.jpg)
អាជ្ញាធរបន្តបិទខ្ទប់តំបន់ក្រហមក្នុងសង្កាត់ស្ទឹងមានជ័យ ១ ខណ្ឌ័ពោធិ៍សែនជ័យ កាលពីថ្ងៃទី ១៣ ឧសភា។ ហេង ជីវ័ន
ភ្នំពេញ៖ រដ្ឋមន្ត្រីក្រសួងសុខាភិបាលបានចាត់ទុកការដាក់វិធានការបិទខ្ទប់នៅភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាលកន្លងមកថា ជាមេរៀន និងបទពិសោធសម្រាប់អភិបាលខេត្តទូទាំងប្រទេស ដកស្រង់យកទៅប្រតិបត្តិនៅតាមមូលដ្ឋានរបស់ខ្លួន ដើម្បីទប់ស្កាត់ការឆ្លងរាលដាលជំងឺកូវីដ។
រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ លោក ម៉ម ប៊ុនហេង បានថ្លែងបែបនេះ ដើម្បីឆ្លើយតបទៅនឹងសំណើរបស់គណៈអភិបាលនៃគណៈអភិបាលរាជធានី-ខេត្ត ដែលបានស្នើសុំដើម្បីពង្រឹងបន្ថែមនូវវិធានការទប់ស្កាត់ការរាតត្បាតជំងឺកូវីដ ១៩ នៅមូលដ្ឋានរាជធានី-ខេត្ត។
លោក ម៉ម ប៊ុនហេង បានមានប្រសាសន៍នៅថ្ងៃនេះថា៖ «យោងតាមចំណារឯកភាពដ៏ខ្ពង់ខ្ពស់របស់សម្តេចតេជោនាយករដ្ឋមន្តី្រចុះថ្ងៃទី ១៣ ខែ ឧសភា ឆ្នាំ ២០២១ លើលិខិតចុះថ្ងៃទី ១៣ ខែ ឧសភា ឆ្នាំ ២០២១ របស់ក្រសួងសុខាភិបាលស្តីពីរបាយការណ៍កិច្ចប្រជុំគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ នាថ្ងៃទី ១២ ខែ ឧសភា ឆ្នាំ ២០២១ ការដាក់វិធានការបិទខ្ទប់នៅភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្តាល គឺជាមេរៀនបទពិសោធដែលគួរត្រូវបានដកស្រង់ ដើម្បីប្រតិបត្តិនៅតាមមូលដ្ឋានរបស់ខ្លួនទៅតាមស្ថានភាពជាក់ស្ដែង»។
លោកបន្តថា ទន្ទឹមគ្នានេះ អភិបាលរាជធានី-ខេត្ត ត្រូវបន្តពង្រឹងការអនុវត្តច្បាប់វិធានការសុខាភិបាល និងវិធានការរដ្ឋបាល ដើម្បីទប់ស្កាត់ការឆ្លងរាលដាលជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ឱ្យមានប្រសិទ្ធភាពខ្ពស់ ព្រមទាំងលើកកម្ពស់ការយល់ដឹងអំពីវិធានការបង្ការជំងឺកូវីដ ១៩ ឱ្យកាន់តែស៊ីជម្រៅទៅដល់បុគ្គល គ្រួសារ និងសហគមន៍។
សូមជម្រាបថា ទោះបីជារាជរដ្ឋាភិបាលសម្រេចបិទបញ្ចប់ការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅរួចមកហើយក្តី ប៉ុន្តែរដ្ឋបាលរាជធានី-ខេត្ត ទាំងពីរបានបន្តដាក់ចេញនូវវិធានការបិទខ្ទប់ទីតាំងភូមិសាស្រ្តមួយចំនួន នៅតំបន់ដែលមានហានិភ័យខ្ពស់ ដោយបានបន្តកំណត់តំបន់ក្រហម លឿងទុំ និងតំបន់លឿងជាដើម។
ដោយឡែកនៅតាមបណ្តាខេត្តផ្សេងៗទៀតទូទាំងប្រទេសបានសម្រេចបន្តវិធានការរដ្ឋបាល និងវិធានការសុខាភិបាលនៅតាមតំបន់មួយចំនួន ដោយខេត្តខ្លះបន្តវិធានការរយៈពេលមួយសប្តាហ៍ និងខេត្តខ្លះបន្តពីរសប្តាហ៍ ដើម្បីទប់ស្កាត់ការឆ្លងរីករាលដាលនៃជំងឺកូវីដ ១៩ ក្នុងសហគមន៍៕
