The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋមន្ត្រី​សុខាភិបាល​ស្នើឱ្យ​អាជ្ញាធរ​គ្រប់គ្រង​កន្លែង​ចត្តាឡីស័ក​តឹងរ៉ឹង និង​ព្រមាន​ផ្លូវច្បាប់ បើ​មាន​អ្នក​លើ្មស

រដ្ឋមន្ត្រី​សុខាភិបាល​ស្នើឱ្យ​អាជ្ញាធរ​គ្រប់គ្រង​កន្លែង​ចត្តាឡីស័ក​តឹងរ៉ឹង និង​ព្រមាន​ផ្លូវច្បាប់ បើ​មាន​អ្នក​លើ្មស

Content image - Phnom Penh Post
ពលករ​ខ្មែរ​ត្រឡប់​ពី​ប្រទេស​ថៃ​តាម​ច្រក​អូរស្មាច់​កាលពី​ថ្ងៃទី​ ២៣ ​ធ្នូ​។ រូប រដ្ឋបាលខេត្ត​ឧត្តរមានជ័យ

រដ្ឋមន្ត្រី​សុខាភិបាល​ស្នើឱ្យ​អាជ្ញាធរ​គ្រប់គ្រង​កន្លែង​ចត្តាឡីស័ក​តឹងរ៉ឹង និង​ព្រមាន​ផ្លូវច្បាប់ បើ​មាន​អ្នក​លើ្មស

ភ្នំពេញៈ រដ្ឋមន្ត្រី​ក្រសួង​សុខាភិបាល និង​ជា​ប្រធាន​គណៈកម្មការ​អន្តរក្រសួង​ដើម្បី​ប្រយុទ្ធ​នឹង​ជំងឺ​កូវីដ ​១៩ លោក​ ម៉ម ប៊ុនហេង បានស្នើ​ទៅគ្រប់​អភិបាល​រាជធានី-ខេត្ត​ ទូទាំង​ប្រទេស​ត្រូវ​ពង្រឹង​ការគ្រប់គ្រង​កន្លែង​ធ្វើ​ចត្តាឡីស័ក​ឱ្យបាន​តឹងរ៉ឹង​ជាទីបំផុត ហើយ​លោក​ព្រមាន​ថា បើ​បុគ្គល​ណាមួយ​ល្មើស​នឹង​វិធានការ​នេះ​ត្រូវ​ទទួល​ទោស​តាមច្បាប់​កំណត់​។

ការណែនាំ​ពី​ការពង្រឹង​កន្លែង​ធ្វើ​ចត្តាឡីស័ក​នេះ បន្ទាប់ពី​មាន​ពលករ​ខ្មែរ​ម្នាក់​ដែល​បាន​វិលត្រឡប់​មកពី​ប្រទេស​ថៃ​ តាម​ច្រក​អន្តរជាតិ​ប៉ោយប៉ែត​បាន​រត់គេច​មិន​ព្រមធ្វើ​ចត្តាឡីស័ក​កាលពី​ល្ងាច​ថ្ងៃទី​ ២៣ ខែធ្នូ​។ សមត្ថកិច្ច​កំពុង​ស្រាវជ្រាវ​រក​បុរស​ម្នាក់នេះ​មក​ធ្វើ​ចត្តាឡីស័ក​វិញ​។

តាមរយៈ​សេចក្តី​ប្រកាស​ព័ត៌មាន​កាលពី​ថ្ងៃទី​ ២៣ ខែធ្នូ លោក​ ម៉ម ប៊ុនហេង មាន​ការព្រួយបារម្ភ​សម្រាប់​ការងារ​គ្រប់គ្រង​អ្នកធ្វើ​ចត្តាឡីស័ក​ដោយសារ​ខេត្ត​ខ្លះ​មាន​ការដាក់​ពលករ​មកពី​ប្រទេស​ថៃ​ធ្វើ​ចត្តាឡីស័ក​ចំនួន​ ១៤ ​ថ្ងៃ​អាចមាន​ចំនួន​លើស​ពី​បន្ទុក​ដែល​អាច​គ្រប់គ្រង​បាន​។

លោក​បាន​បញ្ជាក់ថា​៖ «​ខ្ញុំ​សូមឱ្យ​អភិបាល​រាជធានី-ខេត្ត​ ទាំងអស់​យកចិត្ត​ទុកដាក់​ខ្ពស់​ជា​បន្តទៀត ក្នុង​ការគ្រប់គ្រង​អ្នក​ធ្វើ​ចត្តាឡីស័ក​ចំនួន​ ១៤ ​ថ្ងៃ និង​ការគ្រប់គ្រង​អ្នកដំណើរ​ចូលមក​ក្នុង​ប្រទេស​កម្ពុជា​ តាម​ច្រក​អន្តរជាតិ និង​តាម​ច្រករបៀង​ទាំងអស់​នៅតាម​ព្រំប្រទល់​កម្ពុជា-ថៃ​ ឱ្យ​បាន​ហ្មត់ចត់​ជាទីបំផុត​»​។

លោក ម៉ម ប៊ុនហេង បន្ថែម​ថា​ប្រសិនបើ​មាន​ពលករ​លួច​ចូល​មកពី​ប្រទេស​ថៃ​ដោយ​មិន​បាន​ត្រួតពិនិត្យ​នៅ​ព្រំដែន និង​មិនបាន​ធ្វើដំណើរ​តាម​មធ្យោបាយ​កងទ័ព សុំ​អាជ្ញាធរ​រាជធានី-ខេត្ត ធ្វើការ​ណែនាំ​ទៅ​ស្រុក ខណ្ឌ ឃុំ-សង្កាត់ និង​ភូមិ​ដើម្បី​រៀបចំ​ឱ្យធ្វើ​ចត្តាឡីស័ក​នៅផ្ទះ ឬ​នៅ​កន្លែង​ដែល​មូលដ្ឋាន​រៀបចំ​ឱ្យ​។

ត្រូវយក​សំណាក​របស់​ពួកគាត់​ធ្វើ​វិភាគ​នៅ​វិទ្យាស្ថាន​ប៉ាស្ទ័រ​កម្ពុជា វិទ្យាស្ថាន​ជាតិ​សុខភាព​សាធារណៈ ឬ​មន្ទីរពេទ្យ​ខេត្តសៀមរាប​។ ក្នុងករណី​ដែល​មាន​ពលករ​មកពី​ប្រទេស​ថៃ​បាន​ទៅដល់​ផ្ទះ​របស់គាត់​រួចហើយ អាជ្ញាធរ​មូលដ្ឋាន​ត្រូវ​គ្រប់គ្រង​ឱ្យបាន​ហ្មត់ចត់ និង​ក្តាប់​ឱ្យបាន​នូវ​ការធ្វើ​ចត្តាឡីស័ក​នៅតាម​ផ្ទះ និង​ត្រូវ​មាន​ការតាមដាន​សុខភាព​ពួកគាត់​ជាប្រចាំ​។

លោក​រដ្ឋមន្ត្រី​សង្កត់ធ្ងន់​ថា​៖ «​ណែនាំ​ និង​ចាត់វិធានការ​តាមដាន​អនុវត្ត​វិធានការ​ចត្តាឡីស័ក​ឱ្យបាន​ហ្មត់ចត់​ជា​ទីបំផុត​ចៀសវាង​ការរបូត​ចេញ​ពី​ទីកន្លែង​ធ្វើ​ចត្តាឡីស័ក ដោយ​យើង​មិនបាន​ដឹង​។ អាជ្ញាធរ​ពាក់ព័ន្ធ​ទាំងអស់​ត្រូវ​ចាត់តាំង​កម្លាំង​មាន​សមត្ថកិច្ច ធ្វើការ​យាមកាម​ឱ្យបាន​ដិតដល់​ព្រមទាំង​ក្រុមការងារ​តាមដាន និង​ត្រួតពិនិត្យ​ជាប់​ជាប្រចាំ​ដោយ​មាន​ការទទួល​ខុសត្រូវ​ខ្ពស់​»​។

ទន្ទឹមនឹង​នេះដែរ លោក​ ម៉ម ប៊ុនហេង ក៏បាន​បញ្ជាក់ដែរថា ប្រសិនបើ​បុគ្គល​ណា​មិន​គោរព​អនុវត្ត​តាម​វិធានការ​ចត្តាឡីស័ក​ចំនួន​ ១៤ ​ថ្ងៃ ឬ​រត់ចេញ ឬ​គេចវេះ​ពី​ការធ្វើ​ចត្តាឡីស័ក អាជ្ញាធរ​មាន​សមត្ថកិច្ច​នៅនឹង​កន្លែង​ដោយ​មាន​ការពិគ្រោះ​យោបល់​ជាមួយ​អាជ្ញាធរ​ខេត្ត​ត្រូវ​ចាត់វិធានការ​តាម​ផ្លូវ​ច្បាប់​ជា​ធរមាន​ដោយ​មាន​ការពិន័យ​អន្តរការណ៍​ពី​ ២០ ​ម៉ឺន​រៀល​ទៅ​ ១ ​លានរៀល និង​ទទួលទោស​ព្រហ្មទណ្ឌ​ទៅតាម​ច្បាប់​ដែល​បានកំណត់​។

លោកស្រី​ ឱ វណ្ណឌីន អ្នកនាំពាក្យ​ក្រសួង​សុខាភិបាល​ពី​ម្សិលមិញ​បាន​ឱ្យដឹងថា ពលករ​ខ្មែរ​ម្នាក់​បាន​រត់គេច​នៅពេល​ដែល​គាត់​ត្រូវបាន​ដឹក​យក​មក​ធ្វើ​ចត្តាឡីស័ក​។

លោកស្រី​ថា​៖ «​ពេលមកដល់​ខ្លោង​ទ្វារ​ចូល គាត់​ក៏​លោត​ចេញពី​ឡាន​រត់​តែម្តងទៅ ហើយ​បច្ចុប្បន្ន​នេះ​សមត្ថកិច្ច​កំពុង​តាម​ស្វែងរក​គាត់​ហើយ​»​។

ចំណែក​អ្នកនាំពាក្យ​ខេត្ត​បន្ទាយមានជ័យ​លោក​ សេក សុខុម ប្រាប់​ ភ្នំពេញ ​ប៉ុស្តិ៍ កាលពី​ម្សិលមិញ​ដែរ​ថា អាជ្ញាធរ​ខេត្ត​មាន​រូបថត និង​ស្គាល់​ពី​អត្តសញ្ញាណ​របស់​ពលករ​ដែល​បាន​រត់គេច​ពី​ការធ្វើ​ចត្តាឡីស័ក​នេះ ហើយ​អាជ្ញាធរ​កំពុង​តាម​រក​គាត់​ផងដែរ​។

លោក​បញ្ជាក់ថា​៖ «​ពលករ​ខ្មែរ​យើង​ម្នាក់ អាយុ​ខ្ទង់​ ២០ ​ឆ្នាំ​ ដែល​មាន​ផ្ទះ​នៅក្នុង​ខេត្តបន្ទាយមានជ័យ​បាន​រត់គេច​កន្លែង​ធ្វើ​ចត្តាឡីស័ក​នៅ​ក្រុង​ប៉ោយប៉ែត​។ ប៉ុន្តែ​យើង​បានកំណត់​អត្តសញ្ញាណ និង​រូបថត​គាត់​ហើយ ហើយ​កំពុង​តាម​ស្វែងរក​គាត់​ដើម្បី​យកមក​ធ្វើ​ចត្តាឡីស័ក​នៅក្នុង​មន្ទីរពេទ្យ​ជប៉ុន​ក្នុងស្រុក​មង្គលបុរី​»​។

លោក​ សេក សុខុម បន្តថា ចាប់​តាំងពី​មាន​ការផ្ទុះ​នូវ​ការរីករាលដាល​នៃ​ជំងឺ​កូវីដ​ ១៩​ នៅ​ប្រទេស​ថៃ​ ប៉ុន្មាន​ថ្ងៃ​ចុង​ក្រោយនេះ ពលករ​ខ្មែរ​បាន​វិល​ត្រឡប់​មកពី​ប្រទេស​ថៃ​ពី​ថ្ងៃទី​ ២០-២៤ ខែធ្នូ មាន​ប្រមាណ​ជា​ ១ ០០០ ​នាក់ ​ហើយ​តាម​ខេត្តបន្ទាយមានជ័យ​។ ពួកគាត់​ត្រូវបាន​ពិនិត្យ​សុខភាព និង​ដាក់ឱ្យ​ធ្វើ​ចត្តាឡីស័ក​បាន​ត្រឹមត្រូវ​ផងដែរ​។

តាម​របាយការណ៍​ក្រសួង​សុខាភិបាល​ពី​ម្សិលមិញ អ្នកជំងឺ​កូវីដ​ ១៩ ​ចំនួន​ ២ ​នាក់​ បានជា​សះស្បើយ ដែល​អ្នកជំងឺ​ម្នាក់​ពាក់ព័ន្ធ​នឹង​ព្រឹត្តិការណ៍​ ២៨ ​វិច្ឆិកា និង​ម្នាក់​ទៀត​ជា​អ្នកដំណើរ​មកពី​ក្រៅប្រទេស​។

ស្ត្រីជន​ជាតិខ្មែរ អាយុ​ ៣០ ​ឆ្នាំ​ ស្នាក់​នៅ​សង្កាត់​និរោធ ខណ្ឌ​ច្បារអំពៅ​ជា​ភរិយា​របស់​បុរស​ខ្មែរ អាយុ​ ៣៤ ​ឆ្នាំ ធ្វើការ​នៅ​ក្រសួង​មហាផ្ទៃ​ដែល​បាន​ព្យាបាល​ជាសះស្បើយ​កាលពី​ថ្ងៃទី​ ១៤ ខែធ្នូ​។ ស្ត្រី​រូបនេះ​បាន​ធ្វើ​តេស្ត​អវិជ្ជមាន​កូវីដ​ ១៩ ​ចំនួន​ ២ ​ដង និង​ត្រូវបាន​អនុញ្ញាត​ឱ្យ​ចេញពី​មន្ទីរពេទ្យ​ផងដែរ​។

ចំណែក​បុរស​ជនជាតិ​ខ្មែរ-អាមេរិក អាយុ​ ៥៤ ​ឆ្នាំ​ ស្នាក់នៅ​សង្កាត់​ផ្សារថ្មី ខណ្ឌដូនពេញ​ជា​អ្នកដំណើរ​មកពី​ប្រទេស​ចិន​បាន​ធ្វើ​តេស្ត​អវិជ្ជមាន​កូវីដ​ ១៩​ ចំនួន​ ២ ​ដង និង​បាន​ចេញពី​មន្ទីរពេទ្យ​ផងដែរ​។

គិត​ត្រឹម​ថ្ងៃ​ម្សិលមិញ កម្ពុជា​មាន​អ្នក​មាន​វិជ្ជមាន​វីរុស​កូវីដ​ ១៩​ ចំនួន​ ៣៦៣​ នាក់​ ក្នុង​នោះ​មាន​អ្នកជា​សះស្បើយ​សរុប​ចំនួន​ ៣៥១ ​នាក់ និង​អ្នក​កំពុង​សម្រាក​ព្យាបាល​ចំនួន​ ១២ ​នាក់​៕

វីដេអូ៖

អត្ថបទគួរចាប់អារម្មណ៍