ភ្នំពេញៈ លោក ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡាអះអាងថា កម្ពុជាបានដើរលឿន ១០ ឆ្នាំទៅមុខនៅក្នុងការអនុវត្ដការអប់រំឌីជីថលក្នុងវិស័យអប់រំ ដោយបានប្រែក្លាយវិបត្ដិកូវីដ១៩ ទៅជាកាលានុវត្ដភាពបង្កើតការអប់រំឌីជីថល ដើម្បីរក្សាគុណភាព សមធម៌ បរិយាប័ន្ន និងការអប់រំពេញ ១ ជីវិតជូនដល់សិស្សានុសិស្ស។
លោក ហង់ជួន ណារ៉ុន ថ្លែងបែបនេះតាមរយៈសេចក្ដីប្រកាសព័ត៌មានចំនួន ២ គឺការដាក់ឱ្យដំណើរការកម្មវិធី ទូរស័ព្ទអ៊ែប (App) «ការអប់រំពីចម្ងាយ» ក្រោមកិច្ចសហការរវាងក្រសួងអប់រំ និងក្រសួងប្រៃសណីយ៍ និងទូរគមនាគមន៍ និងសេចក្ដីប្រកាសអំពីកម្មវិធី «Cellcard Free Data Distance Education Program» កាលពីថ្ងៃទី ១៥-១៦ ខែកក្កដា។
លោករដ្ឋមន្ដ្រីថ្លែងថា៖ «យើងបានដើរលឿន ១០ ឆ្នាំទៅមុខនៅក្នុងការអនុវត្ដការអប់រំឌីជីថលក្នុងវិស័យអប់រំនៅកម្ពុជា»។
លោកបន្ដថា ការអប់រំឌីជីថលក្នុងបរិបទឧស្សាហកម្ម ៤.០ មានសារៈសំខាន់សម្រាប់កម្ពុជាក្នុងការបោះជំហានឱ្យក្លាយជាប្រទេសដែលមានសេដ្ឋកិច្ចឌីជីថល និងរដ្ឋាភិបាលឌីជីថល ព្រោះផ្នែកទាំងអស់នេះត្រូវការអ្នកជំនាញជាច្រើនដើម្បីបំពេញការងារ និងគ្រប់គ្រងប្រព័ន្ធឆ្លាតវៃទាំងអស់នោះ។
លោកបន្ថែមថា៖ «ដើម្បីឱ្យមានសេដ្ឋកិច្ចបែបឌីជីថលលុះត្រាតែមានការអប់រំបែបឌីជីថល។ កម្ពុជាអាចប្រែក្លាយវិបត្ដិកូវីដ១៩ទៅជាកាលានុវត្ដភាពក្នុងការបង្កើតការអប់រំឌីជីថល ដើម្បីរក្សាគុណភាព សមធម៌ បរិយាប័ន្ន និងការអប់រំពេញ ១ ជីវិតជូនដល់សិស្សានុសិស្ស»។
លោករដ្ឋមន្ដ្រីលើកឡើងថា ក្នុងដំណើរកំណែទម្រង់វិស័យអប់រំស្របតាមចក្ខុវិស័យនេះ ក្រសួងអប់រំបាននិងកំពុងរៀបចំមូលដ្ឋានគ្រឹះសម្រាប់ការអប់រំឌីជីថលដោយឆ្លើយតបជាមួយយុគសម័យបច្ចេកវិទ្យាដោយការធ្វើកំណែទម្រង់ គ្រឹះស្ថានអប់រំ និងកំណែទម្រង់ការបណ្ដុះបណ្ដាលគ្រូដោយធ្វើយ៉ាងណាឱ្យភាគីពាក់ព័ន្ធទាំងអស់មានសមត្ថភាពខ្ពស់ផ្នែកបច្ចេកវិទ្យា មុននឹងចែករំលែកបន្តទៅដល់សិស្សានុសិស្សដែលជាធនធានមនុស្សជំនាន់ថ្មី។
យោងតាមសេចក្ដីប្រកាសព័ត៌មានខាងលើឱ្យដឹងថា កម្មវិធី «Cellcard Free Data Distance Education» ជាកម្មវិធីមួយដែលគាំទ្រដល់កម្មវិធីអប់រំតាមទូរស័ព្ទដៃមានឈ្មោះថា «ការអប់រំពីចម្ងាយ Distance Education»។
កម្មវិធីនេះនឹងផ្ដល់ជូនដល់សិស្សានុសិស្ស បុគ្គលិកអប់រំ និងសាធារណជនទាំងអស់ដែលកំពុងប្រើប្រាស់បណ្ដាញទូរស័ព្ទរបស់ក្រុមហ៊ុន Cellcard អាចប្រើប្រាស់អ៊ីនធឺណិតដោយឥតគិតថ្លៃជារៀងរាល់ថ្ងៃចាប់ពីម៉ោង ៦ ព្រឹកដល់ម៉ោង ១១ ថ្ងៃត្រង់។
សេចក្ដីប្រកាសដដែលឱ្យដឹងថា អ៊ែប «ការអប់រំពីចម្ងាយ Distance Education» នឹងផ្ដល់ជាវីដេអូនៃការបង្រៀនសម្រាប់កម្មវិធីសិក្សារបស់ក្រសួងអប់រំចាប់ពីថ្នាក់ទី ៩ ដល់ថ្នាក់ទី ១២ ដែលជាជំហានសំខាន់មួយក្នុងការផ្ដល់សេវាអប់រំឌីជីថល និងការអប់រំពីចម្ងាយ។
លោក Ian Watson នាយកប្រតិបត្តិនៃក្រុមហ៊ុន Cellcard ថ្លែងថា៖ «កិច្ចការនេះជាកម្មវិធីប្រកបដោយនវានុវត្តន៍មួយនៃក្រុមហ៊ុន Cellcard ក្នុងការចូលរួមចំណែកជាមួយរាជរដ្ឋាភិបាលកម្ពុជាជួយគាំទ្រដល់ការសិក្សារបស់សិស្សានុសិស្សហើយក្នុងនាមក្រុមហ៊ុនសូមជម្រាបថា Cellcard នឹងនៅទីនេះ ដើម្បីជួយដល់ការសិក្សា និងការងារនៅថ្ងៃអនាគត»។
លោក រស់ សុវាចា អ្នកនាំពាក្យក្រសួងអប់រំឱ្យដឹងពីម្សិលមិញថា ក្រសួងអប់រំ បាននិងកំពុងសហការជាមួយគ្រប់ភាគីពាក់ព័ន្ធដើម្បីជំរុញការអប់រំបែបឌីជីថលដល់សិស្សានុសិស្សនៅកម្ពុជា។
លោកថ្លែងថា៖ «ជាក់ស្តែងកិច្ចសហការរវាងក្រសួងអប់រំ និងក្រុមហ៊ុន Cellcard ក្នុងការដាក់ឱ្យប្រើប្រាស់កម្មវិធី «Cellcard Free Data Distance Education» បានចូលរួមលើកកម្ពស់ការរៀន និងបង្រៀនអនឡាញដែលស្របនឹងការឆ្លើយតបទៅនឹងការទប់ស្កាត់ការរីករាលដាលជំងឺកូវីដ១៩។ កិច្ចការនេះជាផ្នែកមួយនៃចក្ខុវិស័យការអប់រំបែបឌីជីថលរបស់ក្រសួងអប់រំដែលបានចងក្រងក្នុងផែនការយុទ្ធសាស្ត្រវិស័យអប់រំឆ្នាំ ២០១៩-២០២៣»។
លោក សុវាចា បញ្ជាក់ថាដោយការសហការជាមួយក្រសួងព័ត៌មានក្រសួងអប់រំបានធ្វើការផ្សព្វផ្សាយការបង្រៀនតាមប៉ុស្តិ៍ទូរទស្សន៍អប់រំថ្មី «ទទក២»។ ក្រសួងអប់រំ បានបង្កើតវេទិកាឌីជីថលចំនួន ៣ សម្រាប់ផ្តល់សេវាសិក្សាពីចម្ងាយតាមរយៈបណ្តាញ Youtube ផ្លូវការរបស់ក្រសួង www.youtube.com/moeys ទំព័រហ្វេសប៊ុកផ្លូវការរបស់ក្រសួង www.facebook.com/moeys.gov.kh, និងមជ្ឈមណ្ឌលសិក្សាអេឡិចត្រូនិករបស់ក្រសួង www.elearning.moeys.gov.khផងដែរ៕