សៀមរាបៈ រដ្ឋមន្ត្រីក្រសួងសុខាភិបាលលោក ម៉ម ប៊ុនហេង បានជួបជាមួយអនុរដ្ឋមន្ត្រីសុខាភិបាលប្រទេសចិន កូរ៉េ និងជប៉ុននៅខេត្តសៀមរាប ដើម្បីពិភាក្សាពីការពង្រឹងកិច្ចសហប្រតិបត្តិការធ្វើឱ្យប្រសើរឡើងនូវវិស័យសុខាភិបាលដែលសង្គមស៊ីវិលមើលឃើញថា វិស័យសុខាភិបាលកម្ពុជានៅមិនទាន់មានការជឿជាក់ពីប្រជាពលរដ្ឋនៅឡើយ។
យោងតាមសេចក្តីប្រកាសព័ត៌មានរបស់ក្រសួងសុខាភិបាលកាលពីថ្ងៃសៅរ៍បានឱ្យដឹងថាក្នុងជំនួបជាមួយអនុរដ្ឋមន្ត្រីចិនលោក Wang Hesheng កាលពីថ្ងៃសុក្រភាគីទាំង ២ បានពិភាក្សាពីការប្រយុទ្ធប្រឆាំងជំងឺគ្រុនចាញ់ដោយត្រូវពង្រឹងសមត្ថភាពមន្ទីរពិសោធន៍ បណ្តុះបណ្តាលធនធានមនុស្សទប់ស្កាត់ភាពស៊ាំនៃឱសថនិងពង្រឹងប្រព័ន្ធតាមដានជំងឺគ្រុនចាញ់នៅខេត្តស្ទឹងត្រែង។
សេចក្តីប្រកាសព័ត៌មានបញ្ជាក់ថា៖ «ភាគីទាំង ២ នឹងបន្តកិច្ចសហប្រតិបត្តិការលើផ្នែកជំងឺសរសៃឈាមបេះដូង ជាពិសេសការវះកាត់បេះដូងចំហពីកំណើតរបស់កុមារ ការរួមបញ្ចូលនូវផ្នែកជំងឺបេះដូងនេះក្នុងគម្រោងសាងសង់មន្ទីរពេទ្យមិត្តភាពកម្ពុជា-ចិនព្រមទាំងការបន្តជួយគាំទ្រលើផ្នែកវះកាត់ជំងឺភ្នែកឡើងបាយផងដែរ»។
ចំណែកក្នុងជំនួបជាមួយអនុរដ្ឋមន្ត្រីសុខាភិបាលជប៉ុនលោក Yoshinori Oguchi ភាគីទាំង ២ បានពិភាក្សាពីការបណ្តុះបណ្តាលឆ្មប គិលានុបដ្ឋាក កម្មវិធីគាំពារសុខភាពមាតា និងកុមារ និងការកសាងហេដ្ឋារចនាសម្ព័ន្ធសុខាភិបាល ខណៈបច្ចុប្បន្នតាមរយៈអង្គការ JICA ជប៉ុនកំពុងអនុវត្តគម្រោងធ្វើឱ្យមន្ទីរពេទ្យខេត្តបាត់ដំបងប្រសើរឡើង ហើយនៅខេត្តសៀមរាបកំពុងសិក្សាគម្រោងធ្វើឱ្យប្រសើរឡើងមន្ទីរពេទ្យផងដែរ។ នេះបើតាមសេចក្តីប្រកាសព័ត៌មានដដែល។
នៅក្នុងជំនួបជាមួយអនុរដ្ឋមន្ត្រីក្រសួងសុខាភិបាលកូរ៉េខាងត្បូងលោក Ganglip Kim ភាគីទាំង ២ បានពិភាក្សាពីការពង្រឹងសមត្ថភាពទាំងមន្ត្រីសុខាភិបាល និងវិស័យសុខាភិបាលនៅមូលដ្ឋានក្នុងខេត្តបាត់ដំបង ពោធិ៍សាត់ និងប៉ៃលិន។ កូរ៉េក៏បានផ្តល់ជំនួយឥតសំណងក្នុងការសាងសង់អគារចក្ខុរោគនៃមន្ទីរពេទ្យព្រះអង្គឌួង និងកំពុងពង្រីកបន្ថែមទៀតផងដែរ។ ក្រៅពីនោះភាគីទាំង ២ បានឯកភាពគ្នាលើវឌ្ឍនភាពគម្រោងគាំពារសុខភាពមាតា និងកុមារនៅខេត្តរតនគិរី និងមណ្ឌលគិរី និងបានចាត់ទុកការអភិវឌ្ឍធនធានមនុស្សជាបញ្ហាដ៏មានសារៈសំខាន់ក្នុងការលើកកម្ពស់សុខភាពប្រជាជន។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល មិនអាចសុំការអធិប្បាយបន្ថែមបានទេកាលពីថ្ងៃអាទិត្យដោយលោកស្រីប្រាប់ថា កំពុងជាប់រវល់ប្រជុំ។
លោក យ៉ង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាពបានថ្លែងថា មកទល់ពេលនេះមន្ទីរពេទ្យនៅកម្ពុជាមិនទាន់ទទួលបានការជឿជាក់ពីពលរដ្ឋនៅឡើយទេ។ ប្រជាពលរដ្ឋខ្មែរនៅតែទៅស្វែងរកសេវាព្យាបាលនៅក្រៅប្រទេសសូម្បីតែអ្នកដែលមិនមានជីវភាពធូរធារក៏ដោយ។
លោកបន្តថា ក្រសួងសុខាភិបាលគួរតែពង្រឹងធនធានដែលមានស្រាប់ឱ្យមានប្រសិទ្ធភាព និងប្រសិទ្ធផលខ្ពស់ ព្រោះនៅកម្ពុជាក៏មានគ្រូពេទ្យពូកែៗដែរ ជាពិសេសត្រូវចាត់ចែងដាក់មនុស្សឱ្យចំជំនាញ និងផ្តល់ការលើកទឹកចិត្តឱ្យពួកគេបំពេញការងារឲ្យបានល្អ ហើយត្រូវបញ្ចប់របៀបរបបធ្វើការ តាមបែបប្រកាន់សែស្រឡាយ និងបក្ខពួកនិយម។
លោក គិមអេង បានបញ្ជាក់ថា៖ «យើងឃើញថា ជប៉ុន កូរ៉េ គេរីកចម្រើនប៉ុនណាលើរឿងវិស័យសុខាភិបាល វិស័យសុខភាពហ្នឹង។ អ៊ីចឹងទាំងអស់ហ្នឹង ដែលយើងត្រូវតែតម្រង់ចក្ខុវិស័យរបស់យើងទៅដល់ហ្នឹង។ អ៊ីចឹងយើងត្រូវការមនុស្សដែលមានសមត្ថភាព និងស្វែងយល់ពីបញ្ហាហ្នឹង»៕