ភ្នំពេញៈ រដ្ឋមន្ត្រីក្រសួងសុខាភិបាលលោក ម៉ម ប៊ុនហេង បានរំឭកពលរដ្ឋកុំឲ្យភ្លេចការពារខ្លួនពីជំងឺកូវីដ ១៩ ខណៈនៅកម្ពុជាទើបបានរកឃើញអ្នកជំងឺនាំចូលថ្មីពីខាងក្រៅ ១១ ករណីក្នុងរយៈពេល ២ ថ្ងៃដោយលោកបានបញ្ជាក់ថា ការមិនបានអនុវត្តវិធីការពារខ្លួនឱ្យបានត្រឹមត្រូវគឺមានហានិភ័យខ្ពស់ក្នុងការឆ្លងជំងឺដែលគ្រូពេទ្យមានការពិបាកក្នុងការព្យាបាលនេះ។
ថ្លែងនៅក្នុងសេចក្ដីប្រកាសមួយកាលពីម្សិលមិញលោក ម៉ម ប៊ុនហេង បានជំរុញឱ្យពលរដ្ឋបន្តប្រកាន់យកការរស់នៅធម្មតាតាមបែបគន្លងថ្មីគឺការសម្អាតដៃ ការពាក់ម៉ាស់ ឬប្រើក្រមាខ្ទប់មាត់នៅពេលក្អក ឬកណ្ដាស់ និងត្រូវរក្សាគម្លាតសុវត្ថិភាពបុគ្គល និងសង្គម ខណៈលោកអះអាងថា គ្រូពេទ្យពិបាកក្នុងការសង្គ្រោះជីវិតអ្នកជំងឺដែលឆ្លងជំងឺកូវីដ ១៩។
លោករដ្ឋមន្ត្រីបញ្ជាក់ថា៖ «ភាពធ្ងន់ធ្ងរនៃជំងឺកូវីដ ១៩ នេះគឺយើងមិនត្រូវមើលរំលងទេដោយសាររីរុសកូវីដ ១៩ នេះ វ៉ៃលុកផ្លូវដង្ហើមសាហាវណាស់ធ្វើឱ្យមនុស្សពិបាកដកដង្ហើមរហូតដល់ត្រដរខ្យល់ដោយខ្វះអុកស៊ីហ្ស៊ែនដែលក្រុមគ្រូពេទ្យក៏ពិបាកនឹងជួយសង្គ្រោះឱ្យផុតពីសេចក្ដីស្លាប់។ ជ្រោះមរណៈដោយសារជំងឺកូវីដ១៩ ស្ថិតក្នុងស្ថានភាពគួរឱ្យព្រួយបារម្ភណាស់នៅលើសកលលោក...»។
រីឯអង្គការសុខភាពពិភពលោក WHO បញ្ជាក់ដែរថា មកទល់ពេលនេះពុំមានអ្នកណាអាចកំណត់ច្បាស់ថាជំងឺកូវីដ១៩ ឆ្លងនៅកន្លែងណាឡើយ។ ប៉ុន្តែគេដឹងថា បុគ្គលគ្រប់រូបគឺអាចឆ្លងជំងឺនេះ គ្រប់កាលៈទេសៈ គ្រប់ពេលវេលា និងគ្រប់ទីកន្លែង។
WHO បានលើកឡើងថា «យើងមិនទាន់ដឹងបានអំពីវីរុសកូវីដ ១៩ នេះមានអត្តចរិតបែបណា និងនៅកន្លែងណានៅឡើយ តែអ្វីដែលយើងអាចដឹងបាននោះ គឺការចម្លងរបស់វាបណ្ដាលមកពីការប៉ះពាល់ផ្ទាល់ទៅនឹងតំណក់ទឹកមាត់តូចៗ ឬទឹករំអិលផ្លូវដង្ហើមរបស់អ្នកផ្ទុកវីរុសកូវីដ ១៩...ហានិភ័យក្នុងការចម្លងវីរុសដ៏កាចសាហាវនេះគឺមានខ្ពស់នៅពេលបុគ្គលចល័តធ្វើដំណើរពីកន្លែង ១ ទៅកន្លែង ១ ដោយភ្លេច ឬមិនបានអនុវត្តវិធានការការពារខ្លួន»។
កាលពីថ្ងៃម្សិលមិញ ក្រសួងសុខាភិបាលបានប្រកាសថា មានជនជាតិខ្មែរ ២ នាក់មានអាយុពី ១៥ ដល់ ២៣ ឆ្នាំត្រូវបានធ្វើតេស្ដវិជ្ជមានជំងឺកូវីដ ១៩ និងបានបញ្ជូនទៅព្យាបាលនៅមណ្ឌលសុខភាពចាក់អង្រែក្រោម បន្ទាប់ពីធ្វើដំណើរមកពីប្រទេសម៉ាឡេស៊ីពីថ្ងៃទី ២៦ មិថុនា ក្នុងចំណោមអ្នកដំណើរ ១០៧ នាក់ ដែលមានជនជាតិម៉ាឡេស៊ី ២ នាក់ផង។
ចំពោះអ្នកធ្វើតេស្ដអវិជ្ជមាន ១០៣ នាក់ ជាជនជាតិខ្មែរត្រូវបានឲ្យធ្វើចត្តាឡីស័កនៅមណ្ឌលជម្ពូវន្ត១ និងត្រូវដឹកបន្តទៅធ្វើចត្តាឡីស័កនៅមណ្ឌលតាមបណ្ដាខេត្តដែលពួកគេរស់នៅ ប៉ុន្តែជនជាតិម៉ាឡេស៊ី ២ នាក់ត្រូវស្នាក់នៅធ្វើចត្តាឡីស័កនៅសណ្ឋាគារក្នុងរាជធានីភ្នំពេញ។
ករណីនេះដែរកាលពីថ្ងៃទី ២៧ មិថុនា ក្រសួងសុខាភិបាលក៏បានរាយការណ៍ករណីនាំចូលជំងឺកូវីដពីឥណ្ឌូនេស៊ី ៩ ករណីបន្ថែមផងដែរ ក្នុងនោះមានពលរដ្ឋខ្មែរ ៨ នាក់ និងជនជាតិឥណ្ឌូនេស៊ីម្នាក់ បន្ទាប់ពីអ្នកទាំងនេះបានធ្វើដំណើរតាមជើងហោះហើរចេញពីឥណ្ឌូនេស៊ីមកដល់កម្ពុជាពីថ្ងៃទី ២៥ មិថុនា ដែលមានអ្នកដំណើរសរុប ៤០ នាក់ ក្នុងនោះមានវៀតណាមម្នាក់ និងឥណ្ឌូនេស៊ី ១៥ នាក់។
គិតត្រឹមថ្ងៃម្សិលមិញកម្ពុជាបានព្យាបាលអ្នកជំងឺកូវីដ ១៩ ជារហូតដល់ ១២៩ នាក់ និងគ្មានអ្នកស្លាប់ទេក្នុងចំណោមដែលរកឃើញឆ្លង ១៤១ នាក់៕