.jpg)
លោក ហង់ជួន ណារ៉ុន រដ្ឋមន្ត្រីក្រសួងអប់រំ ពេលចុះពិនិត្យសកម្មភាពសិក្សាពីចម្ងាយរបស់សិស្សានុសិស្ស នៅស្រុកទឹកផុស ខេត្តកំពង់ឆ្នាំង។ រូបថត ក្រសួងអប់រំ យុវជន និងកីឡា
ភ្នំពេញៈ រដ្ឋមន្ដ្រីក្រសួងអប់រំ យុវជន និងកីឡា លោក ហង់ជួន ណារ៉ុន បានអំពាវនាវដល់មាតាបិតា និងអ្នកអាណាព្យាបាលត្រូវយកចិត្ដទុកដាក់វិនិយោគលើកុមារតាំងពីចាប់កំណើតដំបូង (០ ថ្ងៃរហូតដល់ ៣ ឆ្នាំដំបូង) ដើម្បីឲ្យកុមារមានរាងកាយមាំមួន និងខួរក្បាលឆ្លាតវៃក្នុងការត្រៀមបន្ដការសិក្សាទៅថ្ងៃមុខបានល្អប្រសើរ។
លោក ហង់ជួន ណារ៉ុន ថ្លែងបែបនេះតាមរយៈវីដេអូក្នុងកិច្ចសម្ភាសន៍មួយនៃកម្មវិធីវេទិកាអប់រំក្រោមប្រធានបទ «ការអប់រំ និងការអភិវឌ្ឍកុមារតូច» ដែលរៀបចំដោយក្រសួងអប់រំកាលពីថ្ងៃទី ២៤ ខែឧសភា។ លោករដ្ឋមន្ដ្រីបានអំពាវនាវថា មាតាបិតាអ្នកអាណាព្យាបាលកុមារត្រូវយកចិត្ដទុកដាក់ទៅលើឱកាសដំបូងនៃកុមារគឺការវិនិយោគឲ្យច្រើនចំពោះកុមារតូច ព្រោះការវិនិយោគបែបនេះគឺជាមូលដ្ឋានគ្រឹះសំខាន់សម្រាប់ការអប់រំ និងការអភិវឌ្ឍដល់កុមារតាំងពីតូចរហូតដល់ធំពេញវ័យ។
លោកថ្លែងថា៖ «ខ្ញុំសង្កេតឃើញថា មាតាបិតាសិស្សប្រសិនបើគាត់មានធនធាន ពួកគាត់ភាគច្រើនវិនិយោគទៅលើកូនចៅនៅកម្រិតមធ្យមសិក្សា និងឧត្ដមសិក្សា។ ពួកគាត់មិនសូវផ្ដោតសារៈសំខាន់ទៅលើកុមារតូចនោះទេ ព្រោះមានគំនិតថា កុមារនៅតូច មិនទាន់មានបញ្ហាអ្វីទេ»។ ប៉ុន្ដែលោកបានលើកឡើងថា តាមពិតដើម្បីសង់ផ្ទះឲ្យបានខ្ពស់គឺត្រូវមានមូលដ្ឋានគ្រឹះរឹងមាំ។ «ដូច្នេះត្រូវថែទាំកូនទាំងនៅក្នុងផ្ទៃ ទាំងពេលកូនកើតមកចាប់ពីអាយុ ០-៣ ឆ្នាំដោយយកចិត្ដទុកដាក់លើការអប់រំគ្រប់ជ្រុងជ្រោយទាំងអត្ដចរិត អាកប្បកិរិយា និងចំណេះដឹងដើម្បីឲ្យកុមារមានឯករាជភាព និងចេះធ្វើអ្វីបានដោយខ្លួនឯង»។
លោករដ្ឋមន្ដ្រីបញ្ជាក់ថា ការយកចិត្ដទុកដាក់លើការអប់រំឲ្យបានគ្រប់ជ្រុងជ្រោយដល់កុមារនេះ គឺមាតាបិតាត្រូវយកចិត្ដទុកដាក់ទាំងផ្នែកអាហារូបត្ថម្ភ ការអប់រំ សុខភាពអនាម័យ ដល់កុមារ។ លោកបញ្ជាក់ថា៖ «យើងសង្កេតឃើញថា មាតាបិតានៅកម្ពុជាមិនសូវសហការ និងចូលរួមជាមួយសាលារៀនប៉ុន្មានទេ។ ទស្សនទាននៃកំណែទម្រង់ថ្មីរបស់ក្រសួងអប់រំ ការចូលរួមរបស់មាតាបិតាគឺមានសារៈសំខាន់ណាស់។ នៅក្នុងការគ្រប់គ្រងកុមារតូចនេះគឺយើងលើកទឹកចិត្ដមាតាបិតា និងអ្នកអាណាព្យាបាលចូលរួមនៅក្នុងការគ្រប់គ្រងតាមសាលារៀនមតេយ្យសិក្សាឲ្យដឹងពីដំណើរការនៃការគ្រប់គ្រងកុមារ និងត្រូវចូលរួមក្នុងការប្រជុំផ្សេងៗចំពោះការអភិវឌ្ឍសាលារៀន»។
មន្ត្រីក្រសួងអប់រំកំពុងសំណេះសំណាលជាមួយក្មេងៗដែលអង្គុយរៀនពីថ្ងៃ ២០ ឧសភា។ រូបថត ក្រសួងអប់រំ
លោក ណារ៉ុន បានថ្លែងថា លោកលើកទឹកចិត្ដឲ្យមានការបង្កើតគណៈកម្មការមួយដែលហៅថា គណៈកម្មការកែលម្អសាលារៀនដែលមានមាតាបិតា និងអាជ្ញាធរមូលដ្ឋានចូលរួម ដើម្បីអាចចូលរួមកែលម្អនៅកន្លែងដែលសាលារៀនខ្វះខាត និងមានតម្រូវការ។ លោករដ្ឋមន្ដ្រីបានថ្លែងទៀតថា តាមការសិក្សាស្រាវជ្រាវ ដើម្បីឲ្យកុមារអាចមានសុខភាពមាំមួន មានបញ្ញាវាងវៃ និងអាចរៀនចប់ទៅតាមគោលដៅការអភិវឌ្ឍប្រកបដោយចីរភាព (SDGs) គឺត្រូវផ្ដោតទៅលើមូលដ្ឋានគ្រឹះកុមារតូច ពិសេសនៅដំណាក់កាល ១ ពាន់ថ្ងៃដំបូងនៃការចាប់កំណើតរបស់កុមារ។
លោកបន្តថា៖ «ក្នុងរយៈពេល ១ ពាន់ថ្ងៃដំបូងនេះ គឺខួរក្បាលរបស់កុមារ មានការវិវឌ្ឍ ៧០ ភាគរយមានន័យថាក្នុងរយៈពេលនេះ ប្រសិនបើកុមារគ្មានអាហារូបត្ថម្ភគ្រប់គ្រាន់ ឬកុមារនោះឧស្សាហ៍ឈឺ និងមិនធ្វើឲ្យកុមារមានរាងកាយ និងខួរក្បាលលូតលាស់ល្អ សម្រាប់ការសិក្សាទៅថ្ងៃមុខនោះទេ»។
បើតាមលោករដ្ឋមន្ដ្រីដំណាក់កាលដំបូងពី ០-៣ ឆ្នាំនេះគឺជាដំណាក់កាលមួយនៃការបង្ហាត់ក្មេងឲ្យមានទម្លាប់ល្អ។ ដូច្នេះនៅក្នុងដំណាក់កាលនេះ គេតែងតែនាំកូនទៅបណ្ណាល័យបណ្ណាគារ ដើម្បីឲ្យកុមារបង្កើតនូវបំណង និងចំណង់ចំណូលចិត្ដឲ្យចេះស្រឡាញ់ការអាន ស្រឡាញ់សៀវភៅ។
លោករដ្ឋមន្ដ្រីបញ្ជាក់ថា៖ «មតេ្តយ្យសិក្សាមិនត្រឹមតែជាកន្លែងបង្ហាត់បង្រៀនឲ្យកុមារចេះរៀនត្រឹមអក្សរទេ ប៉ុន្ដែគឺជាកន្លែងបង្ហាត់ឲ្យក្មេងមានបំណិន។ បំណិនចែកចេញជា ២ គឺបំណិនប្រាជ្ញា ជាការបណ្ដុះបណ្ដាលឲ្យកុមាររៀនសូត្រចេះដឹង និងបំណិនមិនមែនប្រាជ្ញាគឺជាបំណិនធ្វើឲ្យកុមារមានអាកប្បកិរិយាល្អ ទម្លាប់ល្អ ចេះគ្រប់គ្រងខ្លួនឯង ដើម្បីក្លាយទៅជាអ្នករៀនឯករាជ្យ»។ មានន័យថា ក្មេងនោះចេះដោះស្បែកជើងខ្លួនឯង ចេះស្លៀកសម្លៀកបំពាក់ដោយខ្លួនឯង និងពេលទៅដល់សាលារៀន ដឹងពីកន្លែងទុកដាក់សម្ភាររបស់ខ្លួន និងអាចរៀនសូត្របានដោយខ្លួនឯង។
បើតាមលោករដ្ឋមន្ត្រីតាមការស្រាវជ្រាវបង្ហាញថា សិស្សដែលបានចូលរៀនមត្តេយ្យសិក្សា គឺគាត់នឹងរៀនចប់បឋម មធ្យម និងឈានទៅរៀនចប់ឧត្ដមសិក្សាថែមទៀត។ មាតាបិតា ត្រូវយកចិត្ដទុកដាក់ ថែទាំកូននៅក្មេង ការពារកុំឲ្យកូនឈឺ ព្រោះបើឈឺច្រើន ធ្វើឲ្យប្រាជ្ញាកុមារធ្លាក់ចុះធ្វើឲ្យខួរក្បាលមិនបានវិវឌ្ឍល្អហើយមានការលំបាកក្នុងការសិក្សាទៅថ្ងៃមុខ។
លោកស្រី សុទ្ធ សាកាន អ្នកឯកទេសផ្នែកគាំពារ និងអភិវឌ្ឍកុមារតូចនៃអង្គការភ្លែនអន្តរជាតិកម្ពុជាថ្លែងថា ដំណាក់កាលនៃការអភិវឌ្ឍកុមារតូចនេះ គឺជាដំណាក់កាលសំខាន់ជាងគេក្នុងការអភិវឌ្ឍរាងកាយ និងប្រាជ្ញាស្មារតីរបស់កុមារឲ្យមានភាពរឹងមាំ និងឆ្លាតវាងវៃទៅថ្ងៃមុខ។
លោកស្រីបានថ្លែងថា៖ «ដំណាក់កាលក្នុងការអភិវឌ្ឍខួរក្បាលរបស់កុមារលឿនបំផុតគឺចាប់ពីអាយុពី ០-៥ ឆ្នាំ ប៉ុន្ដែក្នុងពេលនេះគឺក្នុងអំឡុងពេលចាប់ពី ០-២ ឆ្នាំគឺមានការអភិវឌ្ឍលឿនជាងគេពី ៨០-៩០ ភាគរយសម្រាប់ការលូតលាស់ខួរក្បាលកុមារ។ ក្នុងដំណាក់កាលពី ០-២ ឆ្នាំនេះបើមាតាបិតាផ្តល់ឲ្យកុមារមានអាហារូបត្ថម្ភគ្រប់គ្រាន់នឹងធ្វើឲ្យកុមារមានមូលដ្ឋានគ្រឹះសម្រាប់ការសិក្សាទៅថ្ងៃមុខថែមទៀត»៕
វីដេអូ៖
