.jpg)
លោក ម៉ម ប៊ុនហេង ក្នុងកិច្ចប្រជុំកាលពីកន្លងមក។ ហុង មិនា
ភ្នំពេញៈ រដ្ឋមន្ត្រីក្រសួងសុខាភិបាលលោក ម៉ម ប៊ុនហេង បានក្រើនរំឭក និងអំពាវនាវដល់ពលរដ្ឋឱ្យប្រុងប្រយ័ត្នពីផលប៉ះពាល់សុខភាព និងអាយុជីវិតក្នុងអំឡុងពេល និងក្រោយពេលទឹកស្រកដើម្បីកាត់បន្ថយឱ្យបានជាអតិបរមានូវគ្រោះថ្នាក់ផ្សេងៗដែលបណ្ដាលមកពីគ្រោះធម្មជាតិនេះ។
ការលើកឡើងរបស់លោក ម៉ម ប៊ុនហេង បែបនេះបានធ្វើឡើងតាមរយៈលិខិតមួយកាលពីថ្ងៃទី ១២ តុលា ដោយលោកបានជំរុញដល់ពលរដ្ឋទាំងអស់ ឱ្យអនុវត្តនូវការណែនាំមួយចំនួនក្នុងអំឡុងពេល និងក្រោយពេលទឹកជំនន់ដែលបាននិងកំពុងកើតមានតាមបណ្ដាខេត្ត ក្រុងនៅកម្ពុជា។
លោក ម៉ម ប៊ុនហេង បានលើកឡើងនៅក្នុងសេចក្តីណែនាំក្រើនរំឭកនោះថា ពលរដ្ឋទាំងអស់មិនត្រូវចូលទៅក្នុងផ្ទះចាស់ ឬអគារទ្រុឌទ្រោមឡើយព្រោះអាចស្រុតបាក់បែកបង្កឱ្យគ្រោះថ្នាក់។ នៅពេលដៃសើម ឬកំពុងឈរក្នុងទឹកមិនត្រូវប៉ះពាល់គ្រឿងប្រើប្រាស់អគ្គិសនីជាដាច់ខាត ហើយនៅពេលធ្វើដំណើរតាមទូក ឬកាណូត នៅពេលយប់ត្រូវមានភ្លើងបំភ្លឺ។
ជាមួយគ្នានេះលោករដ្ឋមន្ត្រីបានរំឭកឱ្យពលរដ្ឋសម្រាន្តក្នុងមុងគ្រប់ពេល ដើម្បីការពារជំងឺគ្រុនឈាម គ្រុនចាញ់ និងជំងឺផ្សេងៗ ហើយក៏ត្រូវប្រុងប្រយ័ត្នចំពោះកុមារី និងក្មេងស្រីដែលនៅទីទួលសុវត្ថិភាពក្រែងមានអំពើហិង្សាផ្លូវភេទកើតឡើង។
លោក ម៉ម ប៊ុនហេង បានបញ្ជាក់ថា៖ «ត្រូវប្រុងប្រយ័ត្នចៀសវាងនូវគ្រោះថ្នាក់លង់ទឹក ត្រូវការពារកុមារតូចៗមិនឱ្យចុះទឹក ពន្យល់កុមារពីគ្រោះថ្នាក់នៃការលង់ទឹកនាំកុមារទៅកន្លែងខ្ពស់ និងមានអ្នកថែទាំ ប្រើអាវពោង ឬប៊ីដុងជ័រគ្រប់ពេលកុមារចេញពីផ្ទះ។ ពេលធ្វើដំណើរតាមទូកមិនត្រូវដាក់មនុស្សហួសកម្រិត បើមានអ្នកណាម្នាក់លង់ទឹកត្រូវហៅជំនួយជាបន្ទាន់»។
ក្រៅពីនេះលោករដ្ឋមន្ត្រីបានអំពាវនាវឱ្យប្រយ័ត្នពីគ្រោះថ្នាក់ ដោយសារពស់ចឹក ឬសត្វអាសិរពិសផ្សេងៗ ដោយលោកស្នើពិនិត្យឱ្យបានត្រឹមត្រូវ មុនទៅកាន់ទីទួលសុវត្ថិភាព ឬមុនទៅធ្វើការជិតគំនរអុស និងគំនរឈើ។
ចំពោះការធ្វើដំណើរពេលយប់ ឬពេលធ្វើការងារលោក ម៉ម ប៊ុនហេង រំឭកឱ្យស្លៀកខោជើងវែង និងពាក់ស្បែកជើងកវែង ចៀសវាងកន្លែងមានស្មៅស៊ុបទ្រុប និងដាច់ខាត មិនត្រូវយកដៃទៅចាប់ពស់ ឬសត្វអាសិរពិសឡើយ។
ក្នុងករណីមានសមាជិកគ្រួសារ ឬនរណាម្នាក់មានគ្រោះថ្នាក់ដោយសារពស់ចឹក ឬសត្វអាសិរពិសទិច ឬខាំត្រូវបញ្ជូនជាប្រញាប់ទៅមណ្ឌលសុខភាព ឬមន្ទីរពេទ្យ ដែលនៅជិតបំផុតដើម្បីទទួលបានការពិនិត្យ និងព្យាបាល។
ក្រៅពីការបង្ការពីការលង់ទឹក និងសត្វអាសិរពិសនេះលោក ម៉ម ប៊ុនហេង ក៏បានណែនាំឱ្យពលរដ្ឋនៅតំបន់មានទឹកជំនន់ត្រូវរក្សាអនាម័យខ្លួនប្រាណដើម្បីបញ្ចៀសនូវជំងឺផ្សេងៗដូចជា ជំងឺរាករូស ពុល រលាកផ្លូវដង្ហើមស្រួចស្រាល់ និងជំងឺដទៃផ្សេងទៀត។
ត្រូវបរិភោគទឹកស្អាតដោយប្រើធុងចម្រោះ ឬដាំទឹកឱ្យពុះ ឬប្រើប្រាស់ទឹកដោយប្រើថ្នាំក្លរីន ឬក្លរ៉ាមីន (ថ្នាំក្លរីន ឬក្លរ៉ាមីន ៥០០ មិល្លីក្រាម ២ គ្រាប់អាចលាយទឹក ២០ លីត្រ)។
ទន្ទឹមនឹងនេះលោករដ្ឋមន្ត្រីបានណែនាំឱ្យពលរដ្ឋ អនុវត្តវិធានការមួយចំនួនទៀតផងដែរ នៅក្រោយពេលទឹកជំនន់ស្រកទៅ ដើម្បីចៀសវាងពីគ្រោះថ្នាក់ក៏ដូចជាជំងឺផ្សេងៗ។
លោកបន្តថា៖ «ត្រូវពិនិត្យមើលផ្ទះក្រែងមានបាក់ស្រុតនាំឱ្យមានគ្រោះថ្នាក់ប្រុងប្រយ័ត្នក្រែងមានសត្វពស់ ឬសត្វអាសិរពិសផ្សេងៗ។ អនាម័យ បរិស្ថានជុំវិញ និងក្នុងផ្ទះ ព្រោះក្រោយពេលទឹកស្រកទៅបានបន្សល់នូវភាពកខ្វក់ និងមេរោគជាច្រើនរស់នៅក្នុងទឹក ចៀសវាងនូវការដក់ទឹកជុំវិញផ្ទះ និងក្នុងផ្ទះនាំឱ្យមានដង្កូវទឹក កើតមូសខ្លា និងមូសដែកគោលអាចបង្កឱ្យមានជំងឺគ្រុនឈាម និងគ្រុនចាញ់ ស្តារ និងសម្អាតអណ្តូងទឹកឡើងវិញ មុននឹងប្រើប្រាស់ ព្រមទាំងជួសជុល និងសង់បង្គន់ឡើងវិញ ដោយជានិច្ចកាលត្រូវបន្ទោរបង់ក្នុងបង្គន់គ្រប់ពេល»។
ក៏ប៉ុន្តែលោក ម៉ម ប៊ុនហេង បានឱ្យដឹងថា ក្រសួងបានផ្តល់ឱសថ និងវ៉ាក់សាំងការពារពស់ចឹកបន្ថែមដល់ខេត្តដែលមានទឹកជំនន់រួចហើយ។
ស្រដៀងគ្នានេះអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានថ្លែងពីម្សិលមិញថា ការរក្សាអនាម័យដៃ និងខ្លួនឱ្យបានគឺជារឿងចាំបាច់បំផុតក្នុងការបង្ការជំងឺផ្សេងៗ ជាពិសេសគឺប្រយ័ត្នសត្វអាសិរពិសទិច ឬខាំ ឬក៏ពស់ចឹកជាដើម។
លោកស្រីបញ្ជាក់ដូច្នេះថា៖ «នៅពេលដែលមនុស្សគេចចេញពីកន្លែងមានទឹកជំនន់ សត្វក៏គេចចេញពីទឹកដូចគ្នា។ ដូចនេះនៅពេលយើងគេចទៅទីកន្លែង ឬទីទួលសុវត្ថិភាពណាមួយ យើងត្រូវពិនិត្យទីតាំងនោះឱ្យបានច្បាស់លាស់ ក្រែងលោមានពស់ ឬសត្វមានពិសណាមួយនៅទីនោះដែរ ហើយចៀសវាងកុំចាប់កាន់ពស់ ឬលេងសត្វអាសិរពិសដែលវាអាចខាំ ឬទិចយើងបាន»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក (Adhoc) បានថ្លែងកាលពីម្សិលមិញថា ជាធម្មតាពេលមានបញ្ហាដូចជា គ្រោះទឹកជំនន់ ឬបញ្ហាអ្វីមួយកើតឡើងគឺក្រសួងសុខាភិបាល ឬរាជរដ្ឋាភិបាលត្រូវតែផ្សព្វផ្សាយ និងក្រើនរំឭកពលរដ្ឋទាក់ទងនឹងការប្រើប្រាស់ទាំងទឹកស្អាត អនាម័យផ្សេងៗដើម្បីកុំឱ្យកើតមានគ្រោះថ្នាក់ ឬជំងឺផ្សេងៗព្រោះនេះជាកាតព្វកិច្ចរបស់រាជរដ្ឋាភិបាលក្នុងការទទួលខុសត្រូវលើសុខុមាលភាពរបស់ពលរដ្ឋ។
លោកបានថ្លែងថា៖ «ក្នុងរដ្ឋធម្មនុញ្ញរបស់យើងក៏បានចែងផងដែរពីការទទួលខុសត្រូវរបស់អាជ្ញាធររដ្ឋាភិបាល ហើយប្រជាពលរដ្ឋគ្រប់រូបក៏គួរតែដឹងអំពីការថែរក្សាសុខភាពរបស់ខ្លួន ហើយបើមានបញ្ហាណាមួយដែលកើតមានឡើងដោយមិនប្រក្រតីណាមួយចំពោះការរាលដាលនូវជំងឺណាមួយក្នុងតំបន់ដែលខ្លួនរស់នៅនោះគួរតែផ្តល់ព័ត៌មាន ឬអំពាវនាវទៅដល់ស្ថាប័ន ពាក់ព័ន្ធ ឬមន្ទីរសុខាភិបាលដែលនៅជិតមូលដ្ឋានបំផុតដើម្បីជួយសង្គ្រោះ ឬព្យាបាលឱ្យទាន់ពេល»៕
