ភ្នំពេញៈ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន បានលើកឡើងថាការសិក្សាតាមរយៈការស្រាវជ្រាវ ដោយផ្អែកលើការវិភាគលើបញ្ហាគឺជាការសិក្សាមួយដែលអាចជួយឱ្យសិស្សចេះនឹកឃើញនិងកែច្នៃបានគំនិតថ្មីៗដោយលោកអះអាងថា ជាការប្រសើរជាងទន្ទេញចាំមាត់តាមបែបចាស់បុរាណដែលមិនអាចឱ្យរីកចម្រើនទៅថ្ងៃមុខបានឡើយ។
លោក ហង់ ជួនណារ៉ុន បានលើកជាឧទាហរណ៍ថា កាលពីដើម អ្នកមានគំនិតស្រាវជ្រាវដំបូងដោយចង់ច្នៃទូរស័ព្ទធម្មតាឱ្យក្លាយទៅជាទូរស័ព្ទស្មាតហ្វូនដើម្បីឱ្យខលអាចមើលមុខគ្នាដូចពេលនេះ គឺត្រូវបានគេចាត់ទុកថា គ្រាន់តែជាការស្រមើស្រមៃប៉ុណ្ណោះ ប៉ុន្តែច្រើនឆ្នាំក្រោយមកនេះគំនិតនេះក៏ត្រូវបានគេទទួលស្គាល់ថា ជាការពិតទៅវិញបន្ទាប់ពីមនុស្សអាចធ្វើឱ្យបច្ចេកវិទ្យាមានការវិវឌ្ឍកាន់តែជឿនលឿនដូចបច្ចុប្បន្ន។
លោកថា៖ «កាលពីពេលមុន អាគំនិតថា យកកុំព្យូទ័រអាប៉ុនណាណីមកបង្រួមឱ្យបានប៉ុណ្ណឹង គឺជាគំនិតស្រមើស្រមៃទេ ប៉ុន្តែ ១០ ឆ្នាំក្រោយគំនិតហ្នឹងគឺត្រឹមត្រូវ។ដូច្នោះគេបង្រៀនមនុស្សឱ្យចេះវិភាគជាជាងទន្ទេញចាំមាត់»។
ផ្ទុយទៅវិញ លោកថា ការសិក្សាទន្ទេញឱ្យចាំតាមអ្វីដែលគ្រាន់តែមានក្នុងសៀវភៅដដែលៗគឺអាចបង្កឱ្យមានហានិភ័យទៅវិញនៅពេលអនាគត ដោយលោកអះអាងថា មេរៀនក្នុងសៀវភៅខ្លះ គឺមិនអាចត្រឹមត្រូវទាំងអស់ឡើយ ហើយគ្រូក៏មិនអាចវាយតម្លៃគំនិតណាខុស គំនិតណាត្រូវបានដែរ ដូច្នោះគឺទាមទារកែលម្អកម្មវិធីសិក្សាដើម្បីឱ្យសិស្សចេះទាំងខ្លឹមសារមេរៀន បំណិន និងគំនិត។
ការលើកឡើងរបស់លោក ហង់ ជួនណារ៉ុន នេះធ្វើឡើងនៅក្នុងសិក្ខាសាលាស្ដីពីការវិវឌ្ឍវិស័យអប់រំក្នុងបរិបទឌីជីថលក្នុងក្របខ័ណ្ឌសកល និងកម្ពុជា នៅវិមានរដ្ឋសភាកាលពីថ្ងៃចន្ទដែលសិក្ខាសាលានេះ បានបំណងផ្ដល់វេទិកាពិគ្រោះយោបល់ និងចែករំលែកនូវបទពិសោធ ចំណេះដឹងទស្សនទាន ចំពោះការអភិវឌ្ឍវិស័យអប់រំនៅកម្ពុជា និងចក្ខុវិស័យទៅអនាគតសម្រាប់កម្ពុជាត្រៀមខ្លួនទទួលដំណើរមកដល់នៃយុគសម័យឌីជីថល។
បើតាមលោក ហង់ ជួនណារ៉ុន ការអប់រំតាមបែបឌីជីថលគឺជាការរៀនទទួលចំណេះដឹង តាមរយៈដូចជាហ្វេសប៊ុក និង យូធូប ជាដើម។
លោក ងួន ញ៉ិល អនុប្រធានទី១ រដ្ឋសភាបានថ្លែងតាមរយៈសុន្ទរកថាថា នៅក្នុងនីតិកាលទី៦ រដ្ឋាភិបាលបានផ្ដោតសំខាន់លើការបន្តលើកកម្ពស់សមត្ថភាព ការគ្រប់គ្រងសាលា ការបន្តលើកកម្ពស់គុណវុឌ្ឍិគ្រូបង្រៀន សមត្ថភាពបង្រៀនការបន្ថែមគ្រូបង្រៀនដែលមានសមត្ថភាពខ្ពស់ទៅតំបន់ខ្វះគ្រូបង្រៀន បន្តការវិនិយោគលើសម្ភារសិក្សាពិសោធន៍ និងការបង្កើនបរិក្ខារបង្រៀន បន្តសាងសង់សាលារៀនឱ្យបានគ្រប់គ្រាន់នៅតាមតំបន់ដាច់ស្រយាលបន្តផ្ដល់មធ្យោបាយទ្រទ្រង់ចាំបាច់នានាដល់សិស្សក្រីក្រសិស្សស្ថិតនៅតំបន់ជួបការលំបាក និងសិស្សមានពិការភាពព្រមទាំងបង្កើនគុណភាពអភិបាលកិច្ចសាលារៀន និងការពង្រឹងគុណភាពអប់រំនៅគ្រប់កម្រិត។
លោកថា៖ «ព្រឹត្តិការណ៍ថ្ងៃនេះ ជាសក្ខីភាពបញ្ជាក់ពីការឈានទៅមុខបន្តទៀតនៃកិច្ចសហការក្នុងការលើកកម្ពស់វិស័យអប់រំនៅកម្ពុជា ជាមួយនឹងជំនឿយ៉ាងមុតមាំលើការអនុវត្តការងាររបស់រាជរដ្ឋាភិបាល ដែលមានក្រសួងអប់រំ យុវជន និងកីឡា ជាសេនាធិការក្នុងការអនុវត្តផែនការយុទ្ធសាស្ដ្រវិស័យអប់រំ»៕