ភ្នំពេញៈ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានចេញលិខិតផ្ញើទៅកាន់អភិបាលគ្រប់រាជធានី-ខេត្ត ដើម្បីណែនាំដល់ប្រធានមន្ទីរសុខាភិបាលទាំងអស់ឱ្យត្រៀមខ្លួនជាមុនក្នុងការឆ្លើយតបចំពោះគ្រោះមហន្តរាយនាពេលខាងមុខដើម្បីការពារសុខភាពពលរដ្ឋដែលបណ្ដាលមកពីកត្តាធម្មជាតិផ្សេងៗ។
លិខិតចុះថ្ងៃទី ៧ ខែកក្កដា របស់លោក ម៉ម ប៊ុនហេង បានបញ្ជាក់ថា ការផ្លាស់ប្ដូររដូវកាល និងរបបទឹកភ្លៀងមិនទៀងទាត់ដោយការប្រែប្រួលអាកាសធាតុកំពុងធ្វើឱ្យមានគ្រោះធម្មជាតិជាញឹកញាប់ ដូចជា រលកកម្ដៅ ផ្គររន្ទះ ខ្យល់ព្យុះ ខ្យល់កន្ត្រាក់ គ្រោះរាំងស្ងួត គ្រោះទឹកជំនន់ជាដើម ដែលតែងបង្កផលប៉ះពាល់ និងខូចខាតហេដ្ឋារចនាសម្ព័ន្ធ ទ្រព្យសម្បត្តិ និងប៉ះពាល់សុខភាព និងស្លាប់ពលរដ្ឋ។
លោក ម៉ម ប៊ុនហេង បានស្នើឱ្យមន្ទីរសុខាភិបាលត្រៀមខ្លួនជាមុនសម្រាប់ឆ្លើយតបនៅពេលមានអាសន្នកើតឡើងពីគ្រោះមហន្តរាយទាំងនេះដើម្បីកាត់បន្ថយផលប៉ះពាល់សុខភាពពលរដ្ឋរងគ្រោះជាអតិបរមាជាពិសេសនៅពេលមានខ្យល់កន្ត្រាក់ ខ្យល់ព្យុះ និងជំនន់ទឹកភ្លៀង។
លិខិតសរសេរថា «ខ្ញុំសូមឯកឧត្តមលោកជំទាវអភិបាលនៃគណៈអភិបាលរាជធានីខេត្ត មេត្តាណែនាំដល់លោក និងលោកស្រីប្រធានមន្ទីរសុខាភិបាលយកចិត្តទុកដាក់ក្នុងការត្រៀមលក្ខណៈជាមុនឱ្យបានគ្រប់ជ្រុងជ្រោយ សម្រាប់ឆ្លើយតបឱ្យបានទាន់ពេលវេលា និងមានប្រសិទ្ធភាពខ្ពស់ក្នុងការសង្គ្រោះថែទាំសុខភាពប្រជាជនរងគ្រោះ»។
រដ្ឋមន្ត្រីសុខាភិបាលបញ្ជាក់ថា មន្ទីរសុខាភិបាលត្រូវត្រៀមខ្លួនដូចជា ត្រៀមរៀបចំក្រុមការងារចុះជួយសង្គ្រោះ និងព្យាបាល ជាពិសេសសេវាសម្រាលកូនដោយសុវត្ថិភាពដល់ស្ដ្រីមានផ្ទៃពោះនៅកន្លែងរងគ្រោះ ការត្រៀមឱសថ បរិក្ខារពេទ្យចាំបាច់ និងមធ្យោបាយបញ្ជូនអ្នកជំងឺជាដើម។
បន្ថែមពីនេះ មន្ទីរសុខាភិបាលត្រូវសហការឱ្យបានទាន់ពេលជាមួយអាជ្ញាធរពាក់ព័ន្ធ និងអង្គការនានាដើម្បីទប់ស្កាត់ការចម្លងរោគដោយជំងឺផ្សេងៗជាពិសេសជំងឺកូវីដ១៩ និងតាមដានអំពីការប្រែប្រួលធម្មជាតិដើម្បីផ្សព្វផ្សាយទៅដល់ពលរដ្ឋឱ្យបានទាន់ពេលជាដើម។
ការចេញលិខិតរបស់រដ្ឋមន្ត្រីក្រសួងសុខាភិបាលនេះបានធ្វើឡើងខណៈរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយបានបង្ហាញថា ក្នុងរយៈពេល ៦ ខែឆ្នាំនេះ ផ្គររន្ទះ និងខ្យល់កន្ត្រាក់បានសម្លាប់មនុស្ស ៣៥ នាក់ របួស ៦៤ នាក់ ខណៈខ្យល់កន្ត្រាក់បានបំផ្លាញផ្ទះទាំងស្រុង ៧១១ ខ្នង និង ៤ ៥០៥ ខ្នងទៀតខូចខាតមធ្យម។
លោក ឃុន សុខា មន្ត្រីនាំពាក្យគណៈកម្មាធិការជាតិគ្រប់គ្រងមហន្តរាយបានប្រាប់ភ្នំពេញ-ប៉ុស្ដិ៍ពីថ្ងៃទី ៨ កក្កដាថា ក្នុងរយៈពេល ៦ ខែនេះ កម្ពុជាបានកើតមានតែករណីខ្យល់កន្ដ្រាក់ និងផ្គររន្ទះប៉ុណ្ណោះប៉ុន្តែបើធៀបនឹងរយៈពេលដូចគ្នាពីឆ្នាំមុនគឺថយចុះប្រហែល ៥០ ភាគរយ។
លោកបន្តថា រីឯទឹកទន្លេ រៀងរាល់ឆ្នាំគឺតែងចាប់ផ្ដើមឡើងនៅខែកក្កដា ហើយជន់លិចនៅខែតុលា និងខែកញ្ញា ប៉ុន្តែឆ្នាំនេះនៅខែកក្កដា ទឹកទន្លេមិនទាន់ឡើងខ្លាំងនៅឡើយ ហើយក៏ពុំទាន់មានការព្យាករអំពីក្រសួងធនធានទឹក និងឧតុនិយមអំពីគ្រោះទឹកជំនន់ប្រចាំឆ្នាំដែរ។
លោកថា៖ «ការប្រែប្រួលអាកាសធាតុមិនមែនជាបញ្ហាសម្រាប់តែខ្មែរយើងទេ គឺជាបញ្ហាសកល។ សម្រាប់ប្រទេសតូចៗក្រីក្រគឺមានផលប៉ះពាល់ខ្លាំង ប្រសិនបើមានបាតុភូតកើតឡើង។ អ៊ីចឹង! វាមានផលប៉ះពាល់ណាស់ ដូចយើងដឹងហើយថា កន្លងមកខេត្តខ្លះរាំងខ្លាំង ហើយខេត្តខ្លះទឹកជំនន់ដែលត្រូវឱ្យយើងប្រុងប្រយ័ត្ន ដោយសារពីពេលនេះទៅយើងពិបាកព្យាករទុកមុន ពីព្រោះអាកាសធាតុប្រែប្រួលអត់ទៀងទាត់»។
លោកបញ្ជាក់ទៀតថា ជាទូទៅគ្រោះរាំងស្ងួតគឺកើតឡើងតែក្នុងរដូវវស្សាប៉ុណ្ណោះ ដោយសារការធ្លាក់ភ្លៀងយឺតយ៉ាវ ឬកើតមានរដូវវស្សាខ្លីធ្វើឱ្យមានការខ្វះទឹកតាមខេត្តខ្លះ ខណៈប្រព័ន្ធស្រោចស្រពនៅមានកម្រិតនៅឡើយ។
ភ្នំពេញប៉ុស្ដិ៍មិនអាចសុំការបញ្ជាក់ពីលោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមបានទេដោយសារទូរស័ព្ទលោកមិនមានអ្នកទទួលកាលពីថ្ងៃពុធ។
លោក ស្រី ស៊ីន ប្រធានមន្ទីរសុខាភិបាលខេត្តកំពង់ធំបានថ្លែងកាលពីថ្ងៃទី ៨ កក្កដា ថា ជារៀងរាល់ឆ្នាំគឺមន្ទីរតែងចាត់ក្រុមពេទ្យចុះជួយព្យាបាលតាមតំបន់មានទឹកជំនន់ ដោយផ្ដល់ថ្នាំចាំបាច់ផ្សេងៗដូចជា ថ្នាំព្យាបាលរបួសពីពស់ចឹក ឬថ្នាំសម្រាប់លាយជាមួយទឹកសម្រាប់បរិភោគដោយមិនបាច់ដាំជាដើម។
លោកថា៖ «ចូលដល់ខែភ្លៀងពិសេសខែ ៨ ឬខែ ៩ ពេលទឹកឡើងគឺនៅតាមមណ្ឌលសុខភាពបានត្រៀមដូចរាល់ឆ្នាំ ហើយត្រៀមក្រុមគ្រូពេទ្យចុះទៅតាមទីទួលសុវត្ថិភាពក្នុងតំបន់ដែលលិចទឹកដើម្បីចាំជួយពលរដ្ឋ»។
តាមការបញ្ជាក់ពីលោក ឃុន សុខា គឺខាងគណៈកម្មាធិការជាតិគ្រប់គ្រងគ្រោះមហន្តរាយបានជំរុញឱ្យអាជ្ញាធរថ្នាក់ខេត្ត ស្រុក និងឃុំធ្វើផែនការទុកមុនសម្រាប់ឆ្លើយតបគ្រោះមហន្តរាយ និងត្រូវចុះផ្សព្វផ្សាយទៅដល់ពលរដ្ឋឱ្យចេះប្រុងប្រយ័ត្ន និងចេះតាមដានអំពីការព្យាករអំពីអាកាសធាតុ។
គណៈកម្មាធិការជាតិគ្រប់គ្រងគ្រោះមហន្តរាយបានបញ្ជាក់ថា មានពលរដ្ឋកម្ពុជាប្រហែលត្រឹមតែ ២៥ ភាគរយប៉ុណ្ណោះ ដែលបានទទួលព័ត៌មានមុនពេលមានគ្រោះមហន្តរាយកើតឡើង។ ក្រៅពីនេះគឺទទួលបានព័ត៌មាននៅអំឡុងពេល ឬក្រោយពេលកើតមានគ្រោះមហន្តរាយ៕