.jpg)
រដ្ឋមន្ត្រីក្រសួងអប់រំលោក ហង់ជួន ណារ៉ុន ថ្លែងនាពេលកន្លងមក។ រូបថត MoEYS
ភ្នំពេញៈ រដ្ឋមន្ត្រីក្រសួងអប់រំលោក ហង់ជួន ណារ៉ុន វាយតម្លៃគ្រឹះស្ថានសិក្សានៅកម្ពុជា និងនៅលើពិភពលោកថា មិនអាចដំណើរការបានដូចមុនទៀតឡើយក្នុងឆ្នាំនេះ និងឆ្នាំក្រោយ ដោយសារជំងឺកូវីដ១៩ នៅបន្តរយៈពេលយូរទៀត ដូច្នេះត្រូវអនុវត្ត «វិធានការសុវត្ថិភាពសិក្សា» ដើម្បីការពារសុវត្ថិភាពអ្នកសិក្សា។ ជាមួយគ្នានេះសមាគមគ្រូបង្រៀនក៏ស្នើសុំឱ្យរដ្ឋាភិបាលដំឡើងប្រាក់ខែគ្រូដល់ ២ លានរៀលក្នុង ១ ខែ។
លោករដ្ឋមន្ត្រីក្រសួងអប់រំបានវាយតម្លៃបែបនេះក្នុងពេលថ្លែងសុន្ទរកថាក្នុងទិវាគ្រូបង្រៀនពីម្សិលមិញនៅវិទ្យាស្ថានជាតិអប់រំ។ លោករដ្ឋមន្ដ្រីថ្លែងថា៖ «ក្រសួងអប់រំ វាយតម្លៃថានៅក្នុងឆ្នាំ ២០២០ និង ២០២១ គ្រឹះស្ថានសិក្សាទាំងនៅកម្ពុជា និងនៅលើពិភពលោកមិនអាចដំណើរការបានដូចមុនទៀតបានឡើយ ហើយត្រូវអនុវត្ត «វិធានការសុវត្ថិភាពសិក្សា» ដើម្បីការពារសុវត្ថិភាពអ្នកសិក្សា និងផ្តល់ទំនុកចិត្តដល់មាតាបិតា»។
តាមការលើកឡើងរបស់លោករដ្ឋមន្ត្រីដែលផ្អែកតាមការប្រកាសរបស់អង្គការសុខភាពពិភពលោកគឺមេរោគកូវីដ ១៩ អាចបន្តរស់នៅក្នុងរយៈពេលយូរតទៅទៀត។ នៅក្នុងបរិបទនេះ វិស័យអប់រំត្រូវសម្របសម្រួលទៅតាម «ជីវិតរស់នៅធម្មតាតាមគន្លងបែបថ្មី» (New Normal Life)។
លោកបញ្ជាក់ថា៖ «អាស្រ័យហេតុនេះដើម្បីបន្តការផ្តល់សេវាអប់រំដល់សិស្សានុសិស្ស និងនិស្សិតរបស់យើង កត្តាសំខាន់ ២ ត្រូវបន្តយកចិត្តទុកដាក់ គឺ ១ ការអនុវត្តវិធានការការពារសុខភាពអ្នកសិក្សា និងបុគ្គលិកសិក្សា និង ២ ការបន្តការសិក្សាតាមបែបចម្រុះដោយគួបផ្សំការសិក្សាក្នុងថ្នាក់រៀន និងការសិក្សាពីចម្ងាយតាមប្រព័ន្ធអេឡិចត្រូនិក និងតាមបែបប្រពៃណី (សន្លឹកកិច្ចការជំនួយ) រួមទាំងការធ្វើស្វ័យសិក្សា (សម្រាប់សិស្សនៅទីជនបទ)»។
បើតាមលោករដ្ឋមន្ដ្រីគឺនាពេលកន្លងមក ដើម្បីឆ្លើយតបនឹងគោលនយោបាយ និងទិសដៅនៃសេដ្ឋកិច្ច ឌីជីថលកម្ពុជាក្រសួងអប់រំបានដាក់ចេញ និងអនុវត្តនូវវិធានការមួយចំនួន ដើម្បីជំរុញការអប់រំតាមបែបឌីជីថលនៅកម្ពុជាផងដែរ។
លោក Sardar Umar Alam តំណាងអង្គការយូណេស្កូប្រចាំនៅកម្ពុជាថ្លែងក្នុងទិវាគ្រូបង្រៀននេះដែរថា ក្នុងរយៈពេលខ្លីមួយគ្រូបង្រៀនកម្ពុជាត្រូវសម្របខ្លួនទៅនឹងកាលៈទេសៈដែលមិនធ្លាប់មានពីមុនមកដើម្បីបន្តបម្រើនិស្សិត និងសហគមន៍របស់ពួកគេ ខណៈកំពុងគ្រប់គ្រងតម្រូវការគ្រួសាររបស់ពួកគេផ្ទាល់។ គ្រូបានផ្លាស់ប្តូររបៀបទៅជាការរៀនសូត្រតាមអ៊ីនធឺណិតយ៉ាងឆាប់រហ័ស ហើយបានផ្លាស់ប្តូរវិធីសាស្ត្រច្នៃប្រឌិត និងការច្នៃប្រឌិតថ្មី ដើម្បីឱ្យសិស្សចូលរួម និងចែករំលែកចំណេះដឹង។
លោកថ្លែងថា៖ «ក្នុងនាមអង្គការយូណេស្កូ យើងសូមបញ្ជាក់ជាថ្មីនូវការគាំទ្រ និងការចូលរួមរបស់យើង ដើម្បីលើកកម្ពស់ការផ្តល់ការអប់រំប្រកបដោយសមធម៌ និងគុណភាពសម្រាប់ប្រជាជនកម្ពុជាទាំងអស់ដោយមានគ្រូជាកម្លាំងជំរុញ»។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យឱ្យដឹងថា កាលពីម្សិលមិញលោកគ្រូអ្នកគ្រូ និងប្រជាពលរដ្ឋប្រមាណ ៥០ នាក់ បាននាំគ្នាប្រារព្ធពិធីជួបជុំគ្នានៅទីលានប្រជាធិបតេយ្យក្នុងខណ្ឌឫស្សីកែវ ដើម្បីអបអរដល់ទិវាគ្រូបង្រៀនពិភពលោក។ តាមរយៈការប្រារព្ធទិវានេះលោកគ្រូ អ្នកគ្រូ បានលើឡើងពីចំណុចអវិជ្ជមានក្នុងវិស័យអប់រំ តាមរយៈឧគ្ឃោសនសព្ទ និងបានបង្ហាញពីស្ថានភាពគ្រូបង្រៀននៅក្នុងប្រទេសកម្ពុជា ពិសេសបញ្ហាជីវភាពគ្រូបង្រៀន ប្រាក់បៀវត្សរ៍គ្រូបង្រៀនជាដើម។
លោកស្រីថ្លែងថា៖ «យើងបានដាក់ញត្ដិទៅក្រសួងអប់រំ ហើយមន្ដ្រីក្រសួងក៏បានចេញមកទទួល។ ញត្តិយើងបានទាមទារឱ្យរដ្ឋាភិបាលដំឡើងប្រាក់បៀវត្សរ៍លោកគ្រូអ្នកគ្រូយើងឱ្យបានដល់ចំនួន ២ លានរៀលដំឡើងអត្ថប្រយោជន៍ផ្សេងៗ ទប់ស្កាត់អំពើពុករលួយ។ យើងក៏ទាមទារឱ្យទទួលយកលោកគ្រូ អ្នកគ្រូដែលក្រសួងបានបញ្ឈប់ពីក្របខ័ណ្ឌ ព្រោះនិន្នាការនយោបាយមកវិញ»។
លោក រស់ សុវាចា អ្នកនាំពាក្យក្រសួងអប់រំបញ្ជាក់ថា ក្រសួងនឹងពិនិត្យមើលជាមុនសិនចំពោះញត្តិដែលសមាគមគ្រូបង្រៀនកម្ពុជាឯករាជ្យបានដាក់មកនោះ៕
