ភ្នំពេញ៖ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានប្រកាសថា រថយន្តគិលានសង្គ្រោះទាំងរដ្ឋ និងឯកជន នៅទូទាំងប្រទេសកម្ពុជា មិនអនុញ្ញាតឱ្យដឹកជញ្ជូនប្រជាជនដែលជាអ្នកដំណើរជាដាច់ខាត។
យោងតាមសេចក្តីជូនដំណឹងរបស់ក្រសួងសុខាភិបាល ដែលចុះហត្ថលេខាដោយលោក ម៉ម ប៊ុនហេង កាលថ្ងៃទី ១៦ ខែមេសា បានឱ្យដឹងថា ក្រសួងអនុញ្ញាតឱ្យរថយន្តគិលានសង្គ្រោះទាំងរដ្ឋ និងឯកជន នៅទូទាំងប្រទេសដឹកជញ្ជូនតែអ្នកជំងឺ និងអ្នករបួសទៅកាន់មន្ទីរពេទ្យរដ្ឋ ឬគ្លីនិកឯកជន ឬវត្ថុសំណាកសម្រាប់យកមកវិភាគនៅតាមមន្ទីរពិសោធន៍របស់ក្រសួងសុខាភិបាលតែប៉ុណ្ណោះ។
លោក ម៉ម ប៊ុនហេង ថា៖ «ក្រសួងសុខាភិបាល និងចាត់វិធានការតាមផ្លូវច្បាប់ ចំពោះអ្នកទទួលខុសត្រូវរថយន្តគិលានសង្គ្រោះទាំងរដ្ឋ និងឯកជនក្នុងករណីរកឃើញថាបានលួចលាក់ដឹកជញ្ជូនប្រជាជនជាអ្នកដំណើរ»។
ក្រសួងសុខាភិបាលចេញសេចក្តីជូនដំណឹងនេះ បន្ទាប់ពីលោកនាយករដ្ឋមន្ត្រី ហ៊ុន សែន បានថ្លែងសារនៅថ្ងៃម្សិលមិញថា លោកទទួលបានព័ត៌មានក្រៅផ្លូវការថាមានរថយន្តគិលានសង្គ្រោះបានលួចដឹកអ្នកដំណើរឆ្លងខេត្ត។ ករណីនេះត្រូវបានលោកនាយករដ្ឋមន្ត្រីបញ្ជាឱ្យមានការត្រួតពិនិត្យ និងហាមដាច់នូវសកម្មភាពនេះ៕