តរភាពរបស់អង្គការ សុខភាពពិភពលោក គឺជារឿងដែលត្រូវពិចារណាជាការចាំបាច់ ដើម្បីជម្នះទៅនឹងបរិបទថ្មីៗ ជាពិសេសវិបត្តិនៃជំងឺកូវីដ ១៩។
លោកថា៖ «រោគរាតត្បាតនេះក៏បានជះឥទ្ធិពលយ៉ាងខ្លាំងផងដែរ ដែលគ្មាននរណាអាចវាស់វែងបានឡើយ។ យើងមិនអាចវាស់វែង ទុក្ខព្រួយរបស់ក្រុមគ្រួសារដែលមិនអាចនិយាយដល់មនុស្សជាទីស្រឡាញ់របស់ពួកគេ។ យើងមិនអាចវាស់ការភ័យខ្លាចដែលមនុស្សជាច្រើនមានចំពោះពេលអនាគតដ៏មិនប្រាកដប្រជានោះទេ។ ប៉ុន្តែថ្ងៃនេះ ហើយជារៀងរាល់ថ្ងៃ យើងត្រូវជ្រើសរើសសុខភាព។ យើងគឺជាក្រុមគ្រួសារធំមួយ»។
ស្ទើរតែ ៥០ លានករណីនៃកូវីដ ១៩ ត្រូវបានរាយការណ៍ទៅអង្គការសុខភាពពិភពលោក ហើយមនុស្សជាង ១,២ លាននាក់បានបាត់បង់ជីវិត ខណៈមនុស្សរាប់លាននាក់ទៀតស្លាប់ដោយសារការរំខានដល់សេវាសុខភាពសំខាន់ៗ។ នេះបើតាមអគ្គលេខាធិការអង្គការសុខភាពពិភពលោក។
សន្និបាតសុខភាពពិភពលោកត្រូវបានប្រារព្ធឡើងជារៀងរាល់ឆ្នាំនៅទីក្រុងហ្ស៊ីណែវ ប្រទេសស្វ៊ីស ហើយសម្រាប់សន្និបាតលើកទី ៧៣ នេះ ប្រេសិត មកពីប្រទេស ២០០ ចូលរួមពិភាក្សាលើប្រធានបទខាងលើ ហើយប្រធានបទរសើបបំផុតគឺវិបត្តិកូវីដ ១៩៕
