.jpg)
លោក ហង់ ជួនណារ៉ុន រដ្ឋមន្ត្រីក្រសួងអប់រំក្នុងពិធីនៅខេត្តសៀមរាប។ រូបថត សហការី
សៀមរាបៈ រដ្ឋមន្ត្រីក្រសួងអប់រំលោក ហង់ជួន ណារ៉ុន បានថ្លែងប្រាប់យុវជនប្រមាណជាង ៤ ៥០០ នាក់ ថា យុវជនចាំបាច់ត្រូវមានចំណេះជំនាញទន់ និងបំណិនសម្រាប់ដោះស្រាយបញ្ហា និងទំនាក់ទំនងជាមួយសហការីក្នុងអាជីពការងារ។
លោក ហង់ជួន ណារ៉ុន ថ្លែងបែបនេះក្នុងទិវាសហគ្រិនភាពកម្ពុជាកាលពីថ្ងៃសៅរ៍ដែលរៀបចំឡើង ដើម្បីបង្កើនការយល់ដឹងពីសារៈសំខាន់នៃសហគ្រិនភាព និងជំរុញឱ្យមានការចូលរួមផ្លាស់ប្តូរគំនិត យោបល់ បទពិសោធ និងការច្នៃប្រឌិតក្នុងចំណោមយុវជន។
លោកថ្លែងថា៖ «អ៊ីចឹងបើយើងធ្វើការតែឯង អត់ចេះសហការ អត់ចេះដោះស្រាយបញ្ហា អត់ចេះនិយាយ អត់ចេះធ្វើបទបង្ហាញថា តើគេឱ្យធ្វើការអត់? អត់ទេ»។ លោកបន្តថា ការធ្វើការងារស្ម័គ្រចិត្តមានសារៈសំខាន់សម្រាប់យុវជនមិនត្រឹមតែជួយដល់សហគមន៍ និងរដ្ឋាភិបាលក្នុងការរៀបចំពិធីផ្សេងៗនោះទេតែជួយដល់យុវជនខ្លួនឯងផងដែរ។ ការងារស្ម័គ្រចិត្តនេះ នាំឱ្យយុវជនទទួលបានបទពិសោធសម្រាប់រកការងារធ្វើ ព្រោះយុវជនបានយល់ដឹងពីបញ្ហាផ្សេងៗ។
លោកថ្លែងថា៖ «ចំណេះពីសហគ្រិនភាព សំខាន់ណាស់ទី ១ យល់ដឹងអំពីអ្វីទៅអាជីវកម្ម? អ្វីទៅក្រុមហ៊ុន? រៀនមិនមែនត្រឹមតែយកចំណេះទេ។ សួរថា បើសិនយើងមានត្រឹមតែចំណេះ ប៉ុន្តែយើងអត់មានជំនាញ យើងធ្វើការបានអត់? អត់បានទេ»។
លោក រស់ សុវាចា អ្នកនាំពាក្យក្រសួងអប់រំបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា សហគ្រិនភាពអាចពង្រឹងភាពជាអ្នកដឹកនាំរបស់យុវជនឲ្យក្លាយជាពលរដ្ឋសកម្មក្នុងការចូលរួមការអភិវឌ្ឍសង្គម វប្បធម៌ និងសេដ្ឋកិច្ច។ ស្មារតីសហគ្រិនភាពក៏ចូលរួមពង្រឹងទម្លាប់នៃការគិតបែបច្នៃប្រឌិត និងបង្កើតថ្មី ការលើកកម្ពស់ការប្រកបមុខរបរដោយខ្លួនឯង និងលទ្ធភាពទទួលបានសេវាណែនាំអាជីវកម្ម និងការងារ និងព័ត៌មានទីផ្សារការងារ។
លោកថ្លែងថា៖ «យុវជនទទួលបានការបណ្តុះបណ្តាលស្តីពីសហគ្រិនភាពដោយប្រើប្រាស់ឧបករណ៍ការអភិវឌ្ឍសហគ្រាសក្នុងសហគមន៍ ការយល់ដឹងអំពីធុរកិច្ច និងការរៀបផែនការអាជីវកម្មយុវជន»។
លោកឲ្យដឹងថានៅឆ្នាំ ២០១៨ ក្រសួងបានអនុម័តសន្ទស្សន៍ស្តីពីការអភិវឌ្ឍយុវជនកម្ពុជា ដើម្បីជាប្រភពព័ត៌មានសម្រាប់ការអភិវឌ្ឍយុវជន។ ចំនួនយុវជន និងកុមារចូលរួមក្នុងក្រុមប្រឹក្សាយុវជន និងកុមារកម្ពុជានៅតាមគ្រឹះស្ថានសិក្សាសាធារណៈមានការកើនឡើងហើយចំនួនយុវជនដែលទទួលបានការបណ្តុះបណ្តាលជំនាញរយៈពេលខ្លីលើការងារស្ម័គ្រចិត្តភាពជាអ្នកដឹកនាំសហគ្រិនភាព និងកាយរិទ្ធកម្មសម្រេចបានតាមគោលដៅដែលបានកំណត់។
លោកស្រី ស៊ូ សុជាតា មន្ត្រីសម្របសម្រួលគម្រោងរួមគ្នាដើម្បីមុខរបរ និងការងាររបស់យុវជននៅកម្ពុជានៃអង្គការអន្តរជាតិខាងការងារ (ILO) ដែលសហការជាមួយក្រសួងអប់រំបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា ក្រសួងអប់រំបានបណ្តុះបណ្តាលយុវជនពីសហគ្រិនភាពនៅក្រៅសាលារៀនចំនួន ១២ ៥០០ នាក់ ដូចជានៅក្នុងទិវាសហគ្រិនភាព។ ក្រៅពីនេះក្រសួងបានបណ្តុះបណ្តាលយុវជនចំនួន ៦២៥ នាក់ដែលធ្វើឡើងនៅក្នុងសាលារៀន។
លោកស្រីថ្លែងថា៖ «អ៊ីចឹងដូចទិវាយើងធ្វើម្សិលមិញ (២១ កញ្ញា) ហ្នឹង គឺជាទិវាដែលយើងធ្វើ ២៥ ខេត្តក្រុងក្នុងថ្ងៃតែ ១។ ក្រៅពីនេះក្រសួងមានកម្មវិធីបណ្តុះបណ្តាលតូចៗទៀតនៅតាមខេត្តមួយៗទៀតជាប្រចាំ»។
លោកស្រី សុជាតា ថ្លែងបន្តថា ការបណ្តុះបណ្តាលពីសហគ្រិនភាពគឺចង់ឱ្យយុវជនស្គាល់ខ្លួនឯងថា តើមានលក្ខណសម្បត្តិគ្រប់គ្រាន់ជាសហគ្រិនហើយឬនៅ? នៅពេលដែលពួកគាត់បានស្គាល់ខ្លួនឯងហើយ ពួកគាត់នឹងធ្វើការសម្រេចចិត្តថា តើការធ្វើជាសហគ្រិន ឬការធ្វើការឱ្យគេ មួយណាជាមាគ៌ាដ៏សមស្របសម្រាប់មុខរបរ និងការងារនៅថ្ងៃអនាគតរបស់ពួកគាត់ នៅពេលដែលពួកគាត់ចង់ប្រឡូកចូលក្នុងការស្វែងរកប្រាក់ចំណូល៕
