.jpg)
គ្រោះថ្នាក់ចរាចរណ៍នៅលើកំណាត់ផ្លូវ ២០០៤ ក្នុងរាជធានីភ្នំពេញពីពេលកន្លងមក។ ហេង ជីវ័ន
ភ្នំពេញ: រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល បានស្នើឲ្យទីភ្នាក់ងារអភិវឌ្ឍន៍បារាំងប្រចាំកម្ពុជាពិនិត្យលទ្ធភាពផ្តល់ការគាំទ្រផ្នែកហិរញ្ញវត្ថុលើយុទ្ធនាការផ្សព្វផ្សាយសាធារណៈអំពីគ្រោះថ្នាក់ចរាចរណ៍ ការខាតបង់ដោយសារគ្រោះថ្នាក់ចរាចរណ៍យុទ្ធនាការចែកមួកសុវត្ថិភាព និងយុទ្ធនាការផ្សេងៗថែមទៀត ដើម្បីកាត់បន្ថយគ្រោះថ្នាក់ចរាចរណ៍ខណៈចំនួនអ្នកស្លាប់ និងរងរបួសបានបន្តកើនឡើងជាលំដាប់។
ការលើកឡើងនេះធ្វើឡើងកាលពីថ្ងៃទី ០៤ ខែកុម្ភៈ នៅក្នុងជំនួបពិភាក្សាការងារជាមួយគណៈប្រតិភូទីភ្នាក់ងារអភិវឌ្ឍន៍បារាំងប្រចាំកម្ពុជាដែលដឹកនាំដោយលោកស្រីនាយិកា Ophelle BOURHIS ដោយលោក ស៊ុន ចាន់ថុល បានបង្ហាញផែនការអភិវឌ្ឍន៍វិស័យដឹកជញ្ជូន គម្រោងសាងសង់ផ្លូវ និងស្ពានមួយចំនួន។
លោក ចាន់ថុល ស្នើឲ្យទីភ្នាក់ងារអភិវឌ្ឍន៍បារាំងពិនិត្យលទ្ធភាពផ្តល់ការគាំទ្រផ្នែកហិរញ្ញវត្ថុលើយុទ្ធនាការផ្សព្វផ្សាយសាធារណៈអំពីគ្រោះថ្នាក់ចរាចរណ៍ ផលលំបាក និងការខាតបង់ដោយសារគ្រោះថ្នាក់ចរាចរណ៍ យុទ្ធនាការចែកមួកសុវត្ថិភាពចរាចរណ៍ ស្លាកសញ្ញាចរាចរណ៍ និងយុទ្ធនាការផ្សេងៗថែមទៀត ដើម្បីជួយកាត់បន្ថយគ្រោះថ្នាក់ចរាចរណ៍នៅកម្ពុជា។
លោកបន្តថា ក្រសួងកំពុងរៀបចំគម្រោងអភិវឌ្ឍន៍សំខាន់ៗមួយចំនួនរួមមានគម្រោងសាងសង់ផ្លូវពីខេត្តកំពង់ឆ្នាំងទៅខេត្តកំពង់ធំ គម្រោងសាងសង់ស្ពានក្រចេះឆ្លងកាត់ទន្លេមេគង្គលើគម្រោងសាងសង់កំពង់ផែកុងតឺន័រថ្មីនៅខេត្តព្រះសីហនុ គម្រោងសាងសង់កំពង់ផែខ្នាតតូចនៅខេត្តកំពង់ចាម និងការបំពាក់ភ្លើងបំភ្លឺផ្លូវសាធារណៈវៃឆ្លាតផងដែរ។
លើសពីនេះលោកបញ្ជាក់អំពីការបញ្ចប់ផែនការមេភ័ស្តុភារកម្ម ដើម្បីធ្វើឲ្យប្រសើរឡើងនូវថ្លៃឈ្នួលដឹកជញ្ជូននៅកម្ពុជាដែលអាចទាក់ទាញការវិនិយោគពីបរទេសបង្កើតការងារជូនប្រជាពលរដ្ឋ និងផែនការមេគ្រប់គ្រងទឹកកខ្វក់ដើម្បីលើកកម្ពស់អនាម័យ និងបរិស្ថានល្អ សំដៅធ្វើឲ្យសុខភាពប្រជាពលរដ្ឋកាន់តែមានភាពប្រសើរឡើង និងទាក់ទាញភ្ញៀវទេសចរបន្ថែមទៀត។
លោកស្រី Ophelle BOURHIS នាយិកាទីភ្នាក់ងារអភិវឌ្ឍន៍បារាំងប្រចាំកម្ពុជា បានកត់សម្គាល់លើសំណើនានារបស់លោក ស៊ុន ចាន់ថុល ដោយសន្យាសហការធ្វើការយ៉ាងជិតស្និទ្ធជាមួយក្រុមមន្ត្រីជំនាញក្រោមឱវាទក្រសួងលើគម្រោងនានាដែលពាក់ព័ន្ធនឹងការអភិវឌ្ឍហេដ្ឋារចនាសម្ព័ន្ធសំខាន់ៗរបស់កម្ពុជា។
លោក គង់ រតនៈ នាយកវិទ្យាស្ថានសុវត្ថិភាពចរាចរណ៍បានថ្លែងពីម្សិលមិញថាលោកគាំទ្រឲ្យមានការចូលរួមពីស្ថាប័នជាតិ និងអន្តរជាតិបន្ថែមជុំវិញការផ្សព្វផ្សាយ ឬរៀបចំឲ្យមានយុទ្ធនាការនានា ពាក់ព័ន្ធគ្រោះថ្នាក់ចរាចរណ៍នៅកម្ពុជា។ មន្ត្រីពាក់ព័ន្ធគួរតែកៀរគរស្ថាប័នអន្តរជាតិជួយផ្នែកហិរញ្ញវត្ថុ ដើម្បីបំផុសបំផុលស្ដីពីច្បាប់ចរាចរណ៍ និងការណែនាំពីការបើកបរយានយន្តគ្រប់ប្រភេទ។
លោកបន្តថា លោកធ្លាប់បានធ្វើការប៉ាន់ស្មានមួយកាលពី ១០ ឆ្នាំមុនគឺនៅឆ្នាំ ២០១៩ ឬ ២០២០ នេះប្រសិនបើគ្មានចំណាត់ការអ្វីទេ បញ្ហាគ្រោះថ្នាក់ចរាចរណ៍នឹងអាចបណ្ដាលឲ្យមានអ្នកស្លាប់រហូតដល់ជាង ៣ ពាន់នាក់ ហើយជាក់ស្ដែងនៅឆ្នាំ ២០១៩ មានអ្នកស្លាប់ ១៩៨១ នាក់។ ដោយចំនួនអ្នកស្លាប់មិនដល់ការប៉ាន់ស្មាននេះ ដោយសារអាជ្ញាធរពាក់ព័ន្ធបានរៀបចំគម្រោង ឬផែនការដាក់ជាគោលដៅ និងសកម្មភាពបានល្អប្រសើរប៉ុន្ដែវាមិនទាន់ឈានដល់ចំណុចដែលគេចង់បាននោះទេ។
លោកបញ្ជាក់ថា៖ «ចំនួនអ្នកស្លាប់ដោយគ្រោះថ្នាក់ចរាចរណ៍មិនដល់ ៣ ពាន់នាក់នេះគឺដោយសារយើងបានធ្វើសកម្មភាពច្រើនដែរ ប៉ុន្ដែយ៉ាងណាគឺនៅមិនទាន់ដល់ចំណុចដែលយើងចង់បានឲ្យមានចំនួនអ្នកស្លាប់កាន់តែតិចជាង ១៩៨១ នាក់នេះ។ យើងលើកទឹកចិត្តឲ្យបន្ថែមសកម្មភាពអប់រំផ្សព្វផ្សាយឲ្យកាន់តែខ្លាំងថែមទៀត»។
លោក រតនៈ បន្ថែមថាបញ្ហាចរាចរណ៍នៅកម្ពុជានេះត្រូវទាមទារឲ្យមានការចូលរួមទាំងថវិកា និងអ្នកស្ម័គ្រចិត្តដោយមិនត្រូវកំណត់យកស្ថាប័នណាមួយជាគោលថា ត្រូវតែធ្វើឲ្យបានជោគជ័យនោះទេ។ គេត្រូវកំណត់ចំណុចអាទិភាពចំនួន ៣ ចំណុចគឺការអប់រំផ្សព្វផ្សាយ ការពិនិត្យលើស្ថានភាពផ្លូវថ្នល់ និងការរឹតបន្ដឹងច្បាប់។ ចំណុចទាំង ៣ នេះត្រូវតែអនុវត្តឲ្យដើរទន្ទឹមគ្នា ទើបអាចកាត់បន្ថយគ្រោះថ្នាក់ចរាចរណ៍បានល្អប្រសើរជាងនេះ។
តាមរបាយការណ៍របស់នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈដែលចេញផ្សាយកាលពីថ្ងៃទី ១ ខែកុម្ភៈ បង្ហាញថានៅក្នុងខែមករា ឆ្នាំ ២០២០ មានគ្រោះថ្នាក់ចរាចរណ៍កើតឡើងចំនួន ៣៥៨ ករណី ដោយបានបណ្ដាលឲ្យមនុស្សស្លាប់ចំនួន ២០៦ នាក់ និងរបួសចំនួន ៥៥៩ នាក់។ រីឯរបាយការណ៍ពេញ ១ ឆ្នាំនៃឆ្នាំ ២០១៩ មានករណីគ្រោះថ្នាក់ចរាចរណ៍កើតឡើងចំនួន ៤ ១២១ លើកបណ្ដាលឲ្យមនុស្សស្លាប់ចំនួន ១ ៩៨១ នាក់ និងរងរបួសចំនួន ៦ ១៤១ នាក់ ដែលគិតជាមធ្យមក្នុង ១ ថ្ងៃមានអ្នកស្លាប់ចំនួន ៥,៤ នាក់ភាគច្រើនកើតឡើងនៅភ្នំពេញ ខេត្តព្រះសីហនុ និងខេត្តកណ្ដាល៕
